Read Rampi Lukas 12 Bible Online

Lukas 12 - Rampi bible

Lukas 12

¹Mosabu-sabuna toaꞌ to humei mangkodokoꞌi pangkiꞌ hi Yesu, momebihiꞌ-bihiꞌmohi alana momedihaꞌ-dihaꞌmohi. I tempo tiꞌo, hi Yesu mampatiꞌikihi topeguruNa, “Majaga-jagakei i ragiꞌra toParisi. Iomo kohantoniꞌra toParisi, alaꞌ moromiꞌhi i huwali angkana kodake lalire.

²Lekiꞌna to tetutuꞌi hingkiꞌ mombaha, hei lekiꞌ-lekiꞌna to tewuni hingkiꞌ tongawa.

³Mewaliꞌ, hapo to ipololitakei i winina bateꞌna hingkiꞌ nibahaꞌ i andona. Hei hapo to iwowaraꞌkikei pe awami i lali tambimi to tewiti, bateꞌna hingkiꞌ tekareba i lali bolaꞌ.”

⁴“Halali-halalingKu, ipehoromuamokei moromiꞌ lolitangKa, inioꞌkei mangkorokaꞌ toaꞌ to dokoꞌhi morokoꞌkei, alaꞌ hawaꞌi uwaꞌ kuasaꞌre mohukukei wute nantolou-louna.

⁵Kutidoꞌkikei hihimo to hangangaa ikotehuꞌkei. Motehuꞌkei pe Pueꞌ Ala! Alaꞌ ane uko merorokoꞌ Io makuasaꞌ woꞌo mampelubaꞌki pe lali naraka! Mepoꞌohikei! Iolu to hangagaa nikotehuꞌo.

⁶Limo mbaꞌana deno wadi nipobaluꞌ rompepaꞌlu doiꞌ see. Angkana kehapoꞌi hatoꞌo, hawaꞌi uwaꞌ hambaꞌa to hawaꞌi norewahi Pueꞌ Ala.

⁷Hapona tene ingkei, hingkoweꞌ woꞌo wilolumi, nobahaꞌ Pueꞌ Ala koworiꞌne. Mewaliꞌ inioꞌkei motehuꞌ. Meliu tene perewahine Pueꞌ Ala pe ingkei ka porewahiNa i deno to woriꞌ.”

⁸“Pehoromua moromiꞌ lolitangKa! Hihimo to mopangakuꞌ petuntuna i Aku anaꞌ Manusiaꞌ i hinarona toaꞌ, io woꞌo hingkiꞌ Kupangakuꞌ i hinarona malaꞌekana Pueꞌ Ala.

⁹Angkana hihimo to mosapuakaꞌA i hinarona toaꞌ, io woꞌo hingkiꞌ Kusapuaka i hinarona malaꞌekana Pueꞌ Ala.

¹⁰Himo to mampononaꞌa Anaꞌ Manusiaꞌ, hohumbolu tene teꞌampuni dosane. Angkana hihimo to mosapuaka Inohaꞌ Mangkolehi, hawaꞌi niꞌampuni dosane.

¹¹Ane nikomikei pe tadulako agama ba i topoparenta bolaꞌ nokomi petuntumi i Aku, inioꞌkei motehuꞌ hei komomaꞌa noniuꞌ hapo to itiꞌikei.

¹²Alaꞌ i tempo tiꞌo, Inohaꞌ Mangkolehi hingkiꞌ mampaꞌanikei hapo to hangangaa itiꞌikei.”

¹³Uwaꞌ haduo toaꞌ ka lumbura toaꞌ to woriꞌ to humei pe hi Yesu notiꞌi, “Guru, Itiꞌiki halalingku hingkeꞌna nopaꞌaniꞌa wokae dolaꞌku ka lumara tomotodingki.”

¹⁴Mehoniꞌ hi Yesu, “Bee, himo to mohiniꞌA mewali to mampeꞌilumbuikei to mampodolaꞌkikei lumana tomotodimi?”

¹⁵Uko tiꞌo, notiꞌi hi Yesu pe toaꞌ to woriꞌ, “Majaga-jagakei hei moromiꞌ-romiꞌkei, inioꞌkei pangkulabo morampu luma duniaꞌ. Alaꞌ kehapoꞌi woriꞌ lumami, handoꞌio tiꞌo to mampoꞌuwaꞌ kotuwuꞌ to wolaꞌ.”

¹⁶Iomo hinaꞌ nopowute hi Yesu lolita pandiriꞌ hieꞌe Notiꞌi, “Uwaꞌ haduo tosugiꞌ, uwaꞌ woiꞌne hei huꞌa-huꞌana mewali mpololeke.

¹⁷Notiꞌi laline tosugiꞌ tiꞌo, Hapo woꞌo tene to kupomasusa? Himaꞌmo ganaꞌ buhoꞌka kupamporiahi kinangku.’

¹⁸Koꞌukoana nohua akala notiꞌi, ‘Agina buhoꞌ to kokiuꞌ hieꞌe kuwolihi, hei kuꞌaro to kodeꞌ, hingkeꞌna itoꞌo kuporiaꞌi lekiꞌ-lekiꞌne kinangku hante lumangku to ntaniꞌna.

¹⁹Uko tiꞌo, himaꞌmoꞌa paralu majama, alaꞌ woriꞌ pamporiangku, ganaꞌmo kupakeꞌ haꞌumbora ntoꞌana. Aku hingkiꞌ mangka hante maꞌinuluꞌa i lali komotanaꞌ-tanaꞌa!’

²⁰Angkana notiꞌi Pueꞌ Ala, ‘Ee tobebe! Wini hieꞌe, inohaꞌmu hingkiꞌ niroamo. Mewaliꞌ, lekiꞌ-lekiꞌna to irampu tiꞌo, himomo intu tumpune?’ ”

²¹Koꞌukona mampowute pandiriꞌ tiꞌo, notiꞌi hi Yesu, “Hatoꞌomo komarugiꞌre toaꞌ to mangkodokoꞌi morampu luma duniaꞌ pe io hadoduona, alaꞌ merima-rima tuwuꞌre i hinarona Pueꞌ Ala.”

²²Notiꞌi hi Yesu pe topeguruNa, “Iomo hinaꞌ kutiꞌikikei, inioꞌ tepe lalimi noniuꞌ i kotuwuꞌmi, hapo to hingkiꞌ iꞌokakei hei to i inukei. Inioꞌ woꞌo tepe lalimi noniuꞌ i peparewami.

²³Alaꞌ kotuwuꞌmi meliu ka pangka, hei wotami meliu ka parewa.

²⁴Iꞌelekei tinti kokao. Hawaꞌhi mehuꞌa, hawaꞌhi mekina, hawaꞌi uwaꞌ buhoꞌre. Kehapoꞌi hatoꞌo, Pueꞌ Ala bateꞌna mampopopangkahi. Hapo tene ingkei! I pampeꞌelena Pueꞌ Ala, meliu tene kotuwuꞌmi ka kotuwuꞌra tinti.

²⁵Hapomo podumbuꞌane woriꞌ ipotepekei? Kehapoꞌi tepe lalimi mampekiri kotuwuꞌmi, angkana hawaꞌkei hohumbo motambai tinuwuꞌmi kehapoꞌi hangkiuꞌlu.

²⁶Mewaliꞌ, ane hawaꞌi nibiaꞌ mowali to monangkoꞌ, mahamporeꞌi hinaꞌ tepekei i ntaniꞌna?

²⁷Elekei bunga i popada. Hawaꞌhi majama, hawaꞌhi marau. Angkana kutiꞌikikei, ngkoweꞌ woꞌo datu Salomo tosugiꞌ mpololeke, baduꞌna hawaꞌi hibali komarangane hante bunga tiꞌo.

²⁸Mewaliꞌ, ane Pueꞌ Ala mampomaranga kora i popada to uwaꞌ i ando hieꞌe hei nihunu poꞌonina, hapo tene ingkei! Meliu tene perewahine Pueꞌ Ala i ingkei. Mewaliꞌ, mahamporeꞌi hinaꞌ hawaꞌi ipohinarukei perewahiNe?

²⁹Hatoꞌo woꞌo inioꞌ tepe lalimi hei itiꞌikei, ‘Hapomo to hingkiꞌ toꞌoka hei toꞌinu?’

³⁰Lekiꞌ-lekiꞌna tiꞌo nopaliꞌ toaꞌ to hawaꞌi pobahaꞌ Pueꞌ Ala. Angkana ingkei, inioꞌkei hatoꞌo, alaꞌ lekiꞌ-lekiꞌna to iparaluꞌikei, nobahaꞌmo Umoꞌmi i suruga.

³¹Mewaliꞌ, to hangangaa ipohimpodulukei iomo Pueꞌ Ala moparenta i lali kotuwuꞌmi, hei lekiꞌ-lekiꞌna to iparaluikei bateꞌna hingkiꞌ Nopaꞌanikikei.”

³²“Ingkei to metuntu i Aku, inioꞌkei motehuꞌ kehapoꞌi hawaꞌkei woriꞌ. Alaꞌ kopopuhiꞌna lalina Umoꞌmi i suruga, iomo hinaꞌ Io moꞌuwiꞌkei, hingkeꞌna pahuakei kotuwuꞌ to wolaꞌ i lali poparentaNa.

³³Iomo hinaꞌ Kutiꞌi, nipobaluꞌmo lumamio, hei hilina ipaꞌanikihi toaꞌ to merima-rima tuwuꞌna. Alaꞌ ane iwalikei watoꞌo iporiakei lumami i lali hepuꞌ to hawaꞌi hingkiꞌ mohepaꞌ, iomo i suruga. Lumami tiꞌo hawaꞌi hingkiꞌ moholi, alaꞌ hawaꞌi hohumbo ninako hei hawaꞌi hohumbo noꞌoka bubuꞌ.

³⁴Iporiamo lumami i lali suruga, alaꞌ i imbo koꞌuwaꞌana lumami, itoꞌo nturusi pekirimio.”

³⁵“Halali-halali, hinamo timomokei mebaduꞌ hei huluꞌmi nipomakiꞌ,

³⁶hibali haduo hawiꞌ to timomo mampekau tuana mahuliꞌ ka pepahamokoa. Ane tuana tiꞌo mahuliꞌ hei mangkadoꞌ wambaꞌ, io hingkiꞌ moweaꞌ wambaꞌ.

³⁷Morasiꞌhi hawiꞌ to matimomo mampekau kohupaꞌna tuara. Alaꞌ tuara tiꞌo hingkiꞌ moroa kumba nopewiwiꞌki i henaꞌna, nopopahurahi, hei nopopopangkahi.

³⁸Morasiꞌ mpololeke hawiꞌ to mampekau hei timomo nokohupaꞌi tuana, kehapoꞌi halumbu wini ba dodungku ando.

³⁹Hangangaa ipoꞌilalikei pandiriꞌ hieꞌe, ane kenobahaꞌi umbiꞌ tumpu tambi hiwaꞌimbo kohupaꞌne topanako, bateꞌna majaga-jaga, hawaꞌi nopotedehi mekahi pe lali tambina.

⁴⁰Iomo hinaꞌ hangangaa majaga-jagakei, alaꞌ hawaꞌkei ibahaꞌ hiwaꞌimbo kohupaꞌne Anaꞌ Manusiaꞌ.”

⁴¹Meꞌitano hi Peturuꞌ pe hi Yesu, “Pueꞌ, hihimo to Itungkai i lali pandiriꞌ tiꞌo, ba ingkalu ba lekiꞌ-lekiꞌna woꞌo toaꞌ?”

⁴²Mehoniꞌ hi Yesu, “Ipoꞌilalikei pandiriꞌ hieꞌe: hihimo i lumbumi to hibali hawiꞌ hieꞌe? Io mononto laline hei nopoꞌohi tuana, hei nohini tuana motadulakoi hawiꞌ ntaniꞌna hei moꞌatoroꞌ pangkara ando-ando.

⁴³Morasiꞌ mpololeke kotuwuꞌna hawiꞌ tiꞌo, ane mahuliꞌmoꞌi uweꞌne, nohua kolentuꞌana mampopatengkaꞌ jamana.

⁴⁴Hawiꞌ tiꞌo bateꞌna hingkiꞌ nohini tuana morewahi lekiꞌ-lekiꞌna lumana.

⁴⁵Angkana ane hawaꞌi moromiꞌ hawiꞌ tiꞌo, hingkiꞌ notiꞌi i lalina, ‘Tuaku hawaꞌi hingkiꞌ hantouꞌ mahuliꞌ.’ Iomo hinaꞌ io hawaꞌi mampopatengkaꞌ jamana. Mepongkamo mampadeahi hawiꞌne moromiꞌ towoweꞌe moromiꞌ tomaꞌani. Io mangka hante maꞌinu woꞌo wute nolanu.

⁴⁶Angkana, hawaꞌi nobahaꞌ kohingkiꞌ hupaꞌne tumpuna i ando hei i jaa to hawaꞌi nopohinaru. Hawiꞌ tiꞌo hingkiꞌ nopadea tuana wute mahi hei nopohibali hante toaꞌ to hawaꞌi tungkuꞌ pe Pueꞌ Ala.

⁴⁷Haduo hawiꞌ to pobahaꞌ peleihana uweꞌna, angkana hawaꞌi majaga-jaga hei hawaꞌi nowali peleihana uweꞌna, hawiꞌ tiꞌo mantorimo pekokondo to monono.

⁴⁸Angkana ane uwaꞌ haduo hawiꞌ to hawaꞌi mpuꞌu pobahaꞌ peleihana uweꞌna hei mowali salaꞌ, monangkoꞌlu konipadeane. Alaꞌ hihimo to nipaꞌani woriꞌ, woriꞌ woꞌo to hingkiꞌ niperapiꞌ ka io. Hei ane woriꞌ to nipoꞌohiki i haduo toaꞌ, woriꞌ woꞌo to hingkiꞌ nipaliꞌ ka io.”

⁴⁹“Aku humeiꞌA mangkomi api i duniaꞌ. Moromiꞌ mpuꞌu ane api tiꞌo makiꞌmo.

⁵⁰Angkana uwaꞌ tene komaporiꞌ to hangangaa morumpaꞌA. Hingkiꞌ masusa lalingKa wute tempona mewali.

⁵¹Inioꞌ ipekirikei kohumeingKa hieꞌe hingkiꞌ mampohaꞌanu toaꞌ. Hawaꞌi! KohumeingKu hieꞌe mangkomi posisalaꞌ i lumbuna toaꞌ.

⁵²Mepongka hinewowoꞌena, toaꞌ hantambi hingkiꞌ mosisalaꞌhi. Pandiriꞌna, ane uwaꞌ limo i lali hantambi, hingkiꞌ mosisalaꞌhi alaꞌ tolu metuntu pe Aku, hei roduo hawaꞌi.

⁵³Umoꞌ hingkiꞌ moꞌewa anaꞌna tomaꞌani, hei anaꞌna tomaꞌani hingkiꞌ moꞌewa umoꞌna. Inoꞌ hingkiꞌ moꞌewa anaꞌna towoweꞌe, hei anaꞌna towoweꞌe hingkiꞌ moꞌewa inoꞌna. Poniana hingkiꞌ moꞌewa moniana, hei moniana hingkiꞌ moꞌewa ponianana.”

⁵⁴Notiꞌi womo hi Yesu pe toaꞌ to woriꞌ, “Ane iꞌokiꞌkei kini tinaꞌ i kotompuha ando, itiꞌikei hingkiꞌ ura, hei ura mpuꞌu.

⁵⁵Ane meparowoꞌi ka mbuhaꞌu, itiꞌikei hingkiꞌ pokoꞌando, hei bateꞌna mewali hatoꞌo.

⁵⁶Mengkomapandekei mpuꞌu! Ibahaꞌkei mampelao laniꞌ hante woiꞌ, angkana hawaꞌkei ibahaꞌ mampelao hapo to nowali Pueꞌ Ala i tempo hieꞌe.”

⁵⁷“Ingkei hieꞌe, mahamporeꞌi hinaꞌ hawaꞌkei iponiuꞌ hapo to tuꞌu?

⁵⁸Ane rapaꞌna, uwaꞌ haduo toaꞌ to mampehorikiko pe hinarona topebutusi, hangangaa ipodameki toaꞌ tiꞌo i tempomi tene i lumbu lala. Alaꞌ ane hawaꞌkei modame, hingkiꞌ nokomikei mpuꞌu nolou pe topobutusi, hei topobutusi tiꞌo hingkiꞌ mampeweikei pe polisi, hei polisi hingkiꞌ mokahikei i lali petarungkuꞌa.

⁵⁹Hawaꞌkei tepohente ka lali petarungkuꞌa ane handoaꞌi tene lapaꞌ indami ibaiarikei.”