Read Rampi Lukas 13 Bible Online

Lukas 13 - Rampi bible

Lukas 13

¹I tempo tiꞌo, uwaꞌhi toaꞌ to mampowute pe hi Yesu noniuꞌ i haꞌumbora toGalilea to norokoꞌ hi Pilatu kolentuꞌara mampopenomba pinatuwuꞌ pe Pueꞌ Ala.

²Konohorina hi Yesu lolitare, notiꞌi, “Ba ipekirikei toGalilea tiꞌo nirokoꞌ watoꞌo alaꞌ meliu dosare ka toGalilea ntaniꞌna?

³Hawaꞌi! Angkana ane hawaꞌkei mengkatobaꞌ ka dosami, bateꞌna ingkei woꞌo mahi hibali lala ngkomahira.

⁴Hohumbo woꞌo hante hampuluꞌ walu duo to mahi alaꞌ nopihihi tambi to dingkaoꞌ i Siloa to uwaꞌ i Yerusale. Ba ipekirikei komahira tiꞌo mewali hatoꞌo alaꞌ meliuꞌi dosare ka lekiꞌ-lekiꞌna toaꞌ ntaniꞌna i Yerusale?

⁵Hawaꞌi! Angkana ane hawaꞌkei mengkatobaꞌ ka dosami, bateꞌna ingkei woꞌo hingkiꞌ mahi hibali lala ngkomahira.”

⁶Uko tiꞌo, nopololiumo hi Yesu lolitaNe hante pandiriꞌ hieꞌe, Notiꞌi, “Uwaꞌ haduo toaꞌ to mehuꞌa loti ara i kineteꞌna. I hampiha tempo, noloumo tumpu kineteꞌ tiꞌo mampeꞌele ba uwaꞌi wuaꞌne. Angkana hawaꞌi uwaꞌ howeꞌ haꞌanu wuaꞌne.

⁷Iomo hinaꞌ notiꞌi tumpu kineteꞌ tiꞌo pe to morewahi kineteꞌna, ‘Ele, i lali tolu ntoꞌa, humeiꞌa moparesaꞌ loti hieꞌe, angkana hawaꞌi uwaꞌ howeꞌ haꞌanu wuaꞌne to kuhua. Agina itowimo loliꞌ! Hapo dumbuꞌne tuwuꞌ iseꞌe, mampoꞌukolu komolompoꞌna woiꞌ.’

⁸Angkana mehoniꞌ to morewahi kineteꞌna, ‘Tua, ipotedehi dulu tuwuꞌ hantoꞌa tene. Hingkiꞌ kubangkali luaꞌne, hei kupamporiahi awu luaꞌne hingkeꞌna nomolompo'.

⁹Wora intu mowuaꞌlu toꞌa to dongkaꞌ. Ane hawaꞌi mowuaꞌ, honiꞌiwae kutowi.’ ”

¹⁰I hampiha tempo, hi Yesu mepoturuꞌ i tambi penombahara toYahudi i ando penombaha.

¹¹Itoꞌo, uwaꞌ haduo towoweꞌe to hampuluꞌ walu ntoꞌana mohakiꞌ, alaꞌ nopekahiꞌi tokodake. Towoweꞌe tiꞌo bungkuꞌmo, hawaꞌi nobiaꞌ metotiꞌi mononto.

¹²Konoꞌokiꞌna hi Yesu towoweꞌe tiꞌo, Nowowoimo notiꞌi, “Inoꞌ, moꞌoriꞌmoko ka hakiꞌmu.”

¹³Uko tiꞌo, Noruntuimo towoweꞌe tiꞌo. Hangkaꞌ-hangkaꞌlu moꞌoriꞌ ka hakiꞌna, metotiꞌimo, hei mampokodeꞌmo Pueꞌ Ala.

¹⁴Angkana uwaꞌ itoꞌo haduo tadulako tambi penombaha to koiꞌ laline pangkiꞌ hi Yesu mampokoꞌoriꞌ toaꞌ i ando penombaha. Iomo hinaꞌ notiꞌi tadulako tiꞌo pe toaꞌ to woriꞌ, “Oni andona, wadiki majama. I ando-ando tiꞌo, wadikei humei mampopekoꞌoriꞌ, anioꞌ i ando penombaha!”

¹⁵Mehoniꞌ hi Yesu, “Ingkei, mampetoromiꞌlukei i howali! I ando penombaha, lekiꞌ-lekiꞌna toaꞌ mampolohoꞌ gapiꞌra hante bukolura ka bontoꞌra hingkeꞌna nikomihi nolou pe howali honiꞌhi nipopaꞌinu.

¹⁶Iseꞌe, uwaꞌ haduo towoweꞌe muleꞌna hi Burahima, hampuluꞌmo walu ntoꞌana nopekahii tokodake. Hawaꞌreꞌi masipatoꞌ ane tokodake tiꞌo Kupopolai i ando penombaha?”

¹⁷Lolitana hi Yesu mampokohilihi poniꞌna, angkana toaꞌ to woriꞌ mampomotanaꞌ lekiꞌ-lekiꞌna to nowali hi Yesu i tempo tiꞌo.

¹⁸Meꞌitanomo hi Yesu notiꞌi, “I tempona Pueꞌ Ala moparenta, hohumbo pewaliane hei hohumbo poꞌoriane? Pewalina waheꞌe,

¹⁹hibali haworia to mororoi mpololeke to noroa haduo toaꞌ hei nohawori i bota kineteꞌna. Haworia tiꞌo tuwuꞌ hei mewali loti to mapongko, hei daꞌana hohumbo nopohorai tinti.”

²⁰Nopowute womo hi Yesu, halangkaꞌ pandiriꞌ notiꞌi,

²¹“Poparentana Pueꞌ Ala hibali ragiꞌ to noroa towoweꞌe, nokalo hante tinampu to woriꞌ. Ragiꞌ tiꞌo, kehapoꞌi hangkiuꞌlu, angkana wadi mampopembiaꞌ lekiꞌ-lekiꞌna tinampu tiꞌo.”

²²I tempona hi Yesu mampololiu pantengkaꞌana pe Yerusale, Io motengkaꞌi woriꞌ kota hei bolaꞌ to nopoliuhi, Io mampoturuꞌ toaꞌ itoꞌo.

²³Uwaꞌ haduo toaꞌ to meꞌitano pe hi Yesu, “Pueꞌ, ba hangkiuꞌlu toaꞌ to hingkiꞌ mantorimo kotuwuꞌ to wolaꞌ tota uwaꞌ koꞌukoana?” Mehoniꞌ hi Yesu,

²⁴“Toaꞌ to mantorimo kotuwuꞌ to wolaꞌ tiꞌo, wadi nipandiriꞌ hibali haduo toaꞌ to mekahi i wambaꞌ to hohopiꞌ. Hangangaa rohohiꞌi mekahi i wambaꞌ to hohopiꞌ tiꞌo kolentuꞌana tene teweaꞌ. Alaꞌ ane temponamoꞌi wambaꞌ tiꞌo nowiti tumpu tambi, woriꞌ toaꞌ to dokoꞌhi mekahi, angkana hamboaꞌmo hohumbo. Mewaliꞌ hingkiꞌ metotiꞌikei i huwali, hei mewowoikei merapiꞌ hingkeꞌna wambaꞌ tiꞌo niweaꞌkikei. Hingkiꞌ itiꞌikei waheꞌe, ‘Tua, weaꞌkika wongkenaꞌ wambaꞌo!’ Io hingkiꞌ mehoniꞌ, ‘Hawaꞌkei Kubahaꞌ!’

²⁶Hingkiꞌ itiꞌikikei, ‘O tumpu tambi, ingka ka mangkamoka hante maꞌinu moꞌawa Ingko! Hei ka mepoturuꞌmoKo i kotangki!’

²⁷Mehoniꞌ tumpu tambi, ‘Hawaꞌkei mpuꞌuli Kubahaꞌ! Molaimokei kaseꞌe, lekiꞌ-lekiꞌmi to mowalia ngkodake!’

²⁸I tempo tiꞌo, hingkiꞌ iꞌokiꞌkei koꞌuweꞌami hampiha, hi Burahima, hi Isaki hante hi Akoꞌ hei lekiꞌ-lekiꞌna nabi. Hingkiꞌ mahurahi motanaꞌ i lali poparentana Pueꞌ Ala. Angkana ingkei hingkiꞌ nitubekei pe huwali. Itoꞌo hingkiꞌ meꞌolakei morii komaporiꞌ.

²⁹Woriꞌ toaꞌ to handoꞌio toYahudi ka humanele duniaꞌ mewali toaꞌna Pueꞌ Ala i lali poparentaNa. Hei hingkiꞌ mahurahi mangka moꞌawa-awa i lali komotanaꞌtanaꞌa i lali poparentana Pueꞌ Ala.

³⁰Hei i tempo tiꞌo hingkiꞌ tongawa mpuꞌu, woriꞌ toaꞌ to nipononaꞌa hingkiꞌ mewali toaꞌ to niꞌadaꞌi hei toaꞌ to niꞌadaꞌi hingkiꞌ mewali toaꞌ to nipononaꞌa.”

³¹I tempo tiꞌo, uwaꞌhi haꞌumbora toParisi to mehupaꞌ pe hi Yesu, mampatiꞌikiꞌi, “MolaimoKo kaseꞌe, hante noloumoKo pe bolaꞌ ntaniꞌna, alaꞌ uwaꞌ tungkaihane datu Herode hingkiꞌ morokoꞌKo.”

³²Notiꞌi hi Yesu pe iohi, “Itiꞌikihi toaꞌ tokodake waliana hei hawaꞌi modumbuꞌ waheꞌe, ando hieꞌe hante poꞌonina kupopatengkaꞌ tene pajamangKa mampopolai lomoa hei mampokoꞌoriꞌ toaꞌ to mohakiꞌ. Angkana ikotolu andona, hingkiꞌ ukomo jamangKa.

³³Angkana kehapoꞌi hatoꞌo, hangangaa bateꞌKu nolou pe Yerusale. Alaꞌ hawaꞌi masipatoꞌ ane haduo nabi nirokoꞌ i huwali kota Yerusale.

³⁴O, toYerusale! Mahamporeꞌi hinaꞌ morokoꞌkei nabi-nabi, hei mowatuikei toaꞌ to norumbaꞌ Pueꞌ Ala pe ingkei? Woriꞌ mpiha Kukodokoꞌi mampoꞌodaꞌkei hibali hinana manuꞌ to moriomouꞌi anaꞌna, angkana hawaꞌAkei itorimo.

³⁵Hingkeꞌ ibahaꞌkei, hamboaꞌmokei hingkiꞌ nopodaꞌ Pueꞌ Ala! Tuꞌu to Kutiꞌikikei, hamboaꞌmoꞌA hingkiꞌ iꞌokiꞌkei, wute hupaꞌ tempona itiꞌikei, ‘Pueꞌ Ala hingkiꞌ mobarakati toaꞌ to hupaꞌ i lali konaꞌNa!’ ”