Read Rampi Lukas 14 Bible Online

Lukas 14 - Rampi bible

Lukas 14

¹I hampiha tempo i ando penombaha, hi Yesu nolou mangka i tambina haduo tadulakora toParisi. Kolentuꞌana i tambi tiꞌo, woriꞌ toaꞌ mampoꞌilali mpololeke pololitaNa alaꞌ mampaliꞌhi konawuꞌaNa.

²I tempo tiꞌo woꞌo, hupaꞌmo haduo toaꞌ to mohakiꞌ kumboꞌ korawene hante kapuꞌna.

³Hi Yesu meꞌitano pe guru agama hante toParisi to uwaꞌ itoꞌo Notiꞌi, “Motuntuni atura agamanta, ba wadiki mampokoꞌoriꞌ to hawaꞌi polido i ando penombaha, ba hawaꞌi?”

⁴Guru-guru agama hante toParisi tiꞌo, hawaꞌhi mehoniꞌ. Katoꞌo hi Yesu mamperama to mohakiꞌ tiꞌo kaliuꞌ moꞌoriꞌ, hei Norumbaꞌ mahuliꞌ.

⁵Uko tiꞌo notiꞌikihi, “Ane rapaꞌna uwaꞌ anaꞌmi ba gapiꞌmi to monawuꞌ i bubu i ando penombaha. Ba ipotedehikei i lali bubu? Ba iꞌoreꞌkei, kehapoꞌi i ando penombaha?”

⁶Angkana hawaꞌi uwaꞌ haduo to nobiaꞌ mohoniꞌ peꞌitanona hi Yesu tiꞌo.

⁷I tambira toParisi tiꞌo, hi Yesu pangkiꞌ haduo tolori to moꞌuwiꞌ pahura to teꞌadaꞌi. Iomo hinaꞌ notiꞌi hi Yesu hante pandiriꞌ hieꞌe,

⁸notiꞌi, “Ane niwowoiko nolou pe posusaꞌa pepohamoko, inioꞌko mahura i pahura to teꞌadaꞌi. Wora intu uwaꞌ toaꞌ ntaniꞌna to niwowoi hante peꞌoꞌuwaꞌna koniꞌadaꞌine ka ingko.

⁹Ane tiꞌo to iwali, tumpu tambi hingkiꞌ humei pe ingko hei notiꞌikiko waheꞌe, ‘Melimbako ka pahura hieꞌe alaꞌ io hingkiꞌ mahura iseꞌe.’ Hingkiꞌ mohiliko melimba nolou mahura i tundu.

¹⁰Mewaliꞌ, ane niwowoiko nolou pe posusaꞌa, agina mahurako dulu i tundu, hingkeꞌna tumpu tambi hingkiꞌ mampatiꞌikiko waheꞌe, ‘Ee, humeiko mahura i pahura to moromiꞌ i hinaro.’ Ane watoꞌoꞌi, hingkiꞌ niꞌadaꞌi i hinarona toaꞌ to woriꞌ.

¹¹Himo to mampokokodeꞌ hingkiꞌ nipoꞌiwowoiꞌ, hante hihimo to mengkoꞌiwowoiꞌ hingkiꞌ nipokodeꞌ.”

¹²Uko tiꞌo, hi Yesu mololita pe toParisi to mowowoiꞌi notiꞌi, “Ane mowowoiko toaꞌ humei i posusaꞌamu, moromiꞌ pohoꞌando ba wini, inioꞌko mowowoi awamu, halalimu, hei tosugiꞌ i lali bolaꞌmu. Alaꞌ iohi, woꞌo bateꞌra hingkiꞌ mowowoiko, hei hapo to iwali tiꞌo hingkiꞌ tepohawa.

¹³Angkana ane mowaliko susaꞌ, hangangaa iwowoi toaꞌ to merima-rima tuwuꞌra, to hawaꞌi masilolonga wotara, tokohu hei tobilo.

¹⁴Ane watoꞌo waliamu, hingkiꞌ nobarakatiko Pueꞌ Ala, alaꞌ hawaꞌi robiaꞌ toaꞌ tiꞌo mohowoni waliamu. Hapo to iwali tiꞌo hingkiꞌ nopohawa Pueꞌ Ala i konipatuwuꞌra huliꞌ lekiꞌ-lekiꞌna toaꞌ to moromiꞌ i pampeꞌelena Pueꞌ Ala.”

¹⁵Kolentuꞌara mangka, uwaꞌ haduo tolori to pahori lolitana hi Yesu hingkonia. Iomo hinaꞌ notiꞌi pe hi Yesu, “Morasiꞌ mpuꞌu toaꞌ to hingkiꞌ mangka hiꞌoꞌalu hante Pueꞌ Ala i lali kodatuaNa.”

¹⁶Angkana notiꞌi hi Yesu pe toaꞌ tiꞌo, “I hampiha tempo uwaꞌ haduo toaꞌ to mowali posusaꞌa ngkodeꞌ, hei woriꞌ toaꞌ nowowoi.

¹⁷Posusaꞌa tiꞌo hingkiꞌ nipemolukamo, iomo hinaꞌ tumpu susaꞌ tiꞌo morumbaꞌmo hawiꞌna nolou ako mampatiꞌikihi toaꞌ to niwowoi humei pe posusaꞌa tiꞌo, notiꞌi, ‘Noloumoki mangka, alaꞌ timomomo lekiꞌ-lekiꞌne.’

¹⁸Angkana lekiꞌ-lekiꞌra to niwowoi, hawaꞌhi mobuhoꞌi pewowoi tiꞌo. Haduo to uluꞌ-uluꞌna niwowoi mantiꞌi, ‘Aku hongkoꞌa mehili woiꞌ, hei hangangaa nolou dulu kuꞌele. Merapiꞌa ampu, alaꞌ hawaꞌa hohumbo nolou.’

¹⁹Uwaꞌ womo haduo to mantiꞌi, ‘Aku hongkoꞌa mehili limo mpasa gapiꞌ, hei hangangaa nolouhi dulu kuhohongkeꞌ kupopopajekoꞌ. Merapiꞌa ampu, alaꞌ hawaꞌa hohumbo nolou!’

²⁰Uwaꞌ womo haduo to mantiꞌi, ‘Hongkoꞌa nipahamoko! Mewaliꞌ, hawaꞌa hohumbo nolou.’

²¹Pahuliꞌnalu hawiꞌne, io mampowute pe tumpuna susaꞌ pehoniꞌra toaꞌ to niwowoi. Makaja mpuꞌu kobukotane tumpu susaꞌ tiꞌo, iomo hinaꞌ notiꞌi pe hawiꞌna, ‘Nolouko hohiꞌ pe lala ngkodeꞌ hei i pohidupaꞌana lala to i bolaꞌ hieꞌe. Iwowoi humei lekiꞌ-lekiꞌna toaꞌ to merima-rima tuwuꞌra, to hawaꞌi masilolonga tuwuꞌra, tobilo, hante tokohu.’ Noloumo mpuꞌu hawiꞌna tiꞌo motuntuni hawaꞌna tumpu susaꞌ.

²²Pahuliꞌna womo, notiꞌi pe tumpuna, ‘Tua, hawaꞌmu kupopatengkaꞌmo, angkana handoaꞌi tene buhaꞌ tambima, uwaꞌ tene pahura.’

²³Iomo hinaꞌ tumpu susaꞌ tiꞌo morumbaꞌi, ‘Nolou womoko pe huwali bolaꞌ hingkeꞌna ipowute posusaꞌa hieꞌe pe imbo-imbolu, moromiꞌ i lala to kodeꞌ moromiꞌ i lala to kokiuꞌ. Hangangaa iparukuhi toaꞌ humei, hingkeꞌna tambingku buhaꞌ.

²⁴Alaꞌ tuꞌu mpuꞌu kutiꞌikikei, hawaꞌi uwaꞌ howeꞌ haduo toaꞌ to Kuwowoi uluꞌ-uluꞌna hingkiꞌ mangka pangka to Kupatimomo!’ ”

²⁵I hampiha tempo, woriꞌ toaꞌ to metuntu pe Yesu. Kolintuꞌara matengkaꞌ nopehahiliꞌihi hi Yesu honiꞌhi notiꞌikihi,

²⁶“Ipehoromuakei, ingkei to mangkodokoꞌi metuntu pe Aku, hihimo to kodeꞌ komarimane pe inoꞌna, umoꞌna, hantambina, anaꞌna, halalina, ba wotana hadoduona ka Aku, io hawaꞌi wadi mewali topegurungKu.

²⁷Ipehoromuakei! Ingkei to mangkodokoꞌi metuntu pe Aku, hihimo to hawaꞌi hiniꞌ mangkowaꞌ loti momehulepe hei metuntu pe Aku, hawaꞌi wadi mewali topegurungKu.

²⁸Ane uwaꞌ haduo ka iliꞌmi to mangkodokoꞌi moꞌaro haꞌanu tambi to dingkaoꞌ, hangangaa nopekokiri dulu popobaiarine poꞌarona tambi tiꞌo, ba ganaꞌi doiꞌne ba hawaꞌi.

²⁹Alaꞌ ane nipopetotiꞌimoꞌi orine, angkana ukomo doiꞌne, hingkiꞌ rokokereꞌi lekiꞌ-lekiꞌna toaꞌ to pangkiꞌ.

³⁰Hingkiꞌ rotiꞌi, ‘Ee! toaꞌ hieꞌe mangkodokoꞌi moꞌaro tambi to kodeꞌ, angkana hawaꞌi ganaꞌ doiꞌne!’

³¹Watoꞌo woꞌo ane uwaꞌ haduo datu to mangkomi surodaduna to hampuluꞌ sabu hingkeꞌna mampomeroaki haduo datu to uwaꞌ rompuluꞌ sabu surodaduna, agina datu tiꞌo mampekokiri dulu, ba nobiaꞌi moꞌewa poniꞌna ba hawaꞌi.

³²Alaꞌ ane nobahaꞌ kohawaꞌna nobiaꞌ moꞌewahi, i tempona moꞌela tene, io morumbaꞌ haꞌumbora surona nolou modame hante poniꞌna.”

³³Nopololiu hi Yesu lolitaNe notiꞌi, “Watoꞌo woꞌo ingkei, agina nipekokiri dulu hapo to hangangaa iwalikei hingkeꞌna mewalikei topetuntuKu. Alaꞌ ane hawaꞌi nilei mampohinte lekiꞌ-lekiꞌna to uwaꞌ i ingkei, hawaꞌkei hohumbo mewali topegurungKu.”

³⁴Nopololiu womo hi Yesu lolitaNe Notiꞌi, “Bure modumbuꞌ mpololeke, angkana ane motobemoꞌi, hohumboreꞌi tene nipomobure huliꞌ?

³⁵Kehapoꞌi woꞌo nipakeꞌ mampomolompoꞌ huꞌa-huꞌa, hawaꞌi modumbuꞌ. Aginamo nitube. Moromiꞌ mpololeke ane ipoꞌilalikei hapo to ihorimokei!”