Read Rampi Lukas 15 Bible Online

Lukas 15 - Rampi bible

Lukas 15

¹I hampiha tempo, woriꞌ toperuruꞌ sima hante toaꞌ ntaniꞌna humei pe hi Yesu alaꞌ dokoꞌhi mampehoromua lolitaNa. Toaꞌ tiꞌohiꞌo nirekeꞌhi toaꞌ to kodake waliara.

²Uwaꞌhi woꞌo toParisi hante guru-guru agama to pangkiꞌhi. Monau-nauhi rotiꞌi, “Io mantorimo toaꞌ to madosa, hei mangkahi moꞌawa!”

³Iomo hinaꞌ hi Yesu mampowute pandiriꞌ hieꞌe,

⁴notiꞌi, “Ane rapaꞌna haduo ka lumbumi uwaꞌ gimbane hanatu mbaꞌana. Ane moholiꞌi hambaꞌa, hapo to noꞌintuꞌo? Bateꞌna hingkiꞌ nopolihi gimbane to hio mpuluꞌ hio mbaꞌa i popada, hei ako mampaliꞌ to hambaꞌa to moholi wute nohua.

⁵Ane nohuamoꞌi huliꞌ, hingkiꞌ motanaꞌ mpuꞌu. Alaꞌ komotanaꞌna, nokowaꞌmo gimbane tiꞌo honiꞌi nokomi huliꞌ nolou pe gimpuna.

⁶Uko tiꞌo, nowowoimo bolene hante awana hampotereana, notiꞌikihi, ‘Motanaꞌki! Alaꞌ gimbangku to moholi kuhuamo huliꞌ.’

⁷Watoꞌo woꞌo i suruga, ane haduo toaꞌ to madosa mengkatobaꞌ ka dosana, makaja konipotanaꞌne i suruga ka toaꞌ to hio mpuluꞌ hio to morekeꞌ waliara moromiꞌmo hei hawaꞌhi paralu mengkatobaꞌ.”

⁸Nopololiu womo hi Yesu lolitaNe hante pandiriꞌ notiꞌi, “Ane uwaꞌ haduo towoweꞌe to mamporia hampuluꞌ pepaꞌna doiꞌ peraꞌ. Ane moholiꞌi hampepaꞌ, hapo to nowali? Io nolou motutu palita honiꞌi mohai tambina tiꞌo. Bateꞌna nopaliꞌ wute nohua.

⁹Konohuanalu, io mowowoimo awana hante awa pototereana, notiꞌi, ‘Humeimoki motanaꞌ! Motanaꞌa mpuꞌu, alaꞌ kuhuamoꞌi huliꞌ doiꞌka to moholi.’

¹⁰Watoꞌo woꞌo komotanaꞌra malaꞌekana Pueꞌ Ala mampotanaꞌ haduo to madosa to mengkatobaꞌ ka dosana.”

¹¹Notiꞌi womo hi Yesu, “Uwaꞌ haduo umoꞌ meroduo anaꞌne, hamoloꞌ tomaꞌani.

¹²Tohinoneeꞌ merapiꞌ pe umoꞌna, ‘Umoꞌ, ipaꞌaniꞌa hinewowoꞌena to mewali dolaꞌku ka lumamu.’ Katoꞌo, umoꞌra modolaꞌ-dolaꞌmo lumana pe anaꞌna to roduo tiꞌo.

¹³Haꞌumbora ando uko tiꞌo, anaꞌna tohinoneeꞌ mampobaluꞌmo dolaꞌna hei nolou pe woiꞌ to moꞌela. Itoꞌo, io mampoꞌukolu ntooꞌ doiꞌna i tota modumbuꞌ.

¹⁴Koꞌukonalu doiꞌne, mehupaꞌmo tempo kobiloraha to makaja i woiꞌ tiꞌo, wute merima-rima tuwuꞌne.

¹⁵Katoꞌo oꞌanaꞌ tiꞌo noloumo meharo i haduo tumpu bolaꞌ hingkeꞌna nopahua pangkana. Tumpu bolaꞌ tiꞌo morumbaꞌ nolou mampoꞌodaꞌ boeꞌna.

¹⁶Alaꞌ biloramoꞌi, dokoꞌmo mangka pangka boeꞌ. Kehapoꞌi biloramo mpololeke angkana hawaꞌi uwaꞌ howeꞌ haduo to mampaꞌaniꞌi mangka.

¹⁷Koꞌukoana, noponindimo umoꞌne, honiꞌi notiꞌi i lalina, ‘Woriꞌ mpololeke toaꞌ to noharoi umoꞌku majama, hante melobi-lobi pangkare, angkana aku hieꞌe, hingkiꞌ mahiꞌa bilora.

¹⁸Mewaliꞌ, hingkiꞌ mahuliꞌa nolou pe umoꞌku, hei hingkiꞌ kutiꞌiki: umoꞌ, masalaꞌmoꞌa pe Pueꞌ Ala hante pe ingko umoꞌ.

¹⁹Hamboaꞌmoꞌa masipatoꞌ mewali anaꞌmu. Agina ipopewalimoꞌa hawiꞌmu.’

²⁰Katoꞌo, mahuliꞌmo nolou pe umoꞌna. Moꞌela tene ka tambina, noꞌokiꞌmo umoꞌna. Nokomi komarimana umoꞌna, mehilaimo nolou ako mampohidupaꞌki, liu nokopui hei noꞌumaꞌ.

²¹Notiꞌi anaꞌne tiꞌo, ‘Umoꞌ, masalaꞌmoꞌa pe Pueꞌ Ala hante pe ingko umoꞌ. Hamboaꞌmoꞌa masipatoꞌ mewali anaꞌmu.’

²²Angkana umoꞌna mowowoi topajamanahi notiꞌikihi, ‘Hohiꞌkei humei! Ikomi humei juba to maranga niponobaduꞌikiꞌi, nihangkokoliꞌi hei nisapatuꞌi.

²³Uko tiꞌo, noloumokei moruiꞌ anaꞌ gapiꞌ to molompoꞌ honiꞌi irereꞌkei. Hingkiꞌ masusaꞌki hei mangkaki i komotanaꞌ-tanaꞌa!

²⁴Alaꞌ anaꞌku hieꞌe kotuꞌuana mahimo, angkana tuwuꞌmo huliꞌ. Moholi hampiha, angkana kuhuamo huliꞌ.’ Katoꞌo mepongkamohi mosusaꞌ hei motanaꞌ-tanaꞌ.

²⁵I tempo tiꞌo, anaꞌna to kokokaꞌ uwaꞌ i kineteꞌ. Pahuliꞌnalu ka kineteꞌ, dodungkumo i tambi, io pahori topotulali hante tomonariꞌ.

²⁶Iomo hinaꞌ nowowoimo haduo topajamane umoꞌna, honiꞌi nopeꞌitanoki ba hapo to kolentuꞌana rowali.

²⁷Mehoniꞌ topajama tiꞌo, ‘Hineꞌmu hupaꞌmo huliꞌ! Umoꞌmu morumbaꞌmo toaꞌ morereꞌ anaꞌ gapiꞌ to molompoꞌ, alaꞌ anaꞌna to moholi nohuamo huliꞌ i lali kosalamaꞌa.’

²⁸Mowahiꞌ mpololeke anaꞌne to kokokaꞌ tiꞌo, hei hawaꞌi hiniꞌ mekahi i lali tambi. Katoꞌo noloumo umoꞌne moroa lalina anaꞌna hingkeꞌna mekahiꞌi pe tambi.

²⁹Angkana notiꞌireꞌi waheꞌe, ‘Motoꞌa-toꞌamoꞌa majama i ingko umoꞌ. Hawaꞌi kahampiha hawaꞌma hawaꞌi kutuntuni. Kehapoꞌi watoꞌo, hapo to ipaꞌanikiꞌa? Hingkoweꞌreꞌi hambaꞌa bekeꞌ, handoaꞌi tene uwaꞌ to ipaꞌanikiꞌa, hingkeꞌna mowaliꞌa susaꞌ moꞌawa-awa hante bolengku.

³⁰Angkana anaꞌmu to nolou motube-tube ntooꞌ lumamu i towoweꞌe to kodake waliana, iporokoꞌki gapiꞌ to molompoꞌ tiꞌo!’

³¹Mehoniꞌ umoꞌne, ‘Anaꞌku, ingko meꞌohaꞌko woꞌo moꞌawa hante aku. Lekiꞌna lumangku, ingkolu woꞌo tumpune.

³²Masipatoꞌki mosusaꞌ mampotanaꞌ hineeꞌmu, alaꞌ mahimoꞌi hampiha, angkana tuwuꞌmo huliꞌ. Moholi hampiha, angkana tohuamo huliꞌ.’ ”