Read Rampi Lukas 17 Bible Online

Lukas 17 - Rampi bible

Lukas 17

¹Uko tiꞌo, notiꞌi hi Yesu pe topeguruNa, “Bateꞌna uwaꞌ toaꞌ to mampokonawuꞌ toaꞌ ntaniꞌ i lali dosa. Angkana horewuꞌ mpuꞌu toaꞌ to mepomonawuꞌ tiꞌo!

²Himo to mampokonawuꞌ haduo toaꞌ to handoaꞌi tene maroho pepoꞌohine alana mowali dosa, aginamo haꞌanu watu to kodeꞌ nihiluꞌ i dokoꞌna hei nipelubaꞌ pe lumbu tahiꞌ.

³Iomo horiana hangangaa majaga-jagakei! Ane halalimu mowali salaꞌ, hangangaa nikamoroki. Hei ane nohohoꞌmoꞌi laline, hangangaa niꞌampuni.

⁴Ane halalimu mowali salaꞌ pe ingko, kehapomo pitu mpihana i lalina haꞌando, hante pitu mpihana woꞌo humei mopangakuꞌ salaꞌna pe ingko, hangangaa iꞌampuni.”

⁵Rotiꞌi topeguruNe, “Pueꞌ, ipokaroho pepoꞌohingki!”

⁶Mehoniꞌ hi Yesu, “Ane uwaꞌmo pepoꞌohimi kehapoꞌi kokiuꞌlu hibali wuaꞌ nunuꞌ, wadi itiꞌikikei loti to kodeꞌ hieꞌe, ‘Mowukomoko kaseꞌe, hei melimbako pe tahiꞌ!’ Loti tiꞌo bateꞌna hingkiꞌ motuntuni hawaꞌmu.”

⁷Nopololiu hi Yesu lolitaNe hante pandiriꞌ hieꞌe notiꞌi, “Uwaꞌ haduo ka lumbumi to uwaꞌ hawiꞌna. Hawiꞌ tiꞌo nolou majama i kineteꞌ ba morewu pinatuwuꞌmu. Ane mahuliꞌi humei ka pajamana, hapo to hingkiꞌ itiꞌikikei? Ba itiꞌikei, ‘humeimoko mangka!’ ”

⁸Mononto hawaꞌi! Angkana hingkiꞌ itiꞌikeireꞌi waheꞌe, “Mempohawako dulu, honiꞌi ipatimomo pangkaka, hei ipekaumo duluna koꞌukongku mangka hante maꞌinu honiꞌko mangka.”

⁹Hawaꞌi paralu itiꞌikei woriꞌ komoromiꞌna i hawiꞌ tiꞌo, kehapoꞌi io motuntunimo hawaꞌna tuana.

¹⁰Watoꞌo woꞌo ingkei. Ane nituntunimoꞌi lekiꞌ-lekiꞌne hawaꞌna Pueꞌ Ala, hangangaa itiꞌikei, “Ingka hieꞌe, hawiꞌ biasaluka. Kituntunilu hapo to hangangaa nohowoꞌikika tuaki.”

¹¹I lali patengkaꞌaNa nolou pe Yerusale, hi Yesu motuntuni parailiꞌ woiꞌra toSamaria hante toGalilea.

¹²KowuteNa i haꞌanu bolaꞌ, hampuluꞌhi toaꞌ to kolentuꞌa mohakiꞌ kakeꞌ ako mampohidupaꞌki hi Yesu. Moꞌela tene, mewowoimohi,

¹³rotiꞌi, “Yesu! Guru! Ipokarimaka wongkenaꞌ!”

¹⁴Katoꞌo, nopenotoꞌmohi hi Yesu honiꞌi notiꞌikihi, “Noloumokei ipetidoꞌkikei wotami pe tadulako mpenomba, hingkeꞌna tongawa komoꞌoriꞌmimo.” Kolentuꞌara matengkaꞌ, moꞌoriꞌmohi.

¹⁵Haduo ka lumbura toaꞌ to hampuluꞌ nobahaꞌ komoꞌoriꞌnamo, katoꞌo mahuliꞌmo nolou pe hi Yesu, hei mantiꞌi pepokodeꞌna, “Tepokodeꞌmo Pueꞌ Ala. Moꞌoriꞌmoꞌa!”

¹⁶Io melingkotuꞌ metoungkaꞌ pe hinarona hi Yesu hante mantiꞌi woriꞌ komoromiꞌna pe Io. Toaꞌ tiꞌo iomo haduo toSamaria.

¹⁷Uko tiꞌo, notiꞌi hi Yesu pe lekiꞌ-lekiꞌna toaꞌ to metuntu pe Io, “Hawaꞌhireꞌi hampuluꞌ duo to Kupokoꞌoriꞌmo? Imbomohi awama to hio duo?

¹⁸Mahamporeꞌi hinaꞌ hadoduomulu to mahuliꞌ mantiꞌi woriꞌ komoromiꞌne Pueꞌ Ala?” Hintaro toaꞌ tiꞌo handoꞌio toYahudi!

¹⁹Katoꞌo notiꞌi womo hi Yesu pe toaꞌ tiꞌo, “Metotiꞌimoko, hei nolouko. Alaꞌ pepoꞌohimu pe Aku, io hinaꞌ moꞌoriꞌko.”

²⁰Haꞌumbora duohi toParisi meꞌitano pe hi Yesu, ba hiwaꞌimbo kohingkiꞌ hupaꞌne Pueꞌ Ala moparenta i duniaꞌ? Mehoniꞌ hi Yesu, “Kohupaꞌna poparentana Pueꞌ Ala i duniaꞌ, hawaꞌi uwaꞌ tandaꞌ-tandaꞌ to hingkiꞌ roꞌokiꞌ toaꞌ.

²¹Watoꞌo woꞌo, hawaꞌi uwaꞌ toaꞌ to hingkiꞌ mantiꞌi, ‘Ele io uwaꞌ iseꞌe!’ Ba, ‘Ele io uwaꞌ inoꞌo!’ Alaꞌ kodatuana Pueꞌ Ala uwaꞌ i lumbumi.”[13]

²²Uko tiꞌo, notiꞌi hi Yesu pe topeguruNa, “Hingkiꞌ hupaꞌ tempone, hingkiꞌ ikodokoꞌikei mpuꞌu pangkiꞌ Anaꞌ Manusiaꞌ kehapoꞌi haꞌandolu, angkana hawaꞌi hingkiꞌ iꞌokiꞌkei.

²³I tempo tiꞌo, uwaꞌ toaꞌ to hingkiꞌ mampatiꞌikikei, ‘Elekei, Anaꞌ Manusiaꞌ uwaꞌ inoꞌo!’ Uwaꞌ woꞌo to hingkiꞌ mantiꞌi, ‘Io uwaꞌ iseꞌe!’ Angkana inioꞌkei nolou hei inioꞌkei woꞌo metuntu pe iohi!

²⁴Alaꞌ ane hupaꞌ huliꞌ Anaꞌ Manusiaꞌ hingkiꞌ tongawa mpuꞌu. Kohupaꞌna hingkiꞌ niꞌokiꞌ hibali wiaꞌ to mowantai humanele laniꞌ.

²⁵Angkana uluꞌ-uluꞌna, Io hangangaa nipoperima-rima hei nosapuaka toaꞌ to tuwuꞌ i tempo hinewowoꞌena.

²⁶Hapo to mewali i tempona nabi Nohoꞌ hampiha, hingkiꞌ mewali woꞌo i ando kohupaꞌna Anaꞌ Manusiaꞌ.

²⁷I tempona nabi Nohoꞌ hampiha, hawaꞌi robahaꞌ hapo to hingkiꞌ morumpahi. Mangka hante maꞌinuhi woꞌo, hamokohi hei nipahamokohi. Tiꞌo to niwali woꞌo wute nabi Nohoꞌ mekahi i lali duanga to kodeꞌ. Hangkaꞌ-hangkaꞌ romohi noliuꞌ uwai, hei mahihi lekiꞌ-lekiꞌra.

²⁸Watoꞌo woꞌo to mewali i kota Sodomo i tempona hi Lot meꞌohaꞌ itoꞌo. Mangkahi woꞌo hante maꞌinu-inuhi, mobaluꞌ-baluꞌhi hei mehilihi, majamahi hei moꞌarohi tambi.

²⁹Angkana ikopolainalu hi Lot ka kota Sodomo, toaꞌ tiꞌo norumpahi ura api hante watu to meꞌuwaro ka laniꞌ, iomo hinaꞌ lekiꞌ-lekiꞌra labuꞌhi.

³⁰Watoꞌolu woꞌo kolembeꞌre toaꞌ ikohupaꞌna huliꞌ Anaꞌ Manusiaꞌ i duniaꞌ.

³¹I ando tiꞌo, hihimolu to mahura i womboꞌ dopiꞌ to marante, inioꞌhi mekahi i lali tambi moroa parewara. Watoꞌo woꞌo toaꞌ to i kineteꞌ, inioꞌhi dulu mahuliꞌ nolou pe bolaꞌ moroa ba hapo-hapo. Hangangaa mehilaihi!

³²Ipondindikei hapo to mewali i hantambina hi Lot![14]

³³Himo to motuntuni peleihana hadoduona, hawaꞌi pahua kotuwuꞌ to wolaꞌ. Angkana hihimo to mampohinte peleihana hei metuntu pe Aku kehapoꞌi nirokoꞌ, iomo to pahua kotuwuꞌ to wolaꞌ.

³⁴Tuꞌu mpuꞌu to Kutiꞌikikei hieꞌe, i ando pahuliꞌangKu, ane uwaꞌ roduo to moꞌawa turu i hampiha tempo intu, haduo hingkiꞌ niroa hei haduo hingkiꞌ nipolihi.

³⁵Roduo towoweꞌe kolentuꞌara mabuhu, haduo niroa hei haduo nipolihi.

³⁶Roduo toaꞌ majama hiꞌoꞌalu i kineteꞌ, haduo niroa hei haduo nipolihi.”

³⁷Koꞌukona hi Yesu mololita, meꞌitanohi topeguruNe pe Io rotiꞌi, “Pueꞌ, hiwaꞌimbo pewaline lekiꞌ-lekiꞌna tiꞌo?” Nohoniꞌhi hi Yesu notiꞌi, “Ane pangkiꞌkei tinti to mororampu mangka to mahi, ibahaꞌkei koꞌuwaꞌne to mahi itoꞌo. Watoꞌo woꞌo, hingkiꞌ tongawa mpuꞌu kohupaꞌKu huliꞌ i duniaꞌ.”