Read Rampi Lukas 19 Bible Online

Lukas 19 - Rampi bible

Lukas 19

²I kota Yeriko tiꞌo, uwaꞌ haduo tadulako toperuruꞌ sima tosugiꞌ, konaꞌna hi Sakeus.

³Hi Sakeus tiꞌo mangkodokoꞌi pangkiꞌ hi Yesu. Angkana nokomi kododihuna, io hawaꞌi hohumbo pangkiꞌ hi Yesu, alaꞌ Nopoꞌilumbuiꞌi toaꞌ woriꞌ.

⁴Iomo hinaꞌ hi Sakeus mehilai mampedului toaꞌ to woriꞌ, ako meponeꞌ i hangkaru loti ara hingkeꞌna nopangkiꞌ hi Yesu to hingkiꞌ moliu itoꞌo.

⁵Kododungkunalu hi Yesu i loti peponeꞌana hi Sakeus, Io menoaꞌ honiꞌi notiꞌi, “Sakeus, mengkohoumoko hohiꞌ humei, alaꞌ ando hieꞌe hingkiꞌ holampiꞌA i tambimu.”

⁶Katoꞌo hi Sakeus kaliuꞌ mengkohou, alaꞌ motanaꞌ laline mantorimo hi Yesu i tambina.

⁷Koroꞌokiꞌnalu toaꞌ to woriꞌ hapo to mewali tiꞌo, mangkonunuꞌhi, rotiꞌi, “Mahamporeꞌi hinaꞌ Io holampi i tambina toaꞌ to madosa?”

⁸Kolentuꞌana hi Yesu i lali tambina hi Sakeus, metotiꞌimo hi Sakeus mantiꞌi, “Pueꞌ, dolaꞌ duana ka lekiꞌ-lekiꞌna lumangku hingkiꞌ kupaꞌanikihi toaꞌ to merima-rima tuwuꞌra. Hei hihimolu to kubagiuꞌ, hingkiꞌ kupopahuliꞌkihi iba mpiha koworiꞌne ka hapo to kubagiuꞌkimohi.”

⁹Notiꞌi hi Yesu, “I ando hieꞌe, Pueꞌ Ala mamposalamaꞌko hante lekiꞌna ohina tambimu, alaꞌ ingko muleꞌna hi Burahima.

¹⁰Anaꞌ Manusiaꞌ humei pe duniaꞌ, tungkaihaNa humei mampaliꞌ toaꞌ to moꞌela ka Pueꞌ Ala hei mamposalamaꞌhi ka pehuku dosa.”

¹¹I tempona hi Yesu dodungkumo i Yerusale, pampekirira toaꞌ to woriꞌ, i tempona intu hi Yesu hupaꞌ i Yerusale, Io hingkiꞌ moparentamo hibali datu. Katoꞌo hi Yesu mampololiu womo lolitaNa hante pandiriꞌ hieꞌe,

¹²Notiꞌi, “Uwaꞌ haduo muleꞌne tokeiꞌ notungkai nolou pe woiꞌ to moꞌela hingkeꞌna niparilangkaꞌi mewali datu, hei uko niparilangkaꞌ, mahuliꞌlu intu pe woiꞌna.

¹³Kohandoaꞌana tene molai, mowowoi dulu hawiꞌna to hampuluꞌ duo, hei haduo-haduo nopaꞌanihi hampepaꞌ doiꞌ bulawa hei notiꞌi, ‘Doiꞌ to kupaꞌanikei hieꞌe, hangangaa iwiliorikei hingkeꞌna ane mahuliꞌa intu humei moꞌanaꞌmo doiꞌka.’

¹⁴Angkana i bolaꞌna tokeiꞌ tiꞌo, uwaꞌhi woꞌo toaꞌ to mampokoiꞌi. Katoꞌo kopolainalu, morapaꞌmohi hingkeꞌna haꞌumbora suro nolou mampetiꞌiki pe datu ngkodeꞌ, hei rotiꞌi, ‘Datu, anioꞌ iparilangkaꞌi mewali datungki, alaꞌ hawaꞌi kilei!’

¹⁵Kehapoꞌi rotiꞌi hatoꞌo, toaꞌ tiꞌo bateꞌnalu niparilangkaꞌ, hei mahuliꞌmo nolou pe bolaꞌna. Kohupaꞌnalu, nowowoimohi hawiꞌne, hei nopeꞌitanokimo haꞌumbomo koworiꞌne anaꞌna doiꞌna.

¹⁶To uluꞌ mehupaꞌ pe io notiꞌi, ‘Datu, hampepaꞌ doiꞌ bulawa to ipanikiꞌa hampiha, hampuluꞌmo anaꞌne.’

¹⁷Notiꞌi datu tiꞌo, ‘Moromiꞌ mpuꞌu pajamama mowiliori doiꞌ to kupaꞌanikiko. Ingkomo hawiꞌ to moromiꞌ. Alaꞌ komonontomu i jama to kokiuꞌ, kuhiniko motadulakoi hampuluꞌ kota.’

¹⁸Mehupaꞌ womo hawiꞌ koroduone hei mantiꞌi, ‘Datu, hampepaꞌ doiꞌ bulawa to ipanikiꞌa hampiha, limomo anaꞌne.’

¹⁹Notiꞌi womo datu pe hawiꞌ to koroduona tiꞌo, ‘Moromiꞌ. Kuhiniko motadulakoi limo kota.’

²⁰Uko tiꞌo, hupaꞌ womo hawiꞌ to ka tolune. Notiꞌi, ‘Hieꞌemo doiꞌma datu. Kuputuꞌlu moromiꞌ i lali lesongku.

²¹Motehuꞌa pe ingko alaꞌ kubahaꞌ ingko haduo toaꞌ to mohiaꞌ, moroa to handoꞌio hanumu, hei moroako wuaꞌna to handoꞌio pehuꞌamu.’

²²Notiꞌi datu, ‘Ingkomo hawiꞌ to kodake! Alaꞌ powiharomu, hingkiꞌ kuhukuko. Ibahaꞌlu aku hieꞌe toaꞌ to mohiaꞌa: aku moroaꞌa to handoꞌio hanungku hei aku moroaꞌa wuaꞌna to handoꞌio pehuꞌangku.

²³Mahamporeꞌi hinaꞌ hawaꞌi ipaꞌaniki toaꞌ to hiniꞌ mowuliori doiꞌ tiꞌo, hingkeꞌna noꞌuwaꞌ anaꞌne doiꞌku?’

²⁴Uko tiꞌo, notiꞌi womo datu pe toaꞌ to metotiꞌi i hirina, ‘Roaꞌi doiꞌ to uwaꞌ i io! Ipaꞌaniki womo hawiꞌku to mampopoꞌanaꞌmo limo doiꞌ bulawa.’

²⁵Angkana iohi mantiꞌi, ‘Tua, io moꞌompuimo hampuluꞌ!’

²⁶Datu tiꞌo mehoniꞌ, ‘Hingkeꞌna ibahaꞌkei, toaꞌ to nipoꞌohi hante hapo to nipaꞌanikiꞌi, to uwaꞌ i io hingkiꞌ nitambaiki womo. Angkana toaꞌ to hawaꞌi nipoꞌohi, hapo to nipaꞌanikiꞌi kehapoꞌi hangkiuꞌlu, bateꞌna hingkiꞌ niroa huliꞌ ka io.’

²⁷Uko tiꞌo notiꞌi womo datu tiꞌo, ‘Ikomikei humei lekiꞌ-lekiꞌne poniꞌku tota mampoꞌioꞌ koniparilangkaꞌku mewali datura. Lekiꞌ-lekiꞌra irokoꞌmohi i hinarongku!’ ”

²⁸Koꞌukona hi Yesu mololita watoꞌo, Nopololiumo patengkaꞌane pe kota Yerusale. Io matengkaꞌ medulu ka toaꞌ ntaniꞌna to metuntu.

²⁹Dodungkumohi i bolaꞌ Bepage hante Betania to i Biri Saitu, hi Yesu morumbaꞌmo roduo topeguruNa medulu,

³⁰Notiꞌikihi, “Noloumokei pe bolaꞌ to tohinoroi. Ane wutekei itoꞌo, hingkiꞌ iꞌokiꞌkei hambaꞌa anaꞌ kalide to nipehiluꞌki, to handoaꞌi tene hampiha nipelambaꞌi. Iꞌuweꞌkei ka konihiluꞌana hei iruiꞌkiꞌAkei humei.

³¹Ane uwaꞌ to meꞌitano pe ingkei mahamporeꞌi hinaꞌ iꞌuweꞌkei, itiꞌikikei waheꞌe, ‘Pueꞌ to mamparaluꞌino.’ ”

³²Noloumohi topeguruNe to roduo tiꞌo, rohuamo mpuꞌu hibali to notiꞌikihi hi Yesu.

³³Kolentuꞌara moꞌuweꞌ ka konipehiluꞌakina, tumpuna kalide meꞌitano, “Mahamporeꞌi hinaꞌ iꞌuweꞌkei?”

³⁴Mehoniꞌhi, “Pueꞌ to mamparaluiꞌi.”

³⁵Uko tiꞌo, kalide tiꞌo roruiꞌ nolou pe hi Yesu, rolampii hante baduꞌra, honiꞌi hi Yesu ropopelambaꞌmo.

³⁶Woriꞌ toaꞌ to mowuraꞌ widara i lumbu lala to hingkiꞌ nopoliuhi hi Yesu alaꞌ peꞌadaꞌira pe hi Yesu.

³⁷Dodungkumo i kota Yerusale munaꞌu ka Biri Saitu, lekiꞌ-lekiꞌra to metuntu motanaꞌhi mampokodeꞌ Pueꞌ Ala. Meꞌoꞌando-andomohi motanaꞌ hei mampokodeꞌhi Pueꞌ Ala, alaꞌ pangkiꞌmohi tandaꞌ kuasaꞌ to nowali hi Yesu.

³⁸Meꞌoꞌando-andohi, rotiꞌi, “Pueꞌ Ala mobarakati Datu to mehupaꞌ i lali konaꞌNa! Moromiꞌmo huliꞌ pohintuwuꞌte hante Pueꞌ Ala. Topokodeꞌmo Pueꞌ Ala i suruga!” [15]

³⁹Katoꞌo haꞌumbora toParisi i lumbura toaꞌ to woriꞌ mampatiꞌiki hi Yesu, “Guru, Itiꞌikihi mondiiꞌhi topeguruMa!”

⁴⁰Mehoniꞌ hi Yesu, “Kutiꞌikikei! Ane mondiiꞌhi topegurungKa, watu-watu hieꞌe hingkiꞌ meꞌoꞌando-andohi.”

⁴¹Dodungkumo hi Yesu i Yerusale, Io mepopanto pe kota tiꞌo, hei Nopeꞌoloni,

⁴²Notiꞌi, “Mepokarimakei toYerusale! Moromiꞌ rahimo ane ando hieꞌe ibahaꞌkei hapo to mampohintuwuꞌkei hante Pueꞌ Ala. Angkana hinewoꞌena hawaꞌkei ibahaꞌ noniuꞌ tiꞌo.

⁴³I hampiha tempo, poniꞌmi hingkiꞌ molimbuꞌ bolaꞌmi hei mowali bente to maroho mantuleliꞌ, hei moꞌewakei ka imbo-imbolu.

⁴⁴Hingkiꞌ ropuꞌkei hante bolaꞌmi hei lekiꞌ-lekiꞌna ohina, wute hawaꞌi uwaꞌ haꞌanu watu to tehuntu i tambimi to melobi i peꞌohaꞌana. Lekiꞌ-lekiꞌna tiꞌo hangangaa mewali, alaꞌ hawaꞌkei ibahaꞌ ando kohupaꞌaNe Pueꞌ Ala mamposalamaꞌkei.”

⁴⁵Uko tiꞌo, hi Yesu mekahi pe Tambina Pueꞌ Ala. Itoꞌo Io mobue toaꞌ to mobaluꞌ-baluꞌ,

⁴⁶notiꞌikihi, “I lali SuraꞌNa Pueꞌ Ala to mangkolehi mantiꞌi waheꞌe, ‘TambingKu hieꞌe iomo Tambi pekokaeha.’ Angkana ipopewalilukei tambi porampuana topanako!”

⁴⁷Ando-andona hi Yesu mepoturuꞌ i Tambina Pueꞌ Ala. Tutuꞌ-tutuꞌ tadulako mpenomba hante guru-guru agama hei tomotodira toYahudi magegahi morokoꞌ hi Yesu,

⁴⁸angkana hawaꞌhi hohumbo mowali tungkaihara, alaꞌ notumba toaꞌ to woriꞌ to hawaꞌi hupeꞌ mampehoromua lolitaNa.