Read Rampi Lukas 2 Bible Online

Lukas 2 - Rampi bible

Lukas 2

¹Hawaꞌi morue uko ka konipoꞌanaꞌkina hi Yohanes, datu Agustu mampoꞌuwaꞌ haꞌanu hawaꞌ. Lekiꞌ-lekiꞌna toaꞌ i woiꞌ Roma hangangaa niꞌukiꞌ konaꞌre hingkeꞌna nibahaꞌi koworiꞌre.

²Poꞌimbaꞌ toaꞌ to uluꞌ-uluꞌna ropoꞌuwaꞌ i tempona hi Kireniu mewali gubenuru i woiꞌ Siria.

³Lekiꞌ-lekiꞌna toaꞌ nolou mampopeꞌukiꞌ konaꞌra, pe bolaꞌna tododulura hori-hori.

⁴Watoꞌo woꞌo hi Yusuf moꞌawa hante hi Maria, to hingkiꞌ mewali hantambina molaimo ka bolaꞌ Nasareꞌ i Galilea pe Beteleme i woiꞌ Yudea. Hi Maria tiꞌo kolentuꞌanamo mohinonaꞌi. Beteleme[2] tiꞌo konipoꞌanaꞌakina datu Daudi hampiha. Itoꞌo, hi Yusuf mampopeꞌukiꞌ konaꞌna hante konaꞌna hi Maria, alaꞌ io muleꞌna hi Daudi.

⁵

⁶Kolentuꞌara tene i Beteleme, hupaꞌmo tempone hi Maria hingkiꞌ moꞌanaꞌ,

⁷hei io moꞌanaꞌmo mpuꞌu haduo oꞌanaꞌ tomaꞌani, anaꞌna to kokokaꞌ. Anaꞌ tiꞌo nolehe hante wida to nipatimomomo umbiꞌ, honiꞌi noꞌuliꞌ i lali kolambaꞌ gimba, alaꞌ itoꞌo hawaꞌi mpuꞌu uwaꞌ kamaraꞌ to ropeꞌohaꞌi.

⁸Dodungku i bolaꞌ Beteleme, uwaꞌhi haꞌumbora topolambaꞌ to mampoꞌodaꞌ gimbara i popada.

⁹Wini konipoꞌanaꞌakina hi Yesu, hangkaꞌ-hangkaꞌ romo hupaꞌ malaꞌekane Pueꞌ Ala, metotiꞌi i hirira topolambaꞌ hante wantana Pueꞌ Ala mowantaihi, katoꞌo motehuꞌhi mpololeke.

¹⁰Notiꞌi malaꞌeka tiꞌo, “Inioꞌkei motehuꞌ, alaꞌ humeiꞌa mampowute kareba to moromiꞌ pe ingkei. Kareba hieꞌe hingkiꞌ mampomotanaꞌ lalina lekiꞌ-lekiꞌna toaꞌ.

¹¹Wini hieꞌe i bolaꞌna datu Daudi, nipoꞌanaꞌkimo Topohompoꞌ dosa, Iomo Kerisitu, Pueꞌta.

¹²Hieꞌemola tandaꞌne, hingkiꞌ ihuakei haduo himidoꞌ to nilehe hante wida, hei niꞌuliꞌ i lali kolambaꞌ gimba.”

¹³Hangkaꞌ-hangkaꞌ romo roꞌokiꞌ topolambaꞌ tiꞌo malaꞌeka to woriꞌ hiꞌoꞌalu hante malaꞌeka to medulu mampokodeꞌhi Pueꞌ Ala, rotiꞌi,

¹⁴“Topokodeꞌmo Pueꞌ Ala to i Suruga! Romiꞌ Ngkotuwuꞌ i lumbuna toaꞌ to uwaꞌ i duniaꞌ to hintotoꞌ hante peleihaNa.”

¹⁵Pahuliꞌralu malaꞌeka tiꞌo nolou pe Suruga, topolambaꞌ tiꞌo haduo hei haduo, mantiꞌi, “Hokei nolouki pe Beteleme, mampeꞌele hapo to mewali to Nopowutekimokiki Pueꞌ.”

¹⁶Katoꞌo rohohiꞌimo mpuꞌu nolou pe Beteleme mampomehuaki hi Maria hante hi Yusuf, hante himidoꞌ to niꞌuliꞌ i lali kolambaꞌna gimba.

¹⁷Koroꞌokiꞌnalu himidoꞌ tiꞌo, ropowute hapo to notiꞌi malaꞌeka noniuꞌ Io.

¹⁸Hokohi lekiꞌ-lekiꞌne toaꞌ to pahori lolitara topolambaꞌ.

¹⁹Angkana lekiꞌ-lekiꞌna to mewali tiꞌo nopoꞌilalilu hi Maria.

²⁰Uko tiꞌo, topolambaꞌ tiꞌo molaimohi nolou pe popada polambaꞌara. I lumbu lala motanaꞌhi hei mampokodeꞌ Pueꞌ Ala, alaꞌ lekiꞌ-lekiꞌna to rohori hei to roꞌokiꞌ, tuꞌu-tuꞌu mewali, hintotoꞌ hante hapo to nopowute malaꞌeka.

²¹Ganaꞌmo umuruꞌne walu ando, himidoꞌ tiꞌo nibulabaꞌmo motuntuni adaꞌna toYahudi, hei nikokeneꞌi hi Yesu motuntuni pohawaꞌna malaꞌeka ikohandoaꞌana tene nopohinonaꞌiki inoꞌNa.

²²Ganaꞌmo tempone hi Yusuf hante hi Maria mororaꞌai hibali to nipokononto i atura to teꞌukiꞌ i suraꞌna hi Musa, toduluna hi Yesu mangkomi Anaꞌra tiꞌo nolou pe Tambina Pueꞌ Ala i Yerusale ako nipeserakaki pe Pueꞌ Ala.

²³Alaꞌ teꞌukiꞌmo i lali Suraꞌ Aturana Pueꞌ waheꞌe, “Lekiꞌ-lekiꞌna oꞌanaꞌ tomaꞌani to kokokaꞌ hangangaa nipeserakaki pe Pueꞌ Ala hingkeꞌna mewaliꞌi toaꞌNa.”

²⁴Mangkomihi woꞌo popenombara hibali to nipokononto i lali Suraꞌ Aturana Pueꞌ iomo, hampasa tinti merpati ba rombaꞌa anaꞌ tinti kokou,[3]

²⁵I Yerusale, uwaꞌ haduo toaꞌ to nikokeneꞌi hi Simeo. Io haduo toaꞌ to moromiꞌ hei mengkoruꞌ pe Pueꞌ Ala hante nopoꞌohi kohingkiꞌ hupaꞌne tempona Pueꞌ Ala hingkiꞌ morumbaꞌ datu Topohompoꞌ hingkeꞌna mamposalamaꞌ toSaraeli. Hei io nopoꞌowoni Inohaꞌ Mangkolehi to mampopebahaꞌ kohawaꞌna hingkiꞌ mahi ane handoaꞌi tene pangkiꞌ datu Topohompoꞌ to nodandi Pueꞌ Ala.

²⁶

²⁷Alaꞌ Inohaꞌ Mangkolehi uwaꞌ i lalina hi Simeo, io nolou pe Tambina Pueꞌ Ala. I tempora hi Yusuf hante hi Maria mangkomi hi Yesu hingkiꞌ nipeserakaki pe Pueꞌ Ala motuntuni suraꞌna hi Musa,

²⁸hi Simeo moroa himidoꞌ tiꞌo, noꞌawiꞌ honiꞌi mampokodeꞌ Pueꞌ Ala, notiꞌi,

²⁹“O Pueꞌ, kuꞌokiꞌmo himidoꞌ hieꞌe hei tongawa koꞌIpobuhoꞌinemo dandiMu, hinewowoꞌena wadimoꞌa mahi i lali kolebaꞌ lali.

³⁰Kuꞌokiꞌmo mpuꞌu datu Topohompoꞌ to Ipopehupaꞌ humei,

³¹to Ipatimomo hingkiꞌ mohompoꞌ lekiꞌ-lekiꞌna toaꞌ ka pehuku dosa.

³²Datu Topohompoꞌ hieꞌe hibali wanta to hingkiꞌ mampokononto lalira toaꞌ to haꞌiohi toSaraeli hingkeꞌna robahaꞌKo Pueꞌ. Moliu i oꞌanaꞌ hieꞌe, toaꞌMu toSaraeli hingkiꞌ ropokodeꞌ.”

³³Hoko hi Maria hante hi Yusuf pahori lolitana hi Simeo noniuꞌ i Anaꞌra.

³⁴Uko tiꞌo, hi Simeo mobarakatihi hante mantiꞌi pe hi Maria, “Anaꞌ hieꞌe iomo to nopokonontomo Pueꞌ hingkiꞌ humei mohuku hante mamposalamaꞌ toSaraeli, alaꞌ Io hingkiꞌ mampatidoꞌki toaꞌ hapo to tuꞌu ka Pueꞌ Ala. Io hingkiꞌ mewali tandaꞌ ka Pueꞌ Ala, to hawaꞌi hingkiꞌ notorimo toaꞌ woriꞌ.

³⁵Hingkeꞌ tongawa hapo to uwaꞌ i lali pekirira. Hei ingko Maria, kohandodoihamu hingkiꞌ hibali konobeloimu piho to motari.”

³⁶I Tambina Pueꞌ Ala, uwaꞌ woꞌo haduo nabi towoweꞌe to nikokeneꞌi hi Hana. Io anaꞌna hi Panueli, muleꞌna hi Aser. Tinuwuꞌna hi Hana tiꞌo walu mpuluꞌ iba ntoꞌamo. Io kahampihamo momaꞌani, angkana pitu ntoꞌalu hamoko, mahimo maꞌanine. Mepongka kobembaꞌana, io ando-ando nolou menomba pe Tambina Pueꞌ Ala. Ando wini hi Hana mekokae hei maboki.

³⁷

³⁸Ikonoꞌokiꞌnalu hi Yesu i Tambina Pueꞌ Ala, io mampokodeꞌ Pueꞌ Ala, hei mololita woꞌo noniuꞌ i Anaꞌ tiꞌo pe lekiꞌ-lekiꞌna toaꞌ to mampekau konipohintena toYerusale ka poniꞌra.

³⁹Koꞌukora hi Yusuf hante hi Maria motuntuni lekiꞌ-lekiꞌna atura to teꞌukiꞌ i lali Aturana hi Musa, molaimohi nolou pe bolaꞌ Nasareꞌ i woiꞌ Galilea.

⁴⁰Anaꞌra tiꞌo kokodeꞌ-kodeꞌa hei komaroho-rohoa. Mononto mpuꞌu laline, hei nobarakati Pueꞌ Ala.

⁴¹Toꞌa-toꞌana, inoꞌna hante umoꞌna hi Yesu nolouhi pe Yerusale ako motuntuni ando ngkodeꞌra toYahudi to nikokeneꞌi Ando Posusaꞌa Pokalintora.

⁴²Ganaꞌmo hampuluꞌ rontoꞌa umuruꞌne hi Yesu, noloumohi todulune pe posusaꞌa tiꞌo hibali biasana, hei hi Yesu ropoꞌawa woꞌo.

⁴³Koꞌukora motuntuni ando ngkodeꞌ tiꞌo, mahuliꞌmohi nolou pe bolaꞌra i Nasareꞌ, angkana hi Yesu hawaꞌi metuntu pe iohi. Io holampi tene i Yerusale, angkana hawaꞌi nobahaꞌ tomotodina.

⁴⁴Ropekiri reaꞌ uwaꞌlu moꞌawa-awa hante awara matengkaꞌ. Haꞌandomohi matengkaꞌ, honiꞌi ropaliꞌ i lumbuna awara hante i halalira.

⁴⁵Nokomi kohawaꞌna rohua, mahuliꞌ womohi nolou pe Yerusale.

⁴⁶Ikotolu andona ropaliꞌ, honiꞌi rohua i tanobaꞌana Tambina Pueꞌ Ala. Hi Yesu kolentuꞌana mahura i iliꞌna guru-guru agama, mampehoromua pololitara, hei meꞌitano woꞌo pe iohi.

⁴⁷Hokohi lekiꞌ-lekiꞌna toaꞌ to pahori pehoniꞌNa hante rotiꞌi, “Mapande mpuꞌu Anaꞌ tiꞌo. Woriꞌ to Nobahaꞌ!”

⁴⁸Koroꞌokiꞌnalu hi Yesu, hokohi inoꞌne hante umoꞌna. Notiꞌi inoꞌne, “Anaꞌku, mahamporeꞌi hinaꞌ watoꞌo waliaMa? Aku hante umoꞌmu, maporiꞌ kihori mampaliꞌKo!”

⁴⁹Angkana mehoniꞌ hi Yesu Notiꞌi, “Mahamporeꞌi hinaꞌ ipaliꞌAkei? Hawaꞌkeireꞌi ibahaꞌ, Aku hangangaa uwaꞌA i lali tambina Umoꞌku?”

⁵⁰Angkana hawaꞌi robahaꞌ palaihane lolitaNa.

⁵¹Uko tiꞌo, mahuliꞌmohi moꞌawa nolou pe Nasareꞌ, hei hi Yesu mengkoruꞌ pe iohi. Lekiꞌ-lekiꞌna to mewali tiꞌo, nopoꞌilalilu inoꞌNa.

⁵²Hi Yesu kokodeꞌ-kodeꞌa, hei kopobahaꞌ-bahaꞌa. Io Nopomotanaꞌ Pueꞌ Ala, hei Nopomotanaꞌ woꞌo toaꞌ.