Read Rampi Lukas 20 Bible Online

Lukas 20 - Rampi bible

Lukas 20

¹I hampiha tempo, hi Yesu mepoturuꞌ hei mampowute Kareba Moromiꞌ pe toaꞌ to woriꞌ to morampu i Tambina Pueꞌ Ala. Katoꞌo, mehupaꞌhi woꞌo tutuꞌ tadulako mpenomba hante guru agamana toYahudi hei tua-tua toYahudihi. Meꞌitanomohi pe hi Yesu rotiꞌi,

²“Itiꞌikika ka imbo kuasaꞌMa mowali lekiꞌ-lekiꞌna tiꞌo. Himo to mampaꞌaniKo kuasaꞌ tiꞌo?”

³Mehoniꞌ hi Yesu, “Aku woꞌo meꞌitanoꞌA pe ingkei.

⁴Ka imbo kuasaꞌne hi Yohanes moriu toaꞌ? Ka Pueꞌ Ala, ba ka toaꞌ?”

⁵Mororapaꞌmohi tadulakore toYahudi tiꞌo, rotiꞌi haduo hei haduo, “Hohumbomo kotohoniꞌne? Ane totiꞌi ka Pueꞌ Ala kuasaꞌNe, hingkiꞌ Notiꞌikiki, ‘Ane watoꞌoꞌi, mahamporeꞌi hinaꞌ hawaꞌkei mepoꞌohi pe hi Yohanes?’

⁶Angkana ane totiꞌi ka toaꞌlu kuasaꞌne, hingkiꞌ rowatuiki toaꞌ to woriꞌ, alaꞌ iohi mepoꞌohi hi Yohanes tiꞌo haduo nabi.”

⁷Mewaliꞌ rohoniꞌ, “Hawaꞌi kibahaꞌ.”

⁸“Ane watoꞌoꞌi, hawaꞌkei hingkiꞌ Kutiꞌiki koka imbone kuasaꞌKa mowali lekiꞌna tiꞌo!”

⁹Uko tiꞌo, hi Yesu mampowute halangkaꞌ pandiriꞌ pe toaꞌ to woriꞌ notiꞌi, “Uwaꞌ haduo toaꞌ to mohoꞌoni kineteꞌna hante anggoroꞌ. Tumpu kineteꞌ tiꞌo moharoi haꞌumbora toaꞌ topajama kineteꞌna. Alaꞌ io hingkiꞌ molai nolou pe bolaꞌ ntaniꞌna, hei hingkiꞌ morue meꞌohaꞌ inoꞌo.

¹⁰Wutemo tempona morupuꞌ wuaꞌ anggoroꞌ, nohowoꞌimo haduo hawiꞌne nolou merapiꞌ dolaꞌna pe topajama kineteꞌna. Angkana topajama kineteꞌ tiꞌo mokondo hawiꞌna hei ropopahuliꞌ ntooꞌ.

¹¹Uko tiꞌo, tumpu kineteꞌ tiꞌo mohowoꞌi womo hawiꞌna koroduona. Wutemo itoꞌo, rokondo woꞌo nipokohili hei ropopahuliꞌ ntooꞌ.

¹²Uko tiꞌo, nirumbaꞌ womo haduo hawiꞌna to kotolu duona. Wute itoꞌo, rokondo woꞌo hei ropelubaꞌ pe huwali kineteꞌ.

¹³Uko tiꞌo, notiꞌi i lalina tumpu kineteꞌ tiꞌo, ‘Hapo to hangangaa kuwali? Aginamo anaꞌku to kupokarima kurumbaꞌ nolou. Bateꞌna hingkiꞌ ropengkoruꞌi.’

¹⁴Angkana, i tempora topajama kineteꞌ pangkiꞌ anaꞌna tiꞌo, morapaꞌmohi rotiꞌi, ‘Anaꞌ tiꞌo aginamo torokoꞌ hantaromoꞌi mewali tumpu kineteꞌ, hei toroa kineteꞌne hante lekiꞌ-lekiꞌna ohina.’

¹⁵Katoꞌo rohokiꞌmo mpuꞌu anaꞌne tiꞌo, hei rokomi nolou pe huwali kineteꞌ honiꞌi rorokoꞌ.” Uko tiꞌo, nopeꞌitanoki hi Yesu, “Ane mahuliꞌi tumpu kineteꞌ tiꞌo, hapo to hingkiꞌ nowali pe topajama kineteꞌ tiꞌo?

¹⁶Bateꞌna ako morokoꞌ topajamana kineteꞌna, hei kineteꞌna hingkiꞌ nopaꞌanikihi toaꞌ ntaniꞌna.” Korohorina toaꞌ to woriꞌ lolita pandiriꞌ tiꞌo, iohi mampatiꞌiki hi Yesu, “Anioꞌ nopewali tiꞌo!”

¹⁷Angkana hi Yesu mampenotohi Notiꞌi, “Hapo palaihane lolita hieꞌe to teꞌukiꞌ i lali Suraꞌ to Mangkolehi: ‘Watu to notube topoꞌaro tambi, watu tiꞌo to mewali pahurahana tambi.’ ” [16]

¹⁸Notiꞌi womo hi Yesu, “Lekiꞌ-lekiꞌna toaꞌ to monawuꞌ i womboꞌ watu tiꞌo hingkiꞌ morutu. Hei hihimo to nokoꞌonoꞌi watu tiꞌo hingkiꞌ morere.”[17]

¹⁹Guru-guru agama hante tutuꞌ-tutuꞌ tadulako mpenomba robahaꞌ koꞌiora to notungkai hi Yesu i lali lolita pandiriꞌNa hingkonia. Iomo hinaꞌ uwaꞌ tungkaihare mohokiꞌ hi Yesu i tempo tiꞌo. Angkana hawaꞌhi podehoꞌ, alaꞌ mangkorokaꞌhi toaꞌ to woriꞌ.

²⁰Katoꞌo, mampaliꞌhi tempo to moromiꞌ, hei morumbaꞌhi haꞌumbora duo toaꞌ nolou pe hi Yesu mampaliꞌ komasalaꞌna lolitaNa hingkeꞌna noꞌuwaꞌ lalane rokomiꞌi pe gubenuruꞌ Roma hei nibutusi i hinarona hei nitarungkuꞌ. Toaꞌ to nirumbaꞌ tiꞌo, hantoniꞌ mampetoromiꞌluhi alaꞌ tungkaihara hingkiꞌ mampokonawuꞌ hi Yesu.

²¹Kohupaꞌra i hi Yesu rotiꞌi, “Guru, kibahaꞌ komaniuꞌne lolitaMu hei lekiꞌ-lekiꞌna pepaguruMu. MepaguruKo ikomaniuꞌna motuntuni peleihana Pueꞌ Ala, hei hawaꞌko mampopoꞌoriꞌori toaꞌ.

²²Iomo hinaꞌ meꞌitanoka, motuntuni aturana pepoꞌohinta, ba hangangaa mobaiariki sima pe datu ba hawaꞌi?”

²³Angkana nobahaꞌlu hi Yesu tungkaihane lalira to kodake. Iomo hinaꞌ Notiꞌikihi,

²⁴“PohumeikiꞌA dulu doiꞌ peraꞌ! Lentena hihimo hante konaꞌna hihimo to uwaꞌ i doiꞌ hieꞌe?” Mehoniꞌhi, “Lentena hante konaꞌna datu ngkodeꞌ.”

²⁵Notiꞌi hi Yesu, “Ane watoꞌoꞌi, ipaꞌanikikei Datu Ngkodeꞌ hapo to hangangaa nipaꞌaniki, hei ipaꞌanikikei woꞌo Pueꞌ Ala hapo to hangangaa nipaꞌanikiꞌI.”

²⁶Koꞌukoana hawaꞌi uwaꞌ komasalaꞌne lolitaNa to rohua i hinarona toaꞌ to woriꞌ. Monondiiꞌluhi alaꞌ lemeniahi pahori pehoniꞌNa.

²⁷Uko tiꞌo, uwaꞌhi haꞌumbora toaꞌ ka paratei Saduki to hupaꞌ pe hi Yesu. ToSaduki iomo hadolaꞌ tadulako agama Yahudi to hawaꞌhi mampoꞌohi toaꞌ to mahi hingkiꞌ nipatuwuꞌ huliꞌ.

²⁸Rotiꞌi toSaduki pe hi Yesu, “Guru, hi Musa moꞌukiꞌ i lali suraꞌ atura pepoꞌohinta waheꞌe, ane haduo tomaꞌani mahi angkana hawaꞌi uwaꞌ anaꞌne, halali hampemolona hangangaa hamoko hante erana tobembaꞌmo tiꞌo, hingkeꞌna uwaꞌ muleꞌne halalina to mahimo.

²⁹Mewaliꞌ, uwaꞌhi pitu topohalali, lekiꞌ-lekiꞌra tomaꞌani. To kokokaꞌ, mohantambi. Hawaꞌi tene uwaꞌ anaꞌre, mahimo.

³⁰Hineꞌna mampohantambi tobembaꞌ tiꞌo. Hawaꞌi tene uwaꞌ anaꞌre, mahimo woꞌo.

³¹Watoꞌo woꞌo to mewali ikotolu wute pe to kopituna.

³²Koꞌukoana mahimo woꞌo towoweꞌe tiꞌo.

³³Mewaliꞌ, i ando kotuwuꞌna huliꞌ to mahi, hihimomo maꞌanine towoweꞌe tiꞌo? Alaꞌ pitumohi to mampohantambiꞌi.”

³⁴Mehoniꞌ hi Yesu, “Toaꞌ to tuwuꞌ i duniaꞌ, nipohamokohi,

³⁵angkana toaꞌ to masipatoꞌ pahua dolaꞌra i duniaꞌ to wolaꞌ hei to nopatuwuꞌhi huliꞌ Pueꞌ Ala, hamboaꞌmohi mohamoko.

³⁶Kotuwuꞌra hibali kotuwuꞌna malaꞌeka alaꞌ hawaꞌhi hingkiꞌ pahua komahia. Iohi tiꞌo anaꞌna Pueꞌ Ala, alaꞌ Pueꞌ Ala mopatuwuꞌhi huliꞌ.

³⁷Hi Musa hadoduona mampokononto toaꞌ to mahi hingkiꞌ nipatuwuꞌ huliꞌ. Tunturaka hieꞌe noꞌukiꞌ i lali suraꞌna hi Musa, noniuꞌ wulaꞌi rui to noꞌoka api. I tempo tiꞌo, Pueꞌ mantiꞌi, ‘Akumo Pueꞌ Ala to ropenombai hi Burahima, hi Isaki hante hi Akoꞌ.’[18]

³⁸Io handoꞌio Pueꞌ Alana toaꞌ to mahi, angkana Pueꞌ Alana toaꞌ to tuwuꞌ, alaꞌ i hinarona Pueꞌ Ala, lekiꞌ-lekiꞌna toaꞌ tontona tuwuꞌ.”[19]

³⁹I tempo tiꞌo, haꞌumbora guru agama mantiꞌi pe hi Yesu, “Guru, tuꞌu mpololeke to Itiꞌi.”

⁴⁰Uko tiꞌo, hawaꞌi uwaꞌ to podehoꞌ mampeꞌitanoki ba hapo-hapo pe hi Yesu.

⁴¹Katoꞌo, hi Yesu meꞌitano pe iohi notiꞌi, “Mahamporeꞌi hinaꞌ ingkei mantiꞌi Datu Topohompoꞌ iomo muleꞌna datu Daudi?

⁴²Alaꞌ hi Daudi hadoduona mampokononto Datu Topohompoꞌ iomo Pueꞌ to nopenombai. I lali suraꞌ Masmur, notiꞌi hi Daudi waheꞌe, Pueꞌ Ala mololita pe Pueꞌku to kupenombai, notiꞌi, ‘Mahuramoko tinaꞌ i koanangKu,

⁴³wute Kupopengkoruꞌhi lekiꞌ-lekiꞌne poniꞌmu pe Ingko.’[20]

⁴⁴Mewaliꞌ, ane Datu Topohompoꞌ iomo muleꞌna hi Daudi, mahamporeꞌi hinaꞌ nopenombai hi Daudi hei nowowoi Pueꞌ?”

⁴⁵Kolentuꞌara tene toaꞌ to woriꞌ mampehoromua lolitaNa, notiꞌi hi Yesu pe topeguruNa,

⁴⁶“Majaga-jagakei, inioꞌkei motuntuni waliara guru agamana toYahudi. Iohi rolei matengkaꞌ mampetoꞌele-ele mopakeꞌ baduꞌ to kurauꞌ, hei dokoꞌhi niꞌadaꞌi i pobaluꞌ-baluꞌa hei dokoꞌhi mahura i pahura to i hinaro i tambi penombaha hei i posusaꞌa.

⁴⁷Mobagiuꞌhi tobembaꞌ hante morompoꞌi tambira. Iomo hinaꞌ hantoniꞌhi mekokae morue-rue motutuꞌi waliara to kodake. Angkana monontomo iohi hingkiꞌ pahuahi pehuku to madori!”