Read Rampi Lukas 21 Bible Online

Lukas 21 - Rampi bible

Lukas 21

¹I lali Tambina Pueꞌ Ala, hi Yesu pangkiꞌ haꞌumbora toaꞌ tosugiꞌ mokahi doiꞌra to woriꞌ pe lali petiꞌ pebolaꞌana doiꞌ popenomba.

²Noꞌokiꞌ woꞌo haduo towoweꞌe tobembaꞌ to merima-rima tuwuꞌna mokahi doiꞌ popenombana. To nopopekahi tiꞌo, rompepaꞌ doiꞌ see to hangkiuꞌlu ihaꞌne.

³Notiꞌi hi Yesu, “Ipehoromuakei to Kutiꞌi, tobembaꞌ to merima-rima tuwuꞌna hieꞌe, meliu kokodeꞌne popenombana ka popenombara lekiꞌ-lekiꞌna toaꞌ to ntaniꞌna,

⁴alaꞌ iohi mampeweihi ka lobina kosugiꞌara. Angkana towoweꞌe tiꞌo, kehapoꞌi merima-rima tuwuꞌne, angkana io mampewei lekiꞌ-lekiꞌna to uwaꞌ i io.”

⁵I tempo tiꞌo, uwaꞌ haꞌumbora duo toaꞌ to mamperenaki komanobaꞌna tambina Pueꞌ Ala rotiꞌi, “Maranga mpuꞌu Tambine Pueꞌ Ala hieꞌe, alaꞌ nipomarangaiꞌi hante watu-watu to maranga hei parewa to ropopenomba pe Pueꞌ Ala.” Katoꞌo notiꞌi Yesu,

⁶“Tuꞌu Tambine Pueꞌ Ala maranga. Angkana Kutiꞌikikei, hingkiꞌ hupaꞌ tempona, hawaꞌi hingkiꞌ uwaꞌ haꞌanu watu to melobi i pebolaꞌana hibali to iꞌokiꞌkei hinewoꞌena. Bateꞌna hingkiꞌ mokero lekiꞌ-lekiꞌne.”

⁷Uko tiꞌo, meꞌitanomohi topeguruNe pe hi Yesu rotiꞌi, “Guru, hiwaꞌimbo pewaliane to Itiꞌi hingkeꞌenia? Hei tandaꞌ hapo to hingkiꞌ mewali ane wutemoꞌi i tempo Pewaliana?”

⁸Notiꞌi hi Yesu, “Majaga-jagakei, hingkeꞌna hawaꞌkei nipowewoꞌ, alaꞌ woriꞌ toaꞌ hingkiꞌ hupaꞌ hei mantiꞌi koꞌioramo mpuꞌu Datu Topohompoꞌ hei ando pebutusi dodungkumo. Angkana inioꞌkei ipoꞌohi.

⁹Ane pahorikei kareba tomagaru hante mpoponiꞌ, inioꞌkei motehuꞌ, alaꞌ lekiꞌ-lekiꞌna tiꞌo hangangaa mewali dulu, angkana hawaꞌi mopalaiha koꞌukoanamo duniaꞌ.”

¹⁰Katoꞌo, nopololiumo hi Yesu lolitaNe notiꞌi, “I tempo tiꞌo, toharoboꞌ hingkiꞌ moponiꞌ moꞌewa roboꞌ ntaniꞌna hante kodatua to haꞌanu hingkiꞌ moꞌewa kodatua to haꞌanuna.

¹¹I umbolu hingkiꞌ uwaꞌ luanoko to makaja, hakiꞌ hante kobiloraha. Hei hingkiꞌ mewali woꞌo tandaꞌ i laniꞌ to mekototehuꞌi.

¹²Angkana handoaꞌi tene mewali tiꞌo, ingkei hingkiꞌ nihokiꞌ hei nipoperima-rima. Hingkiꞌ nisalaꞌikei hei niparesaꞌkei i lali tambi-tambi penombaha hei nitarungkuꞌkei. Nokomi petuntumi pe Aku, hingkiꞌ niparukukei mehinaro pe datu hante pe topoparenta.

¹³Itoꞌomola koholangkoami mampowute noniuꞌ Kareba Moromiꞌ to ka Pueꞌ Ala.

¹⁴Inioꞌkei motehuꞌ hei komomaꞌa noniuꞌ hapo to hingkiꞌ itiꞌikei.

¹⁵Alaꞌ Aku hingkiꞌ mampaꞌanikei pehoniꞌmi to mononto alana hawaꞌi robiaꞌ poniꞌmi mohoniꞌ hapo to itiꞌikei.

¹⁶I tempo tiꞌo, hingkiꞌ nopobaluꞌkei tomotodimi, halalimi, hante awa-awami. Hei haꞌumbora duo ka lumbumi hingkiꞌ nirokoꞌ.

¹⁷Alaꞌ nokomi petuntumi pe Aku, hingkiꞌ nokabiriꞌkei lekiꞌ-lekiꞌna toaꞌ.

¹⁸Angkana hangkaru wilolu ka tutuꞌmi hawaꞌi hingkiꞌ moholi.

¹⁹Ane ingkei tontona mepoꞌohi hei sabaraꞌ, ingkei hingkiꞌ pahua kosalamaꞌa.”

²⁰Nopololiu hi Yesu Notiꞌi, “Ane iꞌokiꞌkei Yerusale nolimbuꞌ surodadu ibahaꞌmokei kota tiꞌo hamboaꞌmo morue hingkiꞌ nikero.

²¹I tempo tiꞌo, toaꞌ to meꞌohaꞌ i Yudea, hangangaa mehilaihi nolou pe biri. Toaꞌ to i lali kota, hangangaa mehilaihi ka kota tiꞌo. Hei toaꞌ to i huwali kota, inioꞌhi mekahi pe lali kota.

²²Alaꞌ i ando tiꞌo, hingkiꞌ mehupaꞌ ando pehukune Pueꞌ Ala i kota tiꞌo, hingkeꞌna tebuhoꞌimo lekiꞌ-lekiꞌna to teꞌukiꞌ i lali Suraꞌ Mangkolehi.

²³Hingkiꞌ maporiꞌ mpuꞌu tuwuꞌre towoweꞌe to kolentuꞌana mohinonaꞌi hei inoꞌ to mampoꞌomiꞌ anaꞌra. Alaꞌ i tempo tiꞌo toaꞌ hingkiꞌ maporiꞌhi mpololeke hei Pueꞌ Ala hingkiꞌ mohuku roboꞌ hieꞌe.

²⁴Uwaꞌ to hingkiꞌ nirokoꞌ hante piho, uwaꞌhi woꞌo to hingkiꞌ nikomi mewali to nitawaniꞌ pe bolaꞌ-bolaꞌna toaꞌ, hei toaꞌ-toaꞌ tota pobahaꞌ Pueꞌ Ala hingkiꞌ mopariwoiꞌ Yerusale wute uko tempo to Nopokononto Pueꞌ pe iohi.”

²⁵“I ando, i wula hei i betueꞌ, hingkiꞌ uwaꞌ tandaꞌ-tandaꞌ to mepohele. Lekiꞌ-lekiꞌna toaꞌ i duniaꞌ, hingkiꞌ motehuꞌ hei wulihi pangkiꞌ balumba tahiꞌ hante pahori pewoona tahiꞌ.

²⁶Alaꞌ komotehuꞌra pangkiꞌ lekiꞌ-lekiꞌna to mewali i humanele duniaꞌ, uwaꞌhi toaꞌ to hingkiꞌ molimpu, alaꞌ to makuasaꞌ i raoha hingkiꞌ mokawewoꞌ.

²⁷I tempo tiꞌo, toaꞌ hingkiꞌ pangkiꞌ Anaꞌ Manusiaꞌ mehupaꞌ noputuꞌ kini hante kuasaꞌ to manobaꞌ.

²⁸Ane mepongkamoꞌi tiꞌo mewali, meꞌaromokei hei ipatimomokei lalimi, alaꞌ hupaꞌmoꞌi kosalamaꞌa.”

²⁹Hi Yesu mampowute lolita pandiriꞌ hieꞌe pe topeguruNa notiꞌi, “Ipoꞌilalikei loti ara hante loti-loti ntaniꞌna.

³⁰Ane iꞌokiꞌkei daꞌane motimbeꞌ ba motaweꞌ, ibahaꞌmokei kohingkiꞌ hupaꞌna tempo pokoꞌando.

³¹Watoꞌo woꞌo, ane iꞌokiꞌkei lekiꞌ-lekiꞌne to Kutiꞌikikei hingkeꞌenia, ibahaꞌmokei dodungkumo poparentane Pueꞌ Ala.

³²Ibahaꞌmokei lekiꞌ-lekiꞌne tiꞌo hingkiꞌ mewali kolentuꞌana toaꞌ to tuwuꞌ hinewowoꞌena handoaꞌi mahi.

³³Laniꞌ hante duniaꞌ hingkiꞌ moholi, angkana pohawaꞌKu tontona uwaꞌ wute nantolou-louna.”

³⁴“Matimomokei anioꞌkei wewoꞌ hante posusaꞌ hei anioꞌkei maꞌinu to melolanu, ba mampekiri kotuwuꞌmi i duniaꞌ koꞌukoana lembeꞌkei, horiana hawaꞌkei timomo i ando pehupaꞌNa to hangkaꞌ-hangkaꞌ,

³⁵alaꞌ ando tiꞌo hingkiꞌ mehupaꞌ hangkaꞌ-hangkaꞌ pe toaꞌ to i womboꞌ duniaꞌ hieꞌe hibali torobumbu to mopangku hangkaꞌ-hangkaꞌ.

³⁶Matimomomo hei mekokaekei pe Pueꞌ Ala, hingkeꞌna himpolohoꞌkei ka lekiꞌ-lekiꞌna komaporiꞌ to hingkiꞌ mewali, hei hingkeꞌna ibiaꞌkei metotiꞌi mehinaro pe Anaꞌ Manusiaꞌ niparesaꞌ.”

³⁷Ane andoꞌi, hi Yesu mepoturuꞌ i Tambina Pueꞌ Ala. Ane winiꞌi, Io nolou mohamini i huwali kota i Biri Saitu.

³⁸Hampihoꞌolu-hampihoꞌolu woriꞌ toaꞌ morampu i Tambina Pueꞌ Ala hingkiꞌ mampehoromua pepoturuꞌNa.