Read Rampi Lukas 22 Bible Online

Lukas 22 - Rampi bible

Lukas 22

¹Hamboaꞌmo morue hingkiꞌ mehupaꞌ ando ngkodeꞌ toYahudi to nikokeneꞌi Posusaꞌa roti to hawaꞌi niragiꞌi ba to nikokeneꞌi woꞌo ando Posusaꞌ Pokalintora toYahudi.[21]

²I tempo tiꞌo, tutuꞌ tadulako-tadulako mpenomba hante guru-guru agama mampaliꞌhi lala hingkiꞌ morokoꞌ hi Yesu hante ngkawowuni, alaꞌ motehuꞌhi ka toaꞌ woriꞌ.

³Haduo ka topeguruna hi Yesu to hampuluꞌ meroduohi konaꞌna hi Yudas, to nikokeneꞌi woꞌo hi Iskarioꞌ, nokeloi Belisiꞌ.

⁴Io nolou pe tutuꞌ tadulako-tadulako mpenomba hante tutuꞌ-tutuꞌ topampodaꞌ Tambina Pueꞌ Ala mampetiꞌiki tungkaihana hingkiꞌ mampobaluꞌ hi Yesu pe iohi.

⁵Motanaꞌhi mpololeke pahori tungkaihana hi Yudas, io horiana hampekokirihi hingkiꞌ mampaꞌanihi doiꞌ pe hi Yudas.

⁶Nopoioꞌmo hi Yudas lolitare, mepongka katoꞌo mampaliꞌmo koholangkoa to moromiꞌ hingkiꞌ mampewei hi Yesu pe iohi hante hawaꞌi nobahaꞌ toaꞌ woriꞌ.

⁷Hupaꞌmo tempona ando Posusaꞌ roti tota niragiꞌi, iomo ando to nipokodeꞌ to niporokoꞌki gimba i posusaꞌ pokalintora.

⁸Katoꞌo hi Yesu morumbaꞌmo hi Peturuꞌ hante hi Yohanes notiꞌi, “Noloumokei, ipatimomomokei pangka posusaꞌ Pokalintora toYahudi to hingkiꞌ toꞌoka.”

⁹Meꞌitanohi, “I imbo peleihaMa kipampatimomoꞌi?”

¹⁰Notiꞌi hi Yesu, “Ane mekahikei pe kota, hingkiꞌ mampohidupaꞌkikei haduo to mangkomi lawu to moꞌohi uwai. Ituntunimokei pe lali tambi to nopekahii,

¹¹hei itiꞌikikei pe tumpu tambi tiꞌo, ‘Gurungki meꞌitano pe ingkei i umbo peꞌohaꞌangKu moꞌawa hante topegurungKu hingkiꞌ mangka Pokalintora toYahudi?’

¹²Katoꞌo tumpu tambi tiꞌo mampatidoꞌkikei iomo peꞌohaꞌa to i womboꞌ liaꞌ holangko hei maganaꞌ-ganaꞌmo, itoꞌomokei mampatimomono.”

¹³Katoꞌo noloumohi mpuꞌu, rohua hibali to notiꞌikihi hi Yesu pe iohi. Katoꞌo iohi mampatimomomohi mpuꞌu Pokalintora toYahudi.

¹⁴Wutemo tempora mangka Pokalintora toYahudi, mahuramo hi Yesu hante topeguruNa.

¹⁵Notiꞌi hi Yesu pe iohi, “Kodeꞌ kopundangKa mangka Pokalintora toYahudi hieꞌe moꞌawa-awa hante ingkei, kolentuꞌangKu tene handoaꞌi mampolala komaporiꞌ.

¹⁶Kutiꞌikikei, Aku hieꞌe hamboaꞌmoꞌA hingkiꞌ mangka Pokalintora toYahudi, wute poparentana Pueꞌ Ala tebuhoꞌi.”

¹⁷Uko tiꞌo, hi Yesu moroamo haꞌanu paꞌinua to moꞌohi anggoroꞌ hei mekokae mampowute poꞌawerasiꞌ notiꞌi, “Irodiꞌmo hei idolaꞌ-dolaꞌmokei.

¹⁸Kutiꞌikikei mepongka hinewowoꞌena, hamboaꞌmoꞌA hingkiꞌ maꞌinu anggoroꞌ wute poparentana Pueꞌ Ala mehupaꞌ.”

¹⁹Katoꞌo hi Yesu moroa roti hei moꞌawerasiꞌ, mokebiꞌ-kebiꞌ roti Nopepaꞌaniki pe iohi, Notiꞌi, “Hieꞌemola potukaꞌ wotangKu to nipewei pe ingkei, i piha-pihana iꞌokakei mewali pekolowoimi pe Aku.”

²⁰Koꞌukonalu mangka, Io moroa paꞌinua to moꞌohi anggoroꞌ hei Notiꞌi, “Anggoroꞌ hieꞌe iomo podandia wolaꞌ ka Pueꞌ Ala hante raꞌangKu, to nibobomo pe ingkei.

²¹Angkana inioꞌkei hoko, toaꞌ to hingkiꞌ mampeweiꞌA uwaꞌlu moꞌawa hante Aku i meja hieꞌe.

²²Anaꞌ Manusiaꞌ hangangaa mahi hibali to nipokonontomo, angkana horewuꞌmo toaꞌ to mampobaluꞌA!”

²³Mepongka katoꞌo momehoniꞌ-honiꞌhi, ba himoꞌi ka lumbure to hingkiꞌ mowalia to kodake hibali tiꞌo.

²⁴Mewalimo pemehoniꞌ-honiꞌara topeguruna hi Yesu, hihimo to masipatoꞌ mewali to kodeꞌ i lumbura.

²⁵Notiꞌi hi Yesu pe iohi, “Datu-datu tota pebahaꞌ pe Pueꞌ moparentahi hante peleihara, hantaro dokoꞌhi niwowoi datu to moromiꞌ.

²⁶Angkana ingkei, inioꞌkei watoꞌo! Hihimo to dokoꞌ mewali to kodeꞌ, hangangaa mewali to nipoꞌiwowoiꞌ. Hei toaꞌ topohawaꞌ hangangaa mewali dulu hibali haduo hawiꞌ.

²⁷Mewaliꞌ, hihimo to niꞌadaꞌio, to mahura mangka, ba to melora? Haꞌioreꞌi, to mahura mangka? Angkana Aku uwaꞌ i lumbu-lumbumi mewali hibali to melora.

²⁸Ingkeimola tota mampolihiꞌA i tempoku mampolala komaporiꞌ.

²⁹Alaꞌ tiꞌo Aku mampaꞌanikei kodatua, hibali woꞌo UmoꞌKu mampaꞌaniꞌA kodatua.

³⁰Ingkei hingkiꞌ mangka maꞌinu i meja moꞌawa hante Aku i lali kodatuangKu, hei ingkei hingkiꞌ mahura i womboꞌ kodatua mobutusi hampuluꞌ meroroboꞌ toSaraeli.”

³¹Notiꞌi hi Yesu pe hi Simo, “Simo, Simo, pehoromuaꞌi! Belisiꞌ nipaꞌanimo koholangkoa mohohongkeꞌkei hingkiꞌ mampohidakei ka Aku hibali haduo to mantopihi mampohida kolopaꞌ kina.

³²Angkana Kupekokaekiko hingkeꞌna pepoꞌohimu nioꞌ mateweꞌ. Hei ane mahuliꞌmoko pe Aku, ipokarohohi woꞌo halali-halalimahi.”

³³Mehoniꞌ hi Peturuꞌ, “Pueꞌ, timomoluꞌa nitarungkuꞌ hei mahi moꞌawa hante Ingko!”

³⁴Angkana notiꞌi hi Yesu, “Peturuꞌ, ando hieꞌe handoaꞌi metantoroꞌouoꞌ manuꞌo, tolu mpihamoko intu mosapuakaꞌA, hantaro ibahaꞌluꞌA.”

³⁵Notiꞌi hi Yesu pe topeguruNa, “I tempomi Kurumbaꞌ hawaꞌkei mangkomi dompeꞌ, baku ba sanalaꞌmi, angkana uwaꞌreꞌi komakuraꞌmio?”

³⁶Mehoniꞌhi, “Hawaꞌi uwaꞌ.” Notiꞌi hi Yesu, “Angkana hinewowoꞌena, hihimo to uwaꞌ doiꞌna nokomimolu hei hihimo tota uwaꞌ pihona hangangaa io mobaluꞌ baduꞌna nopopehili piho.

³⁷Kutiꞌikikei, ohina Boo Mangkolehi hangangaa nipobuhoꞌi pe Aku, ‘Io hingkiꞌ teꞌihaꞌ i iliꞌna toaꞌ to meꞌewa alaꞌ hapo to teꞌukiꞌ noniuꞌ Aku nipobuhoꞌimo.’ ”

³⁸Rotiꞌi topeguruNe, “Pueꞌ, hieꞌemo piho meromato.” Mehoniꞌ hi Yesu, “Tiꞌo ganaꞌmo.”

³⁹Katoꞌo hi Yesu molai ka kota. Hibali biasana Io nolou pe Biri Saitu hei topeguruNa woꞌo metuntuhi.

⁴⁰Kowuteralu i peꞌohaꞌa tiꞌo Notiꞌi pe iohi, “Mekokaekei hingkeꞌna nioꞌkei nihohongkeꞌ.”

⁴¹Uko tiꞌo, Io mampohida ka topeguruNahi wora halubaꞌa komoꞌelane, honiꞌi Io melingkotuꞌ mekokae Notiꞌi,

⁴²“UmoꞌKu, ane hiniꞌKo iroamo komaporiꞌ hieꞌe ka Aku angkana handoꞌio peleihangKu sangadina peleihaMu to mewalio”

⁴³Katoꞌo mehupaꞌ malaꞌeka ka laniꞌ mampopemombaha wotana, hei mepaꞌani roho pe hi Yesu.

⁴⁴Hi Yesu maporiꞌ mpololeke laline hei Io tuꞌu-tuꞌu mpuꞌu mekokae, holemuꞌNa hibali raꞌa to tidoꞌ pe woiꞌ.

⁴⁵Katoꞌo Io metotiꞌimo hei mahuliꞌ pe topeguruNa, hei Nohuahi kolentuꞌaralu leꞌo alaꞌ masusahi.

⁴⁶Notiꞌikihi, “Mahamporeꞌi hinaꞌ toturulukei? Peꞌarokei hei mekokaemokei, hingkeꞌna hawaꞌkei nihohongkeꞌi.”

⁴⁷Kolentuꞌana tene hi Yesu mololita, mehupaꞌmo harombonga toaꞌ to woriꞌ to nopoduluki hi Yudas haduo ka topeguruna hi Yesu. Katoꞌo hi Yudas liu ako moꞌumaꞌI.

⁴⁸Notiꞌi hi Yesu pe io, “Yudas, mahamporeꞌi hinaꞌ mampobaluꞌko Anaꞌ Manusiaꞌ hante peꞌoꞌumaꞌ?”

⁴⁹Koroꞌokiꞌnalu topeguruNahi hapo to hingkiꞌ mewali, rotiꞌi, “Pueꞌ, hohumbo? Kiꞌewamohi hante piho?”

⁵⁰Katoꞌo, haduo ka topeguruNa liu moꞌewa hawiꞌna tadulako mpenomba ngkodeꞌ hante piho horiana noniuꞌ tolina kuanane liu mopudiꞌ.

⁵¹Katoꞌo notiꞌi hi Yesu, “Hingkoreimo”. Honiꞌi Nopalaꞌ tolinane toaꞌ tiꞌo liu moꞌoriꞌ.

⁵²Uko tiꞌo, hi Yesu mampatiꞌikihi tutuꞌ tadulako-tadulako mpenomba hante tadulako-tadulako topampodaꞌ Tambina Pueꞌ Ala hei tomotodi-tomotodi toYahudi to mehupaꞌ mohokiꞌI, Notiꞌi, “Ba ipekirikei Aku hieꞌe to kodakeꞌA, hinaꞌ ipangkomikiꞌAkei piho hante petotuꞌ?

⁵³Ando-andona moꞌawaꞌA ingkei i lali Tambina Pueꞌ Ala, haporeꞌi hinaꞌ hawaꞌAkei ihokiꞌmo. Hieꞌemo tempone Belisiꞌ makuasaꞌ, hei hieꞌemo koholangkoami!”

⁵⁴Katoꞌo hi Yesu nihokiꞌ hante nikomi pe tambina Tadulako Mpenomba Ngkodeꞌ hei hi Peturuꞌ metuntu mengkomoꞌelalu.

⁵⁵I tanobaꞌa tambi tiꞌo, uwaꞌhi haꞌumbora duo toaꞌ to mampatuwuꞌ api ropanirui mantuleliꞌ. Hi Peturuꞌ mahuramo woꞌo moꞌawa-awa hante iohi maniru.

⁵⁶Haduo towoweꞌe to majama i tambina Tadulako Mpenomba Ngkodeꞌ pangkiꞌ hi Peturuꞌ kolentuꞌana maniru. Nopomoꞌoꞌele honiꞌi notiꞌi, “Toaꞌ hieꞌe uwaꞌ moꞌawa-awa hante hi Yesu hingkeꞌenia!”

⁵⁷Angkana hi Peturuꞌ mesapu notiꞌi, “Toaꞌ tiꞌo hawaꞌi kubahaꞌki!”

⁵⁸Hawaꞌi morue uko tiꞌo, uwaꞌ womo to moꞌitonoi hi Peturuꞌ notiꞌi, “Ingko woꞌo haduo aware?” Angkana hi Peturuꞌ mehoniꞌ, “Aa, handoꞌiokae aku!”

⁵⁹Ba hajaaꞌi uko tiꞌo uwaꞌ womo haduo mantiꞌi, “Tuꞌu, toaꞌ hieꞌe topetuntuna hi Yesu, alaꞌ io woꞌo toaꞌ toGalilea.”

⁶⁰Angkana hi Peturuꞌ mehoniꞌ, “Hawaꞌi kubahaꞌ hapo to itiꞌi tiꞌo!” Kolentuꞌana hi Peturuꞌ mololita, mentaroꞌoꞌuoꞌmo manuꞌno,

⁶¹Hei mehahiliꞌmo hi Yesu mampenotoꞌ hi Peturuꞌ. I tempo tiꞌo, noponindimo hi Peturuꞌ lolitane Pueꞌ to mantiꞌi, “Ikohandoaꞌana tene mentaroꞌoꞌuoꞌ manuꞌ, tolu mpihamoko hingkiꞌ mosapuakaꞌA.”

⁶²Katoꞌo molai hi Peturuꞌ pe huwali ako meꞌola alaꞌ hanondoihaꞌi mpololeke.

⁶³Toaꞌ to mampoꞌodaꞌ hi Yesu mampopoꞌioꞌioꞌI hante rokondo.

⁶⁴Rotutuꞌi mataNe hei meꞌitanohi, himo to mokondoKo!

⁶⁵Hei woriꞌ mampopengaa lolita to kodake rotiꞌikiꞌI.

⁶⁶Poꞌonina mehoꞌolu lekiꞌ-lekiꞌna tutuꞌ tadulako-tadulako mpenomba hei guru-guru agama hante tomotodira toYahudi morampumohi i Tambi Peparesaꞌa Ngkodeꞌ Agama toYahudi, hei hi Yesu nikomi pe hinarora.

⁶⁷Rotiꞌi tadulako tiꞌo pe hi Yesu, “Itiꞌikika hinewowoꞌena, ba Ingko mpuꞌu Datu Topohompoꞌ?” Mehoniꞌ hi Yesu, “Kehapoꞌi Kutiꞌikikei, bateꞌna hawaꞌkei ipoꞌohi.

⁶⁸Hei ane meꞌitanoꞌA pe ingkei, bateꞌna hawaꞌAkei hingkiꞌ ihoniꞌ.

⁶⁹Angkana mepongka hinewowoꞌena Anaꞌ Manusiaꞌ hingkiꞌ mahura i tinaꞌ kuanana Pueꞌ Ala to makuasaꞌ.”

⁷⁰Rotiꞌi pe hi Yesu, “Ane watoꞌoꞌi Ingko hieꞌe Anaꞌnako Pueꞌ Ala?” Mehoniꞌ hi Yesu, “Ingkei hadoduomi mantiꞌi koꞌakuna Anaꞌne Pueꞌ Ala.”

⁷¹Katoꞌo rotiꞌi, “Hampoliꞌmo uwaꞌ sabiꞌ tohorimo Io hadoduona mantiꞌi!”