Read Rampi Lukas 23 Bible Online

Lukas 23 - Rampi bible

Lukas 23

¹Uko tiꞌo, noloumohi lekiꞌ-lekiꞌna tadulako tiꞌo hei mangkomi hi Yesu pe hinarona hi Pilatu.

²Kohupaꞌralu itoꞌo, ropepongkamo mosalaꞌi hi Yesu rotiꞌi, “Kihua toaꞌ hieꞌe mampowewoꞌ toaꞌ hante mampoturuꞌ toaꞌ to woriꞌ, hingkeꞌna anioꞌhi mobaiari sima pe datunta i Roma. Hei Notiꞌi woꞌo Io haduo Datu to nikokeneꞌi Kerisitu.”

³Katoꞌo, meꞌitanomo hi Pilatu pe hi Yesu notiꞌi, “Ingkoreꞌi dature toYahudi?” Mehoniꞌ hi Yesu, “Ingko hadoduomu to mantiꞌi.”

⁴Katoꞌo, notiꞌi hi Pilatu pe tutuꞌ tadulako-tadulako mpenomba hante pe toaꞌ to woriꞌ, “Hawaꞌi kuhua salaꞌne toaꞌ hieꞌe.”

⁵Angkana ropokaroho pesalaꞌire pe Io, rotiꞌi, “Io mampoturuꞌ toaꞌ hingkeꞌna meꞌewahi, horiana woriꞌhi to metuntu pe Io mepongka ka woiꞌ Yudea wute i woiꞌ Galilea alana wute iseꞌe.”

⁶Konohorinalu hi Pilatu lolitare tiꞌo, notonoihi, “Ba toGalilearope Toaꞌ hieꞌe?”

⁷Mehoniꞌhi, “Ioꞌ toGalilea.” Konohorinalu pehoniꞌre, io morumbaꞌmo toaꞌ mangkomi hi Yesu nolou pe Herode, alaꞌ Herode iomo gubenuru to moparenta i woiꞌ Galilea. I tempo tiꞌo woꞌo, Herode kolentuꞌana uwaꞌ i Yerusale.

⁸Motanaꞌ mpololeke Herode pangkiꞌ hi Yesu, alaꞌ moruemoꞌi dokoꞌ pangkiꞌ hi Yesu, hei moruemo nohori lolitane toaꞌ noniuꞌ Io, hei nopohinaru woꞌo hingkeꞌna Notidoꞌkiꞌi halangkaꞌ tandaꞌ kuasaꞌ to mepohele.

⁹Iomo hinaꞌ Herode mampowutemo woriꞌ langkaꞌ peꞌitano pe hi Yesu, angkana hawaꞌi mehoniꞌ.

¹⁰Uwaꞌhi woꞌo itoꞌo tutuꞌ tadulako-tadulako mpenomba hante guru-guru mpepoꞌohi to mosalaꞌi mpololeke hi Yesu i hinarona Herode.

¹¹Datu Herode hante surodaduna mampopoꞌioꞌiomo hi Yesu hei mampononaꞌaꞌI. Hi Yesu robaduꞌi baduꞌ kodatua, hei rokomi huliꞌ pe hi Pilatu.

¹²I ando tiꞌo, Herode hante hi Pilatu mewalihi mobole, hantaro hampiha momekabiriꞌhi.

¹³Katoꞌo, hi Pilatu morampu womo lekiꞌ-lekiꞌna tutuꞌ tadulako-tadulako mpenomba hante tomotodi-tomotodi bolaꞌ hei toaꞌ to woriꞌ,

¹⁴honiꞌi notiꞌikihi, “Toaꞌ hieꞌe ikomi womokei huliꞌ humei pe aku, hei itiꞌikei Io to moꞌoꞌaloꞌ toaꞌ to woriꞌ hingkeꞌna moꞌewa poparentaku. Ando hieꞌe kuparesaꞌmo i hinaromi, angkana hawaꞌi kuhua halangkaꞌ waliaNe to kodake hibali to isalaꞌikikei.

¹⁵Watoꞌo woꞌo pahuane Herode, hinaꞌ nopopahuliꞌlu humei pe aku. Toaꞌ hieꞌe hawaꞌi mowali hapo to masipatoꞌ nipahukuikiꞌI mahi.

¹⁶Mewaliꞌ, hingkiꞌ kurumbaꞌlu toaꞌ molabehiꞌ honiꞌi kupolohoꞌ.”

¹⁷Hi Pilatu mantiꞌi hatoꞌo alaꞌ i tempo posusaꞌ Pokalintora toYahudi, hi Pilatu hangangaa mampolohoꞌ haduo toaꞌ to nitarungkuꞌ, hintotoꞌ hante perapiꞌra toaꞌ to woriꞌ.

¹⁸Ikorohorina toaꞌ to woriꞌ lolitane, moloaꞌ-loaꞌmohi mantiꞌi, “Io hangangaa nirokoꞌ! Hi Baraba nipolohoꞌ!” (

¹⁹Hi Baraba tiꞌo, nitarungkuꞌ alaꞌ perorokoꞌna hei peꞌewana i lali kota.)

²⁰Hi Pilatu mololita tene hampiha hante loaꞌ to kodeꞌ pe toaꞌ to woriꞌ alaꞌ io dokoꞌi mampolohoꞌ hi Yesu.

²¹Angkana toaꞌ to woriꞌ moloaꞌhi mantiꞌi, “Pakumoꞌi i loti momehulepe! Pakumoꞌi i loti momehulepe!”

²²Ikotolu mpihana, hi Pilatu mampatiꞌikihi, “Haporeꞌi salaꞌNe? Howeꞌlu halangkaꞌ salaꞌNe to hintotoꞌ nipahukuikiꞌI wute mahi hawaꞌi uwaꞌ kuhua, mewaliꞌ kulabehiꞌlu honiꞌi kupolohoꞌ.”

²³Angkana toaꞌ to woriꞌ tiꞌo roperukuilu perapiꞌre hingkeꞌna hi Yesu nipaku i loti momehulepe. Koꞌukoana penanihi.

²⁴Katoꞌo hi Pilatu mobutusimo hingkeꞌna hi Yesu nihuku mahi angkana hi Baraba nipolohoꞌkihi motuntuni perapiꞌra. Uko tiꞌo, io mampeweimo hi Yesu pe iohi hingkeꞌna ropopoꞌioꞌioꞌI motuntuni peleira.

²⁵

²⁶Katoꞌo, surodadu toRoma mangkomimohi hi Yesu molai ka kota, hei i lumbu lala mampohidupaꞌkihi haduo toaꞌ to mekahi pe kota iomo to nikokeneꞌi hi Simo toKirene. Hi simo roparuku mangkowaꞌ loti momehulepe metuntu i tunduna hi Yesu.

²⁷Woriꞌ toaꞌ to motuntuni hi Yesu, uwaꞌhi woꞌo towoweꞌe to metuntu mampeꞌoloniꞌI.

²⁸Angkana hi Yesu mehahiliꞌ pe iohi hei mantiꞌi, “InioꞌAkei ipeꞌoloni. Agina ipeꞌolonikei wotami hadoduomi hante anaꞌmi.

²⁹Alaꞌ hingkiꞌ uwaꞌ tempone toaꞌ mantiꞌi, ‘Morasiꞌhi towoweꞌe to lalo hei tota kahampiha mepoꞌomiꞌ!’

³⁰I tempo tiꞌo, toaꞌ hingkiꞌ mantiꞌi pe biri-biri, ‘Agina imongkohimoka hante woiꞌ!’

³¹Ane toaꞌ mowali watoꞌo i loti to tuwuꞌ, hapona tene i loti to mobani.”[22]

³²Uwaꞌhi woꞌo roduo toaꞌ to kodake waliara to rokomi moꞌawa hante Io hingkiꞌ nihuku mahi.

³³Kohupaꞌra i biri to nikokeneꞌi Biri Bangaꞌ rouꞌ, hi Yesu nipakumo i loti momehulepe moꞌawa hante roduo toaꞌ to kodake waliara. Haduo nipaku tinaꞌ i koanana hei haduo tinaꞌ i koiriNa.

³⁴Hi Yesu mekokae, Notiꞌi, “Umoꞌ, Iꞌampunihi, alaꞌ hawaꞌi robahaꞌ hapo to rowali.” Surodadu to mopaku hi Yesu mampoꞌuwaꞌhi pantidoꞌ hingkeꞌna mampokononto kohihimona to pahua jubaNe.

³⁵Toaꞌ to woriꞌ mampeꞌele lekiꞌna tiꞌo. Uwaꞌhi woꞌo tadulakone toYahudi to mampononaꞌa hi Yesu hei mantiꞌi, “Elekei! Toaꞌ ntaniꞌna Nosulungi. Ane tuꞌu-tuꞌuꞌi Io Datu Topohompoꞌ to noꞌuwiꞌ Pueꞌ Ala, dehiluiae Noposalamaꞌi wotaNe hadoduoNa!”

³⁶Surodadu woꞌo mampokokeniꞌa hi Yesu, hei mampaꞌani maꞌinu anggoroꞌ to moꞌinsu,

³⁷rotiꞌi, “Ane tuꞌu-tuꞌuKo datura toYahudi, iposalamaꞌmo wotaMa!”

³⁸I womboꞌ loti popakuaNa teꞌukiꞌ waheꞌe, HIEꞋEMO DATUNE TOYAHUDI.

³⁹Haduo toaꞌ to kodake waliana to nipaku woꞌo i loti momehulepe i hiriNa, motaloleuꞌ hi Yesu, notiꞌi, “Itiꞌi Ingko Datu topohompoꞌ! Posalamaꞌmoꞌi wotaMa hante ingka!”

⁴⁰Angkana to haduona mokamoroki awana, notiꞌi, “Mahamporeꞌi hinaꞌ mantiꞌiko hatoꞌo! Hawaꞌkoreꞌi motehuꞌ pe Pueꞌ Ala? Kehapoki nihuku mahi moꞌawa-awa hante Io,

⁴¹angkana ingkiꞌ masipatoꞌki nihuku mahi alaꞌ nokomi walianta to kodake, angkana Io, hawaꞌi uwaꞌ salaꞌNe.”

⁴²Katoꞌo notiꞌi toaꞌ tiꞌo, “Yesu, Iponindiꞌa kaiaꞌ, ane mehupaꞌKo huliꞌ humei mewali Datu!”

⁴³Notiꞌi hi Yesu, “Mepoꞌohimoko pe Aku, i ando hieꞌe, moꞌawako hante Aku i lali Paradesi.”

⁴⁴Tenteꞌ hampuluꞌ dua pohoꞌando, katoꞌo mokorindi i peꞌohaꞌa tiꞌo wute tenteꞌ tolu kononewa,

⁴⁵alaꞌ ando hawaꞌi mewanta. Wida porindi Tambi to Mangkolehi mohepaꞌ merodolaꞌ.

⁴⁶Hi Yesu meꞌoꞌando hante loaꞌ to kodeꞌ, “Umoꞌ, pe lali koraweMu kupetandoki kotuwuꞌKa” Koꞌukona mowiharo hatoꞌo, pudiꞌmo peꞌinohaꞌNe.

⁴⁷Tadulako surodadu mampeꞌele hapo to mewali, io mampokodeꞌ Pueꞌ Ala, notiꞌi, “Tuꞌu toaꞌ hieꞌe toaꞌ tota masalaꞌ!”

⁴⁸Toaꞌ woriꞌ to pangkiꞌ hapo to mewali tiꞌo, mahuliꞌmohi hante konohohoꞌ.

⁴⁹Lekiꞌna toaꞌ to pobahaꞌ hi Yesu, tekahihi towoweꞌe to motuntuniꞌI ka Galilea, metotiꞌi ka moꞌela hei roꞌokiꞌ hapo to mewali tiꞌo.

⁵⁰I tempo tiꞌo, uwaꞌ haduo tomaꞌani to nikokeneꞌi hi Yusuf to ka bolaꞌ Arimatea i woiꞌ Yudea. Hi Yusuf tiꞌo, iomo toaꞌ to moromiꞌ lalina hante mononto waliane. Moruemo mampekau kohupaꞌna poparentana Pueꞌ Ala. Io woꞌo haduo tadulako i Tambi Peparesaꞌa ngkodeꞌ pepoꞌohi toYahudi, angkana hawaꞌi noponiuꞌ pebutusire tadulako tiꞌo to mantiꞌi hi Yesu hangangaa nirokoꞌ.

⁵¹

⁵²Ikomahina hi Yesu, noloumo hi Yusuf mampomehuaki hi Pilatu mamperapiꞌ wotana hi Yesu hingkeꞌna notawuꞌi.

⁵³Uko tiꞌo, nopopengkohoumo wotane hi Yesu ka loti momehulepe, honiꞌi noputuꞌ hante wida to popuhiꞌ, hei noꞌuliꞌ i lali petowua to niwoloꞌ i biri watu. Petowua tiꞌo handoaꞌi tene kahampiha nipoꞌuliꞌi to mahi.

⁵⁴Ando tiꞌo iomo ando Popatimomoa, alaꞌ poꞌonina ando penombaha.

⁵⁵Hei towoweꞌe to mehupaꞌ moꞌawa hante hi Yesu ka Galilea, metuntuhi woꞌo mampeꞌele petowua tiꞌo hei hohumbo koniꞌuliꞌne hi Yesu i lali petowua.

⁵⁶Uko tiꞌo, mahuliꞌmohi nolou pe bolaꞌ mampotimomo kobobau hante minyaꞌ-minyaꞌ to mewowau hingkiꞌ ropakeꞌ mobobohi wotana hi Yesu, angkana i ando penombaha hawaꞌhi majama motuntuni Aturana hi Musa.