Read Rampi Lukas 24 Bible Online

Lukas 24 - Rampi bible

Lukas 24

¹Mehoꞌolu-olu i ando Minggu, noloumohi towoweꞌe tiꞌo pe petowua mangkomi rampa-rampa petomahi hante minyaꞌ-minyaꞌ to mewowau to ropatimomomo umbiꞌ.

²Hupaꞌmohi itoꞌo, roꞌokiꞌ mengkalolimo watu potutuꞌine wambaꞌ petowua.

³Hei mekahimohi pe lali petowua, angkana wotalokaꞌna hi Yesu hamboaꞌmo uwaꞌ.

⁴Kolentuꞌara metotiꞌi itoꞌo alaꞌ lemeniahi mampeꞌele tiꞌo, hampale roꞌokiꞌ meroduo toaꞌ meparewa to mekokiro metotiꞌi dodungku iohi.

⁵Katoꞌo morokaꞌhi mpololeke towoweꞌe tiꞌo, hei metoungkaꞌhi pe woiꞌ. Angkana roduo toaꞌ tiꞌohi mampatiꞌikihi, “Mahamporeꞌi hinaꞌ ipaliꞌkei toaꞌ to tuwuꞌ i lumbura to mahi?

⁶Io hawaꞌi uwaꞌ iseꞌe, alaꞌ Io tuwuꞌmo huliꞌ. Ipondindikei hapo to Notiꞌikikei hampiha i tempomi tene i woiꞌ Galilea,

⁷‘Anaꞌ Manusiaꞌ hangangaa nipewei pe toaꞌ to madosa hingkeꞌna nipakuꞌI i loti momehulepe, angkana ikotolu andona hingkiꞌ tuwuꞌ huliꞌ.’ ”

⁸Katoꞌo hongkoꞌ rokolowoi lolitane hi Yesu hampiha.

⁹Ipahuliꞌralu ka petowua ropowutemo hapo to mewali pe topeguruna hi Yesu to hampuluꞌ haduo hante pe lekiꞌ-lekiꞌna topetuntuNa ntaniꞌna.

¹⁰Towoweꞌe tiꞌo, iomo hi Maria Madalena, hi Yohana, hante hi Maria inoꞌna hi Yakobus, hante uwaꞌhi woꞌo towoweꞌe to ntaniꞌne to moꞌawa-awa hante iohi.

¹¹Angkana korohorinalu topeguruNa lolitare tiꞌo, hawaꞌi ropoꞌohi, rorekeꞌlu lolita to hawaꞌi tuꞌu.

¹²Angkana hi Peturuꞌ metotiꞌi kaliuꞌ mehilai nolou pe petowua. Kohupaꞌnalu itoꞌo, liu mehahiro pe lali petowua, noꞌokiꞌlu wida poputuꞌna romo to uwaꞌ itoꞌo. Hi Peturuꞌ lomenia mpololeke hei mahuliꞌ hante woriꞌ peꞌitano i lali pekirina noniuꞌ hapo to mewali.

¹³I ando tiꞌo woꞌo, uwaꞌ roduo toaꞌ topetuntuna hi Yesu to nolou pe bolaꞌ Emaus. Komoꞌelana bolaꞌ Emaus tiꞌo, hampuluꞌ hakilo hilakoꞌi komoꞌelane ka Yerusale.

¹⁴Kolentuꞌara matengkaꞌ, mololitamohi hapo to mewali tempo tiꞌo.

¹⁵Kolentuꞌara mololita, hi Yesu mehupaꞌ moꞌawa hante iohi matengkaꞌ.

¹⁶Roꞌokiꞌmo hi Yesu, angkana Pueꞌ mamporeroꞌhi horiana hawaꞌi robahaꞌ koꞌIonamo hi Yesu.

¹⁷Kolentuꞌara matengkaꞌ, hi Yesu mampatiꞌikihi, “Haporeꞌi to ipololitakei i kolentuꞌami matengkaꞌ?” Katoꞌo meꞌohaꞌhi hante handondoiha.

¹⁸Katoꞌo haduo to nikokeneꞌi hi Kelopa meꞌitano pe hi Yesu, notiꞌi, “Ka umboluKoreꞌi hinaꞌ hawaꞌi Ibahaꞌ hapo to mewali i Yerusale haꞌumbora ando to liu?”

¹⁹Hi Yesu meꞌitano, “Haporeꞌi to mewalio?” Rotiꞌi, “To mewali tiꞌo noniuꞌ hi Yesu toNasareꞌ! Io haduo nabi to makuasaꞌ i pajamaNa hei i pololitaNa, moromiꞌ i hinarona Pueꞌ Ala moromiꞌ i hinarona toaꞌ.

²⁰Tutuꞌ-tutuꞌ tadulako mpenomba hante tomotodi-tomotodi mampeserakakiꞌI pe topoparenta hingkeꞌna nihukuꞌI mahi. Iomo horiana hi Yesu nipakumo i loti momehulepe.

²¹Kotuꞌuana, Iomo to kipohinaru hingkiꞌ mampolohoꞌki toSaraeli ka poniꞌta. Hei hinewoꞌena, kotolu andonamo ka konirokoꞌaNa.

²²Uwaꞌhi towoweꞌe to moꞌawa-awa ingka noloumohi pe petowua mehoꞌolu-olu, angkana wotalokaꞌNa hamboaꞌmo uwaꞌ roꞌokiꞌ. Kipohoko mpololeke alaꞌ ipahuliꞌra ropowutekika kopangkiꞌre malaꞌeka i petowua to mantiꞌi kotuwuꞌnamo huliꞌ hi Yesu.

²³

²⁴Uko tiꞌo, haꞌumbora awangki nolou womohi pe petowua. Kohupaꞌra itoꞌo, roꞌokiꞌ bateꞌna hibali to rotiꞌi towoweꞌe hingkeꞌenia. Angkana wotalokaꞌna hi Yesu hawaꞌi uwaꞌ roꞌokiꞌ.”

²⁵Katoꞌo, hi Yesu mampatiꞌikihi, “Mahamporeꞌi hinaꞌ hawaꞌkei ibahaꞌ palaihane hapo to mewali? Hawaꞌreꞌi ipoꞌohikei lekiꞌ-lekiꞌne to rotiꞌi nabi hampiha?

²⁶Hieꞌemo to nipowutekikei nabi uluꞌana, Datu topohompoꞌ, hangangaa norumpa komaporiꞌ, honiꞌi pahua pahuraha to manobaꞌ hei to niꞌadaꞌi.”

²⁷Katoꞌo, hi Yesu mampokonontokihi lekiꞌ-lekiꞌna to teꞌukiꞌ i lali Suraꞌ to Mangkolehi noniuꞌ i wotaNa, mepongka ka suraꞌna nabi Musa wute pe suraꞌna nabi to ntaniꞌna.

²⁸Kododungkuralu i bolaꞌ to rotungkai, hi Yesu mampetoliu-liulu.

²⁹Angkana toaꞌ to roduo tiꞌo mokontoꞌI rotiꞌiki, “Maweomoki iseꞌe, alaꞌ hingkiꞌ winimoꞌi.” Mewaliꞌ maweomo mpuꞌu hi Yesu moꞌawa-awa hante iohi.

³⁰I tempora hingkiꞌ mangka moꞌawa-awa, hi Yesu moroa depa Nopekokaeki, Nokebiꞌ-kebiꞌmo hei Notandokihi.

³¹Katoꞌo robahaꞌmo koꞌionamo hi Yesu. Uko tiꞌo, hangkaꞌ-hangkaꞌ romo moholi ka hinarora hamboaꞌmo roꞌokiꞌ.

³²Mowiharomohi, rotiꞌi, “I lumbu lala hingkeꞌenia, motanaꞌ mpololeke lalinte Nopololitaki hei Nopokonontokiki hapo to teꞌukiꞌ i lali Suraꞌ Mangkolehi noniuꞌ wotaNa!”

³³Tempo tiꞌo, kaliuꞌ mahuliꞌhi nolou pe Yerusale. Kohupaꞌralu inoꞌo, rohuamo topeguruNe hi Yesu to hampuluꞌ isaꞌ to kolentuꞌara mororampu hante awara.

³⁴TopeguruNa to hampuluꞌ isaꞌ mantiꞌi, “Tuꞌu mpololeke, Pueꞌ tuwuꞌmo huliꞌ. Io mampomombahamo wotaNa pe hi Simo!”

³⁵Mewaliꞌ, toaꞌ to roduo tiꞌo mampololitahi woꞌo lekiꞌ-lekiꞌna to mewali i lumbu lala hingkeꞌenia, hei mampowutemohi hapo to mewali i tempona hi Yesu mokebiꞌ-kebiꞌ roti, alaꞌ i tempo tiꞌo, hongkoꞌ robahaꞌ kohiYesunamo to uwaꞌ moꞌawa-awa hante iohi.

³⁶Kolentuꞌara tene mololita, hangkaꞌ-hangkaꞌ romo hi Yesu metotiꞌi i lumbura hei Notiꞌi, “Tabea.”

³⁷Ropohoko hei motehuꞌhi, alaꞌ rotiꞌireaꞌ lomoa.

³⁸Angkana hi Yesu mololita, “Mahamporeꞌi hinaꞌ motehuꞌkei hei bata-bata lalimi?

³⁹Iꞌelekei korawengKa hante kapuꞌKu. Akumola hieꞌe! IperoramaꞌAkei hei ipomoꞌeleꞌAkei, alaꞌ lomoa hawaꞌi uwaꞌ ohina hante wukuna hibali to iꞌokiꞌkei i Aku.”

⁴⁰Hi Yesu mololita watoꞌo liu mampetidoꞌki pe iohi koraweNa hante kapuꞌNa,

⁴¹angkana handoaꞌi ropoꞌohi alaꞌ lemeniahi topeguruNe, hi Yesu meꞌitano pe iohi, “Uwaꞌ pangkamio?”

⁴²Katoꞌo liu ropaꞌani hamokuꞌ bouꞌ to lehaꞌmo.

⁴³Hi Yesu moroa bouꞌ tiꞌo liu Noꞌoka i hinarora.

⁴⁴Notiꞌi hi Yesu pe iohi, “To mewali hinewowoꞌena, iomo to Kutiꞌikimokikei i tempoKu tene moꞌawa-awa hante ingkei. Lekiꞌ-lekiꞌna to teꞌukiꞌ i lali Suraꞌna hi Musa hante suraꞌna nabi-nabi hante Suraꞌ Linga pepokodeꞌ noniuꞌ wotangKu, lekiꞌ-lekiꞌna hangangaa mewali.”

⁴⁵Uko tiꞌo, hi Yesu mampokononto hapo to i lali Suraꞌ Mangkolehi pe iohi,

⁴⁶Notiꞌi pe iohi, i lali Suraꞌ Mangkolehi teꞌukiꞌ waheꞌe, “Datu Topohompoꞌ hangangaa pahua komaporiꞌ hante komahi, hei ikotolu andona hingkiꞌ tuwuꞌ huliꞌ.

⁴⁷Hei lekiꞌ-lekiꞌna toaꞌ hangangaa mengkatobaꞌ ka dosara, hingkeꞌna dosara noꞌampuni Pueꞌ Ala, alaꞌ koNohompoꞌramo Datu topohompoꞌ. Hei kareba tiꞌo hangangaa nipekarebaiki pe lekiꞌ-lekiꞌna roboꞌ-roboꞌ i duniaꞌ, mepongka ka Yerusale.

⁴⁸Ingkeimola to mosobiꞌi lekiꞌ-lekiꞌna tiꞌo hei Kurumbaꞌkei mampowute.

⁴⁹Hei hingkiꞌ Kupokatukikei hapo to nodandimo UmoꞌKu. Angkana ingkei hangangaa tontona mampekau i kota hieꞌe wute itorimokei kuasaꞌne Pueꞌ Ala.”

⁵⁰Uko tiꞌo, nopoꞌawamohi hi Yesu molai ka kota Yerusale, dodungku pe bolaꞌ Betania. Katoꞌo Nohinimo koraweNe hei mobarakatihi.

⁵¹Kolentuꞌana Nobarakatihi, mengkaꞌoreꞌmo Io pe suruga.

⁵²Melingkotuꞌmohi menomba pe Io, honiꞌhi mahuliꞌ pe Yerusale hei motanaꞌ mpololeke lalire.

⁵³I Yerusale, ando-andona morampuhi i Tambina Pueꞌ Ala hei mampokodeꞌhi Pueꞌ Ala.