Read Rampi Lukas 3 Bible Online

Lukas 3 - Rampi bible

Lukas 3

¹I toꞌa kohampuluꞌ limona poparentana datu ngkodeꞌ Tiberiu moparenta i kota Roma, tempo tiꞌo to mewali gubenuruꞌ i woiꞌ Yudea, iomo hi Pontius Pilatu, hante datu Antipa to moparenta i Galilea. Hi Pilipu halalina Herode, iomo to moparenta i woiꞌ Iturea hei i Tarakoniti, hei hi Lisania moparenta i Abilene.

²To mewali tadulako mpenomba ngkodeꞌ i tempo tiꞌo, hi Hanas hante hi Kaiapa. I toꞌa tiꞌo, hi Yohanes anaꞌna hi Sakaria mantorimo pohawaꞌna Pueꞌ Ala i popada woꞌoni.

³Iomo horiana hi Yohanes motengkaꞌimo bolaꞌ-bolaꞌ to i bota uwai Yarade mampowute Pohawaꞌna Pueꞌ Ala pe toaꞌ to woriꞌ notiꞌi, “Mengkatobaꞌmokei ka dosami hei humeimokei kuriu hingkeꞌna dosami noꞌampuni Pueꞌ Ala.”

⁴Pajamana hi Yohanes tiꞌo mobuhoꞌi hapo to teꞌukiꞌ i lali Suraꞌna Nabi Yesaia to mantiꞌi waheꞌe, Uwaꞌ haduo toaꞌ to meꞌoꞌando i popada woꞌoni notiꞌi, “Hingkiꞌ hupaꞌmo Pueꞌ! Nipatimomomo lalaNe! Nipokononto lala to hingkiꞌ Nopoliuhi!

⁵To melokeꞌ-lokeꞌ hangangaa nimongkohi, to mebiri-biri hangangaa nipokorante. To molengkoꞌ-lengkoꞌ hangangaa nipokononto, hei to memongku hangangaa nipokorante.

⁶Uko tiꞌo, lekiꞌ-lekiꞌna toaꞌ hingkiꞌ pangkiꞌ Datu Topohompoꞌ to norumbaꞌ Pueꞌ Ala.” [4]

⁷Woriꞌ toaꞌ nolou mampoperiu pe hi Yohanes, hei notiꞌikihi, “Hibalikei muleꞌna ule to moꞌupoꞌ! Mahamporeꞌi hinaꞌ humeikei? Ba ipekirikei hingkiꞌ himpolohoꞌkei ka kobukotana Pueꞌ Ala to hingkiꞌ mehupaꞌ?

⁸Ane tuꞌu-tuꞌu mpuꞌu mengkatobaꞌmokei ka dosami, iwalimokei walia to moromiꞌ. Hei anioꞌ itiꞌikei, ‘Ingkiꞌ hieꞌe, muleꞌnaki hi Burahima. Hawaꞌki hingkiꞌ nohuku Pueꞌ Ala.’ Tiꞌo hawaꞌi tuꞌu! Nipehoromua, ane nolei Pueꞌ Ala, muleꞌna hi Burahima wadi Nopopewali ka watu hieꞌe.

⁹Hingkiꞌ hupaꞌ pehukune Pueꞌ Ala! Pehukune tiꞌo hibali uwahi timomomo. Lekiꞌ-lekiꞌna loti to hawaꞌi mowuaꞌ moromiꞌ hingkiꞌ nitowi hei nitube pe lali api.”

¹⁰Toaꞌ woriꞌ meꞌitano pe hi Yohanes rotiꞌi, “Ane watoꞌoꞌi, hapomo to hangangaa kiwali?”

¹¹Mehoniꞌ hi Yohanes, “Hihimo to merompepaꞌ baduꞌna, hampepaꞌ hangangaa nopepaꞌaniki pe toaꞌ to hawaꞌi uwaꞌ baduꞌna. Hatoꞌo woꞌo, hihimo to uwaꞌ pangkana, hangangaa nodolaꞌ pe toaꞌ to bilora.”

¹²Uwaꞌhi woꞌo toperuruꞌ sima to nolou mampoperiu pe hi Yohanes. Meꞌitanohi rotiꞌi, “Guru, hapomo to hangangaa kiwali?”

¹³Mehoniꞌ hi Yohanes, “Inioꞌkei mesingaraꞌ sima meliu ka to nopokonontomo topoparenta.”

¹⁴Uwaꞌhi surodadu to nolou meꞌitano pe hi Yohanes rotiꞌi, “Hade ingka, hohumbomoka? Hapomo to hangangaa kiwali?” Notiꞌikihi, “Inioꞌkei mamperompoꞌi parewana toaꞌ ntaniꞌna, hei inioꞌkei mowuti pe toaꞌ hingkeꞌna nipaꞌanikei doiꞌ. Ganaꞌlu haromi to ipakeꞌkei.”

¹⁵I tempo tiꞌo, toaꞌ to woriꞌ mampekauhi kohupaꞌna Datu Topohompoꞌ to nodandi Pueꞌ Ala. Iomo hinaꞌ meꞌitanohi haduo hei haduo rotiꞌi, ba hi Yohanesmo tiꞌo Datu Topohompoꞌ.

¹⁶Hi Yohanes mehoniꞌ, “Ane aku, kuriulukei hante uwai. Angkana uwaꞌ Haduo to hingkiꞌ humei to meliu kuasaꞌNe ka aku. Howeꞌ moꞌuweꞌ pehiluꞌ sanalaꞌNa, hawaꞌa masipatoꞌ. Io to hingkiꞌ moriukei hante Inohaꞌ Mangkolehi hei api.

¹⁷Io nipandiriꞌ hibali haduo toaꞌ to mantopihi kina hingkeꞌna kina to moꞌohi hingkiꞌ tepohida ka kina to langkoꞌ. Kina to moꞌohi nopopekahi i lali buhoꞌ, hei to langkoꞌ hingkiꞌ nitube pe api to hawaꞌi hingkiꞌ pideꞌ.”

¹⁸I tempona hi Yohanes mampowute Kareba Moromiꞌ pe toaꞌ to woriꞌ, woriꞌ langkaꞌna pepoturuꞌ to nopowute.

¹⁹Io mokamoroki datu Antipa, gubenuru i woiꞌ Galilea, alaꞌ io moroa hi Herodia, hantambina kokaꞌna, hingkeꞌna nopohantambiꞌi. Haꞌio-iolu to nokamoroki hi Yohanes. Woriꞌ tene waliana to kodake.

²⁰Konohorinalu Herode konokamorokine hi Yohanes tiꞌo, io hawaꞌi mampohinte waliana to kodake, angkana wuloko notambai, io morumbaꞌ surodaduna hingkeꞌna hi Yohanes nihokiꞌ hei rotarungkuꞌ.

²¹Kohandoaꞌna tene nitarungkuꞌ hi Yohanes, woriꞌ toaꞌ to nolou mampoperiu pe io. Hi Yesu woꞌo nolou mampoperiu pe hi Yohanes. I tempona hi Yesu noriu, Io mekokae. Kolentuꞌana Mekokae, laniꞌ moweaꞌmo,

²²hei Inohaꞌ Mangkolehi mengkohoumo pe Io hibali tinti merpati. Hante uwaꞌ wiharo ka Suruga to mantiꞌi, “Ingkomo Anaꞌka to Kupokarima hei to mampomotanaꞌ lalingKu.”

²³Ganaꞌmo tolu mpuluꞌ ntoꞌana tinuwuꞌNa, hi Yesu mepongkamo mampopatengkaꞌ jamaNa to nopaꞌaniki Pueꞌ Ala. Motuntuni pahuara toaꞌ, Hi Yesu iomo anaꞌna hi Yusuf, hi Yusuf anaꞌna hi Eli, Hi Eli anaꞌna hi Mata, hi Mata anaꞌna hi Lewi, Hi Lewi anaꞌna hi Maki, hi Maki anaꞌna hi Yanai, Hi Yanai anaꞌna hi Yusuf, hi Yusuf anaꞌna hi Matika, Hi Matika anaꞌna hi Amos, hi Amos anaꞌna hi Nahum, Hi Nahum anaꞌna hi Heseli, hi Heseli anaꞌna hi Nagai, Hi Nagai anaꞌna hi Maa, hi Maa anaꞌna hi Matika, Hi Matika anaꞌna hi Simei, hi Simei anaꞌna hi Yose, Hi Yose anaꞌna hi Yoda, hi Yoda anaꞌna hi Yohana, Hi Yohana anaꞌna hi Rese, hi Rese anaꞌna hi Serubabel, Hi Serubabel anaꞌna hi Sealtie, hi Sealtie anaꞌna hi Neri, Hi Neri anaꞌna hi Maliki, hi Maliki anaꞌna hi Adi, Hi Adi anaꞌna hi Kosa, hi Kosa anaꞌna hi Emada, Hi Emada anaꞌna hi Ere, hi Ere anaꞌna hi Yesua, Hi Yesua anaꞌna hi Eliese, hi Eliese anaꞌna hi Yori, Hi Yo(...)