Read Rampi Lukas 4 Bible Online

Lukas 4 - Rampi bible

Lukas 4

¹Koꞌukona hi Yesu niriu, Io nokuasaꞌi Inohaꞌ Mangkolehi. Alaꞌ perandana Inohaꞌ mangkolehi Io mampolihimo uwai Yarade nolou pe popada woꞌoni.

²I lali iba mpuluꞌ andona, Io nohohongkeꞌi Belisiꞌ. I tempona hi Yesu itoꞌo, Io hawaꞌi mangka hapo-hapo. Liumo iba mpuluꞌ andona, biloramo.

³Notiꞌi Belisiꞌ pe hi Yesu, “Ane tuꞌu-tuꞌuKo mpuꞌu AnaꞌNa Pueꞌ Ala, Ipopewalimo watu hieꞌe mewali depa!”

⁴Mehoniꞌ hi Yesu, “I lali Suraꞌ Mangkolehi teꞌukiꞌ waheꞌe, ‘Ane pangkaluꞌi, hawaꞌi ganaꞌ i lali kotuwuꞌna toaꞌ.’ ”

⁵Uko tiꞌo, Belisiꞌ mangkomi womo hi Yesu nolou pe kodingkaoꞌana hei nopetidoꞌki lekiꞌ-lekiꞌna kodatua i duniaꞌ

⁶notiꞌi, “Lekiꞌ-lekiꞌna kuasaꞌ hante kosugiꞌana duniaꞌ, hingkiꞌ kupaꞌanikiKo, alaꞌ lekiꞌ-lekiꞌna hieꞌe aku tumpune, hei wadi woꞌo kupaꞌaniki pe hihimolu to kuponiuꞌ.

⁷Mewaliꞌ, ane menombaKo pe aku, lekiꞌ-lekiꞌna hieꞌe hingkiꞌ kupaꞌanikiKo.”

⁸Mehoniꞌ hi Yesu, “Teꞌukiꞌ i lali Suraꞌ Mangkolehi, ‘Hangangaa menombako pe Pueꞌ Alamu, alaꞌ Iolu to masipatoꞌ ipenombai.’ ”

⁹Uko tiꞌo, Belisiꞌ mangkomi womo hi Yesu nolou pe Yerusale, nopopetotiꞌi i womboꞌ wumbu Tambina Pueꞌ Ala, honiꞌi notiꞌi, “Ane tuꞌu-tuꞌuKo mpuꞌu Anaꞌna Pueꞌ Ala, mengkonawuꞌmoKo ka wumbu hieꞌe!

¹⁰HawaꞌKo hingkiꞌ mahampo-hampo, alaꞌ uwaꞌ teꞌukiꞌ i lali Suraꞌ Mangkolehi, ‘Pueꞌ Ala morumbaꞌ malaꞌekaNahi mampoꞌodaꞌKo,

¹¹hei hingkiꞌ mohulaweꞌKo, hingkeꞌna kapuꞌMu hawaꞌi noniuꞌ watu.’ ”

¹²Mehoniꞌ hi Yesu, “Teꞌukiꞌ woꞌo i lali Suraꞌ to Mangkolehi, ‘Inioꞌko mohohongkeꞌi Pueꞌ Alamu.’ ”

¹³Koꞌukona hi Yesu nohohongkeꞌi, molaimo Belisiꞌ mampekau womo tempo to moromiꞌ.

¹⁴Alaꞌ kuasaꞌna Inohaꞌ Mangkolehi mahuliꞌmo hi Yesu nolou pe woiꞌ Galilea. Kareba noniuꞌ Io tekarebaimo i humanele woiꞌ Galilea.

¹⁵Io mepoturuꞌ i tambi-tambi penombahara toYahudi, hei Nopokodeꞌ lekiꞌ-lekiꞌna toaꞌ.

¹⁶Noloumo hi Yesu pe Nasareꞌ, bolaꞌ konipokodeꞌana. Hei hibali biasaNa, i ando penombahara toYahudi, Io mekahi pe tambi penombaha, honiꞌi Io metotiꞌi mobasa Suraꞌ Mangkolehi.

¹⁷I tempo tiꞌo, Io nipaꞌani Suraꞌ Mangkolehi to noꞌukiꞌ nabi Yesaia hampiha. Katoꞌo hi Yesu mowuraꞌ suraꞌ tiꞌo, hei Nopaliꞌ katoꞌo Nobasa lolita to mantiꞌi waheꞌe,

¹⁸“Inohaꞌna Pueꞌ Ala uwaꞌ i Aku, alaꞌ Akumo to Niparilangkaꞌ mampowute Kareba Moromiꞌ, pe toaꞌ to merima-rima tuwuꞌra. Hei NorumbaꞌA: ako mampolohoꞌ to nitawaniꞌ, ako mampopangkiꞌ tobilo, hei ako mampolohoꞌ to nipohawiꞌ,

¹⁹hei Kupekarebaikihi kohingkiꞌ hupaꞌne tempona Pueꞌ mamposalamaꞌ toaꞌNa.” [5]

²⁰Koꞌukona mobasa, Nolulumo huliꞌ suraꞌ tiꞌo, Nopopahuliꞌ pe topajama i lali Tambina Pueꞌ, honiꞌi mahuramo hante mepongka mepoturuꞌ. Lekiꞌ-lekiꞌna toaꞌ i lali tambi penombaha tiꞌo mononto matare mampeꞌele hi Yesu alaꞌ dokoꞌhi mampehoromua lolitaNa.

²¹Nopololiumo pepoturuꞌNe notiꞌi, “I ando hieꞌe, tebuhoꞌimo Pohawaꞌne Pueꞌ Ala to ka ihorimokei Kubasa hingkonia!”

²²Lemeniahi lekiꞌ-lekiꞌne toaꞌ to mampehoromua lolitaNa rotiꞌi, “Moromiꞌ mpuꞌu pololitaNe! Mononto loleke hapo to notiꞌi, hantaro Io anaꞌnalu hi Yusuf!”

²³Iomo hinaꞌ notiꞌikihi hi Yesu, “Mononto uwaꞌkei to hingkiꞌ mantiꞌi pe Aku, ‘Ee sando, ipokoꞌoriꞌ dulu wotaMa hadoduoMu!’ Alaꞌ iomo honiꞌi itiꞌikei ‘Tandaꞌ kuasaꞌ to Iwali i bolaꞌ Kapenau, Iwali woꞌo iseꞌe i bolaꞌmu hadoduomu.’ ”

²⁴Tuꞌu to Kutiꞌi hieꞌe, “Ibahaꞌlukei, hawaꞌi uwaꞌ haduo nabi to nitorimo i bolaꞌna hadoduona.

²⁵Kutiꞌikikei i tempona nabi Elia hampiha. I lali tolu ntoꞌa oni mbula hawaꞌi ura, wute mewali kobiloraha to makaja i humanele woiꞌ. I tempo tiꞌo, woriꞌhi towoweꞌe tobembaꞌ i woiꞌ Saraili.

²⁶Kehapoꞌi hatoꞌo, Pueꞌ Ala hawaꞌi morumbaꞌ hi Elia mosulungi tobembaꞌ tiꞌo. Angkana hi Elia nirumbaꞌ nolou pe bolaꞌ Sarapaꞌ, mosulungi haduo towoweꞌe tobembaꞌ i woiꞌ Sido to handoꞌio toSaraeli.

²⁷Watoꞌo woꞌo i tempona nabi Elisa, woriꞌ mpuꞌu toSaraeli totungki, angkana hawaꞌi uwaꞌ howeꞌ haduo to nopokoꞌoriꞌ hi Elisa, wuliha mampokoꞌoriꞌ to Siria to hadoduolu, iomo hi Naꞌama.”

²⁸Korohorinalu toaꞌ i lali tambi penombaha lolitane hi Yesu, bukotahi mpololeke.

²⁹Metotiꞌimohi mampopolai hi Yesu nolou pe huwali bolaꞌ moliu i tua. Tungkaihara hingkiꞌ mohomunaki hingkeꞌna Nomonawuꞌ pe tua, alaꞌ bolaꞌra i womboꞌ biri.

³⁰Angkana hi Yesu matengkaꞌ i kohelaꞌna toaꞌ to woriꞌ, hei liuhi Nopolihi.

³¹Uko tiꞌo, hi Yesu nolou pe bolaꞌ Kapenau i woiꞌ Galilea. Kohupaꞌna itoꞌo, Io mepoturuꞌ i tambi penombaha i ando penombahara toYahudi.

³²Lemeniahi toaꞌ pahori poturuꞌna, alaꞌ poturuꞌna hibali hante to nopowute haduo toaꞌ to makuasaꞌ mpololeke.

³³Uwaꞌ woꞌo i tambi penombaha tiꞌo haduo toaꞌ to nopekahii lomoa. Moloaꞌ-loaꞌmo notiꞌi,

³⁴“O Yesu toNasare! Hingkiꞌ Ipahampoꞌa? Ba hingkiꞌ Ihorewuꞌiꞌa? Kubahaꞌ koꞌIngkonamo Suro to mangkolehi ka Pueꞌ Ala!”

³⁵Angkana nokamoroki hi Yesu Notiꞌi, “Mondiiꞌko! Polai ka toaꞌ hieꞌe!” Hampale toaꞌ tiꞌo modungka i hinarona toaꞌ to woriꞌ angkana io hawaꞌi marugiꞌ, hei molaimo mpuꞌu lomoa tiꞌo.

³⁶Lekiꞌ-lekiꞌna toaꞌ to pangkiꞌ hapo to mewali tiꞌo lemeniahi, koꞌukoana mololitamohi haduo hei haduo rotiꞌi, “Makuasaꞌ mpuꞌu lolitaNe! Iana woꞌo tokodake mampetuntui hawaꞌNa.”

³⁷Katoꞌo, kareba noniuꞌ hi Yesu tekarebamo pe humanele woiꞌ tiꞌo.

³⁸Uko tiꞌo, molaimo hi Yesu ka lali tambi penombaha, nolou pe tambina hi Simo. Ponianana hi Simo towoweꞌe, makaja kohoholeꞌne. Mewaliꞌ toaꞌ itoꞌo merapiꞌhi sulungi pe hi Yesu.

³⁹Noloumo hi Yesu metotiꞌi i hirina towoweꞌe tiꞌo, mampokoꞌoriꞌ hakiꞌna. Mewaliꞌ moꞌoriꞌmo mpuꞌu towoweꞌe tiꞌo, kaliuꞌ meꞌaro honiꞌi mampatimomoki pangkana hi Yesu.

⁴⁰Ikopentoriꞌnalu ando, woriꞌ womohi toaꞌ nolou pe hi Yesu, mangkomi lekiꞌ-lekiꞌna halalira to mohakiꞌ molangkaꞌ-langkaꞌ. Hi Yesu molule koraweNa i tutuꞌra hei Nopokoꞌoriꞌhi.

⁴¹Woriꞌ woꞌo tokodake to nopopolai hi Yesu ka toaꞌ to nopekahii. Tokodake to Nopopolaihi tiꞌo, meꞌoꞌando-andohi rotiꞌi, “Kibahaꞌ koꞌIngkona Anaꞌna Pueꞌ Ala!” Angkana tokodake tiꞌo Noꞌopihi hi Yesu. Hawaꞌhi Nopoliu mowiharo koꞌIona Datu Topohompoꞌ.

⁴²Poꞌonina mehoꞌolu, molaimo hi Yesu ka bolaꞌ tiꞌo nolou pe komonondiiꞌana. Woriꞌ toaꞌ nolou mampaliꞌI, wute rohua. Roperapiꞌ hingkeꞌna inioꞌhi Nopolihi.

⁴³Angkana notiꞌi hi Yesu, “Kareba moromiꞌ noniuꞌ Kodatuana Pueꞌ Ala hangangaa Kupowute woꞌo pe bolaꞌ-bolaꞌ ntaniꞌna. Alaꞌ iomo tungkaihana Pueꞌ Ala morumbaꞌA humei pe duniaꞌ.”

⁴⁴Katoꞌo hi Yesu mampowute Kareba Moromiꞌ i tambi-tambi penombaha i humanele woiꞌra toYahudi.