Read Rampi Lukas 5 Bible Online

Lukas 5 - Rampi bible

Lukas 5

¹I hampiha tempo, kolentuꞌana hi Yesu metotiꞌi i bota rano Genesareꞌ,[6] woriꞌhi toaꞌ to mehupaꞌ momekari-karimohi mangkodokoꞌi mampehoromua pohawaꞌna Pueꞌ Ala to nopowute hi Yesu.

²I tempo tiꞌo, hi Yesu pangkiꞌ roꞌonu duanga i bota rano, topojalaꞌ tiꞌo mengkohoumohi ka duangara hei mowaheꞌ jalaꞌra.

³Noloumo hi Yesu mehendeꞌ pe haꞌanu duanga, iomo duangana hi Simo, hei noperapiꞌ hingkeꞌna hi Simo mobohe duangana moꞌela hangkiuꞌ ka botana rano. Uko tiꞌo, mahuramo i duanga honiꞌi mampoturuꞌ toaꞌ to woriꞌ.

⁴Uko mepoturuꞌ, notiꞌi hi Yesu pe hi Simo, “Ibohemo duangama nolou pe kokuladuana, hei ipelubaꞌmo jalaꞌma hingkeꞌna pahuakei bouꞌ.”

⁵Mehoniꞌ hi Simo, “Guru, ngkahaminiamoka mojalaꞌ, angkana hawaꞌi uwaꞌ howeꞌ hambaꞌa to noroa jalaꞌki. Angkana kehapoꞌi hatoꞌo, hingkiꞌ kupelubaꞌ mpuꞌu, alaꞌ Ingko to morumbaꞌa.”

⁶Katoꞌo, ropelubaꞌmo mpuꞌu jalaꞌre, hei woriꞌ mpololeke bouꞌ to noroa, koꞌukoana jalaꞌre hingkiꞌ morenda.

⁷Uko tiꞌo rokawemo aware to i lali duanga ntaniꞌna hingkeꞌna nipororuihi. Katoꞌo nipororuimohi mpuꞌu, duangara to roꞌonu tiꞌo roꞌohi bouꞌ wute hingkiꞌ mentoriꞌ nokomi komadorina.

⁸Hokomo hi Simo Peturuꞌ hante awana pangkiꞌ hapo to mewali tiꞌo, alaꞌ nokomi koworiꞌna bouꞌ to rojalaꞌ. Iomo hinaꞌ melingkotuꞌmo hi Peturuꞌ pe hinarona hi Yesu notiꞌi, “Pueꞌ anioꞌa Ikododungkui, alaꞌ aku hieꞌe toaꞌ to madosaꞌa.”

¹⁰Uwaꞌhi roduo awana hi Simo to hoko woꞌo pangkiꞌ hapo to pewali tiꞌo. Konaꞌra hi Yakobus hante hi Yohanes, anaꞌnahi hi Sebedeu to majama moꞌawa hante hi Simo. Notiꞌi hi Yesu pe hi Simo, “Anioꞌko motehuꞌ. Mepongka hinewowoꞌena, haꞌiomo bouꞌ to ijalaꞌo, angkana toaꞌmo to ijalaꞌo.”

¹¹Uko tiꞌo, duangara roruiꞌmo nolou pe lerina hei lekiꞌ-lekiꞌna lumara ropolihi honiꞌhi metuntu pe hi Yesu.

¹²I hampiha, tempona hi Yesu uwaꞌ i haꞌanu kota. Itoꞌo uwaꞌ haduo toaꞌ totungki wotana. Totungki tiꞌo pangkiꞌ hi Yesu, katoꞌo melingkotuꞌmo metoungkaꞌ i hinaroNa, hei noperapiꞌ pe Io notiꞌi, “Pueꞌ, kubahaꞌ koꞌIbiaꞌne mepokoꞌoriꞌ. Ane hiniꞌKo, Ipokoꞌoriꞌa kaiaꞌ!”

¹³Noperamamo hi Yesu toaꞌ tiꞌo honiꞌi notiꞌi, “Kupoꞌioꞌ mpololeke, moꞌoriꞌmoko!” Hangkaꞌ-hangkaꞌlu, hakiꞌ to mekododokui tiꞌo moholimo.

¹⁴Uko tiꞌo hi Yesu moꞌopi toaꞌ tiꞌo Notiꞌi, “Anioꞌ ipetiꞌikiꞌi pe hihimo hapo to mewali hingkonia. Noloumoko dulu ipetidoꞌkimo wotama pe tadulako mpenomba hingkeꞌna noꞌokiꞌi komoꞌoriꞌmumo, hante ikomimo popenombama motuntuni Aturana hi Musa, hingkeꞌna tongawa i lekiꞌ-lekiꞌna toaꞌ komoꞌoriꞌmamo.”

¹⁵Kehapoꞌi niꞌopi mampowute kareba konipokoꞌoriꞌnamo angkana tontona tekareba pe imbo-imbo, alana woriꞌ toaꞌ to mehupaꞌ pe hi Yesu hingkeꞌna mampehoromua lolitaNa hei Nopokoꞌoriꞌhi ka hakiꞌra.

¹⁶Kehapoꞌi watoꞌo, hi Yesu poko nolou mekokae hadoduona i peꞌohaꞌa to monondiiꞌ.

¹⁷Kolentuꞌana hi Yesu mepoturuꞌ, uwaꞌhi haꞌumbora toParisi hante guru-guru agama to mahura itoꞌo. Toaꞌ to hupaꞌhi tiꞌo, ka woiꞌ Galilea, Yudea, hei ka kota Yerusale. Kuasaꞌna Pueꞌ Ala uwaꞌ i hi Yesu, iomo hinaꞌ Nobiaꞌ mampokoꞌoriꞌ toaꞌ to mohakiꞌ.

¹⁸I tempo tiꞌo, hupaꞌhi woꞌo bahaꞌumbora toaꞌ to mangkowaꞌ haduo tokohu. Mampaliꞌhi lala hingkeꞌna hohumbohi mekahi pe lali tambi, alaꞌ dokoꞌhi mangkomi awara pe hinarona hi Yesu.

¹⁹Angkana hawaꞌhi hohumbo mekahi, alaꞌ tambi tiꞌo buhaꞌ mpololeke hante toaꞌ. Iomo hinaꞌ ropeponeꞌki tokohu tiꞌo pe dopiꞌ tambi. Uko tiꞌo, dopiꞌ tambi rorenda, honiꞌi tokohu tiꞌo roꞌulu hante aliꞌna wute i hinarona hi Yesu i lumbuna toaꞌ to woriꞌ.

²⁰Konoꞌokiꞌna hi Yesu maroho pepoꞌohire, Notiꞌimo pe tokohu tiꞌo, “Bee, teꞌampunimo dosama.”

²¹Bahaꞌumbohi guru agama hante toParisi to pahori lolitana hi Yesu tiꞌo. Iomo hinaꞌ mantiꞌihi haduo hei haduo, “Wurani mpuꞌu toaꞌ hieꞌe, mampononaꞌa Pueꞌ Ala. Himoto to nobiaꞌ moꞌampuni dosa? Hawaꞌi uwaꞌ to nobiaꞌ, bateꞌnalu Pueꞌ Ala.”

²²Nobahaꞌ hi Yesu hapo to i lalire. Iomo hinaꞌ notiꞌikihi, “Mahamporeꞌi hinaꞌ koiꞌ lalimi?

²³Imboꞌina to mololihaꞌ nitiꞌi, ‘teꞌampunimo dosama’ ba ‘peꞌaro hei matengkaꞌmoko?’

²⁴Angkana hinewowoꞌena hingkiꞌ Kupomombahakikei koꞌuwaꞌne kuasaꞌna Anaꞌ Manusiaꞌ moꞌampuni dosa i duniaꞌ hieꞌe.” Katoꞌo Notiꞌi pe tokohu tiꞌo, “Meꞌaromoko! Ilulumo aliꞌma, hei mahuliꞌmoko!”

²⁵Meꞌaromo mpuꞌu tokohu tiꞌo i hinarona toaꞌ to woriꞌ, nolulumo aliꞌne liu nokomi mahuliꞌ pe tambina. I lumbu lala, io mampokodeꞌmo Pueꞌ Ala.

²⁶Hokomohi mpuꞌu lekiꞌ-lekiꞌne toaꞌ to pangkiꞌ, hei mampokodeꞌmohi Pueꞌ Ala. Alaꞌ nokomi komotehuꞌra iomo hinaꞌ rotiꞌi, “Mepohele mpuꞌu hapo to mewali i ando hieꞌe!”

²⁷Uko tiꞌo molaimo hi Yesu, hei i lumbu lala Io pangkiꞌ haduo toperuruꞌ sima to mahura i kantoroꞌna, konaꞌna hi Lewi. Notiꞌi hi Yesu, “Metuntumoko pe Aku.”

²⁸Metotiꞌimo hi Lewi, nopolihimo lekiꞌ-lekiꞌne honiꞌi metuntu pe hi Yesu.

²⁹I tempo tiꞌo, hi Lewi mampoꞌuwaꞌ susaꞌ ngkodeꞌ i tambina, tandaꞌ komampokodeꞌna hi Yesu. Woriꞌhi toperuruꞌ sima hei toaꞌ ntaniꞌna to nowowoi mangka moꞌawa hante iohi.

³⁰Itoꞌo woꞌo uwaꞌhi haꞌumbora tadulako agama hante guru agama to motuntuni pepoturuꞌra toParisi. Mosalaꞌihi hi Yesu rotiꞌi pe topeguruna, “Mahamporeꞌi hinaꞌ mangkakei hante maꞌinu moꞌawa hante toperuruꞌ sima hante toaꞌ to madosa?”

³¹Nohoniꞌ hi Yesu, “Toaꞌ to hawaꞌi mohakiꞌ, hawaꞌi moparaluꞌi sando. Toaꞌ to mohaki'lu to paralu mampaliꞌ sando.

³²KohupaꞌKu hieꞌe hawaꞌA mowowoi toaꞌ to mononto waliara, angkana mowowoiꞌA toaꞌ to madosa hingkeꞌna nohohoꞌhi ka dosara.”

³³I tempo tiꞌo, uwaꞌhi haꞌumbora toaꞌ to meꞌitano pe hi Yesu rotiꞌi, “Topeguruna hi Yohanes pokohi maboki hei mekokae. Watoꞌo woꞌo topegurure toParisi. Mahamporeꞌi topeguruMa hinaꞌ hawaꞌhi maboki?”

³⁴Nohoniꞌ hi Yesu hante lolita pandiriꞌ Notiꞌi, “Ane uwaꞌ tene tomaꞌani to nipohamoko, toaꞌ to hupaꞌ i pepohamokoa hawaꞌhi hingkiꞌ maboki.

³⁵Angkana i hampiha tempo intu, tomaꞌani to nipahamoko hingkiꞌ niroa ka lumbura. I tempo tiꞌomo, honiꞌhi hingkiꞌ maboki.”

³⁶Nopowute woꞌo hi Yesu halangkaꞌ lolita pandiriꞌ Notiꞌi, “Hawaꞌi uwaꞌ haduo toaꞌ to modampelei baduꞌ to hohaimo hante hampepaꞌ wida to noheuꞌ ka baduꞌ to wolaꞌ. Alaꞌ ane nowaliꞌi hatoꞌo, mokodokoi rompepaꞌ parewa tiꞌo, baduꞌ to wolaꞌ hingkiꞌ mohepaꞌ hei wida to hohai hawaꞌi hintotoꞌ hante wida to wolaꞌ.

³⁷Watoꞌo woꞌo hawaꞌi uwaꞌ haduo toaꞌ to mantula anggoroꞌ to wolaꞌ i pebolaꞌana[7] to hohaimo. Alaꞌ ane nowali hatoꞌo, anggoroꞌ to wolaꞌ hingkiꞌ mampomopiheꞌ pebolaꞌa to hohaimo tiꞌo, koꞌukoana anggoroꞌ hibobo.

³⁸Mewaliꞌ, anggoroꞌ to wolaꞌ hangangaa nitula woꞌo i pebolaꞌana to wolaꞌ.

³⁹To ka maꞌinumo anggoroꞌ to moruemo, hawaꞌi nolei maꞌinu anggoroꞌ to wolaꞌ, alaꞌ anggoroꞌ to moruemo motomiꞌ nohori.”