Read Rampi Lukas 6 Bible Online

Lukas 6 - Rampi bible

Lukas 6

¹I hampiha tempo i ando penombaha,[8] hi Yesu hante topeguruna moliuhi i halimboꞌ kineteꞌ. Kolentuꞌara moliu i kineteꞌ tiꞌo, topeguruna hi Yesu mokoti wuaꞌ gandum, ropopio honiꞌi roꞌoka.

²Koroꞌokiꞌnalu toParisi hapo to rowali, rokamorokihi rotiꞌi, “Mahamporeꞌi hinaꞌ molungkaꞌikei atura agamanta? Majamakei i ando penombaha!”

³Mehoniꞌ hi Yesu notiꞌi, “Kutiꞌikae kaꞌibasamokei pohawaꞌne Pueꞌ noniuꞌ hapo to nowali datu Daudi hante awanahi hampiha i tempora bilora!

⁴Hi Daudi mekahi pe lali Bambaruꞌ Penombaha, honiꞌi mangka roti to nipopenomba pe Pueꞌ Ala, hei nodolaꞌ-dolaꞌkihi woꞌo awana. Motuntuni adaꞌ agamanta, tadulako mpenombalu to wadi mangka depa tiꞌo. Angkana kehapoꞌi watoꞌo, waliana hi Daudi tiꞌo hawaꞌi nisalaꞌi.”

⁵Nopololiu hi Yesu lolitaNe Notiꞌi, “Anaꞌ Manusiaꞌ makuasaꞌ mampokononto hapo to wadi niwali i ando penombaha.”

⁶I ando penombaha to ntaniꞌna, noloumo hi Yesu pe tambi penombahara toYahudi hei mepoturuꞌ itoꞌo. I tambi penombaha tiꞌo, uwaꞌ haduo toaꞌ to mahi korawe kuanana.

⁷Uwaꞌhi woꞌo haꞌumbora toParisi hante guru agama to mokamata mampaliꞌ komasalaꞌana hi Yesu, ba hingkiꞌ majama mpuꞌu i ando penombaha.

⁸Angkana nobahaꞌ hi Yesu tungkaihane lalira. Iomo hinaꞌ Nowowoi toaꞌ to mahi korawene tiꞌo, “Humeiko metotiꞌi i hinaro!” Noloumo mpuꞌu metotiꞌi itoꞌo.

⁹Uko tiꞌo hi Yesu meꞌitano, “Motuntuni adaꞌ agamanta, hapo to wadi towali i ando penombaha, mowaliki to moromiꞌ ba to kodake? Mosulungiki awanta ba morokoꞌki awanta?”

¹⁰Mehahiliꞌmo hi Yesu mampenotoꞌhi lekiꞌ-lekiꞌra, hei notiꞌi pe toaꞌ to mahi korawena tiꞌo, “Onaꞌi humei korawema!” Konoꞌonaꞌnalu korawene, kaliuꞌ moꞌoriꞌ.

¹¹Katoꞌo bukotahi mpololeke guru agama hante toParisi. Iomo hinaꞌ morapaꞌmohi mampaliꞌ akala, ba hapo to hingkiꞌ ropoꞌintuꞌa pe hi Yesu.

¹²Hawaꞌi morue katoꞌo, hi Yesu noloumo pe bobirina, hei mekokae hamini pe Pueꞌ Ala.

¹³Mewanta ando, Nododoemohi toaꞌ to metuntu pe io, hei Noꞌuwiꞌ hampuluꞌ meroduo ka lumbura. Iomohi to Nopokononto hi Yesu hingkeꞌna mewali suroNa to mampowute Kareba Moromiꞌ pe toaꞌ to woriꞌ.

¹⁴Hieꞌemo konaꞌre: Hi Simo (to nokokeneꞌi hi Yesu hi Peturuꞌ), Hi Andaria hineeꞌna hi Simo, Hi Yakobus hante hi Yohanes, Hi Pilipu hante hi Bartolomeu, Hi Matius hante hi Toma, Hi Yakobus anaꞌna hi Alpeu, Hi Simo toSeloꞌ,[9] Hi Yudas anaꞌna hi Yakobus, Hei hi Yudas Iskarioꞌ to hingkiꞌ mampobaluꞌ hi Yesu pe poniꞌNa.

¹⁵

¹⁶

¹⁷Uko tiꞌo, mengkohoumo hi Yesu ka bobirina moꞌawa hante topeguruNa hei meꞌohaꞌhi i rantena. Itoꞌo woriꞌhi topetuntuNe hei toaꞌ ntaniꞌna mampekau hi Yesu, uwaꞌhi to ka humanele woiꞌna toYahudi, ka kota Yerusale hante ka kota Tiru hei Sido to i bota ntahiꞌ.

¹⁸Toaꞌ-toaꞌ tiꞌo dokoꞌhi mampehoromua lolitana hi Yesu hei merapiꞌhi hingkeꞌna Nopokoꞌoriꞌhi. To nopekahii tokodake hupaꞌhi woꞌo pe Io, hei Nopokoꞌoriꞌhi.

¹⁹Woriꞌhi toaꞌ to magega morama hi Yesu, alaꞌ uwaꞌ kuasaꞌNa to mesuwu ka wotaNa to mampokoꞌoriꞌ toaꞌ.

²⁰Hi Yesu mampenotoꞌ topetuntuNa hei Notiꞌikihi, “Ipotanaꞌlukei ane merima-rimaꞌi tuwuꞌmi, alaꞌ ingkeimo to mewali toaꞌne Pueꞌ Ala i lali poparentaNa.

²¹Ipotanaꞌlukei ane bilorakei hinewowoꞌena, alaꞌ ingkeimo to hingkiꞌ nipowohu. Ipotanaꞌlukei ane meꞌolakei hinewowoꞌena, alaꞌ ingkei to hingkiꞌ motanaꞌ.

²²Ipotanaꞌlukei ane nikabiriꞌkei, hawaꞌkei nilei, hei nosalaꞌikei toaꞌ nokomi petuntumi pe Anaꞌ Manusiaꞌ.

²³Alaꞌ iomo woꞌo to nowali tododulura hampiha pe nabi-nabina Pueꞌ Ala. Mewaliꞌ, ane tiꞌo to rowali pe ingkei, motanaꞌkei mpololeke hei motaroꞌ-taroꞌkei, alaꞌ kodeꞌ howonine to hingkiꞌ ihuakei i lali Suruga.

²⁴Angkana hurewuꞌkei tosugiꞌ hinewowoꞌena. Himaꞌmokei hingkiꞌ motanaꞌ, alaꞌ ihorimokei komotanaꞌmio hinewowoꞌena.

²⁵Hurewuꞌkei to wohu hinewowoꞌena, alaꞌ hingkiꞌ bilorakei. Hurewuꞌkei to motanaꞌ hinewowoꞌena, alaꞌ hingkiꞌ masusa lalimi hei hingkiꞌ meꞌolakei.

²⁶Hurewuꞌkei ane noperenakikei lekiꞌ-lekiꞌna toaꞌ, alaꞌ nabi-nabi to roperenaki woꞌo tododolura hampiha.”

²⁷“Angkana ingkei to mampehoromua lolitangKu, hieꞌemo hawaꞌKa, ipokarimakei poniꞌmi, hei iwalikei hapo to moromiꞌ pe toaꞌ to mokabiriꞌkei.

²⁸Ibarakatihi to motundaꞌkei, ipekokaekihi toaꞌ to mowali to kodake pe ingkei.

²⁹Ane uwaꞌ toaꞌ to motampedaꞌ pipimu hambali, anioꞌ ihowoniꞌi. Agina ipaꞌaniki womo pipima hambali notampedaꞌ. Ane uwaꞌ to mamperompoꞌi jubamu, ipaꞌaniki womo baduꞌma.

³⁰Ane uwaꞌ to merapiꞌ hapolu i ingkei, ipaꞌanikihi. Hei ane uwaꞌ parewami roperompoꞌi, anioꞌmo niperapiꞌ huliꞌ.

³¹Hapo to ileikei rowali toaꞌ pe ingkei, hatoꞌo woꞌo hangangaa iwalikei.

³²Ane marimalukei pe toaꞌ to mampokarimakei, hapomo to hingkiꞌ ihuakei ka Pueꞌ Ala? Hingkoweꞌ woꞌo toaꞌ to kodake, marimahi pe toaꞌ to mampokarimahi.

³³Ane moromiꞌlu waliami pe toaꞌ to mowali woꞌo to moromiꞌ pe ingkei, hawaꞌi uwaꞌ dumbuꞌna. Hingkoweꞌ woꞌo toaꞌ to kodake, watoꞌo woꞌo waliare.

³⁴Ane mampeweilukei doiꞌmi nopebolo toaꞌ to nobiaꞌ mampopahuliꞌ, hawaꞌi uwaꞌ komoromiꞌmio. Howeꞌ woꞌo toaꞌ to kodake, mampeweilu woꞌo doiꞌna pe hangko awara to kodake ropebolo, alaꞌ hingkiꞌ ropopahuliluꞌi.

³⁵Anioꞌkei watoꞌo! Hangangaa nipokarima poniꞌmi, hei hangangaa niwali hapo to moromiꞌ. Ane uwaꞌ toaꞌ to dokoꞌ mebolo ka ingkei, nipaꞌani hei anioꞌmo nipohinaru hingkiꞌ nopopahuliꞌ. Ane iwalikei watoꞌo, woriꞌ pebarakati hingkiꞌ nopaꞌanikikei Pueꞌ Ala, hei hingkiꞌ norekeꞌkei anaꞌna Pueꞌ Ala to i tanti, alaꞌ hatoꞌomo komoromiꞌne Pueꞌ Ala pe toaꞌ to kodake hei pe toaꞌ to hawaꞌi robahaꞌ moꞌawerasiꞌ pe Io.

³⁶Komarimami hangangaa hibali komarimana Umoꞌmi to i Suruga.”

³⁷“Anioꞌkei mosalaꞌi toaꞌ ntaniꞌna, hingkeꞌna hawaꞌkei woꞌo nosalaꞌi Pueꞌ Ala. Anioꞌkei mohuku toaꞌ ntaniꞌna, hingkeꞌna hawaꞌkei woꞌo nohuku Pueꞌ Ala. Iꞌampunikei toaꞌ to masalaꞌ, hingkeꞌna noꞌampunikei woꞌo Pueꞌ Ala.

³⁸Mepaꞌanimokei pe toaꞌ ntaniꞌ hingkeꞌ Pueꞌ Ala hingkiꞌ mepaꞌani huliꞌ hante melobi-lobi. Hukaꞌ to nopake Pueꞌ Ala nipandiriꞌ hibobali to mohukaꞌ kina: io hingkiꞌ mohukaꞌ pe lali pohukaꞌ hante nororoꞌ hei notambai wute buhaꞌ hiluaweꞌ, honiꞌi nopepaꞌaniki pe ingkei. Hukaꞌ hapo to ipakeꞌkei mampaꞌani toaꞌ ntaniꞌna, hukaꞌ tiꞌo woꞌo to nopakeꞌ Pueꞌ Ala mampopahuliꞌ pe ingkei.”

³⁹Nopololiu hi Yesu lolitaNe hante pandiriꞌ waheꞌe, “Ane haduo tobilo moranda hangko tobiloana, bateꞌra hingkiꞌ monawuꞌhi roduo i lali woloꞌ.

⁴⁰Watoꞌo woꞌo, hawaꞌi uwaꞌ topeguru to meliu komapandene ka guruna. Ane tutumoꞌi posikolaꞌne honiꞌi hibali woꞌo hante guruna.”

⁴¹Uko tiꞌo, hi Yesu mampowute pandiriꞌ hieꞌe notiꞌi, “Mahamporeꞌi hinaꞌ iꞌokiꞌkei kowilohane awami, hantaro rangka loti to i matami hawaꞌi iꞌokiꞌ?

⁴²Hohumbomo kowadimi mampatiꞌiki awami, ‘Mai, kupopolaiꞌi kowilohama,’ hantarowae uwaꞌ tene rangka loti i matamu. Mampetomoromiꞌlukei i howali! Hangangaa ipopolaikei duluna rangka to uwaꞌ i matami hadoduomi hingkeꞌna pangkiꞌkei moromiꞌ, honiꞌkei wae mampopolai kowilohana awami.”

⁴³“Hawaꞌi uwaꞌ loti to moromiꞌ, kodake wuaꞌne, hei hawaꞌi woꞌo uwaꞌ loti to kodake, moromiꞌ wuaꞌne.

⁴⁴Nibahaꞌ komoromiꞌna lekiꞌ-lekiꞌna loti ane niꞌokiꞌmo powuaꞌne. Wuaꞌ anggoroꞌ hante ara hawaꞌi nirupuꞌ ka rui.

⁴⁵Watoꞌo woꞌo toaꞌ to moromiꞌ hingkiꞌ mampasuwu lolita to moromiꞌ, alaꞌ lalira buhaꞌ hante komoromiꞌa. Toaꞌ to kodake hingkiꞌ mampasuwu lolita to kodake, alaꞌ lalira buhaꞌ hante kokodakea. Alaꞌ hapo to uwaꞌ i lalinta, tiꞌo woꞌo to mesuwu ka omeꞌta.”

⁴⁶“Mahamporeꞌi hinaꞌ iwowoiꞌA Pueꞌ, angkana hawaꞌi ipetuntui hawaꞌKa?

⁴⁷Lekiꞌ-lekiꞌna toaꞌ to mampehoromua hei motuntuni lolitangKu io nipandiriꞌ hibali haduo toaꞌ to moꞌaro tambi. Io mangkoweꞌ dulu woiꞌ nopokuladu, honiꞌi nopampetoꞌoi watu to maroho, honiꞌi noꞌaro woꞌo orine i womboꞌ watu tiꞌo. Tempona ura to makaja, uwai meluaweꞌ honiꞌi moholuꞌi tambina, angkana hawaꞌi modungka alaꞌ tambina tiꞌo maroho.

⁴⁸

⁴⁹Angkana toaꞌ to mampehoromua lolitangKu hei hawaꞌi notuntuni, io hibali haduo toaꞌ to moꞌaro tambina i womboꞌ woiꞌ, hawaꞌi mopakeꞌ watu. Ane kodeꞌi uwai hei moholuꞌi tambina, hingkiꞌ modungka wute morenda lekiꞌ-lekiꞌna.”