Read Rampi Lukas 7 Bible Online

Lukas 7 - Rampi bible

Lukas 7

¹Koꞌukonalu hi Yesu mololita pe toaꞌ to woriꞌ, noloumo pe bolaꞌ Kapenau.

²I bolaꞌ tiꞌo, uwaꞌ haduo tadulakora surodadu Roma. Hawiꞌna tadulako tiꞌo madori hakiꞌne, hingkiꞌ mahi, hei io to nopokarima mpuꞌu.

³Konohorinalu tadulako tiꞌo koꞌuwaꞌna hi Yesu i lali bolaꞌ, norumbaꞌmohi haꞌumbora duo tomotodira toYahudi nolou merapiꞌ sulungi pe hi Yesu, hingkeꞌna humei mampokoꞌoriꞌ hawiꞌna.

⁴Kohupaꞌra i hi Yesu merapiꞌmohi rotiꞌi, “Tadulako hieꞌe, masipatoꞌ Isulungi,

⁵alaꞌ io mampokarima ingkiꞌ toYahudi, hei mampewei doiꞌna nipopoꞌaro tambi penombahangki.”

⁶Katoꞌo, noloumo hi Yesu moꞌawa hante iohi. Dodungkumo hi Yesu pe tambina, tadulako tiꞌo morumbaꞌmo haꞌumbora duo awana nolou mampohidupaꞌki hi Yesu hingkeꞌna nitiꞌikiꞌi, “Tua, hawaꞌKo paralu humei pe tambingku, alaꞌ hawaꞌa masipatoꞌ mantorimoKo.

⁷Hei mohiliꞌa nolou pe Ingko, alaꞌ hawaꞌa masipatoꞌ mampohidupaꞌkiKo. Angkana ane Itiꞌiluꞌi hamokuꞌ lolita, hawiꞌku tiꞌo bateꞌna hingkiꞌ moꞌoriꞌ.

⁸Kubahaꞌ Ingko to makuasaꞌ mowali watoꞌo, alaꞌ aku hieꞌe, uwaꞌ to i wowomboꞌku, hei uwaꞌhi woꞌo to i wowoiꞌku. Ane rapaꞌna kupohawaꞌki haduo surodadu kutiꞌiki, ‘Nolouko!’ Bateꞌna nolou. Ane kuwowoiꞌi surodadu to ntaniꞌna, ‘Humeiko!’ Bateꞌna humei. Ane kutiꞌiki hawiꞌku, ‘Iwali tiꞌo!’ Bateꞌna nowali. Watoꞌo woꞌo Ingko tua, hapo to Itiꞌi iseꞌe, iomo to hingkiꞌ mewali i tambingku.”

⁹Nopolomomenia hi Yesu mampehoromua lolitaNe tadulako tiꞌo. Iomo hinaꞌ mehahiliꞌ pe toaꞌ to woriꞌ to metuntu pe Io, notiꞌikihi, “Kodeꞌ mpuꞌu pepoꞌohine toaꞌ hieꞌe! Kehapoꞌi i lumbura toSaraeli, handoaꞌi tene Kuhua howeꞌ haduo to kodeꞌ pepoꞌohina hibali toaꞌ hieꞌe.”

¹⁰Uko tiꞌo, mahuliꞌmohi awane tadulako tiꞌo nolou pe tambina. Kohupaꞌra itoꞌo, rohua moꞌoriꞌmo hawiꞌne to mohakiꞌ.

¹¹Hawaꞌi morue katoꞌo, noloumo hi Yesu hante topeguruNa pe bolaꞌ Nain, hei woriꞌ toaꞌ ntaniꞌna nolouhi woꞌo moꞌawa hante Io.

¹²Dodungkumohi i wambaꞌ bente bolaꞌ, roꞌokiꞌ haduo to mahi to nikowaꞌ nolou pe huwali bolaꞌ. To mahi tiꞌo haduo anaꞌntomaꞌani, anaꞌ hadoduona haduo tobembaꞌ. Woriꞌ tumpu bolaꞌ nolou pe potowua mampoꞌowoni inoꞌna.

¹³Konoꞌokiꞌnalu hi Yesu towoweꞌe tiꞌo, marima laliNe hei Notiꞌi, “Hampoliꞌmoko meꞌola!”

¹⁴Nokododungkuimo pekowaꞌne to mahi tiꞌo hei noperama. Meꞌohaꞌmohi toaꞌ to mangkowaꞌ. Notiꞌi hi Yesu, “Anaꞌntomaꞌani! Peꞌaromo!”

¹⁵Tuwuꞌmo huliꞌ anaꞌntomaꞌani to mahi tiꞌo. Io mahura hei mololita. Notiꞌi hi Yesu pe inoꞌna, “Hieꞌemo anaꞌma.”

¹⁶Toaꞌ to pangkiꞌhi hapo to mewali tiꞌo, motehuꞌhi lekiꞌ-lekiꞌra, hei mepongkamohi mampokodeꞌ Pueꞌ Ala rotiꞌi, “Haduo nabi to makuasaꞌ mpololeke uwaꞌ i iliꞌta! Hupaꞌmo Pueꞌ Ala mamposalamaꞌ toaꞌNa.”

¹⁷Kareba tiꞌo tekarebamo pe humanele woiꞌra toYahudi hei pe lekiꞌ-lekiꞌna bolaꞌ to dodungku itoꞌo.

¹⁸Topeguruna hi Yohanes Toperiu mampowute pe hi Yohanes lekiꞌ-lekiꞌna to nowali hi Yesu. Iomo hinaꞌ nowowoi hi Yohanes roduo topeguruna

¹⁹notiꞌikihi, “Noloumokei pe hi Yesu hei ipeꞌitanokikei, ‘Ba Ingkomo mpuꞌu Datu Topohompoꞌ to nodandi Pueꞌ Ala, ba uwaꞌ tene to ntaniꞌna to nipekau?’ ”

²⁰Noloumohi mpuꞌu topeguruNe to roduo tiꞌo pe hi Yesu hei rotiꞌi, “Hi Yohanes morumbaꞌka humei meꞌitano pe Ingko ba Ingko mpuꞌu Datu Topohompoꞌ to nodandi Pueꞌ Ala, ba uwaꞌ tene to ntaniꞌne to nipekau?”

²¹I tempo tiꞌo woꞌo, hi Yesu kolentuꞌana mampokoꞌoriꞌ woriꞌ toaꞌ to mohakiꞌ iomo; mampopolai lomoa to mekahi pe toaꞌ, hei mampopangkiꞌ tobilo.

²²Katoꞌo nohoniꞌ hi Yesu pe topeguruna hi Yohanes notiꞌi, “Pahuliꞌmokei, hei ipowutekikei hi Yohanes hapo to iꞌokiꞌkei hei to ihorikei: tobilo pangkiꞌmo, tokohu matengkaꞌmo, tokusta moꞌoriꞌmo, to bonoꞌ pohorimo, toaꞌ to mahi Kupotuwuꞌ huliꞌ, hei Kareba Moromiꞌ Kupowutemo pe toaꞌ to merima-rima tuwuꞌra.[10]

²³Motanaꞌmohi toaꞌ to hawaꞌi mororangko lalire mepoꞌohi pe Aku.”

²⁴Ikopahuliꞌralu topegurune hi Yohanes tiꞌo, mepongkamo hi Yesu mampololita pe toaꞌ to woriꞌ noniuꞌ i hi Yohanes notiꞌi, “Hapo tungkaihami nolou pe hi Yohanes i popada woꞌoni hampiha? Ba mangkodokoꞌilukei pangkiꞌ kora to noparowohi? Matantu hawaꞌ!

²⁵Hade, haporeꞌi to ikodokoꞌikei nolou iꞌelekei? Ba dokoꞌkei mampeꞌele toaꞌ to maranga baduꞌna? Matantu hawaꞌi woꞌo, alaꞌ toaꞌ to maranga baduꞌna hei tosugiꞌ tuwuꞌra meꞌohaꞌluhi i tambi kodatua.

²⁶Haporeꞌi to ikodokoꞌikei ako iꞌelekei? Ba dokoꞌkei mampeꞌele nabi? Ane watoꞌoꞌi, tuꞌuluiae. Angkana Kutiꞌikikei, meliu kokodeꞌna tuwuꞌna hi Yohanes ka nabi to ntaniꞌna.

²⁷Alaꞌ hi Yohanes tiꞌo to teꞌukiꞌ i lali Suraꞌ to mangkolehi hampiha to mantiꞌi waheꞌe, ‘Hieꞌemo surongKa to hingkiꞌ Kurumbaꞌ medulu ka Ingko, io to hingkiꞌ mampatimomo lalaMu.’ ” [11]

²⁸Hei notiꞌi womo hi Yesu, “Pehoromuakei moromiꞌ: ka lekiꞌ-lekiꞌna toaꞌ to nipoꞌanaꞌki i duniaꞌ hieꞌe, hawaꞌi uwaꞌ haduo to meliu kokodeꞌne tuwuꞌna ka hi Yohanes. Angkana haduo toaꞌ to merima-rima tuwuꞌna i lali kodatuana Pueꞌ Ala, meliu kokodeꞌne tuwuꞌna ka hi Yohanes.”

²⁹Lolitana hi Yesu tiꞌo ropehoromua lekiꞌ-lekiꞌna toaꞌ, tekahihi toperuruꞌ sima. Toaꞌ to woriꞌ tiꞌo mopangakuꞌ komonontona Pueꞌ Ala, alaꞌ iohi mampoperiu pe hi Yohanes.

³⁰Angkana toParisi hei guru-guru agama mosapuakahi tungkaihana Pueꞌ Ala pe iohi, alaꞌ hawaꞌhi mampoperiu pe hi Yohanes.

³¹Hei notiꞌi womo hi Yesu, “Ingkei to tuwuꞌ i tempo hieꞌe wadikei nipandiriꞌ hibali oꞌanaꞌ to mahohura i pobaluꞌ-baluꞌa to momewowoi-woihi rotiꞌi, ‘Kupolingakikei linga komotanaꞌ-tanaꞌ, hawaꞌkei hiniꞌ monariꞌ, Kipolingakikei linga to mepohanondoiha, hawaꞌkei hiniꞌ meꞌola.’

³²

³³Palaihana, hi Yohanes Toperiu hawaꞌi nilei. Kohumeina hi Yohanes, io hawaꞌi mangka kopongkona hibali biasa hei hawaꞌi maꞌinu to melolanu. Itiꞌikei, ‘Io nopekahii lomoa!’

³⁴Katoꞌo hupaꞌmo Anaꞌ manusiaꞌ, Io mangka hante maꞌinu, angkana ipantiꞌikikei, ‘Io haduo to hariko hei poko malanu, awana toperuruꞌ sima hei toaꞌ to madosa!’

³⁵Angkana kehapoꞌi watoꞌo, komonontona lalana Pueꞌ Ala mombaha i kotuwuꞌna toaꞌ to motuntuni peleihana Pueꞌ Ala.”

³⁶Uwaꞌ haduo toParisi to nikokeneꞌi hi Simo, mowowoi hi Yesu nolou mangka pe tambina. Noloumo mpuꞌu hi Yesu pe tambina, mahurahi honiꞌhi mangka.

³⁷I lali bolaꞌ tiꞌo, uwaꞌ woꞌo haduo towoweꞌe to kodake waliana. Konohorinalu hi Yesu uwaꞌ mangka i tambina toParisi, noloumo mampohidupaꞌkiꞌI. Towoweꞌe tiꞌo mangkomi habutoloꞌ minyaꞌ-minyaꞌi to mewowau, to masuliꞌ mpololeke hilina.

³⁸Kohupaꞌna towoweꞌe tiꞌo, metotiꞌi i tinaꞌ kapuꞌna hi Yesu hei meꞌola. Kapuꞌna hi Yesu nowaheꞌ hante uwai matana, uko tiꞌo, nopahi hante wiloluna honiꞌi noꞌumaꞌ hei nominyaꞌ-minyaꞌi to mewowau.

³⁹Konoꞌokiꞌnalu hi Simo waliane towoweꞌe tiꞌo, notiꞌi i lalina, “Ane toaꞌ hieꞌe tuꞌu-tuꞌu mpuꞌu haduo nabi, bateꞌna Nobahaꞌ kohihimona towoweꞌe to humei mominyaꞌ-minyaꞌi kapuꞌNa, hei bateꞌna nobahaꞌ woꞌo kokodakene waliana towoweꞌe tiꞌo.”

⁴⁰Iomo hinaꞌ hi Yesu mantiꞌi pe hi Simo, “Simo, uwaꞌ to hingkiꞌ Kutiꞌikiko.” Notiꞌi hi simo, “Tiꞌimoꞌi guru.”

⁴¹Notiꞌi hi Yesu, “Uwaꞌ roduo toaꞌ to maꞌinda pe haduo toaꞌ to mampaꞌanihi doiꞌ ropebolo. Indana haduo limo natuna doiꞌ peraꞌ, hei indana to haduona limo mpuluꞌlu doiꞌ peraꞌ.

⁴²Alaꞌ kohawaꞌna robiaꞌ mobaiari indara, notiꞌimo toaꞌ to mampaꞌanihi doiꞌ tiꞌo, ‘Hamboaꞌmo paralu nibaiari indami.’ Motuntuni pahuamu, ka toaꞌ to meroduo tiꞌo, hihimo to hingkiꞌ kodeꞌ rimane pe toaꞌ to mampaꞌanihi doiꞌ ropebolo?”

⁴³Mehoniꞌ hi Simo, “Hibali pahuangku, toaꞌ to woriꞌ indana.” Notiꞌi hi Yesu, “Tuꞌu pehoniꞌma.”

⁴⁴Uko tiꞌo, hi Yesu mampenotoꞌ towoweꞌe tiꞌo hei mololita pe hi Simo notiꞌi, “Ele towoweꞌe hieꞌe. KohupaꞌKu i tambimu, hawaꞌAkei ipaꞌani uwai powaheꞌna kapuꞌKu, motuntuni adaꞌmi pe tolori. Angkana towoweꞌe hieꞌe mowaheꞌ kapuꞌKu hante uwai matana, honiꞌi nopahi hante wiloluna.

⁴⁵Ingko hawaꞌA idupaꞌ hante iꞌumaꞌ motuntuni adaꞌmi pe tolori. Angkana towoweꞌe hieꞌe moꞌumaꞌ woꞌo kapuꞌKu mepongka ka kohupaꞌangKu hingkonia.

⁴⁶Ingko hawaꞌko mobobohi tutuꞌKu hante minyaꞌ-minyaꞌ motuntuni adaꞌmi pe tolori. Angkana towoweꞌe hieꞌe mominyaꞌ-minyaꞌi kapuꞌKu.

⁴⁷Alaꞌ dosana to woriꞌ niꞌampunikimo, pepokarimana woriꞌ woꞌo. Angkana toaꞌ to hangkiuꞌlu dosane niꞌampuni, hangkiuꞌlu woꞌo pepokarimane.”

⁴⁸Uko tiꞌo notiꞌi hi Yesu pe towoweꞌe tiꞌo, “Teꞌampunimo dosama.”

⁴⁹Iomo hinaꞌ mantiꞌihi toaꞌ to mangka moꞌawa-awa i lalira, “Wurani mpuꞌu toaꞌ hieꞌe mantiꞌi hatoꞌo. Pueꞌ Alalu to pobiaꞌ moꞌampuni dosa!”

⁵⁰Katoꞌo notiꞌi hi Yesu pe towoweꞌe tiꞌo, “Alaꞌ pepoꞌohimu, iomo hinaꞌ himpolohoꞌmoko ka pehuku dosamu. Mahuliꞌmoko, romiꞌ ngkotuwuꞌ mampoꞌowoniko.”