Read Rampi Lukas 8 Bible Online

Lukas 8 - Rampi bible

Lukas 8

¹Hawaꞌi morue uko tiꞌo, hi Yesu nolou pe kota-kota to kodeꞌ hante to kokiuꞌ mampowute Kareba Moromiꞌ noniuꞌ i poparentana Pueꞌ Ala. Io ropoꞌowoni woꞌo topeguruNa to hampuluꞌ meroduo.

²Uwaꞌhi woꞌo haꞌumbora duo towoweꞌe to mampoꞌowoni hi Yesu. Towoweꞌe tiꞌo to nopokoꞌoriꞌ hi Yesu ka hakiꞌra hante ka konopekahiira lomoa. Konaꞌna to haduo, hi Maria to niwowoi woꞌo hi Madalena. Hi Maria tiꞌo to nopokoꞌoriꞌ hi Yesu hampiha ikonopekahiina pitu tokodake.

³Haduo woꞌo iomo hi Yohana hantambina hi Kusa, topamporiana i lali tambina datu Herode. Hi Susana metuntu woꞌo moꞌawa hante woriꞌ towoweꞌe to ntaniꞌna. Lekiꞌ-lekiꞌra mosulungi hi Yesu hante topeguruNa ka doiꞌra hadoduora.

⁴Woriꞌhi toaꞌ to hupaꞌ ka bolaꞌ-bolaꞌ mampohidupaꞌkiꞌI hi Yesu. Kohupaꞌra toaꞌ to woriꞌ, nopowutemo hi Yesu halangkaꞌ lolita pandiriꞌ notiꞌi,

⁵“Uwaꞌ haduo topokineteꞌ to nolou mohawori. I tempona mohawori, uwaꞌ howoria to monawuꞌ i lala. Howoria tiꞌo nodihaꞌ-dihaꞌ toaꞌ hei nobingku tinti wute uko.

⁶Uwaꞌ woꞌo howoria to monawuꞌ i woiꞌ to mowatu-watu. Howoria tiꞌo tuwuꞌ, angkana kaliuꞌ molau alaꞌ manonipaꞌi woiꞌne.

⁷Uwaꞌ woꞌo howoria to monawuꞌ i lali dui. Howoria tiꞌo tuwuꞌ moꞌawa hante dui. Angkana noputuꞌ rui wute mahi.

⁸Uwaꞌ woꞌo howoria to monawuꞌ i woiꞌ to molompoꞌ. Howoria tiꞌo moromiꞌ kotuwuꞌne wute mowuaꞌ, hanatu mpiha pewaline ka howoriana.” Uko mampowute pandiriꞌ tiꞌo, notiꞌi hi Yesu, “Moromiꞌ mpololeke ane ipoꞌilalikei hapo to ihorimokei!”

⁹Uko tiꞌo topeguruna meꞌitano pe hi Yesu, hapo palaihane pandiriꞌ tiꞌo.

¹⁰Mehoniꞌ hi Yesu, “Hampiha, tewuni tene pepoturuꞌ noniuꞌ i poparentana Pueꞌ Ala. Hinewowoꞌena nopaꞌanimokei Pueꞌ Ala pekiri hingkeꞌna ibahaꞌkei palaihane pepoturuꞌ tiꞌo. Angkana i toaꞌ to woriꞌ, Kupoturuꞌhi hante pandiriꞌ, hingkeꞌna palaihana tewowuni. ‘Kehapoꞌi roꞌokiꞌmo, angkana hawaꞌi robahaꞌ palaihane hapo to roꞌokiꞌ. Kehapoꞌi rohori, angkana hawaꞌi robahaꞌ palaihane hapo to rohori.’

¹¹Hieꞌemo palaihane lolita pandiriꞌKu hingkonia, howoria to nihawori tiꞌo, palaihana Pohawaꞌna Pueꞌ Ala.

¹²Uwaꞌhi toaꞌ to nipandiriꞌ hibali woiꞌ to nipolalai. Hawaꞌna Pueꞌ Ala ropehoromua mpuꞌu, angkana Belisiꞌ mampowuli lalira, horiana hawaꞌhi mepoꞌohi hei hawaꞌhi niposalamaꞌ.

¹³Uwaꞌhi woꞌo toaꞌ to nipandiriꞌ hibali woiꞌ to mowatu-watu. Kopohorira pohawaꞌna Pueꞌ Ala, tuꞌu-tuꞌu motanaꞌ lalire. Mepoꞌohimohi, angkana pepoꞌohira tiꞌo hawaꞌi maroho, hibali huꞌa-huꞌa to hawaꞌi moꞌuwakaꞌ. Iomo hinaꞌ ane pahuahi komaporiꞌ, himaꞌmohi mepoꞌohi.

¹⁴Uwaꞌhi woꞌo toaꞌ to nipandiriꞌ hibali woiꞌ to nokotuwuꞌi rui. Iohi mampehoromua pohawaꞌna Pueꞌ Ala, angkana koꞌukoana bata-bataluhi hei kosugiꞌa duniaꞌ mohopiꞌ kotuwuꞌra horiana hawaꞌhi mowuaꞌ moromiꞌ.

¹⁵Uwaꞌhi woꞌo toaꞌ to nipandiriꞌ hibali woiꞌ to molompoꞌ. Korohorinalu Pohawaꞌne Pueꞌ liu-liu rotorimo hei ropoꞌilali mpuꞌu. Wute mowuaꞌ i lali kotuwuꞌra.”

¹⁶Hi Yesu mampololiu lolitaNa Notiꞌi, “Hawaꞌi uwaꞌ haduo toaꞌ to motutu palita honiꞌi notutuꞌi ba noporia i luaꞌna koi. Huluꞌ bateꞌna roporia i womboꞌ hingkeꞌna wantana roꞌokiꞌ lekiꞌ-lekiꞌna toaꞌ to mekahi pe tambi.

¹⁷Hatoꞌo woꞌo, lekiꞌ-lekiꞌna pepoturuꞌKu to tewuni tene, bateꞌna hingkiꞌ mombaha. Hei lekiꞌ-lekiꞌna lolitangKu to tewuni bateꞌna hingkiꞌ tongawa.

¹⁸Iomo hinaꞌ Kutiꞌikikei, nipehoromua moromiꞌ-romiꞌ pohawaꞌne Pueꞌ Ala. Toaꞌ to mangkodokoꞌi pobahaꞌ peleihana Pueꞌ Ala, hingkiꞌ tetambai pebahaꞌre wute robahaꞌ mpololeke. Angkana toaꞌ to hawaꞌhi mangkodokoꞌi pobahaꞌ peleihana Pueꞌ Ala, kehapoꞌi robahaꞌmo hangkiuꞌ, bateꞌna hawaꞌi modumbuꞌ alaꞌ hingkiꞌ niroa huliꞌ.”

¹⁹I tempo tiꞌo, inoꞌna hi Yesu hante halalina hupaꞌhi, alaꞌ dokoꞌhi mampohidupaꞌki hi Yesu, angkana hawaꞌhi hohumbo mangkododungkuiꞌI nokomi koworiꞌna toaꞌ to uwaꞌ itoꞌo.

²⁰Uwaꞌ haduo toaꞌ to mololita pe hi Yesu notiꞌi, “Guru, inoꞌMu hante halaliMu, uwaꞌhi i huwali dokoꞌhi hidupaꞌ hante Ingko.”

²¹Angkana notiꞌi hi Yesu, “Himolu to mampehoromua hante mampetuntui pohawaꞌna Pueꞌ Ala, iohi halalingKa hante inoꞌKu.”

²²I haꞌandona hi Yesu hante topeguruNa mehendeꞌhi i duanga. Notiꞌikihi Yesu, “Noloumoki pe tinaꞌ hanupe rano.” Katoꞌo noloumohi mpuꞌu.

²³I lali duangara tiꞌo hi Yesu leꞌo. Hampale hupaꞌ parowo to makaja i rano morumpahi. Duangara norumpa ropoꞌ, koꞌukoana hingkiꞌ nobuhoꞌi uwai, hei hingkiꞌ mentoriꞌ.

²⁴TopeguruNa moluke hi Yesu rotiꞌi, “Guru! Guru! Sulungika. Hingkiꞌ horewuꞌki!” Meꞌaromo hi Yesu, mokamoroki parowo hante balumba, katoꞌo meꞌohamo mpuꞌu parowo tiꞌo, hante hangkaꞌ-hangkaꞌ rano tiꞌo lolebaꞌ.

²⁵Katoꞌo, notiꞌi hi Yesu pe topeguruna, “Mahamporeꞌi hinaꞌ hawaꞌAkei ipoꞌohi?” Lekiꞌ-lekiꞌna topeguruNa lemeniahi hei motehuꞌhi. Mololitahi, rotiꞌi haduo hei haduo, “Makuasaꞌ mpuꞌu toaꞌ hieꞌe! hingkoweꞌ parowo hante balumba motuntuni hawaꞌNa!”

²⁶Katoꞌo mampololiumohi peduangara wute i woiꞌ Gerasa to uwaꞌ i tinaꞌ hanupena rano Galilea.

²⁷I woiꞌ Gerasa tiꞌo, uwaꞌ haduo toaꞌ to nopekahii lomoa to woriꞌ. Toaꞌ tiꞌo moruemo hawaꞌi nolei mebaduꞌ, hei hawaꞌi hiniꞌ meꞌohaꞌ i tambi, noleilu meꞌohaꞌ i woloꞌ watu petowua. Woriꞌ mpiha nopekahii lomoa kehapoꞌi nihiluꞌ hante rante hei nipoꞌodaꞌ, angkana rante tiꞌo bateꞌnalu nopudiꞌ-pudiꞌ, hei io mesilai nolou pe popada woꞌoni, alaꞌ nokomi kuasaꞌna lomoa to mampekahiꞌi. Pengkohounalu hi Yesu ka duanga pe lerina, humeimo toaꞌ to nopekahii lomoa tiꞌo mampohidupaꞌkiꞌI. Konoꞌokiꞌnalu hi Yesu, mololitamo hei melingkotuꞌ i hinarona. Hi Yesu morumbaꞌhi lomoa tiꞌo hingkeꞌna molaihi, angkana toaꞌ tiꞌo moloaꞌ, “Yesu anaꞌna Pueꞌ Ala to i tanti! Hingkiꞌ Ipohampoꞌa? Kuperapiꞌ hingkeꞌna anioꞌa wokae ipoperima-rima!”

²⁸

²⁹

³⁰Meꞌitano hi Yesu pe toaꞌ tiꞌo, “Himo konaꞌma?” Mehoniꞌ, Legio. Legio palaihana “Sabuna”, alaꞌ woriꞌ mpololeke tokodake to mekahi.

³¹Tokodake tiꞌo roperapiꞌ mpuꞌu pe hi Yesu hingkeꞌna inioꞌhi nipopesuwu nolou pe konihukuara tokodake.

³²Hawaꞌi moꞌela katoꞌo, uwaꞌhi boeꞌ harombonga kolentuꞌara mahuge i papina to mebobobiri. Roperapiꞌ lomoa tiꞌo hingkeꞌna norumbaꞌhi hi Yesu mekahi pe boeꞌ tiꞌo. Nopoꞌioꞌ hi Yesu perapiꞌre tiꞌo.

³³Katoꞌo molaihi lomoa ka toaꞌ tiꞌo, hei liu-liuhi mekahi pe boeꞌ. Pekahira pe boeꞌ, mehilaimohi boeꞌ tiꞌo hei monawuꞌhi i tua liu pe lali rano, hei mahihi podu.

³⁴Koroꞌokiꞌna toaꞌ to mampoꞌodaꞌ boeꞌ hapo to mewali tiꞌo, mehilaimohi nolou pe bolaꞌ-bolaꞌ to dodungku mampowute hapo to pewali.

³⁵Uko tiꞌo tumpu bolaꞌ humeimohi pe hi Yesu dokoꞌhi pangkiꞌ hapo to mewali. Kohupaꞌra pe hi Yesu, pangkiꞌhi toaꞌ to nopekahii tokodake hingkonia, mahura dodungku i kapuꞌna hi Yesu mebaduꞌ hei pekirina monontomo. Iomo hinaꞌ motehuꞌhi.

³⁶Toaꞌ to pangkiꞌ hapo to nowali hi Yesu hingkonia ropololita pe awara hohumbo toaꞌ to nopekahii tokodake tiꞌo nopokoꞌoriꞌ hi Yesu

³⁷Iomo hinaꞌ lekiꞌ-lekiꞌna toaꞌ to i woiꞌ Gerasa merapiꞌ pe hi Yesu hingkeꞌna molaiꞌi ka woiꞌra alaꞌ motehuꞌhi mpololeke. Katoꞌo mehendeꞌmo hi Yesu pe duanga moꞌawa hante topeguruNa hingkeꞌna molaihi mahuliꞌ.

³⁸Kolentuꞌana hi Yesu mehendeꞌ i duanga, toaꞌ to nopekahii lomoa hingkonia merapiꞌ hingkeꞌna metuntuꞌi pe Io. Angkana hawaꞌi nopoliu hi Yesu notiꞌi,

³⁹“Mahuliꞌmoko nolou pe tambimu hei ipololitakihi toaꞌ to habobolaꞌma hapo to nowali Pueꞌ Ala pe ingko.” Noloumo mpuꞌu pe bolaꞌna mampowute hapo to nowali hi Yesu pe io.

⁴⁰Ipahuliꞌna hi Yesu ka hanupe rano, motanaꞌmohi toaꞌ to woriꞌ mampohidupaꞌki, alaꞌ moruemo ropekau.

⁴¹Hupaꞌmo woꞌo haduo tadulako tambi penombaha i bolaꞌ tiꞌo, konaꞌna hi Yairu. Konoꞌokiꞌnalu hi Yesu, melingkotuꞌmo i hinarona merapiꞌ hingkeꞌna hi Yesu nolou pe tambina,

⁴²alaꞌ anaꞌna towoweꞌe to hadoduona mohakiꞌ hei hingkiꞌ mahi. Umuruꞌna anaꞌna tiꞌo hampuluꞌ merontoꞌamo. Noloumo hi Yesu pe tambina hi Yairu, hei i lumbu lala woriꞌ toaꞌ momebihiꞌ-bihiꞌ motuntuniꞌI.

⁴³I lumbuna toaꞌ to woriꞌ tiꞌo, uwaꞌ woꞌo haduo towoweꞌe, hampuluꞌ merontoꞌamo meraꞌa, hawaꞌi meꞌohaꞌ-ohaꞌ. Haꞌumbora mpihamo nipokuliꞌi, hawaꞌi uwaꞌ komoꞌoriꞌana.

⁴⁴Noloumo towoweꞌe tiꞌo mokododungkui hi Yesu ka tunduna hei moruntui doe jubaNa. Konoruntuinalu hampale moꞌoriꞌ hakiꞌne tiꞌo.

⁴⁵Meꞌitano hi Yesu, “Himo to moruntuiꞌA?” Hawaꞌi uwaꞌ toaꞌ to mangakuꞌ, katoꞌo notiꞌi hi Peturuꞌ, “Guru, woriꞌ mpololeke toaꞌ to motuleliꞌiki, momebihiꞌ-bihiꞌmohi.”

⁴⁶Notiꞌi hi Yesu, “Bateꞌna uwaꞌ to moruntuiꞌA, alaꞌ Kubahaꞌ uwaꞌ kuasaꞌ to mesuwu ka wotangKu.”

⁴⁷Nobahaꞌmo towoweꞌe tiꞌo, konobahaꞌne hi Yesu waliane. Katoꞌo io mororidiꞌ nokomi komotehuꞌna, toloumo melingkotuꞌ pe hinarona hi Yesu. Honiꞌi nopololitamo i hinarora toaꞌ to woriꞌ, tungkaihane morama baduꞌna hi Yesu hei komoꞌoriꞌnamo ka hakiꞌna.

⁴⁸Hi Yesu mololita pe towoweꞌe tiꞌo notiꞌi, “AnaꞌKu, moꞌoriꞌmoko alaꞌ mepoꞌohiko pe Aku. Mahuliꞌmoko i lali romiꞌ ngkotuwuꞌ.”

⁴⁹Kolentuꞌana tene hi Yesu mololita, hupaꞌ haduo suro ka tambina hi Yairu, notiꞌi pe hi Yairu, “Mahimo anaꞌma. Hampoliꞌmoko mampomasusa Guru.”

⁵⁰Konohorinalu hi Yesu lolitane tiꞌo, nopetiꞌiki pe hi Yairu, “Anioꞌko motehuꞌ! Ane mepoꞌohiko, anaꞌmu hingkiꞌ niposalamaꞌ.”

⁵¹Kohupaꞌralu i tambina hi Yairu, toaꞌ to woriꞌ hawaꞌhi nopoliu hi Yesu mekahi pe koturuana anaꞌ tiꞌo, sangadina hi Peturuꞌ, hi Yohanes, hi Yakobus hante inoꞌna hei umoꞌna anaꞌ tiꞌo to wadi mekahi.

⁵²Lekiꞌ-lekiꞌna toaꞌ to morampu itoꞌo mampeꞌolonihi anaꞌ to mahi tiꞌo. Angkana notiꞌi hi Yesu, “Hampoliꞌmokei meꞌola, anaꞌ hieꞌe hawaꞌi mahi angkana leꞌolu.”

⁵³Korohorina lolitaNe, rokokereiꞌIlu, alaꞌ robahaꞌ anaꞌ tiꞌo mahimo.

⁵⁴Uko tiꞌo, hi Yesu motikomo korawena anaꞌ tiꞌo hei notiꞌi, “AnaꞌKu meꞌaromoko!”

⁵⁵Anaꞌ tiꞌo meꞌinohaꞌmo huliꞌ, hei kaliuꞌ meꞌaro. Uko tiꞌo hi Yesu mampatiꞌikihi hingkeꞌna anaꞌ tiꞌo ropaꞌani mangka.

⁵⁶Lemeniahi mpololeke todulune anaꞌ tiꞌo. Angkana noꞌopihi hi Yesu, hingkeꞌna anioꞌ ropololitaꞌi pe hihimolu hapo to pewali tiꞌo.