Read Rampi Yohanes 1 Bible Online

Yohanes 1 - Rampi bible

Yohanes 1

¹Mepongka ka uluꞌ-uluꞌna handoaꞌi niwali duniaꞌ, Boo uwaꞌmo umbiꞌ.[1] Boo tiꞌo, umbiꞌnamo uwaꞌ moꞌawa-awa hante Pueꞌ Ala, hei Boo tiꞌo iomo Pueꞌ Ala.

²Mepongka ka uluꞌ-uluꞌna Io moꞌawa-awa hante Pueꞌ Ala.

³Pueꞌ Ala mowali hinangkana to uwaꞌ moliu i Boo. Hawaꞌi uwaꞌ halangkaꞌ to Nopopewali ane hawaꞌi moliu Boo.

⁴Ka Boo tiꞌo pepongkane kotuwuꞌ. Hei kotuwuꞌ tiꞌo to mampomobaro lalina manusiaꞌ.

⁵Wanta tiꞌo mewanta nturusi i lali duniaꞌ to mokorindi hieꞌe, hei Io hawaꞌi howeꞌ hampiha nonani komokorindi.

⁶Uwaꞌ haduo toaꞌ to norumbaꞌ Pueꞌ Ala, konaꞌna hi Yohanes.

⁷Kohupaꞌna hi Yohanes, io mewali haduo sabiꞌ to mampowute noniuꞌ i pewanta tiꞌo hingkeꞌna lekiꞌ-lekiꞌna toaꞌ to pahori mepoꞌohihi i wanta tiꞌo.

⁸Angkana hi Yohanes handoꞌio wanta tiꞌo. Io to humeilu mampowute noniuꞌ i wanta tiꞌo pe lekiꞌ-lekiꞌna toaꞌ.

⁹Wanta tiꞌo to tuꞌu-tuꞌu, to mampomobaro lalina lekiꞌ-lekiꞌna toaꞌ. Iomo to mehupaꞌ i duniaꞌ.

¹⁰Moliu i Boo, duniaꞌ Nopopewali. Angkana i tempona uwaꞌ i duniaꞌ, toaꞌ hawaꞌi pobahaꞌ kohihimoNa.

¹¹Io hupaꞌ pe woiꞌNa hadoduona, angkana hawaꞌi rotorimo.

¹²Angkana hihimolu to mantorimoꞌI hei mepoꞌohi pe Io, Nopaꞌanihi komasipatoꞌ mewali Anaꞌna Pueꞌ Ala.

¹³Hawaꞌhi mewali anaꞌna Pueꞌ Ala alaꞌ kohamokona toaꞌ ba nokomi peleira toaꞌ. Bateꞌnalu Pueꞌ Ala to mampopewalihi anaꞌNa.

¹⁴Boo tiꞌo mewalimo toaꞌ, hei meꞌohaꞌ i lumbunta i duniaꞌ hieꞌe. Kiꞌokiꞌmo komarohone kuasaꞌNa. Kuasaꞌna tiꞌo Notorimo ka UmoꞌNa, alaꞌ Iomo AnaꞌNe to Hadoduona. Ka Io tobahaꞌi Pueꞌ Ala, hei tohorikimo kopopuhiꞌne lalina Pueꞌ Ala i ingkiꞌ.

¹⁵Hampiha tempo, hi Yohanes mampotongawa pe toaꞌ to woriꞌ kohihimona Boo tiꞌo. Io mololita nopokobue, notiꞌi, “Iomo hieꞌe to kupokonontokikei hampiha! Kutiꞌi: uwaꞌ to hingkiꞌ humei mehuntu ka aku, hei meliu komarohone kuasaꞌNa ka aku. Alaꞌ handoaꞌa tene nipoꞌanaꞌki, Io umbiꞌnamo uwaꞌ”[2]

¹⁶Io buhaꞌ rima, hei ka kopopuhiꞌna laliNa tiꞌo, Nobarakatiki lekiꞌ-lekiꞌta. Pebarakati to tohua ka Io hawaꞌi mokoꞌukoa.

¹⁷Hi Musa Aturalu to nopaꞌanikiki, angkana hi Yesu Kerisitu mampomombahakiki, kopopuhiꞌna laliNa Pueꞌ Ala, hei moliu i poturuꞌNa to tuꞌu, tobahaꞌ kohihimona Pueꞌ Ala.

¹⁸Hawaꞌi uwaꞌ howeꞌ haduo to pangkiꞌ Pueꞌ Ala, ukonalu AnaꞌNa to Hadoduona to uwaꞌ moꞌawa-awa hante Io. Iomo to mampokonontokiki kohihimona Pueꞌ Ala.

¹⁹Hieꞌemo posobiꞌine hi Yohanes to mampowute kohihimona hi Yesu. Hampiha tempo, tadulakora toYahudi i Yerusale morumbaꞌmohi haꞌumbora duo tadulako mpenomba hei toLewi[3] nolou pe hi Yohanes. Kowuteralu i hi Yohanes, ropeꞌitanoki, “Kotuꞌuana hihimoko? Ingkomo mpuꞌuto Datu to Mamposalamaꞌ?”

²⁰Mehoniꞌ hi Yohanes hante tuꞌu-tuꞌu, notiꞌi, “Aku, handoꞌioꞌa Datu To Mamposalamaꞌ.”

²¹Meꞌitano womohi, “Ane hatoꞌoꞌi, hihimoko? Ba nabi Eliako.”[4] Notiꞌi hi Yohanes, “Handoꞌio.” Meꞌitano womohi, “Ba ingkomo nabi ngkodeꞌ[5] to nidandi hampiha hingkiꞌ humei pe duniaꞌ?” Notiꞌi hi Yohanes, “Handoꞌio woꞌo.”

²²Katoꞌo ropantiꞌiki, “Ane hatoꞌoꞌi, itiꞌikika ba hihimoko, hingkeꞌna uwaꞌ pehoniꞌki pe to morumbaꞌka humei. Hapo pehoniꞌma noniuꞌ i wotamu hadoduomu?”

²³Nohoniꞌ hi Yohanes hibali hante to noꞌukiꞌ nabi Yesaia hampiha: “Akumo hieꞌe toaꞌ to moloaꞌ-loaꞌ i popada lori waheꞌe: ‘Pueꞌ hingkiꞌ hupaꞌmo. Ipatimomokei lalaNe!’” [6]

²⁴I lumbura toaꞌ-toaꞌ to nirumbaꞌ tiꞌo, uwaꞌ haꞌumbora duo toParisi.

²⁵Rotiꞌi toParisi tiꞌo, “Ane handoꞌioko Datu To Mamposalamaꞌ, handoꞌioko nabi Elia, hei handoꞌioko woꞌo nabi ngkodeꞌ to nidandi, mahamporeꞌi hinaꞌ podehoꞌko moriu toaꞌ?”[7]

²⁶Notiꞌi hi Yohanes, “Aku moriu toaꞌ hante uwailu. Hinewowoꞌena uwaꞌmo haduo i lumbumi, angkana Io handoaꞌi tene ibahaꞌkei.

²⁷Iomo to hupaꞌ mehuntu ka aku. Howeꞌlu moꞌuweꞌ pehiluꞌ sanalaꞌNa, hawaꞌa masipatoꞌ.”

²⁸Lekiꞌ-lekiꞌna tiꞌo mewali i bolaꞌ Betania to tinaꞌ i motoꞌando uwai Yarade, pebolaꞌana hi Yohanes meriu.

²⁹Poꞌonina, hi Yohanes pangkiꞌ hi Yesu hupaꞌ pe io. Notiꞌi pe toaꞌ to woriꞌ, “Elekei! Hintumoꞌo humei toaꞌ to nipandiriꞌ hibali Anaꞌ Gimba[8] to mamposalamaꞌ toaꞌ i duniaꞌ ka dosa.

³⁰Iomo to kutiꞌi hampiha hingkiꞌ hupaꞌ mehuntu ka aku, angkana meliu komarohone kuasaꞌNa ka aku, alaꞌ mepongka handoaꞌa tene nipoꞌanaꞌki, Io umbiꞌna uwaꞌmo.

³¹Uluꞌ-uluꞌna, handoaꞌi tene woꞌo kubahaꞌ kohihimoNa. Angkana hieꞌemo tungkaihangku: humeiꞌa moriuhi toSaraeli hante uwai, hingkeꞌna kupokonontokihi kohihimoNa.”

³²Uwaꞌ woꞌo posobiꞌine hi Yohanes hieꞌe, notiꞌi, “Uluꞌna handoaꞌi tene kubahaꞌ kohihimona hi Yesuno. Angkana Pueꞌ Ala morumbaꞌa moriu toaꞌ hante uwai. Notiꞌikiꞌa waheꞌe: ‘Ane iꞌokiꞌi Inohaꞌ Mangkolehi mengkohou hei meꞌohaꞌ i haduo toaꞌ, Iomo to hingkiꞌ mampomangkolehikei hante Inohaꞌ Mangkolehi.’ Katoꞌo, kuꞌokimo mpuꞌu Inohaꞌ Mangkolehi ka Suruga hibali pengkohouna tinti merpati pe hi Yesu. Iomo hinaꞌ kutiꞌi: hi Yesu iomo Anaꞌna Pueꞌ Ala.”

³³

³⁴

³⁵Poꞌonina, hi Yohanes uwaꞌ woꞌo itoꞌo moꞌawa-awa hante roduo topeguruna.

³⁶Konoꞌokiꞌnalu hi Yesu moliu, notiꞌi, “Ele, ndiꞌomo Anaꞌ Gimbane Pueꞌ Ala!”

³⁷Korohorina lolitane hi Yohanes, noloumohi metuntu hi Yesu.

³⁸Nopehahiliꞌihi hi Yesu hei Noꞌele metuntuhi. Katoꞌo Noteneihi, “Hapo to ipaliꞌkei?” Rotiꞌi “Guru, i imbo peꞌohaꞌaMa?”

³⁹Notiꞌi hi Yesu, “Humeimokei, iꞌokiꞌlukei hantudoꞌ.” Metuntumohi mpuꞌu pe Io nolou pe peꞌohaꞌaNa. Tempo tiꞌo tenteꞌ iba kononewa. I ando tiꞌo moꞌawa-awahi hante Io.

⁴⁰Iohi meroduo metuntuhi hi Yesu alaꞌ mampehoromuahi lolitana hi Yohanes Toperiu. Haduo, konaꞌna hi Andaria, hampemomolona hi Simo Peturuꞌ.

⁴¹Kaliuꞌ nolou hi Andaria mampaliꞌ hi Simo, notiꞌiki, “Mohidupaꞌmoka hante Mesias,” (Mesias hibobali hante Kerisitu palaihane, Datu Topohompoꞌ.)

⁴²Uko tiꞌo, nokomi nolou pe hi Yesu. Hi Yesu meꞌoꞌele pe hi Simo hei nopantiꞌiki, “Ingko Simo anaꞌna hi Yohanes. Mepongka hinewowoꞌena, hingkiꞌ niwowoiko Kepas.” (Palaihana “Kepas” i wiharora toYahudi, hibobali palaihane hante “Peturuꞌ” i wiharo Yunani. Palaihana: watu.)

⁴³Poꞌonina, hi Yesu hingkiꞌ nolou pe woiꞌ Galilea. Io mangkohidupaꞌki hi Pilipu hei nopantiꞌiki, “Metuntumoko i Aku!”

⁴⁴Hi Pilipu tiꞌo ka bolaꞌ Besaida, bolaꞌna hi Andaria hante hi Peturuꞌ.

⁴⁵Mepongka katoꞌo, noloumo woꞌo hi Pilipu mampaliꞌ awana to nikokeneꞌi hi Natanael. Nohuamo mpuꞌu honiꞌi notiꞌiki, “Kihuamo mpuꞌu, Toaꞌ to nitiꞌi i suraꞌna hi Musa hante i suraꞌna nabi-nabi hampiha! Iomo hi Yesu, anaꞌna hi Yusuf to ka Nasareꞌ.”

⁴⁶Mehoniꞌ hi Natanael, notiꞌi, “Uwaꞌreꞌi woꞌo to moromiꞌ to ka bolaꞌ Nasareꞌ?”

⁴⁷Notiꞌi hi Pilipu, “Metuntuko, hingkeꞌna iꞌokiꞌi!” Noloumohi pe hi Yesu, konoꞌokiꞌna hi Yesu hi Natanael mehupaꞌ mampohidupaꞌkiꞌI, hi Yesu mantiꞌi pe hi Natanael, “Hieꞌemoꞌe to mehupaꞌ, hintotoꞌ nikokeneꞌi haduo toSaraeli to mononto hei moromiꞌ mpololeke laline.”

⁴⁸Notiꞌi hi Natanael, “Hohumboreꞌi hinaꞌ Ibahaꞌ mpololeke waliangka, Guru?” Notiꞌi hi Yesu, “Handoaꞌko tene nowowoi hi Pilipu, Kuꞌokiꞌmoko mahura i luaꞌna loti ara.”

⁴⁹Notiꞌi hi Natanael, “Guru, AnaꞌnaKo mpuꞌu Pueꞌ Ala! Ingkomo mpuꞌu Datune toSaraeli!”

⁵⁰Notiꞌi hi Yesu, “Ba ipoꞌohiꞌi alaꞌ Kutiꞌi koKuꞌokiꞌma i luaꞌ loti ara? Hingkiꞌ iꞌokiꞌ womo tandaꞌ kuasaꞌ to meliu kokodeꞌne ka tiꞌo.”

⁵¹Uko tiꞌo, notiꞌi womo hi Yesu, “Tuꞌu mpololeke lolitangka hieꞌe: hingkiꞌ iꞌokiꞌkei laniꞌ moweaꞌ hei malaꞌekana Pueꞌ Ala uwaꞌ to moneꞌ hei uwaꞌ to mengkohou pe Anaꞌ Manusiaꞌ.”