Read Rampi Yohanes 10 Bible Online

Yohanes 10 - Rampi bible

Yohanes 10

¹Notiꞌi hi Yesu, “Tuꞌu mpololeke lolitangKa hieꞌe: ane uwaꞌ haduo to mekahi pe lali bontoꞌ gimba hei hawaꞌi moliu i wambaꞌ, angkana meponeꞌ ka bontoꞌ, palaihana toaꞌ tiꞌo iomo topanako hei toperompoꞌi.

²Angkana topolambaꞌ, mekahi ka wambaꞌ.

³To mampoꞌodaꞌ wambaꞌ bontoꞌ mampoweaꞌki wambaꞌ pe topolambaꞌ, Topolambaꞌ tiꞌo mowowoi konaꞌra hambaꞌa-hambaꞌa hei gimbana pobahaꞌ loaꞌna. Katoꞌo nokomihi nolou pe howali.

⁴Konokomina nolou pe howali, io medulumo ka gimbana, hei gimbana metuntu, alaꞌ robahaꞌ rotandai loaꞌne.

⁵Ane uwaꞌ to mowowoihi handoꞌio to molambaꞌhi, hawaꞌi rotuntuni, angkana ropehilaihi, alaꞌ handoꞌio loaꞌna to molambaꞌhi.”

⁶Hi Yesu mampowute pandiriꞌ tiꞌo pe toParisihi, angkana hawaꞌi robahaꞌ tungkaihane.

⁷Iomo horiana Notiꞌi womo, “Tuꞌu mpololeke lolitangKa hieꞌe: Akumo hieꞌe wambaꞌ to ropoliuhi gimba ane mekahihi pe lali bontoꞌ.

⁸Lekiꞌ-lekiꞌna toaꞌ to himpodulumo ka Aku[29] hibali to manako hei toperorompoꞌi, angkana gimbangKu, hawaꞌhi metuntu i pewowoira.

⁹Akumo hieꞌe to nipandiriꞌ hibali wambaꞌ. Himo to mekahi moliu i Aku, pahuahi kotehompoꞌ. Iohi wadi nipandiriꞌ hibali gimba to mekahi pe lali bontoꞌ hei mesuwuhi nolou pe howali pahua kora to molompoꞌ.

¹⁰Tungkaihana topanako iomo manako, merorokoꞌ hei mepokarugiꞌ. Angkana kohumeingKu hieꞌe hingkeꞌna toaꞌ pahuahi kotuwuꞌ to wolaꞌ to moromiꞌ mpololeke.

¹¹Akumo hieꞌe topolambaꞌ to moromiꞌ. TimomoꞌA mampewei kotuwuꞌKu hingkeꞌna gimbangKu tuwuꞌhi.

¹²Ane toaꞌ to niharoilu molambaꞌ, hawaꞌi moromiꞌ polambaꞌne, alaꞌ io handoꞌio tumpu gimba. Ane pangkiꞌi serigala, io mehilai mampolihi gimba to woriꞌ tiꞌo. Katoꞌo uwaꞌ gimba to nohokiꞌ serigala, koꞌukoana to ntaniꞌna mogara-garahi.

¹³Toaꞌ to niharoi tiꞌo mehilai, alaꞌ io majama hingkeꞌna pahualu harona. Hawaꞌi mampekiri gimba tiꞌo.

¹⁴Akumo hieꞌe Topolambaꞌ to moromiꞌ. Hibali UmoꞌKu pobahaꞌA, hei Aku woꞌo pobahaꞌA UmoꞌKu, hatoꞌo woꞌo Aku pobahaꞌA gimbangKu, hei gimbangKu pobahaꞌA. TimomoꞌA mampewei kotuwuꞌKu hingkeꞌna gimbangKu tuwuꞌhi.

¹⁶Uwaꞌ tene gimbangKa to ntaniꞌna, to i howali bontoꞌ hieꞌe, Aku hingkiꞌ mampodulukihi, hei robahaꞌ mpololeke loaꞌKa. Mewaliꞌ, lekiꞌ-lekiꞌna gimbangKu mewalihi hantibura hei Akumo to mewali topolambaꞌre.

¹⁷UmoꞌKu mampokarimaꞌA, alaꞌ hingkiꞌ Kupeweiꞌi kotuwuꞌKa hingkeꞌna tuwuꞌA huliꞌ.

¹⁸Hawaꞌi uwaꞌ haduo to moroa kotuwuꞌKu ane handoꞌio peleihangKu. Kulei mampewei tuwuꞌKu motuntuni peleihangKu hadoduongKu. Uwaꞌ kuasaꞌKa mampewei kotuwuꞌKu, hei uwaꞌ woꞌo kuasaꞌKa moroa huliꞌ kotuwuꞌKu. Iomo hawaꞌne UmoꞌKu to Kutorimo.”

¹⁹Korohorina toYahudi lolitane hi Yesu, momehoniꞌ-honiꞌ womohi.

²⁰Woriꞌhi to mantiꞌi, “Nopekahii tokodake hei magila! Hampoliꞌmo paralu topehoromua lolitaNe.”

²¹Angkana uwaꞌ woꞌo to mantiꞌi, “Hawaꞌi! Toaꞌ to nopekahii tokodake hawaꞌi mololita hatoꞌo. Uwaꞌreꞌi tokodake to pobiaꞌ mampopangkiꞌ toaꞌ tobilo?”

²²I tempo tiꞌo i Yerusale, toaꞌ mampoꞌuwaꞌhi susaꞌ mangkolowoi ando pampomangkolehi Tambina Pueꞌ Ala hampiha. Tempo tiꞌo tempo mepoholeꞌ.

²³Hi Yesu matengkaꞌ i tanobaꞌa Tambina Pueꞌ Ala i tangkoꞌ to nikokeneꞌi tangkoꞌ Salomo.

²⁴Haꞌumbora duohi tadulakora toYahudi motuleliꞌihi hi Yesu, ropantiꞌiki, “Mahamporeꞌi hinaꞌ Ipotedehika nturusi wuli? Ane tuꞌuKo Datu to Mamposalamaꞌ, Ipokonontokimoka.”[30]

²⁵Notiꞌi hi Yesu, “Ukomokei Kutiꞌiki, angkana hawaꞌkei mepoꞌohi. Tandaꞌ kuasaꞌ to Kuwali hante kuasaꞌna UmoꞌKu, tiꞌomo to mampokononto kohihimongKu.

²⁶Angkana hawaꞌkei ipoꞌohi, alaꞌ handoꞌiokei gimbangKu.

²⁷GimbangKu mampehoromua loaꞌKu. Kubahaꞌhi mpololeke, hei ropetuntuiꞌA.

²⁸Kupaꞌanihi kotuwuꞌ to wolaꞌ to hawaꞌi mokoꞌukoa, hei monontomo kohawaꞌre hingkiꞌ tekaꞌa ka Pueꞌ Ala wute nantolou-louna. Hawaꞌi uwaꞌ haduo to wadi mamperompoꞌihi ka korawengKu.

²⁹Meliu kuasaꞌNe UmoꞌKu ka lekiꞌ-lekiꞌna, hei Iomo to mampaꞌaniꞌA gimbangKu. Hawaꞌi uwaꞌ haduo to wadi mamperompoꞌi ka koraweꞌna UmoꞌKu.

³⁰Aku hei UmoꞌKu mohaꞌanuKa.”

³¹Korohorinalu tadulakora toYahudi lolitane hi Yesu tiꞌo, kaliuꞌ mopingkuꞌhi watu. Rokodokoꞌi molubaꞌ hi Yesu wute mahi.

³²Notiꞌikihi hi Yesu, “Woriꞌ jama to moromiꞌ to norumbaꞌkiꞌA UmoꞌKu hingkeꞌna Kuponoꞌokiꞌkikei. Ka lekiꞌ-lekiꞌna tiꞌo, imboꞌina to mewali pongkane hinaꞌ ikodokoꞌikei morokoꞌA?”

³³Rotiꞌi tadulakore toYahudi, “Handoꞌio alaꞌ tandaꞌ kuasaꞌMu to moromiꞌ horiana hingkiꞌ kirokoꞌKo, angkana alaꞌ pampokokeniꞌaMu wae Pueꞌ Ala! Itiꞌi Pueꞌ AlaKo, hantaro toaꞌ biasaluKo!”

³⁴Notiꞌi hi Yesu, “I lali suraꞌ aturami, teꞌukiꞌmo lolitane Pueꞌ Ala pe topebutusi toYahudi hampiha to mantiꞌi waheꞌe: ‘pueꞌ alakei’[31]

³⁵Hapo to teꞌukiꞌ i lali Suraꞌ Mangkolehi tiꞌo, hawaꞌi uwaꞌ kotewolihine wute hinewowoꞌena. Mewaliꞌ, ane Suraꞌ Mangkolehi mantiꞌi ‘pueꞌ alakei’ pe toaꞌ to mantorimo pohawaꞌna Pueꞌ Ala hampiha, pelumbuꞌna tene Aku,

³⁶alaꞌ Aku hieꞌe to noꞌuwiꞌA mpololeke UmoꞌKu to morumbaꞌA humei pe duniaꞌ. Mewaliꞌ, mahamporeꞌi hinaꞌ itiꞌikei Kupokokeniꞌa Pueꞌ Ala ane kutiꞌi koꞌAkuna anaꞌNe?

³⁷Ane kehawaꞌi Kujama jama to NorumbaꞌkiꞌA UmoꞌKu, kehawaꞌi Kupohinaru hingkiꞌ nipoꞌohiꞌA.

³⁸Angkana alaꞌ Kujamamoꞌi jama to NorumbaꞌkiꞌA UmoꞌKu, hangangaa nipoꞌohiꞌA. KehapoꞌA hawaꞌi ipoꞌohikei, hangangaa ipoꞌohikei alaꞌ jama to Kuwali. Ane ipoꞌohikei jama tiꞌo, hingkiꞌ ibahaꞌkei mpololeke i lalimi komohaꞌanungKu hante UmoꞌKu, hei UmoꞌKu mohaꞌanu hante Aku.”

³⁹Korohorinalu tadulakora toYahudi lolitane hi Yesu, rokodokoꞌi womo rohokiꞌ, angkana hawaꞌi moroa.

⁴⁰Uko katoꞌo, molai womo hi Yesu, nolou pe tinaꞌ motoꞌando uwai Yarade i pebolaꞌana hi Yohanes hampiha meriu, hei meꞌohaꞌ itoꞌo.

⁴¹Woriꞌ toaꞌ nolou mampohidupaꞌki hi Yesu, hei rotiꞌi haduo hei haduo, “Hi Yohanes hawaꞌi mowali tandaꞌ kuasaꞌ, angkana lekiꞌ-lekiꞌna to nopowute noniuꞌ toaꞌ hieꞌe tuꞌu.”

⁴²Iomo horiana woriꞌ toaꞌ itoꞌo mepoꞌohi pe hi Yesu.