Read Rampi Yohanes 11 Bible Online

Yohanes 11 - Rampi bible

Yohanes 11

¹Haduo tomaꞌani to nikokeneꞌi hi Lasarus meꞌohaꞌ i bolaꞌ Betania moꞌawa hante hampemomolona hi Maria hante hi Marta. Hi Maria tiꞌomo to mobobohi kapuꞌna hi Yesu hante minyaꞌ-minyaꞌ to mewowau honiꞌi nopahi hante wiloluna. Hampiha tempo, hi Lasarus makaja komohakiꞌne.

³Hi Maria hante hi Marta morumbaꞌmohi toaꞌ nolou mampowute pepaha pe hi Yesu, rotiꞌi “Pueꞌ, halalingki to Ipokarima, kolentuꞌana mohakiꞌ ngkodeꞌ.”

⁴Konohorinalu hi Yesu kareba tiꞌo, Notiꞌi, “Hakiꞌna tiꞌo hawaꞌi hingkiꞌ mangkomiꞌi pe komahia. Tiꞌo mewali hingkeꞌna Pueꞌ Ala ropokodeꞌ, hei moliu i hapo to hingkiꞌ Kuwali, Aku anaꞌna Pueꞌ Ala hingkiꞌ ropokodeꞌ woꞌo.”

⁵Hi Yesu mampokarima hi Marta, hi Maria, hante hi Lasarus.

⁶Angkana KonohoriNalu komohakiꞌne hi Lasarus, hawaꞌi kaliuꞌ nolou, lebaꞌlu i peꞌohaꞌaNa roꞌando komoruene.

⁷Liumo roꞌando honiꞌi Notiꞌiki topeguruNa, “Hokeimo mahuliꞌmoki nolou pe woiꞌ Yudea.”

⁸TopeguNa mantiꞌi, “Guru, handoaꞌhi tene morue toYahudihi itoꞌo mangkodokoꞌihi hingkiꞌ mowatuiKo wute mahi. Mewaliꞌ, mahamporeꞌi hinaꞌ Ikodokoꞌi womo mahuliꞌ nolou?”

⁹Notiꞌi hi Yesu, “I lali haꞌando, hawaꞌireꞌi hampuluꞌ merojaa? Toaꞌ to matengkaꞌ andona, hawaꞌhi hingkiꞌ hiwintiꞌ. Pangkiꞌhi, alaꞌ uwaꞌ wanta ando to mampomobaro duniaꞌ hieꞌe.

¹⁰Angkana toaꞌ to matengkaꞌ i lali komokorindi, bateꞌna hingkiꞌ hiwintiꞌ, alaꞌ hawaꞌi uwaꞌ to mowantaiꞌi.”

¹¹Hatoꞌomo lolitane hi Yesu, hei uko tiꞌo Notiꞌi womo, “Awanta hi Lasarus leꞌomo, angkana hingkiꞌ ako Kuluke.”

¹²Kotuꞌuana lolitane hi Yesu tiꞌo, palaihana hi Lasarus mahimo. Angkana hawaꞌi robahaꞌ palaihane lolitaNa tiꞌo, rotiꞌiae leꞌolu hi Lasarusꞌno. Iomo horiana rotiꞌi, “Pueꞌ, ane leꞌoluꞌi, hingkiꞌ meꞌarolu intu alaꞌ moꞌoriꞌmoꞌi.”

¹³

¹⁴Katoꞌo, Nopokonontokihi palaihane lolitaNa, Notiꞌi, “Hi Lasarus mahimo.

¹⁵MotanaꞌA alaꞌ hawaꞌA uwaꞌ itoꞌo i tempona mahi. Alaꞌ hapo to mewali, hingkiꞌ modumbuꞌ i ingkei, hingkeꞌna mepoꞌohikei pe Aku. Mewaliꞌ hokeimo noloumoki pe hi Lasarus.”

¹⁶Hi Toma, to rotiꞌi woꞌo tomoropaꞌ, mampatiꞌikihi topeguru ntaniꞌna, “Aginamo metuntuki pe hi Yesu, hingkeꞌna mahiki moꞌawa hante Io.”

¹⁷Kohupaꞌralu i bolaꞌ Betania, hi Yesu pahori kareba to mantiꞌi iba andomo hi Lasarus nitawu.

¹⁸Betania tiꞌo dodungku i Yerusale, kira-kira tolu kilo komoꞌelane.

¹⁹Mewaliꞌ, woriꞌhi toYahudi hupaꞌ mampododoli hi Marta hante hi Maria alaꞌ komahina hineeꞌra.

²⁰Ikonohorina hi Marta kohupaꞌne hi Yesu, kaliuꞌ nolou mangkohidupaꞌkiꞌI. Angkana hi Maria i tambilu nturusi.

²¹Notiꞌi hi Marta pe hi Yesu, “Pueꞌ, ane keꞌiseꞌeKo i tempona halalingku mohakiꞌ, kehawaꞌi hingkiꞌ mahi.

²²Angkana kehapoꞌi hatoꞌo, kubahaꞌ: hapo to Iperapiꞌ pe Pueꞌ Ala hinewowoꞌena noniuꞌ i halalingku, bateꞌna hingkiꞌ Nopaꞌanikiko.”

²³Notiꞌi hi Yesu, “Halalimu hingkiꞌ tuwuꞌlu huliꞌ.”

²⁴Notiꞌi hi Marta, “Kubahaꞌlu kohingkiꞌ tuwuꞌne huliꞌ i ando pobutusi i kotutuana duniaꞌ, ikonipopeꞌarona lekiꞌ-lekiꞌra toaꞌ to mahi.”

²⁵Notiꞌi hi Yesu, “Akumo hieꞌe to mampopeꞌaro to mahi, hei to mepaꞌani kotuwuꞌ. Toaꞌ to mepoꞌohi pe Aku, kehapohi mahi, hingkiꞌ tuwuꞌhi huliꞌ.

²⁶Hei lekiꞌ-lekiꞌna toaꞌ to tuwuꞌ hei mepoꞌohi pe Aku, kotuꞌuana hawaꞌi mahi wute nantolou-louna. Ipoꞌohilu to Kutiꞌi hieꞌe?”

²⁷Notiꞌi hi Marta, “Kupoꞌohi Pueꞌ. Tuꞌu koꞌIngkona Anaꞌne Pueꞌ Ala, Datu to Mamposalamaꞌ to nodandi Pueꞌ Ala hampiha to hingkiꞌ humei pe duniaꞌ.”

²⁸Koꞌukona mantiꞌi hatoꞌo, noloumo hi Marta pe tambina mowowoi hi Maria, honiꞌi nowowaraꞌ notiꞌiki, “Uwaꞌ Guru inoꞌo. Nokodokoꞌi mangkohidupaꞌkiko!”

²⁹Ikonohorinalu hi Maria lolitane, hohiꞌ-hohiꞌmo mpuꞌu nolou mangkohidupaꞌki hi Yesu.

³⁰I tempo tiꞌo, hi Yesu handoaꞌi tene mekahi pe lali bolaꞌ, uwaꞌlu tene i pohidupaꞌara hante hi Marta hingkenia.

³¹ToYahudi to hupaꞌhi mepododoli i lali tambi, pangkiꞌhi hi Maria metotiꞌi kaliuꞌ molai. Rotiꞌireaꞌ io hingkiꞌ ako meꞌola i petowua. Iomo horiana metuntuhi woꞌo.

³²Ikohupaꞌnalu hi Maria i koꞌuwaꞌna hi Yesu, hei noꞌokiꞌmo tiꞌo hi Yesu, melingkotuꞌ i hinaroNa honiꞌi notiꞌi, “Pueꞌ, ane keꞌiseꞌeKo i tempo tiꞌo, kehawaꞌi hingkiꞌ mahi halalingka.”

³³Ikonoꞌokiꞌnalu hi Yesu hi Maria meꞌola, hante toYahudi to nopoꞌawa meꞌolahi woꞌo, io horiana hanondoiha mpololeke hei masusa laliNe.

³⁴Nopeꞌitanoki, “I imbo nitawuꞌi?” Rotiꞌi, “Pueꞌ, hoki, akoꞌi toꞌele.”

³⁵Meꞌolamo hi Yesu.

³⁶Rotiꞌi toYahudi, “Ele! Marimamo mpuꞌu pe hi Lasarus!”

³⁷Angkana uwaꞌhi woꞌo to mantiꞌi, “Toaꞌ tobilo Nopokoꞌoriꞌ. Mahamporeꞌi hinaꞌ hi Lasarus hawaꞌi nopokoꞌoriꞌ hingkeꞌna hawaꞌi mahi?”

³⁸Katoꞌo, masusa womo laline hi Yesu, horiana nolou pe petowua. Potowua tiꞌo, iomo woloꞌ watu to i papina biri to rotutuꞌi hante watu to kodeꞌ.

³⁹Notiꞌi hi Yesu, “Lolihakikei watu potutuꞌine tiꞌo!” Hi Marta mantiꞌi, “Pueꞌ, inioꞌ nihungkaꞌi alaꞌ momaumoꞌi. Iba minimo nitawu.”

⁴⁰Notiꞌi hi Yesu pe hi Marta, “Hawaꞌireꞌi Kutiꞌikimoko hingkenia? Ane ipoꞌohiꞌA, hingkiꞌ iꞌokiꞌi mpuꞌu komarohone kuasaꞌna Pueꞌ Ala”

⁴¹Katoꞌo toaꞌ to itoꞌohi mohungkaꞌmohi mpuꞌu watu potutuꞌina petowua. Hi Yesu menoaꞌ pe laniꞌ honiꞌi Notiꞌi, “UmoꞌKu, kutiꞌi woriꞌ komoromiꞌMa, alaꞌ perapiꞌKu poko Ipehoromua.

⁴²Kubahaꞌ, lolitangKu bateꞌna Ihori. Aku mantiꞌiꞌA hatoꞌo hingkeꞌna toaꞌ woriꞌ mampoꞌohi koꞌIngkonamo mpuꞌu to morumbaꞌA.”

⁴³Uko tiꞌo, notiꞌi hi Yesu Nopokobue, “Lasarus! Mesuwumoko humei!”

⁴⁴Mesuwumo mpuꞌu toaꞌ to mahi tiꞌo ka lali petowua. Korawena hante kapuꞌna tebungku tene hante wida popebungkuna, hei tutuꞌna tewiwiꞌ tene motuntuni adaꞌ toYahudi. Notiꞌikihi hi Yesu, “Ipopolaikei tiꞌo popebungkune hingkeꞌna moromiꞌ patengkaꞌne.”

⁴⁵Woriꞌhi toYahudi to nolou mokadodoroꞌi hi Maria i tempo tiꞌo, pangkiꞌ hapo to nowali hi Yesu, iomo horiana woriꞌhi to mepoꞌohi pe Io.

⁴⁶Angkana uwaꞌhi woꞌo hantenaꞌne to nolou pe toParisi mampowutekihi hapo to nowali hi Yesu.

⁴⁷Horiana toParisi hante tutuꞌ-tutuꞌ tadulako mpenomba mampoꞌuwaꞌmohi pogombo ngkodeꞌ moꞌawa hante tomotodi-tomotodira toYahudi. Rotiꞌi, “Hapo to hangangaa towali, alaꞌ woriꞌmo mpuꞌu tandaꞌ kuasaꞌ to nowali hi Yesu?

⁴⁸Ane topotedehiꞌi nturusi, lekiꞌ-lekiꞌna toaꞌ hingkiꞌ mepoꞌohihi pe Io. Koꞌukoana, surodadu toRoma hingkiꞌ hupaꞌ mokero Tambina Pueꞌ Ala hante leki-lekiꞌna roboꞌta.”

⁴⁹Uko tiꞌo, mololitamo haduo ka lumbura to nikokeneꞌi hi Kaipa, Tadulako Mpenomba ngkodeꞌ i toꞌa tiꞌo, notiꞌi, “Hawaꞌkei ibahaꞌ hapo-hapo!

⁵⁰Hawaꞌkei ibahaꞌ hapo to modumbuꞌ i ingkei. Aginamo haduo toaꞌ mahi mosulewotai lekiꞌ-lekiꞌna toaꞌ, hintina mahiki lekiꞌ-lekiꞌta.”

⁵¹Lolita tiꞌo handoꞌio ka hi Kaipa hadoduona, angkana ka Pueꞌ Ala. Hi Kaipa tiꞌo iomo Tadulako Mpenomba ngkodeꞌ i tempo tiꞌo. Tungkaihana lolitana hi Kaipa iomo hingkeꞌna hi Yesu hangangaa nihuku mahi hingkeꞌna toYahudi himpolohoꞌ ka komahia. Hei handoꞌiolu toYahudi. Nokomi komahina hi Yesu tiꞌo, lekiꞌ-lekiꞌna anaꞌna Pueꞌ Ala to mogara-garahi i humanele duniaꞌ hingkiꞌ nirampuhi huliꞌ hei nipohantiburahi.

⁵²

⁵³Mepongka ando tiꞌo, tadulakora toYahudi hampekokirihi hingkeꞌna hi Yesu rorokoꞌ.

⁵⁴Iomo horiana hi Yesu hamboaꞌmo mampopeꞌokiꞌ pe toYahudi, hingkeꞌna hantaro romoꞌi roꞌokiꞌ toaꞌ to woriꞌ. Io molaimo katoꞌo nolou pe bolaꞌ to nikokeneꞌi Eparai i bota popada lori, honiꞌi meꞌohaꞌ itoꞌo hante topeguruNahi.

⁵⁵I tempo tiꞌo, hingkiꞌ hupaꞌ ando ngkodeꞌ agama Yahudi to rotiꞌi ando Posusaꞌ Pokalintora toYahudi. Handoaꞌi tene ando ngkodeꞌ tiꞌo, woriꞌ toaꞌ ka bolaꞌ-bolaꞌ nolou pe Yerusale, hingkeꞌna mampomangkolehihi wotara motuntuni adaꞌ agamara.

⁵⁶Toaꞌ to hirampu i Yerusale tiꞌo mampaliꞌhi hi Yesu. Kolentuꞌara hirampu i Tambina Pueꞌ Ala, mometenei-teneimohi, rotiꞌi, “Hohumbo pahuami? Ba hingkiꞌ hupaꞌi mpuꞌu hi Yesu i posusaꞌa hieꞌe?”

⁵⁷Hatoꞌo pololitare toaꞌ to woriꞌ, alaꞌ tutuꞌ-tutuꞌ tadulako mpenomba hei toParisi, uwaꞌmo umbiꞌ parentare pe toaꞌ to woriꞌ to mantiꞌi, “Ane hihimo to pobahaꞌ koꞌiꞌimbona hi Yesu, hangangaa itiꞌikika, hingkeꞌna nihokiꞌI.”