Read Rampi Yohanes 13 Bible Online

Yohanes 13 - Rampi bible

Yohanes 13

¹Haꞌando romo honiꞌi ando Posusaꞌ Pokalintora toYahudi, nobahaꞌ hi Yesu kohingkiꞌ hohiꞌnemo tempoNe hingkiꞌ mampolihi duniaꞌ hei mahuliꞌ nolou pe Umoꞌna. Io mampokarimahi lekiꞌ-lekiꞌra toaꞌ to metuntu pe Io, hei Nopotongawa pe iohi kokodeꞌne rimaNa wute nantolou-louna.

²Wini tiꞌo, hi Yesu hante topeguruNahi mangkahi moꞌawa-awa. I tempo tiꞌo, Belisiꞌ ukomo mokeloi lalina hi Yudas anaꞌna hi Simo Isikarioꞌ, hingkeꞌna mampobaluꞌ hi Yesu pe poniꞌNa.

³Angkana nobahaꞌmo hi Yesu konopaꞌaniNa Umoꞌna lekiꞌ-lekiꞌna kuasaꞌ pe Io. Nobahaꞌ woꞌo koka Pueꞌ Alana, hei kohingkiꞌ mahuliꞌNe womo pe Pueꞌ Ala.

⁴Iomo horiana metotiꞌimo, mampohente jubaNa, hei moroa wida Nopehiluꞌki i henaꞌNa.

⁵Uko tiꞌo, moroa uwai i loia, honiꞌi mowaheꞌ kapuꞌna topeguruNahi, hei Nopahi hante wida to i henaꞌNa.

⁶Wutemo hi Yesu i hi Peturuꞌ, angkana hi Peturuꞌ mantiꞌi, “Pueꞌ, mahamporeꞌi hinaꞌ Ingko to mowaheꞌ kapuꞌki?”

⁷Notiꞌi hi Yesu, “Hinewowoꞌena, handoaꞌi tene ibahaꞌ hapo to Kuwali. Angkana i ando to dongkaꞌ, honiꞌiwae ibahaꞌ.”

⁸Notiꞌi hi Peturuꞌ, “Inioꞌ, Pueꞌ! Hawaꞌi masipatoꞌ ane Ingko to mowaheꞌ kapuꞌka.” Notiꞌi hi Yesu, “Ane hawaꞌko Kuwaheꞌ, hawaꞌi uwaꞌ pohintuwuꞌma hante Aku.”

⁹Notiꞌi hi Peturuꞌ, “Ane hatoꞌoꞌi Pueꞌ, handoꞌio kapuꞌkulu, angkana korawengku hante tutuꞌku woꞌo.”

¹⁰Notiꞌi hi Yesu, “Toaꞌ to ukomo mendiu, hamboaꞌmo mokomaꞌ, moꞌituꞌmo lekiꞌ-lekiꞌne wotana, hamboaꞌmo paralu niwaheꞌ huliꞌ, bateꞌnalu kapuꞌna to hangangaa niwaheꞌ.[39] Ingkei, tewaheꞌmokei, angkana hawaꞌi lekiꞌ-lekiꞌmi.”

¹¹Hi Yesu mololita hatoꞌo, alaꞌ Nobahaꞌmo kohihimona to hingkiꞌ mampobaluꞌ wotaNa pe poniꞌNa. Iomo horiana Notiꞌi, “Tewaheꞌmokei, angkana hawaꞌi lekiꞌ-lekiꞌmi.”

¹²Koꞌukona hi Yesu mowaheꞌ kapuꞌra, Nopakeꞌmo huliꞌ jubaNe hei mahura, honiꞌi Notiꞌikihi, “Ba ibahaꞌmokei palaihane hapo to hongkoꞌ Kuwali pe ingkei?

¹³IꞌadaꞌiꞌAkei, mewaliꞌ iwowoiꞌAkei Guru hei Pueꞌ. Lolitami tiꞌo tuꞌu mpuꞌu.

¹⁴Ane Aku, Pueꞌmi hei Gurumi, majamaꞌA hibali haduo hawiꞌ mowaheꞌ kapuꞌmi, hatoꞌo woꞌo ingkei, hangangaa momewaheꞌkei kapuꞌmi.

¹⁵Kuponoꞌokiꞌkikei hieꞌe, hingkeꞌna ipetuntuikei.

¹⁶Tuꞌu mpololeke lolitangKa hieꞌe: haduo hawiꞌ hawaꞌi meliu koniꞌadaꞌine ka tuana, hatoꞌo woꞌo haduo suro hawaꞌi meliu koniꞌadaꞌine ka toaꞌ to merorumbaꞌ.

¹⁷Ane ibahaꞌmokei hei ipetuntuikei poturuꞌ hieꞌe, hingkiꞌ morasiꞌkei.

¹⁸Hapo to kutiꞌi hingkenia, hawaꞌi noniuꞌ i ingkei lekiꞌ-lekiꞌmi. Umbiꞌ Kubahaꞌ pambiarane toaꞌ to Kuꞌuwiꞌ. Angkana hangangaa tebuhoꞌi hapo to teꞌukiꞌ i lali Suraꞌ Mangkolehi to mantiꞌi: ‘Haduo toaꞌ to mangka moꞌawa Aku,[40] iomo to mewali poniꞌKu’

¹⁹Tiꞌo Kupowutekimokei umbiꞌ ikohandoaꞌna tene mewali, hingkeꞌna ane mewalimoꞌi, hingkiꞌ ipoꞌohikei koꞌAkunamo Io to ka Pueꞌ Ala.

²⁰Tuꞌu mpololeke lolitangKa hieꞌe: himo to mantorimo surongKu, hibalimo woꞌo Aku to notorimo. Hatoꞌo woꞌo, himo to mantorimoꞌA, hibalimo woꞌo Pueꞌ Ala to notorimo alaꞌ Iomo to morumbaꞌA.”

²¹Koꞌukona hi Yesu mololita hatoꞌo, hanondoiha mpololeke laliNe, honiꞌi Notiꞌi, “Tuꞌu mpololeke lolitangKa hieꞌe: haduo ka ingkei hingkiꞌ mampobaluꞌA pe poniꞌKu.”

²²Momeꞌele-elemohi haduo hei haduo alaꞌ hawaꞌi robahaꞌ kohihimona to Notungkai.

²³Haduo topeguruNa to Nopotundeꞌ, mahura i hiriNa.[41]

²⁴Hi Simo Peturuꞌ mokaweꞌi, hei mantiꞌi pe io, “Ipeꞌitanoki pe Guru, ba hihimoꞌi to Notungkai.”

²⁵Iomo horiana topeguruNa to Nopotundeꞌ tiꞌo mekododungku pe hi Yesu honiꞌi nopeꞌitanoki, “hihimo toaꞌne Pueꞌ?”

²⁶Notiꞌi hi Yesu, “Himo to Kupaꞌani roti to Kupelomiꞌki pe lali kati hieꞌe, iomo toaꞌne.” Noroamo hamokuꞌ roti, Nopelomiꞌki i lali kati tiꞌo, honiꞌi Nopaꞌaniki pe hi Yudas, anaꞌna hi Simo Iskarioꞌ.

²⁷Konoroanalu hi Yudas roti tiꞌo, Belisiꞌ mekahimo i lalina. Uko tiꞌo, hi Yesu mampatiꞌiki, “Hapo to hingkiꞌ iwali, hohiꞌmo iwali.”

²⁸To mangkahi itoꞌo, hawaꞌi uwaꞌ howeꞌ haduo to pobahaꞌ tungkaihane hi Yesu mantiꞌi hatoꞌo pe hi Yudas.

²⁹Uwaꞌ hantenaꞌ mantiꞌi hi Yesu morumbaꞌ hi Yudas nolou mehili koparaluara i posusaꞌara, ba mampaꞌaniꞌi doiꞌ pe toaꞌ to merima-rima, alaꞌ hi Yudas topamporia doiꞌra.

³⁰Konoroanalu hi Yudas roti tiꞌo, io molaimo nolou pe howali. I tempo tiꞌo, winimo.

³¹Kopolainalu hi Yudas, notiꞌimo hi Yesu, “Hinewowoꞌena Aku Anaꞌ Manusiaꞌ hingkiꞌ nipokodeꞌmo. Hei hapo to hingkiꞌ mewali i Aku, hingkiꞌ mampokodeꞌ woꞌo Pueꞌ Ala.

³²Nokomi komahingKu, kokodeꞌna konaꞌna Pueꞌ Ala hingkiꞌ mombaha pe toaꞌ, hei Aku woꞌo hingkiꞌ nopokodeꞌA Pueꞌ Ala. To Kutiꞌi hieꞌe hangangaa hohiꞌ mewali.

³³PokoꞌanaꞌKu, hamboaꞌmoꞌA hingkiꞌ morue moꞌawa-awa hante ingkei. Uko tiꞌo, hingkiꞌ ipaliꞌAkei, angkana hibali to Kutiꞌikihi tadulakora toYahudi hampiha, hatoꞌo woꞌo Kutiꞌikikei: i konolouhangKu tiꞌo, handoaꞌkei tene hohumbo nolou.

³⁴Kupaꞌanikei hawaꞌ to wolaꞌ. Hangangaa momepokarimakei hibali Aku mampokarimakei.

³⁵Ane momepokarimakei, lekiꞌ-lekiꞌna toaꞌ hingkiꞌ pobahaꞌ koꞌingkeinamo toaꞌKa.”

³⁶Nopeꞌitanoki hi Simo Peturuꞌ pe hi Yesu, “Pueꞌ, hingkiꞌ pe imboKo?” Notiꞌi hi Yesu, “I konolouhangKu tiꞌo, hawaꞌko hohumbo hingkiꞌ nolou hinewowoꞌena. I ando to dongkaꞌ romo, honiꞌko hohumbo metuntu pe Aku.”

³⁷Notiꞌi womo hi Peturuꞌ, “Pueꞌ, mahamporeꞌi hinewowoꞌena hinaꞌ hawaꞌa wadi metuntu pe Ingko? Timomoluꞌa mahi alaꞌ petuntuku pe Ingko!”

³⁸Notiꞌi hi Yesu, “Ba timomoko mpuꞌu mahi alaꞌ Aku? Tuꞌu mpololeke lolitangKa hieꞌe: poꞌoni dodungku ando handoaꞌi tene metantoroꞌoꞌuoꞌ manuꞌo, tolu mpihamoko hingkiꞌ mosapuakaꞌA.”