Read Rampi Yohanes 14 Bible Online

Yohanes 14 - Rampi bible

Yohanes 14

¹Hi Yesu mololita pe topeguruNahi, Notiꞌi, “Inioꞌ mororangko lalimi! Mepoꞌohimokei pe Pueꞌ Ala, hei mepoꞌohimokei woꞌo pe Aku.

²I tambina UmoꞌKu, woriꞌ peꞌohaꞌa. Ane kehawaꞌi hatoꞌo, kehawaꞌkei hingkiꞌ Kutiꞌiki. NolouꞌA mampatimomokikei peꞌohaꞌami.

³Ane ukomoꞌi Kupatimomo peꞌohaꞌami, hingkiꞌ mahuliꞌ womoꞌA humeikei Kuroa, hei hingkiꞌ Kukomikei pe peꞌohaꞌangKu, hingkeꞌna i imbolu koꞌuwaꞌangKu, itoꞌokei woꞌo moꞌawa hante Aku.

⁴Ibahaꞌmokei i imbo lala pe peꞌohaꞌa konolouhangKu.”

⁵Notiꞌi hi Toma, “Pueꞌ, hawaꞌi kibahaꞌ pe imbo koꞌakoaMa. Mewaliꞌ, hohumbo kokibahaꞌne lalana?”

⁶Notiꞌi hi Yesu, “Akumola hieꞌe lala hei komononto, hei to mampaꞌanikei kotuwuꞌ. Hawaꞌi uwaꞌ howeꞌ haduo to wute pe UmoꞌKu, ane hawaꞌi moliu ka Aku.

⁷Ane ibahaꞌAkei, ibahaꞌkei woꞌo UmoꞌKa. Mepongka hinewowoꞌena, ibahaꞌmokei Pueꞌ Ala hei hibalimokei woꞌo pangkiꞌ Io.”

⁸Notiꞌi hi Pilipu, “Pueꞌ, Itidoꞌkika UmoꞌMa. Iolu to kiperapiꞌ.”

⁹Notiꞌi hi Yesu pe hi Pilipu, “Pilipu, handoaꞌAreꞌi ibahaꞌ? Moruemoki moꞌawa! Himo to pangkiꞌA, hibalimo woꞌo pangkiꞌ UmoꞌKu. Mewaliꞌ, mahamporeꞌi hinaꞌ iperapiꞌ tene hingkeꞌna Kutidoꞌkikei UmoꞌKa?

¹⁰Ba hawaꞌireꞌi ipoꞌohi Aku hante UmoꞌKu haꞌanuluKa? Hapo to Kutiꞌikikei hieꞌe, hawaꞌi Kutiꞌi motuntuni peleihangKu hadoduongKu, angkana lolitangKu mesuwu ka UmoꞌKu to mohaꞌanu hante Aku. Iomo pongkane, horiana Kubiaꞌ mowali tandaꞌ kuasaꞌ.

¹¹Mepoꞌohimokei pe Aku ikopohintuwuꞌKu hante UmoꞌKu, hei UmoꞌKu mohaꞌanu hante Aku. Kehapoꞌi hawaꞌkei ipoꞌohi lolitangKa, hangangaa ipoꞌohikei alaꞌ iꞌokiꞌmokei lekiꞌ-lekiꞌne tandaꞌ kuasaꞌ to Kuwali.

¹²Tuꞌu mpololeke lolitangKa hieꞌe: toaꞌ to mepoꞌohi pe Aku, wadihi mowali hibali to Kuwali, ba meliuwae ka to Kuwali, alaꞌ hingkiꞌ nolouꞌA meꞌohaꞌ moꞌawa hante UmoꞌKu.

¹³Hei hapolu to iperapiꞌkei i lali konaꞌKu, hingkiꞌ Kupopewali, hingkeꞌna UmoꞌKu tepokodeꞌ moliu Aku.

¹⁴Hapolu to iperapiꞌkei i lali konaꞌKu, bateꞌna hingkiꞌ Kupopewali.”

¹⁵“Ane ipokarimaꞌAkei, hingkiꞌ ipetuntuikei lekiꞌne hawaꞌKu.

¹⁶Hei hingkiꞌ Kuperapiꞌ pe UmoꞌKu, hingkeꞌna Nopaꞌanikei haduo Topesulungi to ntaniꞌna, hingkeꞌna Io mampoꞌawakei wute nantolou-louna.

¹⁷Topesulungi tiꞌo, Iomo Inohaꞌna Pueꞌ Ala to hingkiꞌ morandakei i poturuꞌ to tuꞌu. Toaꞌ to hawaꞌi mepoꞌohi, hawaꞌhi wadi mantorimo Inohaꞌna Pueꞌ Ala, alaꞌ hawaꞌhi pangkiꞌ hei pobahaꞌ Inohaꞌna Pueꞌ Ala. Angkana ingkei, ibahaꞌmokei, alaꞌ Nopoꞌawakei hinewowoꞌena, hei Io hingkiꞌ lebaꞌ i lalimi.

¹⁸I tempoKu molai, hawaꞌkei hingkiꞌ Kupolihi hibali anaꞌ to oꞌilu. Hingkiꞌ mahuliꞌ womoꞌA humei pe ingkei.

¹⁹Hampaiꞌ romo, hamboaꞌmoꞌA hingkiꞌ roꞌokiꞌ toaꞌ i duniaꞌ. Angkana ingkei, hingkiꞌ iꞌokiꞌAkei alaꞌ tuwuꞌA, hingkiꞌ tuwuꞌkei woꞌo.

²⁰Ane hupaꞌi tempo tiꞌo, hingkiꞌ ibahaꞌkei Aku mohaꞌanuꞌA hante UmoꞌKu, hei ingkei mohaꞌanu hante Aku, hei Aku mohaꞌanu hante ingkei.

²¹Toaꞌ to mantorimo hei motuntuni lekiꞌna hawaꞌKu, iomohi to mampokarimaꞌA. UmoꞌKu hingkiꞌ mampokarima toaꞌ to mampokarimaꞌA, hei Aku woꞌo hingkiꞌ mampokarimahi, hante hingkiꞌ Kupomombahakihi kohihimongKu.”

²²Hi Yudas (handoꞌio hi Yudas Iskarioꞌ) meꞌitano pe hi Yesu, “Pueꞌ, mahamporeꞌi hinaꞌ hingkiꞌ Ipomombaha kohihimoMa pe ingkalu, hei hawaꞌi pe lekiꞌ-lekiꞌna toaꞌ to uwaꞌ i duniaꞌ?”[42]

²³Notiꞌi hi Yesu, “Toaꞌ to mampokarimaꞌA hingkiꞌ motuntuni lolitangKu, UmoꞌKu hingkiꞌ mampokarimaꞌi. UmoꞌKu hante Aku hingkiꞌ humeiKa pe io hei meꞌohaꞌ moꞌawa hante io.

²⁴Toaꞌ to hawaꞌi mampokarimaꞌA, hawaꞌhi motuntuni lolitangKu. Lolita to ihorimokei ka Aku, kotuꞌuana handoꞌio ka Aku, angkana ka UmoꞌKu to morumbaꞌA humei.

²⁵Lekiꞌ-lekiꞌna hieꞌe Kutiꞌikikei i tempoKu tene iseꞌe moꞌawa-awa hante ingkei.

²⁶Angkana ane hupaꞌmoꞌi Topesulungi iomo Inohaꞌ Mangkolehi, Io hingkiꞌ mampoturuꞌkei lekiꞌ-lekiꞌna, hei Nopopangkolowoikei lekiꞌ-lekiꞌna to ukomo Kutiꞌikikei, alaꞌ Iomo Topesulungi to hingkiꞌ Norumbaꞌ humei UmoꞌKu mewali to mampohawaꞌA.

²⁷Kolebaꞌ lali to moromiꞌ Kupatimomokikei. Kolebaꞌ lali to moromiꞌ ka Aku, iomo to Kupaꞌanikikei. To Kupaꞌanikikei hieꞌe, hawaꞌi hibali to ihuakei ka duniaꞌ. Inioꞌkei tepe hei inioꞌkei motehuꞌ hante hapo to hingkiꞌ mewali.

²⁸Ihorikei lolitangKa hingkenia to mantiꞌi: ‘Hingkiꞌ molaiꞌA, angkana hingkiꞌ mahuliꞌ womoꞌA humei pe ingkei.’ Ane ipokarimaꞌAkei mpuꞌu, hangangaa motanaꞌkei alaꞌ hingkiꞌ mahuliꞌA nolou pe UmoꞌKu alaꞌ meliu komanobaꞌne UmoꞌKu i suruga ka Aku.

²⁹Hieꞌe Kutiꞌikimokikei umbiꞌ ikohandoaꞌana tene mewali, hingkeꞌna ane mewaliꞌi intu, hingkiꞌ ipoꞌohikei hapo to Kutiꞌikimokikei.

³⁰Hamboaꞌmo morue tempoKa mololita hante ingkei, alaꞌ Belisiꞌ hingkiꞌ hupaꞌmo. Iomo to mokuasaꞌi duniaꞌ hieꞌe, angkana io hawaꞌi makuasaꞌ i Aku,

³¹angkana lekiꞌ-lekiꞌna tiꞌo hangangaa mewali, hingkeꞌna lekiꞌ-lekiꞌna toaꞌ hingkiꞌ pobahaꞌ koKupokarimana UmoꞌKu hei koKupetuntuine lekiꞌ-lekiꞌna to NohowoꞌikiꞌA. Hokeimo, molaimoki kaseꞌe.”