Read Rampi Yohanes 16 Bible Online

Yohanes 16 - Rampi bible

Yohanes 16

¹Hi Yesu mampololiu womo lolitaNa, Notiꞌi, “Lekiꞌ-lekiꞌna hieꞌe Kutiꞌikikei, hingkeꞌna hawaꞌi hingkiꞌ hipohinte pepoꞌohimi pe Aku.

²Hawaꞌkei hingkiꞌ ropoliu ako menomba pe tambi penombaha. Hei handoꞌio tiꞌolu, angkana hingkiꞌ hupaꞌ tempone toaꞌ hingkiꞌ morokoꞌkei alaꞌ ropekiri hante waliara tiꞌo menombahi pe Pueꞌ Ala.

³Lekiꞌ-lekiꞌna tiꞌo hingkiꞌ rowali pe ingkei, alaꞌ hawaꞌhi pobahaꞌ UmoꞌKu, hawaꞌhi woꞌo pobahaꞌ kohihimongKu.

⁴Kutiꞌikikei tiꞌo, hingkeꞌna i tempona mewali, ikolowoikei hapo to ka Kutiꞌikimokikei.” “Lekiꞌ-lekiꞌna poturuꞌ hieꞌe hawaꞌkei Kutiꞌiki mepongka ka uluꞌ-uluꞌna, alaꞌ uwaꞌA tene moꞌawa hante ingkei.

⁵Angkana hinewowoꞌena, hingkiꞌ nolouꞌA pe UmoꞌKu to morumbaꞌA, hei hawaꞌi howeꞌ haduo ka lumbumi to meꞌitano pe Aku ba pe imbo koꞌakoangKa.

⁶Masusa lalimi i kopahorimi lolitangKu hingkenia to mantiꞌi kohingkiꞌ polaingKu.

⁷Tuꞌu to Kutiꞌikikei hieꞌe, hingkiꞌ pahuakei rasiꞌ ane molaiꞌA! Alaꞌ ane hawaꞌA molai, hawaꞌi hingkiꞌ hupaꞌ Topesulungi. Angkana ane molaiꞌA, Io hingkiꞌ Kurumbaꞌ humei pe ingkei.

⁸Ane hupaꞌmoꞌi Topesulungi, Io to hingkiꞌ mampokononto pe toaꞌ i duniaꞌ komadosara, komaniuꞌangKu hei pehukuna Pueꞌ Ala.

⁹Io hingkiꞌ mampokononto komadosara toaꞌ, alaꞌ hawaꞌhi mepoꞌohi pe Aku.

¹⁰Hingkiꞌ mampokononto komaniuꞌKu alaꞌ nolouꞌA pe UmoꞌKu, hei hamboaꞌmoꞌA hingkiꞌ iꞌokiꞌkei.

¹¹Hei Io hingkiꞌ mampokononto woꞌo konohukura Pueꞌ Ala, alaꞌ Belisiꞌ to mokuasaꞌi duniaꞌ hieꞌe nihukumo.

¹²Woriꞌ tene to Kukodokoꞌi Kutiꞌikikei, angkana hinewowoꞌena handoaꞌi tene ibiaꞌkei mantorimo lekiꞌ-lekiꞌne tiꞌo.

¹³Ane hupaꞌmoꞌi Inohaꞌ Mangkolehi, Iomo to hingkiꞌ morandakei hei mamponobahaꞌikei lekiꞌ-lekiꞌna poturuꞌ to tuꞌu. Io hawaꞌi hingkiꞌ mololita motuntuni pekiriNa hadoduoNa. Hapo to Nohori ka UmoꞌKu, tiꞌo to hingkiꞌ Nopololita. Hei Io hingkiꞌ mampowutekikei hapo to hingkiꞌ mewali i ando to hingkiꞌ dongkaꞌ.

¹⁴Io hingkiꞌ mampokodeꞌA moliu pampowutena pe ingkei lolita to Notorimo ka Aku.

¹⁵Lekiꞌ-lekiꞌna to uwaꞌ i UmoꞌKu, uwaꞌ woꞌo i Aku. Iomo horiana Kutiꞌi: Hapo to Notorimo Inohaꞌ Mangkolehi ka Aku, iomo woꞌo to hingkiꞌ Nopowutekikei.”

¹⁶Notiꞌi womo hi Yesu, “Hampaiꞌ romo hamboaꞌmoꞌA hingkiꞌ iꞌokiꞌkei, angkana hawaꞌi morue uko tiꞌo hingkiꞌ iꞌokiꞌ womoꞌAkei.”

¹⁷Wulihi, hei uwaꞌhi to mometenei-tenei, rotiꞌi, “Hapo tungkaihaNe horiana Notiꞌikiki: ‘Hamboaꞌmo morue, hamboaꞌmoꞌA hingkiꞌ iꞌokiꞌkei, hei hamboaꞌmo woꞌo morue, hingkiꞌ iꞌokiꞌAkei womo’? Hei hapo womo tungkaihaNe horiana Notiꞌi, ‘NolouꞌA pe UmoꞌKu’?”

¹⁸Mometonoi-tonoihi nturusi, rotiꞌi, “Mahamporeꞌi hinaꞌ Notiꞌi, ‘Hamboaꞌmo morue’? Hawaꞌi tobahaꞌ palaihane.”

¹⁹Nobahaꞌ hi Yesu korokodokoꞌine meꞌitano pe Io. Iomo horiana Notiꞌikihi, “Wora mometenei-teneikei hapo palaihane lolitangKu hingkenia to mantiꞌi: ‘Hamboaꞌmo morue, hamboaꞌmoꞌA hingkiꞌ iꞌokiꞌkei. Angkana hawaꞌi morue katoꞌo, hingkiꞌ iꞌokiꞌ womoꞌAkei’?

²⁰Tuꞌu mpololeke lolitangKa hieꞌe: Hingkiꞌ meꞌolakei {pangkiꞌ hapo to hingkiꞌ mewali pe Aku}, angkana toaꞌ to hawaꞌi mepoꞌohi pe Aku, hingkiꞌ motanaꞌhi mpololeke. Hingkiꞌ masusa lalimi, angkana komasusami tiꞌo hingkiꞌ tewolihi mewali komotanaꞌmi.

²¹Komotanaꞌmi tiꞌo, hingkiꞌ hibali komotanaꞌ to nohua haduo towoweꞌe to ukomo moꞌanaꞌ. Uluꞌ-uluꞌna maporiꞌ mantodiha, angkana ane mesuwumoꞌi anaꞌne, nokolembulikimo polalone mantodiha alaꞌ komotanaꞌna nopehupaꞌi anaꞌna.

²²Hatoꞌo woꞌo ingkei: Hinewowoꞌena masusa lalimi. Angkana hingkiꞌ Kupohidupaꞌkikei womo. I kohidupaꞌta tiꞌo, hingkiꞌ motanaꞌkei huliꞌ, hei hawaꞌi uwaꞌ to wadi moroa komotanaꞌmi tiꞌo ka ingkei.

²³I tempo tiꞌo, hamboaꞌmo paraluꞌ ipeꞌitanokikei ba hapo-hapo pe Aku. Wadimokei meꞌitano hadoduomi pe UmoꞌKu. Hatoꞌo woꞌo ane merapiꞌkei, wadimokei woꞌo hadoduomi merapiꞌ pe UmoꞌKu i lali konaꞌKu, bateꞌna hingkiꞌ Nobuhoꞌi.

²⁴Wute hinewowoꞌena, handoaꞌkei tene merapiꞌ hapo-hapo i lali konaꞌKu. Iperapiꞌmokei, hei hingkiꞌ itorimokei hingkeꞌna kodeꞌ mpololeke komotanaꞌmi.”

²⁵“Lekiꞌ-lekiꞌna hieꞌe Kutiꞌikimokikei moliu pandiriꞌ. Angkana hingkiꞌ hupaꞌ tempone, hamboaꞌmoꞌA mopakeꞌ pandiriꞌ. Hamboaꞌmo hingkiꞌ Kuwowuni Kulolitakikei noniuꞌ UmoꞌKu.

²⁶I tempo tiꞌo, hingkiꞌ merapiꞌkei pe UmoꞌKu i lali konaꞌKu. Hamboaꞌmo paralu Kuperapiꞌkikei pe UmoꞌKu hapo to iparaluꞌikei, wadimokei merapiꞌ hadoduomi

²⁷alaꞌ UmoꞌKu hadoduoNa to mampokarimakei. Io mampokarimakei, alaꞌ ipokarimaꞌAkei, hei ipoꞌohikei koꞌAkunamo to ka Pueꞌ Ala.

²⁸Tuꞌu kohumeingKa pe duniaꞌ hieꞌe ka UmoꞌKu. Hinewowoꞌena, hingkiꞌ Kupolihi duniaꞌ hieꞌe, hei mahuliꞌA nolou pe UmoꞌKu.”

²⁹Notiꞌi topeguruNehi, “Pueꞌ, hinewowoꞌena monontomo lolitama, alaꞌ hawaꞌKo mopakeꞌ pandiriꞌ.

³⁰Monontomo i ingka: Ingko to pobahaꞌ lekiꞌ-lekiꞌna. Hawaꞌi uwaꞌ to paralu meꞌitano pe Ingko. Hinewowoꞌena, kipoꞌohimo koka Pueꞌ AlaMu.”

³¹Notiꞌi hi Yesu, “Tuꞌureꞌi ipoꞌohikei?

³²Iponindikei! Hingkiꞌ hupaꞌ tempone hei kotuꞌuana tempo tiꞌo hupaꞌmo, hingkiꞌ mehilaikei haduo-haduo nolou pe tambimi, hei hingkiꞌ ipolihiꞌAkei.[43] Angkana i tempo tiꞌo, hawaꞌA hadoduongKu, alaꞌ UmoꞌKu hingkiꞌ mampoꞌawaꞌA.

³³Lekiꞌ-lekiꞌna hieꞌe Kutiꞌikimokei. Hingkeꞌna pahuakei kolebaꞌ lali ka pohintuwuꞌmi hante Aku. Kolentuꞌami tene i duniaꞌ hieꞌe bateꞌna nipoperima-rimakei. Angkana ipokarohokei lalimi alaꞌ Belisiꞌ to mokuasaꞌi duniaꞌ hieꞌe Kunanimo.”