Read Rampi Yohanes 17 Bible Online

Yohanes 17 - Rampi bible

Yohanes 17

¹Koꞌukona hi Yesu mampowute lekiꞌ-lekiꞌna tiꞌo, menoaꞌmo pe laniꞌ hei mekokae, Notiꞌi, “UmoꞌKu, hupaꞌmo tempone nipokodeꞌA. Aku AnaꞌMu ipokodeꞌmoꞌA, hingkeꞌna Aku woꞌo mampokodeꞌKo Umoꞌ.

²IpaꞌanimoꞌA kuasaꞌ motadulakoi lekiꞌ-lekiꞌna toaꞌ, hingkeꞌna toaꞌ to IpaꞌanikiꞌA, hingkiꞌ Kupaꞌanihi woꞌo kotuwuꞌ to wolaꞌ to hawaꞌi mokoꞌukoa.

³To Kutungkai hante lolita ‘Kotuwuꞌ to wolaꞌ to hawaꞌi mokoꞌukoa’ iomo: robahaꞌ koꞌIngkonalu Pueꞌ Ala to tuꞌu, hei robahaꞌ woꞌo koꞌAkuna Yesu Kerisitu to Irumbaꞌ humei.

⁴Umoꞌ, i lali duniaꞌ hieꞌe Kupomombahamo komanobaꞌMa moliu koKupoꞌukonamo jama to IpaꞌanikiꞌA.

⁵Umoꞌ, IpomanobaꞌA mahuliꞌ, hibali komanobaꞌKu tempoKu moꞌawa hante Ingko ikohandoaꞌna tene nipopewali duniaꞌ hieꞌe.

⁶Kuponobahaꞌimohi kohihimoMu, pe toaꞌ to IpaꞌanikiꞌA ka lumbura toaꞌ to hawaꞌi mepoꞌohi pe Ingko. Iohi tiꞌo toaꞌMumohi to IpaꞌanikiꞌA hingkeꞌna Kurewahimohi, hei mampetuntuimohi PohawaꞌMu.

⁷Hinewowoꞌena robahaꞌmo lekiꞌ-lekiꞌna to IpaꞌanikiꞌA pongkana ka Ingko.

⁸Kupowutekimohi lekiꞌ-lekiꞌne lolita to IpaꞌanikiꞌA. Lolita tiꞌo rotorimomo, hei hinewowoꞌena robahaꞌmo, koꞌAkuna to ka Ingko Umoꞌ. Ropoꞌohimo koꞌIngkona to morumbaꞌA.

⁹Kupekokaekihi topetuntuKa tiꞌo. Hawaꞌhi Kupekokaeki lekiꞌ-lekiꞌra toaꞌ i duniaꞌ, bateꞌnalu toaꞌ to IpaꞌanikimoꞌA, alaꞌ iomohi toaꞌMa.

¹⁰Lekiꞌ-lekiꞌna toaꞌ to mewali toaꞌKu, toaꞌMumohi woꞌo. Hei lekiꞌ-lekiꞌna toaꞌ to mewali toaꞌMu, toaꞌKumohi woꞌo. Hei komanobaꞌKu mombaha moliu toaꞌKu hieꞌe.

¹¹HumeiꞌA pe Ingko Umoꞌ, hamboaꞌmoꞌA morue i duniaꞌ hieꞌe. Angkana topetuntuKuhi hieꞌe uwaꞌhi tene nturusi i duniaꞌ. O UmoꞌKu to mangkolehi, Ipodaꞌmohi hante kuasaꞌMu to IpaꞌanikiꞌA. Irewahihi hingkeꞌna hampekokirihi nturusi, hibali Ingko hante Aku hampekokiriKi.

¹²TempoKu moꞌawa hante iohi, Akumo to mampodaꞌhi hante kuasaꞌMu to IpaꞌanikiꞌA. Kupodaꞌmohi hingkeꞌna hawaꞌhi uwaꞌ to moholi. Angkana uwaꞌ haduo to moholi, to nipokonontomo pahua pehuku, hingkeꞌna tebuhoꞌi hapo to teꞌukiꞌ i lali Suraꞌ Mangkolehi.

¹³Hinewowoꞌena, hingkiꞌ nolouꞌA pe Ingko. Lekiꞌ-lekiꞌna hieꞌe Kutiꞌikimohi i tempoKu tene moꞌawa-awa hante iohi i duniaꞌ hieꞌe, hingkeꞌna hingkiꞌ buhaꞌ komotanaꞌre to rohua ka Aku.

¹⁴Kupowutekimohi lolitaMa, koꞌukoana toaꞌ to hawaꞌi mepoꞌohi mampokoiꞌhi, alaꞌ pekirira topegurungKu hieꞌe hamboaꞌmo hibali hante pekirira. Hibalihi woꞌo Aku, hawaꞌA motuntuni pekirira toaꞌ to i duniaꞌ hieꞌe to hawaꞌi mepoꞌohi.

¹⁵Hawaꞌi Kuperapiꞌ hingkeꞌna Iroahi topetuntuKa ka duniaꞌ hieꞌe. PerapiꞌKu hingkeꞌna Ipodaꞌhi ka Belisiꞌ.

¹⁶Aku hawaꞌA motuntuni pekirira toaꞌ to hawaꞌi mepoꞌohi, hatoꞌo woꞌo topegurungKa hawaꞌhi motuntuni pekirira.

¹⁷Kuperapiꞌ hingkeꞌna Ipohohidamohi mewali toaꞌMu, Ipomangkolehihi moliu i komaniuꞌaMu. Komaniuꞌa tiꞌo iomo BooMu.

¹⁸Umoꞌ, IrumbaꞌA humei pe duniaꞌ. Hatoꞌo woꞌo Aku morumbaꞌhi nolou pe toaꞌ ntaniꞌna i duniaꞌ hieꞌe.

¹⁹Umoꞌ, Kupeweimo kotuwuꞌKa pe Ingko alaꞌ iohi. Hingkeꞌna iohi woꞌo mampeweihi kotuwuꞌra mewali hawiꞌMu.[44]

²⁰Handoꞌiolu topeguruKu hieꞌe to Kupekokaeki. Kupekokaekihi woꞌo toaꞌ to hingkiꞌ mepoꞌohi pe Aku alaꞌ pampowutera PohawaꞌMu.

²¹PerapiꞌKu hingkeꞌna iohi lekiꞌ-lekiꞌra mohaꞌanu, hibali Ingko hante Aku mohaꞌanuluKi. Kuperapiꞌ hingkeꞌna iohi woꞌo mohaꞌanu hante Ingkiꞌ horiana lekiꞌ-lekiꞌna toaꞌ i duniaꞌ hingkiꞌ mampoꞌohi koꞌIngkona to morumbaꞌA.

²²Kupaꞌanimohi komanobaꞌ to IpaꞌanikiꞌA, hingkeꞌna hingkiꞌ pobahaꞌhi hampekokiri, hibali woꞌo Ingkiꞌ hampekokiriKi,

²³Aku mohaꞌanu hante iohi, hei Ingko woꞌo mohaꞌanu hante Aku. Hingkeꞌna iohi hingkiꞌ mewalihi mpuꞌu hampekokiri. Horiana duniaꞌ hingkiꞌ pobahaꞌ koꞌIngkona to morumbaꞌA hei to mampokarimahi hibali Ingko mampokarimaꞌA.

²⁴PeleihangKu hingkeꞌna iohi to IpaꞌanikiꞌA hingkiꞌ meꞌohaꞌ moꞌawa-awa hante Aku i peꞌohaꞌangKu, hingkeꞌna pangkiꞌhi komanobaꞌKu. KomanobaꞌKu tiꞌo IpaꞌanikimoꞌA ikohandoaꞌna tene duniaꞌ hieꞌe nipopewali, alaꞌ IpokarimaꞌA.

²⁵O UmoꞌKu, Ingkomo to mononto. Toaꞌ i duniaꞌ hieꞌe to hawaꞌhi mepoꞌohi pe Ingko, hawaꞌhi pobahaꞌ kohihimoMu. Angkana Aku, KubahaꞌKo. Hei lekiꞌ-lekiꞌna topeguruKu hieꞌe to mepoꞌohi pe Aku pobahaꞌ koꞌIngkona to morumbaꞌA.

²⁶Kuponobahaꞌimohi kohihimoMu, hei bateꞌna hingkiꞌ Kupowutekihi nturusi kohihimoMu, hingkeꞌna iohi mampokarimahi hangko awara hibali hante koꞌIpokarimangKu, hei hingkeꞌna Aku hingkiꞌ uwaꞌA nturusi moꞌawa-awa hante iohi.”