Read Rampi Yohanes 18 Bible Online

Yohanes 18 - Rampi bible

Yohanes 18

¹Koꞌukona hi Yesu mekokae, Io hante topeguruNa nolouhi pe howali kota Yerusale. Noloumohi pe hanupe uwai Kidero, nolouhi pe kineteꞌ to tinaꞌ i hanupe.

²Hi Yudas to mampobaluꞌ hi Yesu, pobahaꞌ woꞌo kineteꞌ tiꞌo, alaꞌ hi Yesu hante topeguruNahi hadodehihi morampu itoꞌo.

³Katoꞌo noloumo hi Yudas pe kineteꞌ tiꞌo, mangkomi harombonga surodaduna toRoma hante to mampoꞌodaꞌ Tambina Pueꞌ Ala, to norumbaꞌhi tutuꞌ-tutuꞌ tadulako mpenomba hei toParisihi nolouhi mohokiꞌ hi Yesu. Mangkomihi parewa mpoponiꞌ, huluꞌ hei lantera.

⁴Nobahaꞌmo hi Yesu lekiꞌ-lekiꞌna to hingkiꞌ mewali i wotaNa. Io horiana mewotumo mampohidupaꞌkihi toaꞌ tiꞌo, Noteneihi, “Himo to ipaliꞌkei?”

⁵Rotiꞌi, “Hi Yesu toNasare.” Notiꞌi hi Yesu, “Akumola hieꞌe.” Hi Yudas, to mampobaluꞌ hi Yesu pe poniꞌNa, metotiꞌi itoꞌo moꞌawa-awa hante iohi.

⁶Ikonotiꞌinalu hi Yesu, “Akumola hieꞌe,” maꞌoruꞌmohi hei modungkahi.

⁷Nopeꞌitanoki womo hi Yesu, “Himo to ipaliꞌkei?” Rotiꞌi, “Hi Yesu toNasare.”

⁸Notiꞌi hi Yesu, “Kutiꞌimo hingkenia, Akumola hieꞌe. Mewaliꞌ, ane Akulu to ipaliꞌkei, ipotedehimokei topegurungKa hieꞌe molai.”

⁹Notiꞌi hatoꞌo hingkeꞌna tebuhoꞌimo hapo to Notiꞌi i lali pekokaeNa hingkenia, “Ka lekiꞌ-lekiꞌna toaꞌ to IpaꞌanikiꞌA, hawaꞌi uwaꞌ haduo to hingkiꞌ moholi.”

¹⁰Uko katoꞌo, hi Simo Peturuꞌ mowutu ladiꞌna motobai haduo hawiꞌna Tadulako Mpenomba Ngkodeꞌ, angkana noniuꞌlu tolina koanana hei liu mopudiꞌ. Konaꞌna hawiꞌ tiꞌo, hi Malkus.

¹¹Notiꞌi hi Yesu pe hi Peturuꞌ, “Kahiꞌi huliꞌ ladiꞌma! Ba ipekiri Kupaꞌoruꞌki komaporiꞌ to nopokonontokimoꞌA UmoꞌKu?”[45]

¹²Uko katoꞌo, surodadu toRoma hei tadulakora, hante to mampoꞌodaꞌ Tambina Pueꞌ Ala, mohokiꞌ hi Yesu hei rohiluꞌ.

¹³Io nikomi nolou pe tambina Tadulako Mpenomba Ngkodeꞌ. Uluꞌ-uluꞌna rokomi nolou pe hi Hanas, ponianana hi Kaipa. Hi Kaipa iomo Tadulako Mpenomba Ngkodeꞌ i tempo tiꞌo.

¹⁴Hi Kaipa tiꞌomola to ka mampatiꞌikihi tadulakora toYahudi, “Aginamo haduo toaꞌ mahi, mosulewotai lekiꞌ-lekiꞌna toaꞌ.”

¹⁵Hi Simo Peturuꞌ hante haduo topeguru to ntaniꞌna motuntunihi hi Yesu. Tadulako Mpenomba Ngkodeꞌ momebahaꞌhi hante haduo topeguruNa tiꞌo, mewaliꞌ nipoliulu io mekahi pe tanobaꞌa tambina Tadulako Mpenomba Ngkodeꞌ tiꞌo.

¹⁶Hi Peturuꞌ mampekaulu i howali wambaꞌ. Uko katoꞌo, topeguruNa to hingkonia nolou mahuliꞌ pe howali mololita hante towoweꞌe to mampoꞌodaꞌ wambaꞌ, iomo horiana hi Peturuꞌ nopoꞌawa mekahi.

¹⁷Towoweꞌe to mampoꞌodaꞌ wambaꞌ tiꞌo mampatiꞌiki hi Peturuꞌ, “Handoꞌioreꞌi woꞌo ingko haduo topeguruNe toaꞌ tiꞌo.” Notiꞌi hi Peturuꞌ, “Handoꞌio!”

¹⁸I tempo tiꞌo, tempo mepoholeꞌ. Mewaliꞌ haꞌumbora duohi hawiꞌ hei to mampoꞌodaꞌ Tambina Pueꞌ Ala, mampatuwuꞌhi api i tanobaꞌa, hei metotiꞌihi motuleliꞌi api ropanirui. Hi Peturuꞌ woꞌo nolou metotiꞌi hei maniru moꞌawa-awa hante iohi.

¹⁹I tempo tiꞌo woꞌo i lali tambi, Tadulako Mpenomba Ngkodeꞌ meꞌitanomo pe hi Yesu, notiꞌi, “Hihimohi lekiꞌ topeguruMa? Hapo to Ipoturuꞌkihi toaꞌ to woriꞌ?”

²⁰Notiꞌi hi Yesu, “MololitaꞌA hawaꞌi uwaꞌ to Kuwowuni i lekiꞌ-lekiꞌna toaꞌ. MepoturuꞌA nturusi i woriꞌ tambi penombaha hei i Tambina Pueꞌ Ala, to poko roporampui toYahudi. Hawaꞌi uwaꞌ to Kuwowuni.

²¹Mewaliꞌ, mahamporeꞌi hinaꞌ ipetanoki pe Aku tua? Ipetanoki pe iohi, alaꞌ iohi to pahori poturuꞌKa. Bateꞌna robahaꞌ mpololeke hapo to Kutiꞌi.”

²²Konotiꞌina hi Yesu hatoꞌo, haduo to mampoꞌodaꞌ to metotiꞌi i hiriNa motampele lioNa, notiꞌi, “BaiꞌKo mpuꞌu mololita hatoꞌo pe Tadulako Mpenomba Ngkodeꞌ!”

²³Notiꞌi hi Yesu, “Ane hawaꞌi maniuꞌ to Kutiꞌi, ipomombaha hapo salaꞌKa. Angkana ane tuꞌu lolitangKa, mahamporeꞌi hinaꞌ itampeleꞌA?”

²⁴Uko katoꞌo, hi Hanas morumbaꞌmohi topampoꞌodaꞌ mangkomi hi Yesu nolou pe Tadulako Mpenomba Ngkodeꞌ Kaipa. I tempo tiꞌo, koraweꞌna hi Yesu nihiluꞌ tene.

²⁵Hi Simo Peturuꞌ metotiꞌi maniru moꞌawa hante topampoꞌodaꞌ Tambina Pueꞌ Ala. Uwaꞌhi toaꞌ to mampatiꞌikiꞌi, “Hawaꞌireꞌi woꞌo ingko haduo topeguruNe?” Mesapumo hi Peturuꞌ, notiꞌi, “Handoꞌio aku!”

²⁶Uwaꞌ woꞌo itoꞌo haduo hawiꞌne Tadulako Mpenomba Ngkodeꞌ. Hawiꞌ tiꞌo halalina toaꞌ to notobai hi Peturuꞌ tolinane. Notiꞌi hawiꞌ tiꞌo pe hi Peturuꞌ, “Handoꞌioreꞌi ingko to kuꞌokiꞌ hingkenia i kineteꞌ tiꞌo moꞌawa-awa hante hi Yesu?”

²⁷Mesapu womo hi Peturuꞌ, notiꞌi, “Handoꞌio!” I tempo tiꞌo, metantoroꞌoꞌuoꞌmo manuꞌ.

²⁸Dodungku ando, hi Yesu rokomi ka tambina hi Kaipa nolou pe tambina gubenuruꞌ. Tadulako toYahudi, hawaꞌhi mekahi pe lali tambina gubenuruꞌ alaꞌ gubenuruꞌ tiꞌo handoꞌio toYahudi. Ane mekahihi pe lali tambina, morokaꞌhi hamboaꞌmohi mangkolehi motuntuni atura agamara, hei hawaꞌhi hingkiꞌ wadi mangka pangka Posusaꞌ Pokalintora toYahudi.

²⁹Iomo horiana gubenuruꞌ Pilatu noloumo pe howali mampohidupaꞌkihi hei noteneihi, “Hapo to isalaꞌikikei toaꞌ hieꞌe?”

³⁰Angkana rotiꞌilu, “Ane kehandoꞌio toaꞌ to kodake, kehawaꞌi hingkiꞌ kikomi humei pe ingko gubenuruꞌ.”

³¹Notiꞌi Pilatu, “Ingkei to hangangaa mobutusi salaꞌNe motuntuni adaꞌ agamami hadoduomi!” Rotiꞌi tadulakore toYahudi, “Kilei hingkeꞌna toaꞌ hieꞌe nihuku mahi, angkana ingka toYahudi, hawaꞌka ropoliu toRoma mohuku toaꞌ wute mahi.”

³²Hieꞌe mewali hingkeꞌna tebuhoꞌi hapo to notiꞌi hi Yesu noniuꞌ lala komahiNa.[46]

³³Uko katoꞌo, hi Pilatu mekahi huliꞌ pe lali tambina, hei norumbaꞌmohi toaꞌne mangkomi hi Yesu pe hinarona, honiꞌi notenei, “Ba Ingko mpuꞌu dature toYahudi?”

³⁴Notiꞌi hi Yesu, “Peꞌitanomu tiꞌo ka ingko hadoduomu, ba ihoriꞌi ka toaꞌ ntaniꞌna koꞌAkuna Datu?”

³⁵Notiꞌi Pilatu, “Aku handoꞌioꞌa toYahudi! Hangko toYahudiMu hante tutuꞌ-tutuꞌ tadulako mpenomba to mangkomiKo humei pe aku. Salaꞌ haporeꞌi to Iwalimo?”

³⁶Notiꞌi hi Yesu, “Aku, handoꞌioꞌA datu to ka duniaꞌ. Ane kedatu to ka duniaꞌA, toaꞌ to metuntu i Aku bateꞌna hingkiꞌ meꞌewahi hingkeꞌna inioꞌA rohokiꞌ hei ropewei pe tadulakora toYahudi. Angkana handoꞌioꞌA datu to ka duniaꞌ hieꞌe.”

³⁷Notiꞌi womo Pilatu, “Ane hatoꞌoꞌi, tuꞌureꞌi koꞌIngkonemo mpuꞌu datuo?” Notiꞌi hi Yesu, “Ingko hadoduomu to mantiꞌi koꞌAkune datu. Aku mehupaꞌA hei nipoꞌanaꞌkiꞌA i duniaꞌ hieꞌe, hingkeꞌna Kupowuteꞌi hapo to tuꞌu. Toaꞌ to motuntuni hapo to tuꞌu, mampehoromuahi lolitangKu.”

³⁸Notiꞌi Pilatu, “Hapo palaihane to tuꞌu tiꞌo?” Uko tiꞌo, nolou womo Pilatu pe howali mampowute pe tadulakora toYahudi, “Howeꞌ halangkaꞌ salaꞌNe, hawaꞌi kuhua.

³⁹Angkana, biasana, i toꞌa-toꞌana i ando Posusaꞌ Pokalintora toYahudi, kupolohoꞌkikei haduo to nitarungkuꞌ, motuntuni peleimi. Mewaliꞌ, hohumbo? Ba ileikei ane kupolohoꞌkikei dature toYahudi hieꞌe?”

⁴⁰Moloaꞌ-loaꞌmohi, rotiꞌi, “Inioꞌ, inioꞌ Io! Aginamowae hi Baraba!” Hi Baraba tiꞌo, haduo toperorompoꞌi.