Read Rampi Yohanes 2 Bible Online

Yohanes 2 - Rampi bible

Yohanes 2

¹Liu roꞌando, katoꞌo uwaꞌ posusaꞌ pepohamoko i bolaꞌ Kana i woiꞌ Galilea. Inoꞌna hi Yesu uwaꞌ woꞌo i posusaꞌa tiꞌo.

²Hi Yesu hante topeguruNahi niwowoihi woꞌo nolou pe posusaꞌa tiꞌo.

³Kolentuꞌara mosusaꞌ, nokoꞌukoihi anggoroꞌ, katoꞌo inoꞌna hi Yesu nolou merapiꞌ sulungi pe hi Yesu, notiꞌi, “Ukomo angoroꞌo.”

⁴Notiꞌi hi Yesu, “Inoꞌ, hapo tungkaihama hinaꞌ itiꞌikiꞌA? Handoaꞌi tene tempona Kupomombaha kuasaꞌKa.”

⁵Angkana, inoꞌna hi Yesu mampatiꞌikihi topajama i posusaꞌa tiꞌo, notiꞌi, “Hapolu to hingkiꞌ Norumbaꞌkikei hi Yesu, hangangaa ipetuntuikei!”

⁶I posusaꞌa tiꞌo, uwaꞌ oni onu potomua uwai to kodeꞌ. Potomua uwai tiꞌo biasana niꞌohii uwai to hingkiꞌ nipakeꞌ mewaheꞌ motuntuni adaꞌra toYahudi. Koworiꞌna ohina potomua uwai tiꞌo, kira-kira hanatu liteꞌ i haꞌanu potomua uwai.

⁷Hi Yesu mampatiꞌikihi topajama tiꞌo, “Iꞌohikei potomua uwai tiꞌo hante uwai.” Katoꞌo roꞌohimo mpuꞌu ropobuhaꞌ.

⁸Uko tiꞌo, Notiꞌikihi, “Tembuꞌi hangkiuꞌ, hei ikomikikei tadulako posusaꞌ.” Rotembuꞌmo mpuꞌu honiꞌi rokomi nolou pe tadulako posusaꞌ.

⁹Tadulako posusaꞌa tiꞌo mampetomiꞌ uwai to rokomi. Hamboaꞌi motobe hibali uwai biasa, tewolihimo mewali anggoroꞌ. Angkana hawaꞌi nobahaꞌ koka imbona humei anggoroꞌ tiꞌo, to pobahaꞌ topajamanalu, koꞌukona mampetomiꞌ anggoroꞌ tiꞌo, nowowoimo tomaꞌani to nipohamoko,

¹⁰hei notiꞌi “Biasana motuntuni adaꞌta, anggoroꞌ to motomiꞌ hangangaa niꞌinu medulu i posusaꞌa. Ane nihorikimoꞌi maꞌinu, honiꞌiwae niꞌinu to hawaꞌi rahi motomiꞌ. Angkana ingko, ipokamuri reꞌi anggoroꞌ to motomiꞌ mpololeke.”

¹¹Tiꞌomo pepongkane hi Yesu mowali tandaꞌ kuasaꞌ. Nowali tiꞌo i bolaꞌ Kana i woiꞌ Galilea. Moliu i tanda kuasaꞌ tiꞌo, Io mampopebahaꞌ komanobaꞌNa, horiana topeguruNahi mepoꞌohi pe Io.

¹²Uko posusaꞌa tiꞌo, hi Yesu hante lekiꞌna topeguruNahi, inoꞌNa hante hineeꞌNahi, nolouhi pe bolaꞌ Kapenau, hei meꞌohaꞌhi itoꞌo haꞌumbora mini.

¹³Hingkiꞌ mehupaꞌmo tempone ando ngkodeꞌ agama Yahudi to nitiꞌi ando Posusaꞌ Pokalintora toYahudi. Io horiana noloumo hi Yesu pe Yerusale.

¹⁴Kohupaꞌralu i tanobaꞌa Tambina Pueꞌ Ala, Noꞌokiꞌ toaꞌ to mampobaluꞌ gapiꞌ, gimba hei tinti kokou. Uwaꞌhi woꞌo topotopu[9] doiꞌ to mahura itoꞌo.

¹⁵Konoꞌokiꞌnalu hi Yesu lekiꞌ-lekiꞌne tiꞌo, mowalimo pelabehiꞌ ka koloroꞌ Nopopobue lekiꞌ-lekiꞌna gapiꞌra hei gimbara ka Tambina Pueꞌ Ala. Nobolingkotaꞌ meja potopuare doiꞌ, koꞌukoana tehawori doiꞌre.

¹⁶Uko tiꞌo, Notiꞌikihi pe topobaluꞌ-baluꞌ tinti kokou, “Polaimokei! Ikomimokei lekiꞌne tiꞌo, inioꞌ ipopewalikei tambiNe UmoꞌKu mewali pobaluꞌ-baluꞌami!”

¹⁷Rokolowoimo topeguruNahi hapo to teꞌukiꞌ i lali suraꞌ Mangkolehi to mantiꞌi waheꞌe: “Makaja koKupotanaꞌne TambiMu Pueꞌ, iomo to mampomolaho lalingKu.” [10]

¹⁸Mepongka katoꞌo, tadulako-tadulakora toYahudi mampatiꞌiki hi Yesu, “Ane uwaꞌ mpuꞌu kuasaꞌMa mowalia hatoꞌo, Iponoꞌokiꞌkika haꞌanu tandaꞌ kuasaꞌ!”

¹⁹Notiꞌi hi Yesu, “Ikerokei Tambine Pueꞌ Ala hieꞌe, hingkiꞌ Kuꞌaro i lali tolu ando.”[11]

²⁰Rotiꞌi toYahudi pe Io, “Iba mpuluꞌ oni ntoꞌa Tambine Pueꞌ noꞌaro[12] toaꞌ, hingkiꞌ Ingko lekemo moꞌaro i lali tolu andolu?”

²¹Kotuꞌuana, wotana hadoduoNa to notungkai hi Yesu i tempona mantiꞌi Tambina Pueꞌ Ala.

²²I kotuwuꞌna huliꞌ hi Yesu, hongkoꞌ rokolowoi topeguruna lolitaNe tiꞌo, honiꞌi ropoꞌohi hapo to teꞌukiꞌ hampiha i lali Suraꞌ Mangkolehi, hei hapo to notiꞌi hi Yesu.

²³Kolentuꞌana hi Yesu i Yerusale motuntuni ando Posusaꞌ Pokalintora toYahudi, woriꞌ toaꞌ mepoꞌohi koꞌIona Datu to mamposalamaꞌ, alaꞌ pangkiꞌhi tandaꞌ-tandaꞌ kuasaꞌ to Nowali.

²⁴Angkana hawaꞌhi nopoꞌohi hi Yesu, alaꞌ Nobahaꞌ hapo to i laline lekiꞌra toaꞌ.

²⁵Hawaꞌi paralu nilolita pe Io noniuꞌ waliana manusiaꞌ, alaꞌ Nobahaꞌmo umbiꞌ hapo to i laline toaꞌ.