Read Rampi Yohanes 20 Bible Online

Yohanes 20 - Rampi bible

Yohanes 20

¹Mihoꞌolu-olu mpololeke, mokorindi tene i ando Minggu, hi Maria toMadalena nolou pe petowua. Wute itoꞌo, kaliuꞌ noꞌokiꞌ watu petutuꞌi wambaꞌ petowua mengkalolimo.

²Katoꞌo, io mehilai nolou pe hi Simo Peturuꞌ hante haduo topeguruNa to nopokarima hi Yesu, notiꞌikihi, “Wota lokaꞌna Pueꞌ niroamo ka lali petowuaNa, hei hawaꞌi kubahaꞌ koꞌiꞌimbona roporiaꞌi!”

³Katoꞌo hi Peturuꞌ hante topeguruNa to ntaniꞌna tiꞌo nolouhi pe petowua.

⁴Meroduohi mehilai hiꞌoꞌalu, angkana topeguru ntaniꞌna tiꞌo magasiꞌ ka hi Peturuꞌ, iomo horiana himpodulu wute i petowua,

⁵angkana handoaꞌi tene mekahi pe lali, nopehahirokilu. Noꞌokiꞌ wida to ropopowiwiꞌ hi Yesu uwaꞌlu itoꞌo.

⁶Uko tiꞌo, hupaꞌmo hi Simo Peturuꞌ kaliuꞌ mekahi. Noꞌokiꞌmo woꞌo wida poputuꞌNe,

⁷angkana wida to ropopowiwiꞌ tutuꞌna hi Yesu, tepilulu hei tepohida ka wida to ntaniꞌna.

⁸Pekahinalu hi Peturuꞌ i lali petowua, to medulu hupaꞌ hingkenia, hongkoꞌ mekahi woꞌo. Noꞌokiꞌ hapo to uwaꞌ i lali petowua tiꞌo, honiꞌi nopoꞌohi kotuwuꞌnemo huliꞌ hi Yesu.

⁹Wute i ando tiꞌo, handoaꞌi tene robahaꞌ palaihane hapo to teꞌukiꞌ hampiha i lali Suraꞌ Mangkolehi to mampokononto kohingkiꞌ tuwuꞌNe huliꞌ hi Yesu ka komahia.

¹⁰Uko tiꞌo, mahuliꞌmohi nolou pe tambira.

¹¹Angkana hi Maria toMadalena metotiꞌi i howali petowua, meꞌola nturusi. Kolentuꞌana meꞌola, io mehahiro pe lali petowua.

¹²Hampale noꞌokiꞌ roduo malaꞌeka to mebaduꞌ mpopuhiꞌ, mahurahi ikoniꞌuliꞌaNa wotalokaꞌna hi Yesu, haduo tinaꞌ ipetutuꞌaNa, hei haduo tinaꞌ ipekapuꞌaNa.

¹³Meꞌitanohi malaꞌeka tiꞌo pe hi Maria, rotiꞌi, “Inoꞌ, haporeꞌi to ipeꞌoloni?” Mehoniꞌ hi Maria, “Wota lokaꞌna Pueꞌku niroamo kaseꞌe, hei hawaꞌi kubahaꞌ koꞌiꞌimbona roporiaꞌi.”

¹⁴Uko tiꞌo, mehahiliꞌmo hi Maria hei noꞌokiꞌ haduo toaꞌ metotiꞌi i tunduna, angkana hawaꞌi nobahaꞌ kohiYesuna.

¹⁵Meꞌitanomo hi Yesu pe io, “Inoꞌ, haporeꞌi to ipeꞌoloni? Himo to ipaliꞌo?” Notiꞌiae hi Maria toaꞌ tiꞌo toporewahilu kineteꞌ, iomo horiana notiꞌiki, “Tua, ane Ingkoꞌi to molimba wotalokaꞌNe, Itidoꞌkiꞌa i imbo koꞌiporiahane. Hingkeꞌna akoꞌi kuroa.”

¹⁶Notiꞌi hi Yesu, “Maria.” Mehahiliꞌmo hi Maria pe hi Yesu honiꞌi mololita i wiharo Ibarani, “Rabuni!” Palaihana, “Guru.”

¹⁷Notiꞌi hi Yesu pe hi Maria, “InioꞌA itiko, alaꞌ handoaꞌA tene mengkaꞌoreꞌ nolou pe UmoꞌKu. Noloumoko pe topegurungKuhi, itiꞌikihi kohingKiꞌ noloungkamo pe UmoꞌKu hei Umoꞌmi woꞌo, Pueꞌ AlangKu hei Pueꞌ Alami woꞌo.”

¹⁸Noloumo hi Maria toMadalena mampohidupaꞌki topeguruNahi hi Yesu, honiꞌi notiꞌi, “Kuꞌokiꞌmo Pueꞌ hingkenia!” Katoꞌo nopowutekimohi lekiꞌ-lekiꞌne to notiꞌi hi Yesu.

¹⁹Wini i ando Minggu tiꞌo, morampuhi topeguruNe i tambi to tekuhi wambaꞌne, alaꞌ mangkorokaꞌhi tadulakora toYahudi. Hangkaꞌ-hangkaꞌ romo hi Yesu mehupaꞌ, metotiꞌi i lumbura hei Notiꞌi, “Romiꞌ ngkotuwuꞌ.”

²⁰Uko tiꞌo, Notidoꞌkimohi koraweNe hante uhuꞌNa to mebilaꞌ. Motanaꞌ mpololeke lalire pangkiꞌ Pueꞌra.

²¹Notiꞌi womo hi Yesu, “Romiꞌ ngkotuwuꞌ i ingkei. Hibali UmoꞌKu morumbaꞌA, hatoꞌo woꞌo Aku morumbaꞌkei.”

²²Uko tiꞌo, Notowuiꞌmohi hante inohaꞌNa honiꞌi Notiꞌi, “Itorimomokei Inohaꞌ Mangkolehi.

²³Ane iꞌampunikei dosane awami, Pueꞌ Ala woꞌo moꞌampunihi. Angkana ane hawaꞌkei iꞌampuni dosane awami, Pueꞌ Ala woꞌo hawaꞌi moꞌampunihi.”

²⁴Hi Toma to rotiꞌi woꞌo hi Didimu, haduo ka topeguruNahi to hampuluꞌ meroduo, hawaꞌi uwaꞌ moꞌawa hante iohi ikohupaꞌna hi Yesu itoꞌo.

²⁵Iomo horiana rotiꞌiki, “Toma, Pueꞌ kiꞌokiꞌmo!” Angkana notiꞌi hi Toma, “Ane hawaꞌi kuꞌokiꞌ bilaꞌ popakua i koraweNa hei kupetubuꞌ bilaꞌ popakua to nipakune, hei ane hawaꞌi kuperama bilaꞌNe to rotohu i uhuꞌNa, bateꞌna hawaꞌi kupoꞌohi.”

²⁶Haminggu katoꞌo, hirampu womohi i lali tambi tiꞌo. I tempo tiꞌo, hi Toma uwaꞌ moꞌawa hante iohi. Rokuhimo lekiꞌ-lekiꞌne wambaꞌ, angkana kehapoꞌi hatoꞌo, hangkaꞌ-hangkaꞌ romo hupaꞌ hi Yesu metotiꞌi i lumbura, hei mantiꞌi, “Romiꞌ ngkotuwuꞌ hupaꞌ pe ingkei.”

²⁷Uko tiꞌo, Io mampatiꞌiki hi Toma, “Iꞌelemo hei ipetubuꞌmo popakua to i korawengKa. Iperama woꞌo potohua to i uhuꞌKa, hingkeꞌna ipoꞌohimoꞌi. Mepoꞌohimoko, alaꞌ tuwuꞌmoꞌA huliꞌ!”

²⁸Notiꞌi hi Toma, “Ingkomo Pueꞌka hei Pueꞌ Alangku!”

²⁹Notiꞌi hi Yesu pe hi Toma, “Ipoꞌohi alaꞌ iꞌokiꞌmoꞌi. Morasiꞌhi toaꞌ to mepoꞌohi pe Aku, kehapoꞌi hawaꞌA roꞌokiꞌ.”

³⁰Kotuꞌuana woriꞌ tene tandaꞌ kuasaꞌ to nowali hi Yesu to rosobiꞌi mata topeguruNahi to hawaꞌi teꞌukiꞌ i lali suraꞌ hieꞌe.

³¹Angkana lekiꞌ-lekiꞌna to niꞌukiꞌ hieꞌe, niꞌukiꞌ hingkeꞌna ipoꞌohikei kohiYesuna Anaꞌne Pueꞌ Alaꞌ, Datu to Mamposalamaꞌ, hei alaꞌ pepoꞌohimi pe Io, hingkiꞌ pahuakei kotuwuꞌ to wolaꞌ to hawaꞌi mokoꞌukoa.