Read Rampi Yohanes 4 Bible Online

Yohanes 4 - Rampi bible

Yohanes 4

¹ToParisi pahorimohi kareba to mantiꞌi koworiꞌ-woriꞌamo toaꞌ to nolou mampoperiu pe hi Yesu, koꞌukoana pedeꞌ woriꞌ toaꞌ to metuntu pe hi Yesu hintina toaꞌ to metuntu pe hi Yohanes.

²(Kotuꞌuana, handoꞌio hi Yesu to meriu, angkana topeguruNa to meriu.)

³Konobahaꞌnalu hi Yesu hapo to rohori toParisi tiꞌo, Io molaimo ka woiꞌ Yudea mahuliꞌ nolou pe woiꞌ Galilea.

⁴I patengkaꞌaNa tiꞌo, Io hangangaa moliu i woiꞌna toSamaria.

⁵Pohoꞌando, hupaꞌmohi i bolaꞌna toSamaria to nikokeneꞌi Sikar, hawaꞌi moꞌela ka woiꞌ to nopewei hi Akoꞌ hampiha pe hi Yusuf anaꞌna. I howali bolaꞌ tiꞌo, uwaꞌ haꞌanu bubu to nikokeneꞌi bubuna hi Akoꞌ. Mahuramo hi Yesu i bota bubu tiꞌo, alaꞌ luleꞌI matengkaꞌ.

⁶

⁷Topeguruna loliuhi nolou pe bolaꞌ mehili pangkara. Hawaꞌi morue, hupaꞌmo haduo towoweꞌe toSamaria ako mehangkuꞌ. Notiꞌi hi Yesu, “Inoꞌ, ipaꞌaniꞌA kaiaꞌ uwai Kuꞌinu.”

⁸

⁹Hoko laline towoweꞌe tiꞌo, alaꞌ motuntuni adaꞌna toYahudi hawaꞌhi wadi mopakeꞌ taboꞌ ba sangkiriꞌra toSamaria. Iomo horiana notiꞌi, “Ingko toYahudiko, aku towoweꞌe toSamariaꞌa. Mewaliꞌ, mahamporeꞌi hinaꞌ merapiꞌKo uwai pe aku?”

¹⁰Notiꞌi hi Yesu, “Ane ibahaꞌi kokodeꞌne pebarakati to ka Pueꞌ Ala, hei ane ibahaꞌi woꞌo kohihimongKu to merapiꞌ uwai, bateꞌna merapiꞌko woꞌo uwai i Aku, hei hingkiꞌ Kupaꞌaniko uwai Ngkotuwuꞌ.”

¹¹Notiꞌi towoweꞌe tiꞌo, “Tua, ka imbo uwai Ngkotuwuꞌ to Itiꞌi tiꞌo? Hawaꞌi uwaꞌ popetembuꞌMa, alaꞌ bubu hieꞌe kuladu.

¹²Bubu hieꞌe manaꞌki ka hi Akoꞌ, tododulungku hampiha. Io maꞌinu uwai kaseꞌe, hatoꞌo woꞌo anaꞌnahi hante pinatuwuꞌna. Ba Itiꞌi meliu tuwuꞌMa ka tuwuꞌna hi Akoꞌ?”

¹³Notiꞌi hi Yesu, “Lekiꞌ-lekiꞌna toaꞌ to maꞌinu uwai ka bubu hieꞌe, hingkiꞌ mangkumarohi huliꞌ.

¹⁴Angkana himo to maꞌinu uwai to hingkiꞌ Kupaꞌanikihi, hamboaꞌmohi mangkumaro wute nantolou-louna. Alaꞌ uwai to Kupaꞌanikihi tiꞌo hingkiꞌ mewali mata uwai Ngkotuwuꞌ to moꞌili nturusi ka lalira, horiana pahuahi kotuwuꞌ to wolaꞌ to hawaꞌi mokoꞌukoa.”

¹⁵Notiꞌi towoweꞌe tiꞌo, “Ane hatoꞌoꞌi, tua, Ipaꞌanimoꞌa uwai tiꞌo, hingkeꞌna hamboaꞌmoꞌa mangkumaro, hei hamboaꞌmoꞌa paralu humei mehangkuꞌ ando-ando iseꞌe.”

¹⁶Notiꞌi hi Yesu, “Noloumoko duluna mowowoi maꞌanimu, honiꞌko humei mahuliꞌ.”

¹⁷Notiꞌi towoweꞌe tiꞌo, “Hawaꞌi uwaꞌ maꞌaningka.” Notiꞌi hi Yesu, “Tuꞌu lolitama. Hawaꞌi uwaꞌ maꞌanima.

¹⁸Limo mpihamoko momaꞌani, hei tomaꞌani to ipoꞌawa hinewowoꞌena, handoꞌio maꞌanimu. Mewaliꞌ, tuꞌu mpuꞌu lolitama hingkenia.”

¹⁹Notiꞌi towoweꞌe tiꞌo, “Hinewowoꞌena kubahaꞌmo Ingko haduo nabi.

²⁰Ingka toSamaria menombaka i biri Korasi hieꞌe, i biri penombahara tododulungki. Angkana pantiꞌimi toYahudi, i Yerusalelu penombaha to tuꞌu.”

²¹Notiꞌi hi Yesu, “Inoꞌ, ipoꞌohimo lolitangKa hieꞌe: hingkiꞌ hupaꞌmo tempone, toaꞌ hingkiꞌ menomba pe Pueꞌ Ala, handoꞌio i Yerusale, hei handoꞌio woꞌo i biri hieꞌe.

²²Ingkei toSamaria, hawaꞌkei ibahaꞌ kohihimoNa to nipenombai. Ingka toYahudi, kibahaꞌ kohihimoNa to kipenombai, alaꞌ uwaꞌ dandine Pueꞌ Ala to hingkiꞌ mangkomi kosalamaꞌa pe toaꞌ moliu ingka.

²³Angkana hingkiꞌ hupaꞌ tempone, hei kotuꞌuana hinewowoꞌena hupaꞌmo tempone, toaꞌ hingkiꞌ menomba pe Pueꞌ Ala Umoꞌta, hangangaa menombahi pe Io motuntuni poturuꞌ to tuꞌu alaꞌ perandana Inohaꞌ Mangkolehi. Toaꞌ to menomba hatoꞌo, iomo to nolei Pueꞌ Ala Umoꞌta.

²⁴Pueꞌ Ala iomo Inohaꞌ. Iomo horiana toaꞌ to menomba pe Io, hangangaa menomba pe Io motuntuni poturuꞌ to tuꞌu alaꞌ perandana Inohaꞌ Mangkolehi.”

²⁵Notiꞌi towoweꞌe tiꞌo, “To kubahaꞌ, hingkiꞌ hupaꞌ Datu to Mamposalamaꞌ, to rotiꞌi woꞌo Kerisitu. Ane hupaꞌI, Iomo to hingkiꞌ mampokononto pe ingkiꞌ lekiꞌ-lekiꞌna to uwaꞌ.”

²⁶Notiꞌi hi Yesu, “Akumola hieꞌe, to kolentuꞌa mololita hante ingko.”

²⁷Kolentuꞌara tene mololita, hupaꞌmohi topeguruNe ka bolaꞌ. Hokohi pangkiꞌ hi Yesu mololita hante haduo towoweꞌe toSamaria. Angkana hawaꞌi howeꞌ haduo to podehoꞌ meꞌitano pe hi Yesu hapo tungkaihane towoweꞌe tiꞌo hei mahamporeꞌi hinaꞌ hi Yesu mololita hante towoweꞌe tiꞌo.

²⁸Uko tiꞌo, towoweꞌe tiꞌo mampolihi pehongkuꞌana, noloumo pe bolaꞌ mampowute pe toaꞌ to itoꞌo,

²⁹“Hokei, nolouki mangkohidupaꞌki haduo toaꞌ to pobahaꞌ hinangkana waliangku. Wora Iomo mpuꞌu Datu to Mamposalamaꞌ?”

³⁰Io horiana noloumohi pe howali bolaꞌ hingkeꞌna mampohidupaꞌkihi hi Yesu.

³¹Kolentuꞌana towoweꞌe tiꞌo nolou pe bolaꞌ, topeguruNa mantiꞌi pe hi Yesu, “Guru, mangkamoki.”

³²Angkana notiꞌi hi Yesu, “Hampoliꞌmo alaꞌ uwaꞌ pangkaKa to hawaꞌkei ibahaꞌ.”

³³Mometenei-teneimohi, rotiꞌi, “Himoreꞌi to mampangkomikiꞌI pangkaNa?”

³⁴Iomo horiana notiꞌikihi hi Yesu, “PangkaKu, iomo mampetuntui peleihana Pueꞌ Ala to morumbaꞌA, hei mampoꞌuko jama to NopaꞌanikiꞌA.

³⁵Poko itiꞌikei waheꞌe: iba mbula tene, honiꞌki mekina. Angkana Kutiꞌikikei: iꞌelekei mantuleliꞌ toaꞌ hieꞌehiꞌe hibalimohi kina to molingkokuniꞌmo to timomomo nipekina. Hatoꞌolu woꞌo toaꞌ to mampoꞌohi lolitangKu, hibalihi kina to molingkokuniꞌmo, to hingkiꞌ nipekina.

³⁶Toaꞌ to mampowute pohawaꞌna Pueꞌ, wadi nipandiriꞌ hibali to mantudaꞌ. Alaꞌ pajamara, woriꞌ toaꞌ pahua kotuwuꞌ to wolaꞌ to hawaꞌi mokoꞌukoa. Toaꞌ to mekina mampemolukamo mantorimo howonina. Iohi hingkiꞌ motanaꞌ moꞌawa-awa hante toaꞌ to mantudaꞌ.

³⁷Io horiana, tuꞌu mpololeke lolita tantaniꞌ to mantiꞌi waheꞌe: ‘Haduo to mantudaꞌ, to haduona to mampekina.’

³⁸Kurumbaꞌkei nolou mekina i kineteꞌ to handoꞌio ingkei to motudoꞌio. Toaꞌ ntaniꞌna to motudoꞌi, angkana ingkeimo to mampekina wuaꞌna pajamara.”

³⁹I bolaꞌ tiꞌo, woriꞌ toSamaria to mepoꞌohi pe hi Yesu, alaꞌ pahorihi lolitana towoweꞌe tiꞌo hingkenia to mantiꞌi, “Notiꞌikimoꞌa hinangkana waliangka.”

⁴⁰Katoꞌo, noloumohi mangkohidupaꞌki hi Yesu, hei roperapiꞌ mpuꞌu hingkeꞌna holampiꞌI i bolaꞌra. Iomo horiana hi Yesu roꞌando itoꞌo.

⁴¹Uko katoꞌo, koworiꞌ-woriꞌa tumpu bolaꞌ to mepoꞌohi pe hi Yesu, alaꞌ mampehoromuamohi mpuꞌu lolitaNa.

⁴²Rotiꞌi tumpu bolaꞌ pe towoweꞌe tiꞌo, “Hinewowoꞌena kipoꞌohimo mpuꞌu Iomo Datu to Mamposalamaꞌ, handoꞌio ala hapo to itiꞌi pe ingka, angkana alaꞌ kihorimoꞌi lolitaNe, hei kibahaꞌ koꞌIonamo mpuꞌu to Mamposalamaꞌ duniaꞌ.”

⁴³Meroꞌandomo Io i Samaria, katoꞌo nopololiu womo hi Yesu patengkaꞌne moꞌawa-awa hante topeguruNahi nolou pe woiꞌ Galilea.

⁴⁴Alaꞌ kahampiha hi Yesu mantiꞌi, “Haduo nabi hawaꞌi niꞌadaꞌi i woiꞌ konipokodeꞌana.”

⁴⁵Angkana kohupaꞌralu i Galilea, tumpu bolaꞌ mantorimo hi Yesu ka lalira mpololeke, alaꞌ uwaꞌhi hampiha i Yerusale i tempona hi Yesu motuntuni ando Posusaꞌ Pokalintora toYahudi, hei roꞌokiꞌ mata lekiꞌ-lekiꞌna tandaꞌ kuasaꞌ to Nowali i tempo tiꞌo.

⁴⁶I woiꞌ Galilea, hupaꞌ womo hi Yesu i bolaꞌ Kana, i bolaꞌ powolihiaNa uwai mewali anggoroꞌ. Uwaꞌ haduo toaꞌ to majama i tambina datu i bolaꞌ Kapenau. Anaꞌna madori hakiꞌne.

⁴⁷Ikonohorinalu kohupaꞌne hi Yesu i Galilea, io nolou merapiꞌ sulungi pe hi Yesu, hei notiꞌi, “Guru, nolouki pe Kapenau, Ipokoꞌoriꞌkiꞌakae anaꞌka, alaꞌ hingkiꞌ mahiꞌi.”

⁴⁸Notiꞌi hi Yesu pe io hante toaꞌ to itoꞌohi, “Ingkei hawaꞌkei mampoꞌohi koka Pueꞌ AlangKu, ane kehawaꞌkei pangkiꞌ tandaꞌ kuasaꞌ!”

⁴⁹Notiꞌi toaꞌ tiꞌo, “Guru, hokimo, mahi intu anaꞌka!”

⁵⁰Notiꞌi hi Yesu, “Mahuliꞌmoko. Anaꞌmu moꞌoriꞌmo.” Tua tiꞌo mampoꞌohi mpuꞌu lolitana hi Yesu, honiꞌi mahuliꞌmo.

⁵¹Kolentuꞌana tene i lala, haꞌumbora duohi hawiꞌne ako modupaꞌi. Rotiꞌiki, “Anaꞌmu moꞌoriꞌmo!”

⁵²Noteneihi, “Tenteꞌ haꞌumbo nomoꞌoriꞌ?” Rotiꞌi, “Hiwinia, tenteꞌ isaꞌ pohoꞌando, meꞌohaꞌmo kohoholeꞌne.”

⁵³Nokolowoimo umoꞌna, i jaa tiꞌo woꞌo hi Yesu mantiꞌi, “Moꞌoriꞌmo anaꞌma.” Mepongka katoꞌo, toaꞌ tiꞌo mepoꞌohimo pe hi Yesu moꞌawa hante lekiꞌ-lekiꞌna to i tambina.

⁵⁴Iomo korompihane tandaꞌ kuasaꞌ to nowali hi Yesu hei korompihanamo woꞌo mehupaꞌ i Galilea.