Read Rampi Yohanes 5 Bible Online

Yohanes 5 - Rampi bible

Yohanes 5

¹Uko tiꞌo, molaimo hi Yesu nolou pe Yerusale hingkeꞌna motuntuniꞌI ando ngkodeꞌra toYahudi.

²I Yerusale, dodungku i wambaꞌ ngkodeꞌ to nikokeneꞌi “Wambaꞌ Gimba”, uwaꞌ haꞌanu wuhuꞌ; i wiharo Ibarani konaꞌna Betesda. Uwaꞌ limo tangkoꞌ to motuleliꞌi wuhuꞌ tiꞌo.

³Woriꞌ to mohakiꞌ hirampu itoꞌo. Uwaꞌhi tobilo, tokohu, hei to biku, lekiꞌ-lekiꞌra toturuhi nturusi i tangkoꞌna, [mampekauhi pengkaduiꞌna uwai.

⁴Alaꞌ hampiha-hampihaluꞌi uwaꞌ malaꞌekana Pueꞌ to mengkohou humei pe wuhuꞌ tiꞌo mampopengkaduiꞌ uwai. Hei himo to medulu mengkohou pe lali wuhuꞌ tiꞌo i tempona uwai mengkaduiꞌ, moꞌoriꞌmo ka hakiꞌna][15]

⁵Uwaꞌ itoꞌo haduo tomaꞌani, tolu mpuluꞌmo walu ntoꞌa hawaꞌi hohumbo matengkaꞌ alaꞌ kohuꞌi.

⁶Konoꞌokiꞌna hi Yesu toaꞌ tiꞌo toturuhi itoꞌo, hei Nobahaꞌ woꞌo komoruenemo kohu, iomo horiana Nopeꞌitanoki, “Ikodokoꞌireꞌi hingkeꞌna pobiaꞌko matengkaꞌ?”

⁷Notiꞌi tokohu tiꞌo, “Kulei mpololeke, Tua, angkana hawaꞌi wokae uwaꞌ toaꞌ to mampopengkohouꞌa pe lali wuhuꞌ i tempona uwai mengkaduiꞌ. Kekudiaꞌ kotea mengkohou, uwaꞌmo to mampeduluiꞌa.”

⁸Notiꞌi hi Yesu, “Metotiꞌimoko, hei matengkaꞌmoko ikomimo aliꞌma.”

⁹Moꞌoriꞌmo mpuꞌu toaꞌ tiꞌo, liu matengkaꞌ mangkomi aliꞌna. Tiꞌo mewali i ando penombahara toYahudi.

¹⁰Iomo horiana tadulakora toYahudi mokamoroki toaꞌ to hongkoꞌ nipokoꞌoriꞌ tiꞌo, rotiꞌiki, “Hinewoꞌena ando penomba! Hawaꞌki wadi majama, mewaliꞌ hawaꞌko woꞌo wadi mangkomi aliꞌmu.”

¹¹Notiꞌi toaꞌ tiꞌo, “Toaꞌ to mampokoꞌoriꞌa hingkenia morumbaꞌa, ‘matengkaꞌmoko hei ikomimo aliꞌma.’”

¹²Ropeꞌitanoki, “Himo to morumbaꞌko mangkomi aliꞌmu hei matengkaꞌ?”

¹³Angkana hawaꞌi nobahaꞌ kohihimoNa to mampokoꞌoriꞌi, alaꞌ molaimoꞌi hi Yesu hei hamboaꞌmo roꞌokiꞌ i lumbura toaꞌ to woriꞌ.

¹⁴Hawaꞌi morue katoꞌo, hi Yesu nolou mampohidupaꞌki toaꞌ tiꞌo i tanobaꞌa Tambina Pueꞌ Ala, Notiꞌi, “Hinewowoꞌena moꞌoriꞌmoko. Inioꞌ womoko mowali dosa, hingkeꞌna hawaꞌko norumpa hapo-hapo to meliu kokodakene.”

¹⁵Uko katoꞌo, noloumo toaꞌ tiꞌo mampohidupaꞌkihi tadulakora toYahudi, notiꞌikihi kohiYesuna to mampokoꞌoriꞌi.

¹⁶Iomo horiana tadulakona toYahudi mampemolukamo mampomasusa hi Yesu, alaꞌ Io mepokoꞌoriꞌ i ando penombaha.

¹⁷Notiꞌikihi hi Yesu, “UmoꞌKu majama ando-andona, hei Aku woꞌo majamaꞌA nturusi”

¹⁸Uko katoꞌo, tadulakora toYahudi pedeꞌ magegahi nturusi mampaliꞌ lala hingkeꞌna nihukuꞌi mahi hi Yesu. Rowali hatoꞌo, handoꞌiolu nokomi koNolungkaꞌina adaꞌ i ando penomba, angkana alaꞌ Notiꞌi woꞌo koPueꞌ Alana Umoꞌne; palaihana, Io mampohibali wotana hante Pueꞌ Ala.

¹⁹Mehoniꞌ hi Yesu pe tadulakora toYahudi, Notiꞌi, “Tuꞌu mpololeke lolitangKa hieꞌe: kotuꞌuana kehapoꞌA Anaꞌna Pueꞌ Ala, hawaꞌA wadi majama motuntuni peleihangKu hadoduongKu ane hawaꞌA pangkiꞌ hapo to Nowali UmoꞌKu, alaꞌ hapo to nojama UmoꞌKu, tiꞌo woꞌo to Kujama.

²⁰Lekiꞌ-lekiꞌna tiꞌo mewali alaꞌ UmoꞌKu mampokarimaꞌA, hei mampatidoꞌkiꞌA lekiꞌ-lekiꞌna to Nowali. Hei uwaꞌ womo tandaꞌ kuasaꞌ to hingkiꞌ NotidoꞌkiꞌA to meliu kokodeꞌne ka tandaꞌ kuasaꞌ to ukomo Kuwali. Hingkiꞌ Kuwali tandaꞌ kuasaꞌ tiꞌo hei hingkiꞌ ipohokokei mpololeke.

²¹UmoꞌKu mampopeꞌaro to mahi hei mampaꞌanihi kotuwuꞌ, iomo horiana Aku woꞌo mampaꞌaniꞌi kotuwuꞌ pe hihimolu motuntuni peleihangKu.

²²Handoꞌio UmoꞌKu to hingkiꞌ mobutusi, angkanareꞌi kuasaꞌ pobutusi tiꞌo Nopeweimo i Aku, anaꞌNa.

²³Nowali hatoꞌo, hingkeꞌna lekiꞌ-lekiꞌna toaꞌ moꞌadaꞌiꞌA hibali woꞌo moꞌadaꞌi UmoꞌKu. Himo to hawaꞌA moꞌadaꞌi, hibali hante hawaꞌhi woꞌo moꞌadaꞌi UmoꞌKu to morumbaꞌA.

²⁴LolitangKu hieꞌe tuꞌu mpololeke: himolu to mampehoromua lolitangKu hei mepoꞌohi pe Pueꞌ Ala to morumbaꞌA humei, pahuamohi kotuwuꞌ to wolaꞌ to hawaꞌi mokoꞌukoa. Hawaꞌhi hingkiꞌ nihuku, hei hipohintehi ka komahia, koꞌukoana pahuamohi kotuwuꞌ to wolaꞌ.

²⁵Tuꞌu mpololeke lolitangKa hieꞌe: hingkiꞌ hupaꞌ tempone, hei hupaꞌmo tempone, to mahi pepoꞌohira hingkiꞌ pahori pohawaꞌNa Anaꞌna Pueꞌ Ala. Iohi to motuntuni pohawaꞌNa tiꞌo hingkiꞌ pahuahi kotuwuꞌ to wolaꞌ.

²⁶UmoꞌKu makuasaꞌ mepaꞌani kotuwuꞌ. Hatoꞌo woꞌo Aku, NopaꞌaniꞌA kuasaꞌ mepaꞌani kotuwuꞌ.

²⁷NopaꞌanimoꞌA woꞌo kuasaꞌ mobutusi kara-karana toaꞌ, alaꞌ Aku Anaꞌ Manusiaꞌ.

²⁸Inioꞌ ipohokokei lolitangKa hieꞌe, alaꞌ hampiha tempo lekiꞌ-lekiꞌna toaꞌ to mahi hingkiꞌ pahori loaꞌKu.

²⁹Toaꞌ to mowalia to moromiꞌ hingkiꞌ nipopeꞌarohi hingkeꞌna pahuahi kotuwuꞌ to wolaꞌ. Angkana toaꞌ to mowalia to kodake hingkiꞌ nipotuwuꞌhi huliꞌ hingkeꞌna nihukuhi.”

³⁰Hi Yesu mampololiu womo lolitaNa, Notiꞌi, “Aku hawaꞌA wadi mowali hapo-hapo motuntuni peleihangKu hadoduongKu. Kubutusi lekiꞌ-lekiꞌne motuntuni hapo to nohowoꞌikiꞌA UmoꞌKu. PobutusingKu tuꞌu hawaꞌi mampohambobeiꞌ, alaꞌ hawaꞌA motuntuni peleihangKu hadoduongKu, motuntuniꞌA peleihana Pueꞌ Ala to morumbaꞌA.

³¹Ane Akulu hadoduongKu to mantiꞌi koka Pueꞌ AlangKu, bateꞌna hawaꞌkei ipoꞌohi.[16]

³²Angkana uwaꞌ to ntaniꞌne to mampetotuꞌu, iomo UmoꞌKa, hei Kubahaꞌ kotuꞌune to Nopololita.

³³Hampiha morumbaꞌkei suromi nolou pe hi Yohanes, hei io mampowute noniuꞌ Aku hei hapo to nopowute tiꞌo tuꞌu.

³⁴Kotuꞌuana hampoliꞌmo uwaꞌ sabiꞌ ka toaꞌ, angkana hieꞌe Kupetiꞌiki pe ingkei hingkeꞌna niposalamaꞌkei.

³⁵Hi Yohanes tiꞌo hibali huluꞌ to mewanta hei mangkomi komobaro i ingkei. Hei motanaꞌkei pahori lolitana. Angkana komotanaꞌmi tiꞌo hampaiꞌlu.

³⁶Angkana Aku, uwaꞌ sabiꞌKa to mampokononto kohihimongKu, hei sabiꞌ tiꞌo meliu tene ka posobiꞌina hi Yohanes. Ane iꞌokiꞌkei pajamangKa, tiꞌomo to mampokononto kohihimongKu. Hapo to Kuwali hinewowoꞌena, iomo tandaꞌ kuasaꞌ to nohowoꞌikiꞌA UmoꞌKu. Tandaꞌ kuasaꞌ to Kuwali, tiꞌo to mampokononto koꞌAkuna to norumbaꞌ UmoꞌKu humei pe duniaꞌ hieꞌe.

³⁷Hei meliu ka tiꞌo, UmoꞌKu to morumbaꞌA humei, Io hadoduoNa to mantiꞌi hei mampokononto koꞌAkuna rumbaꞌaNe. Angkana ingkei, handoaꞌi tene hampiha ihorikei loaꞌNe, handoaꞌi tene iꞌokiꞌkei lenteNe.

³⁸LolitaNa hawaꞌi ipoꞌilalikei, alaꞌ hawaꞌkei mepoꞌohi i Aku to Norumbaꞌ humei.

³⁹Pokokei mampegurui Suraꞌ Mangkolehi, alaꞌ nipekiri ane mampeguruimokei Suraꞌ Mangkolehi tiꞌo, hingkiꞌ ihuakei kotuwuꞌ to wolaꞌ to hawaꞌi mokoꞌukoa. I Suraꞌ Mangkolehi tiꞌo teꞌukiꞌ noniuꞌ i Aku.

⁴⁰Angkana kehapoꞌi hatoꞌo, hawaꞌkei hiniꞌ humei pe Aku hingkeꞌna pahuakei kotuwuꞌ to wolaꞌ to hawaꞌi mokoꞌukoa.

⁴¹HawaꞌA mampaliꞌ noperenaki ka toaꞌ.

⁴²Angkana Kubahaꞌ mpololeke lalimi, kohawaꞌne uwaꞌ rimami pe Pueꞌ Ala.

⁴³UmoꞌKu to morumbaꞌA humei. KuasaꞌKu Kuhua ka Io, angkana hawaꞌAkei itorimo. Ane uwaꞌhi to humei i lali kuasaꞌra hadoduora, itorimokei.

⁴⁴Ileikei tene momeperenaki haduo hei haduo. Hawaꞌkei ilei mowolihi lalimi hingkeꞌna nopokodeꞌkei Pueꞌ Ala hadoduoNa. Ane hatoꞌoꞌi hohumbomo kohingkiꞌ mepoꞌohimio pe Aku?

⁴⁵Inioꞌ nipekiri Aku to hingkiꞌ mosalaꞌikei i hinaroNa UmoꞌKu, hei hi Musa to hingkiꞌ mototundukei. Hawaꞌi. Nabi Musa wae to hingkiꞌ mosalaꞌikei.

⁴⁶Angkana ane tuꞌu-tuꞌu kopepoꞌohimi pe hi Musa, mononto ipoꞌohiꞌAkei woꞌo, alaꞌ hapo to noꞌukiꞌ hi Musa, tiꞌomo woꞌo to mololita noniuꞌ i Aku.

⁴⁷Alaꞌ hawaꞌkei ipoꞌohi hapo to noꞌukiꞌ hi Musa, lolitangKu woꞌo hawaꞌi hingkiꞌ ipoꞌohikei.”