Read Rampi Yohanes 6 Bible Online

Yohanes 6 - Rampi bible

Yohanes 6

¹[17] Uko tiꞌo, noloumo hi Yesu moꞌawa hante topeguruNahi pe tinaꞌ motoꞌando rano Galilea, to rotiꞌi woꞌo rano Tiberia.

²Woriꞌ mpololeke toaꞌ metuntu nturusi pe Io, alaꞌ pangkiꞌhi lekiꞌ-lekiꞌna tandaꞌ kuasaꞌ to Nowali ipampokoꞌoriꞌna to mohakiꞌ.

³Hi Yesu moneꞌmo nolou pe biri moꞌawa hante topeguruNa, hei mahura itoꞌo.

⁴I tempo tiꞌo, hingkiꞌ hupaꞌ ando ngkodeꞌ agama Yahudi to rotiꞌi ando Posusaꞌ Pokalintora toYahudi.

⁵Noꞌele hi Yesu, toaꞌ modinti-dintihi humei mangkododungkuiꞌI. Notiꞌi pe hi Pilipu, “Iꞌimboki mehili pangka, hingkeꞌna toaꞌ to woriꞌ hieꞌe topaꞌanihi mangka?”

⁶Kotuꞌuana, nobahaꞌmo hi Yesu hapo to hingkiꞌ Nowali. Nopeꞌitanoki hatoꞌo pe hi Pilipu, alaꞌ Nopampeꞌelei pekirina hi Pilipu.

⁷Notiꞌi hi Pilipu, “Kehapoꞌi ronatu doiꞌ peraꞌ[18] topopehili pangka hei topaꞌanikihi lekiꞌ-lekiꞌna toaꞌ, hawaꞌi hingkiꞌ ganaꞌ kehapoꞌi hangkiuꞌ-hangkiuꞌlu nipaꞌanikihi.”

⁸Uko katoꞌo, haduo ka topeguruNahi to nikokeneꞌi hi Andaria hampemomolona hi Simo Peturuꞌ, mantiꞌi,

⁹“Iseꞌe uwaꞌ haduo oꞌanaꞌ to mebaku limo onu depa hei rombaꞌa bouꞌ, angkana hapomoreꞌi podumbuꞌane i toaꞌ to woriꞌ hieꞌe?”

¹⁰Notiꞌi hi Yesu, “Irumbaꞌmohi mahura!” Mahuramohi mpuꞌu i womboꞌ kora. Koworiꞌra toaꞌ tiꞌo, kira-kira limo sabu tomaꞌani.[19]

¹¹Uko katoꞌo, noroamo hi Yesu depa hante bouꞌ tiꞌo, Nopekokaeki, Nopaꞌanikimohi topeguruNa hingkeꞌna rodolaꞌ-dolaꞌi pe toaꞌ to woriꞌ to kolentuꞌara mahura. Mangkamohi lekiꞌ-lekiꞌra wutehi wohu.

¹²Wohumohi lekiꞌ-lekiꞌra, notiꞌi hi Yesu pe topeguruNahi, “Irampukei lobine, hingkeꞌna hawaꞌi uwaꞌ to rotube.”

¹³Koꞌukonalu rorampu, melobi tene hampuluꞌ merobakuꞌ ka limo onu roti to roꞌoka toaꞌ to woriꞌ hingkenia.

¹⁴Koroꞌokinalu toaꞌ to woriꞌ tandaꞌ kuasaꞌ tiꞌo, mololitamohi haduo hei haduo, rotiꞌi, “Hangangaa Iomo nabi ngkodeꞌ to nopowute hi Musa hampiha, hingkiꞌ humei pe duniaꞌ”

¹⁵Mewaliꞌ, tungkaihara moparuku hi Yesu hingkeꞌna mewali datura. Konobahaꞌnalu hi Yesu tungkaihare, Io molaimo katoꞌo nolou mampohadoduo i biri.

¹⁶Kononewamo, topeguruNahi munaꞌumohi nolou pe rano.

¹⁷Ando hingkiꞌ mentoriꞌmo, angkana hi Yesu hawaꞌi mehupaꞌ. Katoꞌo, meduangamohi nolou menonto bolaꞌ Kapenau.

¹⁸Kolentuꞌara meduanga, hupaꞌmo parowo to makaja, koꞌukoana mebalumba ngkodeꞌ.

¹⁹Komoꞌelara mobohe limo ba oni kilometeꞌ ka bota rano,[20] roꞌokiꞌmo hi Yesu matengkaꞌ i womboꞌ uwai nolou mampohidupaꞌkihi. Morokaꞌmohi mpololeke,

²⁰angkana notiꞌi hi Yesu, “Inioꞌkei morokaꞌ! Akulu hieꞌe.”

²¹Korohorinalu loaꞌNe, motanaꞌmohi mantorimo hi Yesu i duangara. I tempo tiꞌo woꞌo kaliuꞌmohi wute i bota rano to rotungkai.

²²Poꞌonina, woriꞌ toaꞌ i hanupe rano mampaliꞌ hi Yesu, rotiꞌi, “I imbomoꞌi hi Yesu? Io hawaꞌi meduanga moꞌawa-awa hante topeguruNa hiwinia. Hei hawaꞌi uwaꞌ duanga ntaniꞌne iseꞌe, ukonalu duanga to ropakeꞌ topeguruNa.”

²³Uko tiꞌo, mehupaꞌmohi toaꞌ ka kota Tiberia hante duangara, hei mehorihi dodungku ikopangkahara toaꞌ to woriꞌ to mangkahi depa to nopekokaeki Pueꞌ Yesu.

²⁴Korobahaꞌna toaꞌ to woriꞌ hi Yesu hante topeguruNahi hamboaꞌmohi uwaꞌ itoꞌo, meduangamohi woꞌo nolou pe bolaꞌ Kapenau mampaliꞌ hi Yesu.

²⁵Kowuteralu toaꞌ to woriꞌ i hanupe rano mampohidupaꞌkihi hi Yesu, ropeꞌitanoki, “Guru! Hiwaꞌimbo Ihupaꞌ?”

²⁶Mehoniꞌ hi Yesu, “Tuꞌu mpololeke lolitangKu hieꞌe: Kubahaꞌ tungkaihami hinaꞌ humeiꞌAkei ipaliꞌ. IpaliꞌAkei alaꞌ wohumokei Kupopopangka, handoꞌio alaꞌ ibahaꞌkei palaihane tandaꞌ kuasaꞌ to Kuwali.

²⁷Inioꞌkei majama mampaliꞌ pangka to hampihalaolu uko hei hantouꞌ wuhoni. Majamamokei mampaliꞌ pangka to hawaꞌi hohumbo wuhoni hei to mepaꞌani kotuwuꞌ to wolaꞌ to hawaꞌi mokoꞌukoa. Anaꞌ Manusiaꞌ to hingkiꞌ mampaꞌanikei pangka tiꞌo, alaꞌ Iomo to Noponiuꞌ Pueꞌ Ala.”

²⁸Meꞌitanohi toaꞌ to woriꞌ, “Hapo to hangangaa kiwali hingkeꞌna waliangki motuntuni peleihana Pueꞌ Ala?”

²⁹Notiꞌi hi Yesu, “Hieꞌemo to nolei Pueꞌ Ala hingkeꞌna iwalikei: mepoꞌohimokei pe Aku to Norumbaꞌ Pueꞌ Ala humei.”

³⁰Iomo horiana rotiꞌi womo toaꞌ to woriꞌ, “Ane hatoꞌoꞌi, tandaꞌ kuasaꞌ hapo to Iponoꞌokiꞌkika, hingkeꞌna kipoꞌohiꞌi koka Pueꞌ AlaMa humei? Hapo to hingkiꞌ Iwali?

³¹Tododulunta hampiha mangkahi roti manna kolentuꞌara i pada lori, hibali to teꞌukiꞌ i lali Suraꞌ Mangkolehi: ‘Io mampaꞌanihi pangka to ka suruga.’ Ba ingko woꞌo hingkiꞌ mowali tandaꞌ kuasaꞌ to hatoꞌo?”

³²Notiꞌi hi Yesu, “Kotuꞌuana handoꞌio nabi Musa to mepaꞌani pangka ka suruga. Hampalenareꞌi, UmoꞌKu to mampaꞌanihi pangka, hei Iomo to mampaꞌanikei pangka to tuꞌu-tuꞌu ka suruga.

³³Pangka to nopaꞌanikikei Pueꞌ Ala, iomo Io to mengkohou humei ka suruga hei mampaꞌani kotuwuꞌ pe toaꞌ i duniaꞌ.”

³⁴Rotiꞌi toaꞌ to woriꞌ, “Ane hatoꞌoꞌi, Ipaꞌanika woꞌo pangka tiꞌo ando-andona!”

³⁵Notiꞌi hi Yesu, “Akumo hieꞌe[21] pangka to mepaꞌani kotuwuꞌ. Himo to humei pe Aku hei mepoꞌohi, hamboaꞌmohi bilora hei hamboaꞌmohi mangkumaro wute nantolou-louna.

³⁶Angkana, hibali to kutiꞌi hingkenia, kehapoꞌi iꞌokiꞌmokei tandaꞌ kuasaꞌ to Kuwali hingkenia, handoaꞌkei tene mepoꞌohi.

³⁷Lekiꞌ-lekiꞌna toaꞌ to NopaꞌanikiꞌA UmoꞌKu, bateꞌna humei pe Aku. Hei himolu to humei pe Aku, bateꞌna Kutorimo hei hawaꞌi Kusapuaka.

³⁸KohumeingKu ka suruga, hawaꞌA mowali peleihangKu hadoduongKu. HumeiꞌA mowali peleihana Pueꞌ Ala to morumbaꞌA.

³⁹Hieꞌemo peleihaNe: hingkeꞌna ka lekiꞌ-lekiꞌna toaꞌ to NopaꞌanikiꞌA, hawaꞌi uwaꞌ howeꞌ haduo to moholi. Angkana Nokodokoꞌi hingkeꞌna Kupopeꞌarohi lekiꞌ-lekiꞌra ka komahia i ando pobutusi i koꞌukoana duniaꞌ.

⁴⁰Hieꞌemo peleihane UmoꞌKu: hingkeꞌna hihimolu to pangkiꞌA hei mepoꞌohi pe Aku anaꞌNa, hingkiꞌ pahuahi kotuwuꞌ to wolaꞌ to hawaꞌi mokoꞌukoa, hei hingkiꞌ Kupopeꞌarohi i ando pobutusi i koꞌukoana duniaꞌ.”

⁴¹Uko katoꞌo, monau-naumohi tadulakore toYahudi, alaꞌ notiꞌi hi Yesu koꞌIonamo pangka to mengkohou humei ka suruga.

⁴²Mololitamohi, rotiꞌi haduo hei haduo, “Hi Yesu tiꞌo handoꞌioreꞌi anaꞌnalu hi Yusuf? Tobahaꞌ mpololeke inoꞌNe hei umoꞌNe. Mahamporeꞌi hinaꞌ Notiꞌi koꞌIona ka suruga?”

⁴³Notiꞌi hi Yesu, “Inioꞌmokei monau-nau.

⁴⁴Hawaꞌi uwaꞌ haduo to wadi humei pe Aku, ane hawaꞌi nokomi UmoꞌKu to morumbaꞌA. Hei himolu to humei pe Aku, hingkiꞌ Kupopeꞌaro ka komahia i ando pobutusi i kotutuana duniaꞌ.

⁴⁵I lali suraꞌ nabi-nabi hampiha teꞌukiꞌ waheꞌe: ‘Pueꞌ Ala hingkiꞌ mopaguru lekiꞌ-lekiꞌna topetuntuNa.’ [22] Mewaliꞌ, lekiꞌ-lekiꞌna toaꞌ to pahori hei mantorimo poturuꞌna UmoꞌKu, bateꞌna hingkiꞌ humeihi pe Aku.

⁴⁶Inioꞌ ipekirikei uwaꞌhi to pangkiꞌ UmoꞌKu. Bateꞌnalu Aku to pangkiꞌo, alaꞌ Aku hupaꞌA ka Pueꞌ Ala.

⁴⁷Tuꞌu mpololeke lolitangKa hieꞌe: himo to mepoꞌohi pe Aku, pahuahi kotuwuꞌ to wolaꞌ to hawaꞌi mokoꞌukoa.

⁴⁸Akumo hieꞌe pangka to mepaꞌani kotuwuꞌ.

⁴⁹Tododulumi hampiha i pada lori mangkahi roti manna, angkana tontoralu woꞌo mahi.

⁵⁰Angkana hawaꞌi hibali hante pangka to mengkohou humei ka suruga. Himolu to mangka pangka hieꞌe, hawaꞌhi hingkiꞌ mahi.

⁵¹Akumo hieꞌe pangka to mengkohou humei ka suruga, pangka to mepaꞌani kotuwuꞌ pe toaꞌ! Himolu to mangka pangka hieꞌe hingkiꞌ pahuahi kotuwuꞌ to hawaꞌi mokoꞌukoa. Pangka ngkotuwuꞌ hieꞌe, palaihana wotangKu to Kupewei hingkeꞌna toaꞌ i duniaꞌ pahua kotuwuꞌ.”

⁵²Korohorina toYahudi lolitane hi Yesu tiꞌo, mometonoi-tonoihi haduo hei haduo, rotiꞌi, “Hohumbo hinaꞌ Io wadi mampewei wotaNa pe ingkiꞌ hingkeꞌna toꞌokaꞌi?”

⁵³Iomo horiana Notiꞌikihi, “Ipehoromuakei moromiꞌ-romiꞌ: ane hawaꞌkei iꞌoka wotane Anaꞌ Manusiaꞌ, hei hawaꞌkei iꞌinu raꞌaNe, hawaꞌkei hingkiꞌ pahua kotuwuꞌ wute nantolou-louna.

⁵⁴Toaꞌ to mangka wotangKu hei maꞌinu raꞌangKu, hingkiꞌ pahuahi kotuwuꞌ to wolaꞌ to hawaꞌi mokoꞌukoa, hei hingkiꞌ Kupotuwuꞌhi ka komahia i ando pobutusi i koꞌukoana duniaꞌ.

⁵⁵Alaꞌ wotangKu tuꞌu-tuꞌu mpuꞌu pangka, hei raꞌangKu tuꞌu-tuꞌu inua.

⁵⁶Toaꞌ to mangka wotangKu hei maꞌinu raꞌangKu, hingkiꞌ mohaꞌanuhi nturusi hante Aku, hatoꞌo woꞌo Aku hante iohi.

⁵⁷UmoꞌKu to morumbaꞌA, Iomo pongkane kotuwuꞌ, hei Aku tuwuꞌ ka Io. Hatoꞌo woꞌo toaꞌ to mangka wotangKu, pahuahi kotuwuꞌ ka Aku.

⁵⁸Akumola to nipandiriꞌ pangka to mengkohou ka suruga. Pangka tiꞌo hawaꞌi hibali roti manna to roꞌoka tododulumi hampiha. Kehapomohi mangka roti manna tiꞌo, tontoralu mahihi. Angkana toaꞌ to mangka pangka hieꞌe, hingkiꞌ tuwuꞌhi wute nantolou-louna.”

⁵⁹Hi Yesu mampowute lekiꞌ-lekiꞌna tiꞌo i tempona mepoturuꞌ i tambi penombaha i Kapenau.

⁶⁰Korohorinalu topetuntuna lolitaNe, woriꞌhi to mantiꞌi, “Ee! Poturuꞌ tiꞌo madori rahi! Himoreꞌi to pobiaꞌ mampetuntui?”

⁶¹Angkana i laliNa nobahaꞌ hi Yesu ponau-naure topetuntuNa. Iomo horiana Notiꞌikihi, “Ba poturuꞌKu to ihorikei hingkenia mampomoledeꞌ pepoꞌohimi?

⁶²Hohumbo pekirimi ane iꞌokiꞌkei intu Anaꞌ Manusiaꞌ mengkaꞌoreꞌ nolou pe peꞌohaꞌaNa to uluꞌ-uluꞌna?

⁶³Komarohona toaꞌ hawaꞌi modumbuꞌ. Inohaꞌnamo Pueꞌ Ala to mepaꞌani kotuwuꞌ. LolitangKu to Kupowutekikei mesuwu ka Inohaꞌna Pueꞌ Ala hei mepaꞌani kotuwuꞌ to hawaꞌi mokoꞌukoa.

⁶⁴Angkana kehapoꞌi hatoꞌo, uwaꞌ mpuꞌu hantenaꞌ ka lumbumi to hawaꞌi mampoꞌohi.” Notiꞌi hi Yesu hatoꞌo alaꞌ Nobahaꞌmo mpololeke ka uluꞌ-uluꞌna kohihimora to hawaꞌi hingkiꞌ mepoꞌohi pe Io, hei Nobahaꞌ woꞌo kohihimona to hingkiꞌ mampobaluꞌ wotaNa pe poniꞌNa.

⁶⁵Notiꞌi womo hi Yesu, “Iomo horiana Kutiꞌi hingkenia, hawaꞌi uwaꞌ haduo to wadi humei pe Aku ane hawaꞌi nopoꞌioꞌ UmoꞌKu.”

⁶⁶Mepongka i tempo tiꞌo, woriꞌmohi topetuntuNe to mampolihiꞌI. Hamboaꞌmohi hiniꞌ metuntu i Io.

⁶⁷Katoꞌo, hi Yesu meꞌitano womo pe topegurunahi to hampuluꞌ meroduo, Notiꞌi, “Ba hingkiꞌ ipolihiꞌAkei woꞌo?”

⁶⁸Notiꞌi hi Simo Peturuꞌ, “Ane kipolihiKo Pueꞌ, pe hihimo kiꞌako? Ingkolu to mampasuwu lolita to mepaꞌani kotuwuꞌ to wolaꞌ wute nantolou-louna.

⁶⁹Ingka, kipoꞌohimo hei kibahaꞌ koꞌIngkona Rumbaꞌa to Mangkolehi to ka Pueꞌ Ala.”

⁷⁰Notiꞌi hi Yesu, “Akumo to moꞌuwiꞌkei to hampuluꞌ meroduo hieꞌe, angkana uwaꞌ haduo ka ingkei to kodake lalina hibali Belisiꞌ.”

⁷¹To notungkai hi Yesu iomo hi Yudas anaꞌna hi Simo Isikarioꞌ. Alaꞌ kehapoꞌi hi Yudas haduo to ka hampuluꞌ meroduo topeguruNa, iomo to hingkiꞌ mampobaluꞌ hi Yesu pe poniꞌNa.