Read Rampi Yohanes 9 Bible Online

Yohanes 9 - Rampi bible

Yohanes 9

¹Kolentuꞌana hi Yesu matengkaꞌ, Noꞌokiꞌmo haduo tobilo ka konipoꞌanaꞌkina.

²TopeguruNahi meꞌitano, “Guru, mahamporeꞌi hinaꞌ toaꞌ hieꞌe bilo ka konipoꞌanaꞌkina? Alaꞌ dosana hadoduona, ba alaꞌ dosara tomotodina?”

³Mehoniꞌ hi Yesu, Notiꞌi, “Handoꞌio nokomi dosana hadoduona, hei handoꞌio woꞌo alaꞌ dosana tomotodina. Hampalenareꞌi toaꞌ hieꞌe bilo, hingkeꞌna kuasaꞌna Pueꞌ Ala hingkiꞌ mombaha i io.

⁴Kolentuꞌana tene ando, hangangaa topopatengkaꞌ jamane Pueꞌ Ala to morumbaꞌA humei. Hingkiꞌ winimo, alaꞌ ane mokorindimoꞌi, hamboaꞌmo uwaꞌ toaꞌ to hohumbo mowali hapo-hapo.

⁵KolentuꞌaKu tene i duniaꞌ, Akumo hieꞌe wanta to mampomobaro duniaꞌ.”

⁶Koꞌukona hi Yesu mololita hatoꞌo, melikumo i woiꞌ. LikuNa nokaloi hante woiꞌ, honiꞌi Nopopowewui matana tobilo tiꞌo.

⁷Uko tiꞌo, Nopantiꞌiki, “Noloumoko memporouꞌ i Wuhuꞌ Siloa.” Siloa tiꞌo, palaihana rorumbaꞌ[27] Noloumo mpuꞌu memporouꞌ, hei ikopahuliꞌnalu, pangkiꞌmo.

⁸Uko katoꞌo, awana hei toaꞌ to pobahaꞌ kobilona hei toperapiꞌ-rapiꞌlu hampiha, mometenei-teneimohi, rotiꞌi, “Himoreꞌito tiꞌo? Handoꞌioreꞌi tobilo to poko mahura merapiꞌ-rapiꞌ?”

⁹Uwaꞌ to mantiꞌi, “Io mpuꞌu!” Uwaꞌ woꞌo to mantiꞌi, “Handoꞌio. Uwaꞌ kohibaliane lentena.” Angkana tobilo tiꞌo mantiꞌi, “Akumolato!”

¹⁰Katoꞌo, ropeꞌitanoki, “Hohumboreꞌi horiana hohumboko pangkiꞌ?”

¹¹Notiꞌikihi, “Toaꞌ to nikokeneꞌi hi Yesu mowali laneꞌ, Nopopowewui matangku, hei Notiꞌikiꞌa, ‘noloumoko memporouꞌ pe Wuhuꞌ Siloa.’ Noloumoꞌa mpuꞌu memporouꞌ, katoꞌo pangkiꞌmoꞌa mpuꞌu!”

¹²Ropeꞌitanoki, “I imbomoꞌi toaꞌ tiꞌo hinewowoꞌena?” Notiꞌikihi, “Hawaꞌi kubahaꞌ kopeꞌimboNa?”

¹³Hi Yesu moroa woiꞌ, nokaloi hante likuna, honiꞌi mampokoꞌoriꞌ tobilo, tiꞌo mewali i ando penombahara toYahudi, iomo horiana tobilo to pangkiꞌmo tiꞌo rokomi nolou pe toParisi.

¹⁵ToParisi meꞌitano woꞌo pe io, rotiꞌi, “Hohumboreꞌi hinaꞌ hohumboko pangkiꞌ?” Notiꞌikihi, “Toaꞌ tiꞌo mowewui matangku hante laneꞌ. Uko tiꞌo nolouꞌa memporouꞌ, iomo horiana pangkiꞌmoꞌa.”

¹⁶Katoꞌo hantenaꞌhi toParisi mantiꞌi, “Ane hatoꞌoꞌi, toaꞌ tiꞌo handoꞌio ka Pueꞌ Ala, alaꞌ hawaꞌi mampetuntui atura i ando penombaha.” Angkana hantenaꞌ woꞌo mantiꞌi, “Ane Io toaꞌ to madosa, ka imboreꞌi humei kuasaꞌNe mowali tandaꞌ kuasaꞌ to hatoꞌo?” Iomo horiana momehoniꞌ-honiꞌmohi haduo hei haduo.

¹⁷Uko tiꞌo, meꞌitano womohi toParisi pe tobilo tiꞌo, rotiꞌi, “Hohumbo pahuama noniuꞌ i toaꞌ tiꞌo? Itiꞌi hingkonia Io to mampokoꞌoriꞌ matamu.” Notiꞌi tobilo tiꞌo, “Mononto Io haduo nabi.” Katoꞌo rotiꞌi toParisi, “Pehowaliko dulu!”

¹⁸Angkana tadulakora toYahudi hawaꞌi ropoꞌohi koꞌionamo mpuꞌu toaꞌ tobilo hampiha hei hangkaꞌ-hangkaꞌlu pangkiꞌ. Iomo horiana rowowoi inoꞌne hei umoꞌna,

¹⁹honiꞌi ropeꞌitanoki, “Totuꞌunareꞌi toaꞌ hieꞌe anaꞌmi, tobilo mepongka ka konipoꞌanaꞌkina? Hohumboreꞌi hinaꞌ hohumbo pangkiꞌ?”

²⁰Rotiꞌi todulune, “To kibahaꞌ, iomo hieꞌe anaꞌki, hei bilo ka konipoꞌanaꞌkina.

²¹Angkana hohumbo lalane horiana hohumbo pangkiꞌ, hawaꞌi kibahaꞌ. Hei himo to mampokoꞌoriꞌi, hawaꞌi woꞌo kibahaꞌ. Io kodeꞌmo. Ipeꞌitanoromokikei pe io. Io romoꞌi mohoniꞌ peꞌitanomi.”

²²Inoꞌna hei umoꞌna mantiꞌi hatoꞌo, alaꞌ morokaꞌhi pe tadulako-tadulakora toYahudi. Alaꞌ uwaꞌmo korentehiane lolitara tadulako-tadulako tiꞌo to waheꞌe: himolu to mantiꞌi kohiYesuna Datu to Mamposalamaꞌ, hamboaꞌmohi ropoliu mekahi pe lali tambi penombaha.

²³Iomo horiana tomotodina mantiꞌi, “Io kodeꞌmo. Ipeꞌitano romokikei pe io.”

²⁴Uko tiꞌo, rowowoi womo toaꞌ tobilo to nipokoꞌoriꞌ tiꞌo, hei rotiꞌiki, “Itiꞌi hante tuꞌu i hinarona Pueꞌ Ala! Kibahaꞌ toaꞌ tiꞌo toaꞌ to madosa.”

²⁵Notiꞌikihi, “Hawaꞌi kubahaꞌ to mampokoꞌoriꞌa tiꞌo to madosa ba hawaꞌi. To kubahaꞌlu, biloꞌa hampiha, angkana hinewowoꞌena pangkiꞌmoꞌa.”

²⁶Mepongka katoꞌo, ropeꞌitanoki womo, “Hapo to Nowali pe ingko? Hei hohumbo konopokoꞌoriꞌma?”

²⁷Nohoniꞌhi, “Ukomokei kulolitaki hingkenia. Hakeireꞌi ihori? Mahamporeꞌi hinaꞌ ipeꞌitanokikei nturusi pe aku? Ba dokoꞌkei woꞌo mewali topeguruNa?”

²⁸Mepongka katoꞌo, ropononaꞌa hei ropantiꞌiki, “Ingko, topeguruNako toaꞌ tiꞌo! Ingka, topegurunaka nabi Musa!

²⁹Kibahaꞌ Pueꞌ Ala mampowute lolitaNa pe hi Musa hampiha. Angkana toaꞌ tiꞌo, hawaꞌi kibahaꞌ koka imboNa humei.”

³⁰Mehoniꞌ tobilo tiꞌo, “Mepowulikei mpuꞌu! Itiꞌikei hawaꞌkei ibahaꞌ koka imbona humei, hantarowae Io to mampokoꞌoriꞌ matangku!

³¹Tobahaꞌ Pueꞌ Ala hawaꞌi mohoniꞌ perapiꞌna toaꞌ to madosa, angkana Io mampehoromua perapiꞌna toaꞌ to mengkoruꞌ pe Io hei to mampetuntui hawaꞌNa.

³²Mepongka ka pewalina duniaꞌ, handoaꞌi tene howeꞌ hampiha tohori lolita noniuꞌ to mampokoꞌoriꞌ toaꞌ tobilo mepongka ka konipoꞌanaꞌkina.

³³Ane Toaꞌ tiꞌo handoꞌio to ka Pueꞌ Ala, mononto kehawaꞌi hohumbo mowali lekiꞌna to mepohele!”

³⁴Rohoniꞌ tadulakora toYahudi tiꞌo, “Ingkomo to buhaꞌ dosa mepongka ka konipoꞌanaꞌakimu. Mahamporeꞌi hinaꞌ podehoꞌko mopaturuꞌka?” Mepongka katoꞌo, nibuemo ka lali tambi penombaha.

³⁵Nohori hi Yesu korobuenemo ka tambi penombaha, iomo horiana ako Nokohidupaꞌki hei Nopeꞌitanoki, “Ba Ipoꞌohiꞌi koꞌIonamo Anaꞌ Manusiaꞌ?”

³⁶Notiꞌi toaꞌ tiꞌo, “Tua! Itiꞌikiꞌa kohihimoNa toaꞌ tiꞌo, hingkeꞌna mepoꞌohiꞌa pe Io.”

³⁷Notiꞌi hi Yesu, “Iꞌokiꞌmo! Hinewowoꞌena Iomo to kolentuꞌane mampololitakiko.”

³⁸Notiꞌi toaꞌ tiꞌo, “KupoꞌohiKo, Pueꞌ!” Honiꞌi melingkotuꞌ menomba pe Io.

³⁹Notiꞌi hi Yesu, “KohumeingKu pe duniaꞌ hieꞌe, humeiꞌA mobutusi kara-karana toaꞌ, hingkeꞌna toaꞌ tobilo mewali pangkiꞌ, hei toaꞌ to pangkiꞌ hingkiꞌ mewali bilo.”

⁴⁰Uwaꞌhi haꞌumbora duo toParisi itoꞌo to pahori lolitana hi Yesu, rotiꞌiki, “Ba Itiꞌi biloka woꞌo?”

⁴¹Notiꞌi hi Yesu, “Ane kebilokei, kehawaꞌi hingkiꞌ ibahaꞌkei hapo to tuꞌu, hei kehawaꞌkei madosa. Angkana, alaꞌ itiꞌikei pangkiꞌlukei, dosami bateꞌna uwaꞌ.”[28]