Read Rampi Suro 1 Bible Online

Suro 1 - Rampi bible

Suro 1

¹Teopilu to kuꞌadaꞌi, i lali suraꞌku to uluꞌ-uluꞌna, kuꞌukiꞌmo lekiꞌ-lekiꞌna to nowali hi Yesu hante lekiꞌ-lekiꞌna pepoturuꞌNa, mepongka ka uluꞌ-uluꞌna majama,

²wute i ando pengkaꞌoreꞌNa nolou pe suruga. Ikohandoaꞌana tene mengkaꞌoreꞌ pe suruga, Nopaꞌanihi pepotinto moliu i kuasaꞌna Inohaꞌ Mangkolehi pe suro-suroNa to Noꞌuwiꞌmo.

³PeꞌaroNalu ka komahiaNa, i lali iba mpuluꞌ ando Io mampopemombaha wotaNa pe suroNa hante woriꞌ tandaꞌ, hingkeꞌna tongawamo mpuꞌu kotuwuꞌNa huliꞌ ka lumbuna to mahi. I tempo tiꞌo, Io uwaꞌ moꞌawa-awa hante iohi, hei Nololitakihi noniuꞌ poparentana Pueꞌ Ala.

⁴I tempoNa morampu moꞌawa-awa hante suroNa tiꞌo, Nopaꞌanihi woꞌo hawaꞌ hieꞌe, Notiꞌi, “Inioꞌkei dulu mampolihi Yerusale. Ipekaukei iseꞌe wute UmoꞌKu mampaꞌanikei hapo to Nodandimo, hibali to Kutiꞌikikei hampiha.

⁵Hi Yohanes meriu hante uwai, angkana haꞌumbora ando tene, ingkei hingkiꞌ niriu hante Inohaꞌ Mangkolehina Pueꞌ Ala.”

⁶I tempona suroNa tiꞌo moꞌawa-awa hante hi Yesu, meꞌitanomohi, rotiꞌi, “Pueꞌ, ba i tempo hieꞌemo hingkiꞌ Ipolohoꞌka ka poparentana toaꞌ ntaniꞌna hei Iꞌaro huliꞌ poparentane toSareili?”

⁷Mehoniꞌ hi Yesu, “UmoꞌKulu to uwaꞌ kuasaꞌNa mampokononto hiwaꞌimbo ando hei tempo pewaliana. Hawaꞌi paralu ibahaꞌkei.

⁸Angkana hingkiꞌ itorimokei kuasaꞌNe, i tempona Inohaꞌ Mangkolehi mengkohou pe ingkei. Hei hingkiꞌ mewalikei sabiꞌKu iomo mampowute noniuꞌ Aku i Yerusale, i humanele woiꞌ Yudea hante i Samaria, wute-wute i humanele duniaꞌ.”

⁹Koꞌukona hi Yesu mololita watoꞌo, mengkaꞌoreꞌmo Io pe suruga. Menoaꞌmohi suroNe mampeꞌele wute hamboaꞌmo roꞌokiꞌ alaꞌ Noputuꞌmoꞌi kini.

¹⁰Kolentuꞌara tene menoaꞌ pe laniꞌ, hangkaꞌ-hangkaꞌ romo roꞌokiꞌ roduo tomaꞌani to mebaduꞌ to popuhiꞌ metotiꞌi i hirira.

¹¹Rotiꞌi toaꞌ to roduo tiꞌo, “Ee, toGalilea! Mahamporeꞌi hinaꞌ menoaꞌkei nturusi pe laniꞌ? Hi Yesu to iꞌokiꞌkei tiꞌo, mengkaꞌoreꞌmo nolou pe suruga, hei hingkiꞌ mahuliꞌ womo humei ka suruga hibali to iꞌokiꞌkei hingkenia.”

¹²Uko tiꞌo, mahuliꞌmohi topeguruNe ka Biri Saitu nolou pe Yerusale. Biri Saitu tiꞌo, hakilo komoꞌelane ka Yerusale.

¹³Kohupaꞌralu i Yerusale, liuhi nolou pe tambi peꞌohaꞌara honiꞌi nolou pe kamaraꞌ to i womboꞌ. SuroNa Pueꞌ Yesu tiꞌo iomo: Hi Peturuꞌ hante hi Yohanes, hi Yakobus hante hi Andaria; hi Pilipu hante hi Toma; hi Batolomeu hante hi Matius; hi Yakobus anaꞌna hi Alpeu, hi Simo toSeloꞌ hei hi Yudas anaꞌna hi Yakobus.

¹⁴Poko moꞌawa-awahi lekiꞌ-lekiꞌra hante haꞌumbora duo towoweꞌe, tekahi hi Maria inoꞌna hi Yesu, hante halalina hi Yesu uwaꞌhi woꞌo itoꞌo. Hampekokirihi, hei mekokaehi moꞌawa-awa.

¹⁵I hampiha tempo, uwaꞌhi 120 duo to mepoꞌohi morampu. I tempo tiꞌo, metotiꞌimo hi Peturuꞌ mololita notiꞌi,

¹⁶“Halali-halali, hapo to teꞌukiꞌ i lali Suraꞌ Mangkolehi hangangaa tebuhoꞌi. Hampiha Nopokonontomo Inohaꞌ Mangkolehi to nopowute datu Daudi noniuꞌ hi Yudas to mampodulukihi toaꞌ to nolou mohokiꞌ hi Yesu.

¹⁷Hi Yudas tiꞌo, noꞌuwiꞌ woꞌo Pueꞌ Yesu mewali topeguruNa, hei io majama moꞌawa hante ingka.”

¹⁸(Angkana hi Yudas mampobaluꞌ hi Yesu. Ka hilina tiꞌo ropopehili woiꞌ potowuana, io mahi menoꞌo monawuꞌ hitumpapaꞌ hei hinaꞌina mewutu wute ohi hinaꞌina mobuntela.

¹⁹Lekiꞌ-lekiꞌna toYerusale pobahaꞌ hapo to mewali tiꞌo. Iomo hinaꞌ woiꞌ tiꞌo rokokeneꞌi Hakaldama. Motuntuni wiharo toYahudi, palaihana: Woiꞌ Raꞌa.)

²⁰Notiꞌi womo hi Peturuꞌ, “I lali Masmur, teꞌukiꞌ waheꞌe: ‘Potedehimo peꞌohaꞌane mondiiꞌ. Inioꞌ uwaꞌ hupaꞌ haduo toaꞌ to mampeꞌohaꞌi.’ [1] Hei uwaꞌ woꞌo to teꞌukiꞌ waheꞌe: ‘Aginamo jamane noroa toaꞌ ntaniꞌna.’” [2]

²¹Mewaliꞌ, hangangaa uwaꞌ haduo to metuntu ingkiꞌ to hingkiꞌ mampowute kotuwuꞌnamo mpuꞌu Pueꞌ Yesu ka komahia. Toaꞌ to hingkiꞌ toꞌuwiꞌ tiꞌo hangangaa haduo to poko metuntu moꞌawa hante ingkiꞌ i tempota metuntu Pueꞌ Yesu mepongka periuna hi Yohanes wute pengkaꞌoreꞌana hi Yesu pe suruga ka lumbu-lumbunta.

²³Itoꞌo uwaꞌ roduo tomaꞌani to hingkiꞌ roꞌuwiꞌ. Haduo to rokokeneꞌi hi Yusuf to nikokeneꞌi woꞌo hi Baranaba, hei koroduona hi Matia. (Hi Yusuf tiꞌo rokokeneꞌi woꞌo hi Yustu.)

²⁴Katoꞌo mekokaemohi rotiꞌi, “Pueꞌ, Ingko to pobahaꞌ lekiꞌ-lekiꞌna lalira toaꞌ. Hi Yudas, to mewali suroMu hampiha, hinewowoꞌena monawuꞌmo, hei nihuku hintotoꞌ hante waliana. Iomo hinaꞌ kiperapiꞌ pe Ingko Pueꞌ, hingkeꞌna Itidoꞌkika hihimo ka lumbura toaꞌ to roduo hieꞌe, to Iꞌuwiꞌ hingkeꞌna mewali suroMu mampohawa hi Yudas.”

²⁶Ukohi mekokae, mowalihi pantidoꞌ. To noniuꞌ, iomo hi Matia. Io nihinimo mewali surona Pueꞌ Yesu, hingkeꞌna ganaꞌhi hampuluꞌ meroduo hibali uluꞌ-uluꞌna.