Read Rampi Suro 10 Bible Online

Suro 10 - Rampi bible

Suro 10

¹I kota Kaisarea, uwaꞌ haduo tomaꞌani to nikokeneꞌi hi Kornelius. Hi Kornelius tiꞌo haduo tadulako surodadu to motadulakoi hanatu surodadu Italia.

²Io handoꞌio toYahudi, angkana kehapoꞌi watoꞌo, mengkoruꞌ mpuꞌu pe Pueꞌ Ala, hei lekiꞌ-lekiꞌna toaꞌ to uwaꞌ i tambina menombahi woꞌo pe Pueꞌ Ala. Woriꞌ doiꞌne hi Kornelius nopepaꞌaniki pe toYahudi to merima-rima, hei io mekokae nturusi pe Pueꞌ Ala.

³I hampiha tempo, kira-kira tenteꞌ tolu kononewa, uwaꞌ to noꞌoki i lali peponoꞌokiꞌi. To noꞌoki iomo haduo malaꞌekana Pueꞌ hupaꞌ hei mowowoi, notiꞌi, “Kornelius!”

⁴Hi Kornelius morokaꞌ mampeꞌele malaꞌeka tiꞌo, notiꞌi, “Mahamporeꞌi Pueꞌ?” Mehoniꞌ malaꞌeka tiꞌo, “Nohorimo Pueꞌ Ala pekokaema, hei Nobahaꞌ kopopuhiꞌne lalimu mosulungi toaꞌ to merima-rima. Hei Noponindiko nturusi.

⁵Hinewowoꞌena, irumbaꞌmohi bahaꞌumbo duo nolou pe Yope mowowoi haduo toaꞌ to rokokeneꞌi hi Simo Peturuꞌ.

⁶Peꞌohaꞌana dodungku i bota ntahiꞌ i tambina haduo toaꞌ to rokokeneꞌi woꞌo hi Simo. Jamana toaꞌ tiꞌo mowali mampopengaa ka koliꞌ pinatuwuꞌ.”

⁷Kopolainalu malaꞌeka tiꞌo, hi Kornelius liu mowowoi roduo surona hante haduo surodadu to nopoꞌohi. Surodadu tiꞌo mengkoruꞌ woꞌo pe Pueꞌ Ala.

⁸Hi Kornelius mampowute pe iohi hapo to ka noꞌoki hei Nohori, honiꞌi norumbaꞌmohi nolou pe kota Yope.

⁹Poꞌonina, kira-kira pohoꞌando, kolentuꞌara matengkaꞌ dodungku i Yope, hi Peturuꞌ meponeꞌ pe womboꞌ tambi to marante dopiꞌna, ako mekokae.

¹⁰Hawaꞌi morue katoꞌo, hi Peturuꞌ dokoꞌmo mangka alaꞌ biloramoꞌi. Angkana, kolentuꞌana mampekau kolehaꞌna pangka, hangkaꞌ-hangkaꞌ romo niponoꞌokiꞌi.

¹¹I lali peponoꞌokiꞌi tiꞌo, noꞌokiꞌmo laniꞌ teweaꞌ hei uwaꞌ to hibali wida to koroba. Wida to koroba tiꞌo mengkalohohoi iba mpolohu, mengkaraꞌulu wute i woiꞌ.

¹²I lali wida tiꞌo, molangkaꞌ-langkaꞌ pinatuwuꞌ: uwaꞌ to mokapuꞌ iba, to menondae, hei uwaꞌ woꞌo tinti-tinti to moꞌilo.

¹³Uko tiꞌo, nohorimo loaꞌ to mantiꞌi, “Peturuꞌ! Metotiꞌimoko, irereꞌmo pinatuwuꞌ tiꞌo hingkeꞌna iꞌokaꞌi.”

¹⁴Angkana mehoniꞌ hi Peturuꞌ, “Hawaꞌi Pueꞌ! Pinatuwuꞌ to uwaꞌ i wida tiꞌo hawaꞌi kono kiꞌoka motuntuni adaꞌ agamangki. Hapona lekemo handoaꞌi howeꞌ kahampiha kuꞌoka pinatuwuꞌ to nikobinteꞌ ba nikopalia motuntuni adaꞌ agamangki.”

¹⁵Notiꞌi womo loaꞌ tiꞌo korompihana pe hi Peturuꞌ, “Hapo to notiꞌi Pueꞌ Ala wadi iꞌoka, inioꞌ ikopaliꞌi.”

¹⁶Peponoꞌokiꞌi tiꞌo tolu mpiha mewali, hei uko tiꞌo, teꞌoreꞌmo huliꞌ wida tiꞌo pe laniꞌ.

¹⁷Katoꞌo nopowuli hi Peturuꞌ hapo palaihane peponoꞌokiꞌi tiꞌo. Kolentuꞌana mampekiri hampale hupaꞌhi surone hi Kornelius ka kota Yope. Iohi mampeꞌitanoki tambina hi Simo.

¹⁸Katoꞌo rowowoi haduo rotenei, “Uwaꞌreꞌi iseꞌe haduo tolori to nikokeneꞌi hi Simo Peturuꞌ?”

¹⁹Kolentuꞌana hi Peturuꞌ mampekiri hapo palaihane peponoꞌokiꞌi tiꞌo, Inohaꞌ Mangkolehi mampokononto pe io, “Pehoromua, uwaꞌhi tolu tomaꞌani to humei mampaliꞌko.

²⁰Hohiꞌko mengkohou. Inioꞌko motehuꞌ metuntu pe iohi, alaꞌ Aku to morumbaꞌhi.”

²¹Katoꞌo hi Peturuꞌ mengkohoumo ka tambi tiꞌo, hei nopetiꞌiki pe to hongkoꞌ hupaꞌ tiꞌo, “Akumola to ipaliꞌkei. Hapo tungkaihamio?”

²²Mehoniꞌhi, “Tua Kornelius to morumbaꞌka humei iseꞌe. Io toaꞌ to moromiꞌ lalina. Io mengkoruꞌ pe Pueꞌ Ala, hei noꞌadaꞌi woꞌo lekiꞌ-lekiꞌna toYahudi. Haduo malaꞌekana Pueꞌ morumbaꞌi mowowoiko nolou pe tambina, hingkeꞌna nopehoromuaꞌi hapo to hingkiꞌ ipowutekiꞌi.”

²³Uko tiꞌo, hi Peturuꞌ mokonto surona hi Kornelius mohamini itoꞌo. Katoꞌo Haminimohi mpuꞌu itoꞌo. Poꞌonina mihoꞌolu, mangkolodohimo hi Peturuꞌ honiꞌi molai moꞌawa-awa hante iohi nolou pe bolaꞌ Kaisarea. Hei uwaꞌ woꞌo haꞌumbora duo halali hampepoꞌohira ka Yope to nolouhi moꞌawa-awa.

²⁴I haꞌandona honiꞌhi hupaꞌ i Kaisarea. Kohupaꞌnalu i tambina hi Kornelius morampumohi mampekauꞌi. Uwaꞌ woꞌo tinora hante bolena to nowowoi hi Kornelius hingkeꞌna morampuhi i tambina.

²⁵Ikohupaꞌna hi Peturuꞌ i tambina, hi Kornelius nolou mampohidupaꞌkiꞌi, katoꞌo liu melingkotuꞌ hei metoungkaꞌ i kapuꞌna hi Peturuꞌ menomba pe io.

²⁶Angkana hi Peturuꞌ mampopetotiꞌi honiꞌi notiꞌiki, “Metotiꞌimoko. Aku hieꞌe toaꞌ biasaluꞌa, hibali hante ingko.”

²⁷Kolentuꞌara mololita, io mekahimo pe lali tambi. Noꞌele hi Peturuꞌ woriꞌmo toaꞌ to morampu itoꞌo.

²⁸Notiꞌikihi hi Peturuꞌ, “Ibahaꞌlukei, motuntuni atura agamangki, ingka toYahudi hawaꞌka wadi mampohintuwuꞌki toaꞌ to handoꞌiohi toYahudi ba mekahi i lali tambira. Angkana uwaꞌ to nopetidoꞌki Pueꞌ Ala pe aku hampiha to mampokonontokiꞌa hawaꞌi wadi mampopoꞌoriꞌori toaꞌ to mewali awanta.

²⁹Iomo horiana koꞌiwowoingku hawaꞌi kulewai. Hinewowoꞌena kupehupaꞌi, alaꞌ kukodokoꞌi kubahaꞌ hapo tungkaihama mowowoiꞌa humei.”

³⁰Mehoniꞌmo hi Kornelius notiꞌi, “Iba ando to liu, kira-kira i tempo to hibali hante hieꞌe, kolentuꞌaku mekokae i tambingku tenteꞌ tolu kononewa, hangkaꞌ-hangkaꞌ romo uwaꞌ haduo tomaꞌani to metotiꞌi i hinarongku. Baduꞌna manakiꞌ-nakiꞌ.

³¹Notiꞌi toaꞌ tiꞌo, ‘Kornelius, Pueꞌ Ala mampehoromuamo pekokaemu hei Noꞌokiꞌmo kopopuhiꞌne lalimu.

³²Irumbaꞌmo toaꞌma nolou pe kota Yope mowowoi haduo toaꞌ to nikokeneꞌi hi Simo Peturuꞌ. Peꞌohaꞌana dodungku i bota ntahiꞌ i tambina hi Simo to mowali mampopengaa ka koliꞌ pinatuwuꞌ.’

³³Iomo hinaꞌ hohiꞌ kurumbaꞌ toaꞌ nolou mowowoiko. Hei moromiꞌ mpuꞌu lalima, alaꞌ humeiko iseꞌe i ingka. Iomo hinaꞌ morampumoka iseꞌe i hinarona Pueꞌ Ala, alaꞌ kikodokoꞌi kipehoromua lekiꞌ-lekiꞌna to norumbaꞌkiko Pueꞌ Ala hingkeꞌna ipowuteꞌi.”

³⁴Mepongkamo hi Peturuꞌ mololita notiꞌi, “Hinewowoꞌena kubahaꞌmo Pueꞌ Ala hawaꞌi mampopontaniꞌ toaꞌ.

³⁵Himolu to mengkoruꞌ pe Pueꞌ Ala hei to mononto waliara, bateꞌna notorimo Pueꞌ Ala, hei hawaꞌi mpuꞌu Nopopoꞌori-ori kehapoꞌi ba to ka imbolu.

³⁶Mononto ibahaꞌmokei mpololeke Kareba Moromiꞌ to nopowute Pueꞌ Ala pe ingka toSareili, Kareba Moromiꞌ to mampohintuwuꞌki hante Pueꞌ Ala moliu i Yesu Kerisitu. Hi Yesu tiꞌo iomo Pueꞌna lekiꞌna toaꞌ.

³⁷Ibahaꞌmokei mpololeke hapo to mewali i humanele woiꞌ Yudea mepongka ka Galilea ikoꞌukona hi Yohanes moriu toaꞌ to mengkatobaꞌ ka dosara.

³⁸Ibahaꞌmokei hi Yesu toNasareꞌ, Iomo to noꞌuwiꞌ Pueꞌ Ala hei Nopaꞌani Inohaꞌ Mangkolehi hante kuasaꞌ. I umbo-umbolu patengkaꞌana i woiꞌra toYahudi, Io mowali hapo to moromiꞌ, hei Io mampokoꞌoriꞌ lekiꞌ-lekiꞌna toaꞌ to nopoperima-rima Belisiꞌ alaꞌ Io nopoꞌowoni Pueꞌ Ala.

³⁹Ingkamo hieꞌe to mewali sabiꞌ i lekiꞌ-lekiꞌna to Nowali i woiꞌra toYahudi wute i kota Yerusale. Koꞌukoana, hi Yesu tiꞌo nirokoꞌ hei mahi hante lala nipaku i loti momehulepe.

⁴⁰Angkana i ando katolu, Pueꞌ Ala mampopeꞌaroꞌI huliꞌ ka komahia, hei Nopotongawa wotaNe pe toaꞌ.

⁴¹Hi Yesu hawaꞌi mampomombaha wotaNa pe lekiꞌ-lekiꞌna toaꞌ, bateꞌnalu ingka topeguruNaka to umbiꞌ noꞌuwiꞌmo Pueꞌ Ala mewali sabiꞌNa. Hei i kotuwuꞌna huliꞌ hi Yesu, maꞌinu hei mangkaka moꞌawa-awa hante Io.

⁴²Hei Norumbaꞌka mampowute Kareba Moromiꞌ pe lekiꞌ-lekiꞌna toaꞌ, hei mampololita koꞌIona mpuꞌu to noꞌuwiꞌ Pueꞌ Ala mewali Topobutusi lekiꞌ-lekiꞌna toaꞌ, moromiꞌ to tuwuꞌ tene, moromiꞌ to mahimo.

⁴³Lekiꞌ-lekiꞌna nabi hampiha mampololita noniuꞌ hi Yesu, rotiꞌi: hihimolu to mepoꞌohi pe Io, dosara hingkiꞌ teꞌampuni moliu i kuasaꞌNa.”

⁴⁴I tempona hi Peturuꞌ mololita, mengkohoumo Inohaꞌ Mangkolehi pe lekiꞌ-lekiꞌna toaꞌ to mampehoromua lolitana.

⁴⁵Ropohoko lekiꞌ-lekiꞌna toYahudi to mepoꞌohi pe hi Yesu to mampoꞌawa hi Peturuꞌ ka Yope, alaꞌ toaꞌ to handoꞌiohi toYahudi pahuahi woꞌo Inohaꞌ Mangkolehi.

⁴⁶Monontomo kopahuara Inohaꞌ Mangkolehi, alaꞌ mololitahi i wiharo to Nopaꞌanikihi Inohaꞌ Mangkolehi hei mampokodeꞌmohi Pueꞌ Ala. Katoꞌo, notiꞌimo hi Peturuꞌ,

⁴⁷“Ele! Toaꞌ hieꞌe nokuasaꞌihi Inohaꞌ Mangkolehi hibali to mewali i ingkiꞌ. Mewaliꞌ, hangangaa niriuhi woꞌo.”

⁴⁸Iomo hinaꞌ norumbaꞌhi hi Peturuꞌ hingkeꞌna niriuhi i lali konaꞌna hi Yesu Kerisitu. Uko tiꞌo, hi Kornelius hante awana mamperapiꞌ pe hi Peturuꞌ hingkeꞌna holampiꞌi dulu moꞌawa-awa hante iohi bahaꞌumbo mini.