Read Rampi Suro 11 Bible Online

Suro 11 - Rampi bible

Suro 11

¹Lekiꞌ-lekiꞌna surona Pueꞌ Yesu hante halali hampepoꞌohira i woiꞌ Yudea rohori koꞌuwaꞌna toaꞌ to hawaꞌi moꞌagama Yahudi to mantorimohi woꞌo Pohawaꞌna Pueꞌ Ala.

²Katoꞌo konolouna hi Peturuꞌ pe Yerusale, haꞌumbora duo toYahudi to mepoꞌohi pe hi Yesu mosalaꞌi hi Peturuꞌ,

³rotiꞌi, “Mahamporeꞌi hinaꞌ mekahiko pe tambina toaꞌ to handoaꞌi tene mepoꞌohi motuntuni ada pebulabaꞌ, hei mangkako woꞌo moꞌawa-awa hante iohi?”

⁴Iomo hinaꞌ nopokonontokihi hi Peturuꞌ lekiꞌ-lekiꞌna to mewali mepongka ka uluꞌ-uluꞌna, notiꞌi,

⁵“Kolentuꞌangku mekokae i kota Yope, hangkaꞌ-hangkaꞌ romo kuꞌokiꞌ peponoꞌokiꞌi. Kuꞌokiꞌ uwaꞌ wida to koroba, to nihoi iba mpolohu. Wida tiꞌo mengkaraꞌulu ka laniꞌ toꞌu i hinarongku.

⁶I lali wida tiꞌo kuꞌokiꞌ woriꞌ langkaꞌna pinatuwuꞌ to iba ngkapuꞌ, pinatuwuꞌ to moꞌilo, pinatuwuꞌ to mendae, hei tinti-tinti to moꞌilo.

⁷Hawaꞌi morue katoꞌo, kuhori Loaꞌ to mantiꞌi, ‘Peturuꞌ, peꞌaromo, irereꞌmo hei iꞌokamo.’

⁸Kuhoniꞌ: ‘Hawaꞌi Pueꞌ! Handoaꞌi howeꞌ kahampiha kuꞌoka pinatuwuꞌ tiꞌo to nikobinteꞌ ba nikopalia motuntuni adaꞌ agamangki.’

⁹Kuhori womo loaꞌ tiꞌo mantiꞌi, ‘Hapo to Notiꞌi Pueꞌ Ala wadi iꞌoka inioꞌ ikopaliꞌi.’

¹⁰Tolu mpiha mewali watoꞌo, honiꞌi teꞌoreꞌmo huliꞌ wida tiꞌo pe laniꞌ.

¹¹Tempo tiꞌo woꞌo, uwaꞌhi totolu tomaꞌani to hupaꞌ i tambi to kipeꞌohaꞌi. Totolu tiꞌo, nirumbaꞌhi ka kota Kaisarea nolou pe kota Yope mampaliꞌa.

¹²I tempo tiꞌo, notiꞌi Inohaꞌ Mangkolehi, ‘Peturuꞌ, metuntumoko pe iohi, hei inioꞌko komomaꞌa moꞌawa hante toaꞌ to handoꞌiohi toYahudi tiꞌo.’ Katoꞌo, noloumoꞌa mpuꞌu moꞌawa-awa hante iohi. Hei uwaꞌ woꞌo sabiꞌka iseꞌe, alaꞌ halalinta to oni duo hieꞌe hiꞌoꞌaluka woꞌo nolou pe Kaisarea. Kohupaꞌki i tambina hi Kornelius, mekahimoka pe lali ntambi.

¹³Hi Kornelius mololita pe ingka hohumbo koniponoꞌokiꞌine haduo malaꞌeka to hupaꞌ i tambina to mampatiꞌikiꞌi: ‘Irumbaꞌmohi haꞌumbora toaꞌ nolou pe Yope mowowoi haduo tomaꞌani to nikokeneꞌi hi Simo Peturuꞌ.

¹⁴Io to hingkiꞌ mampowutekiko kareba to mamposalamaꞌko hante pe lekiꞌ-lekiꞌna toaꞌ to uwaꞌ i lali tambimu.’

¹⁵Kolentuꞌangku mololita, mengkohoumo Inohaꞌ Mangkolehi mokuasaꞌihi, hibali to mewali i ingkiꞌ toYahudi uluꞌ-uluꞌna i tempona nokuasaꞌiki Inohaꞌ Mangkolehi.

¹⁶Katoꞌo, kuponindimo lolitane Pueꞌ to mantiꞌi, ‘hi Yohanes meriu hante uwai, angkana ingkei hingkiꞌ niriukei hante Inohaꞌ Mangkolehi.’

¹⁷Mewaliꞌ, halali-halalingku toYahudi, kehapoꞌi hi Kornelius hantambi handoꞌiohi toYahudi, monontomo mpuꞌu konopaꞌanire Pueꞌ Ala Inohaꞌ Mangkolehi, hibali to Nopaꞌanikiki alaꞌ pepoꞌohinta pe Pueꞌ Yesu Kerisitu. Ane watoꞌoꞌi, aku hieꞌe, hawaꞌa wadi motaha tungkaihana Pueꞌ Ala.”

¹⁸Korohorina toaꞌ lolita tiꞌo, hamboaꞌmohi mosalaꞌi hi Peturuꞌ. Mampokodeꞌmohi Pueꞌ Ala, rotiꞌi, “Hinewowoꞌena mombahamo i ingka, Pueꞌ Ala mantorimo woꞌo toaꞌ to handoꞌiohi toYahudi, hei Nopaꞌanihi woꞌo tempo mengkatobaꞌ ka dosara hingkeꞌna pahuahi kotuwuꞌ to wolaꞌ to hawaꞌi mokoꞌukoa.”

¹⁹Mepongka ka konirokoꞌna hi Stepanu, to mepoꞌohi pe hi Yesu mepongkahi nidapaꞌ-dapaꞌ nturusi, horiana woriꞌhi to mehilai nolou pe bolaꞌ ntaniꞌna, wute tehaworihi. Uwaꞌhi to hupaꞌ i woiꞌ Penisia, uwaꞌhi woꞌo to hupaꞌ i leowuta Siprus hante i kota Antiokia. I lekiꞌ-lekiꞌna bolaꞌ to rotengkaꞌi, ropowute nturusi Pohawaꞌne Pueꞌ Ala noniuꞌ hi Yesu Kerisitu, angkana kareba tiꞌo ropowutelu pe toYahudi.

²⁰Uwaꞌhi woꞌo to mepoꞌohi pe hi Yesu ka woiꞌ Siprus hante Kirene. Uwaꞌhi ka lumbura to nolou pe kota Antiokia mampowute Kareba Moromiꞌ noniuꞌ i Pueꞌ Yesu pe toaꞌ to handoꞌiohi toYahudi.

²¹Kuasaꞌna Pueꞌ uwaꞌ i iohi, horiana woriꞌ toAntiokia mepoꞌohi pe Pueꞌ Yesu hei metuntuhi pe Io, hei Io mewali tadulako i lali kotuwuꞌra.

²²Mewaliꞌ, toSarani to uwaꞌ i Yerusale pahorihi woꞌo hapo to mewali i Antiokia tiꞌo. Iomo hinaꞌ hi Baraba[17] nirumbaꞌ nolou pe jumaꞌa i Antiokia.

²³Hi Baraba tiꞌo, haduo toaꞌ to moromiꞌ lalina. Io nokuasaꞌi Inohaꞌ Mangkolehi hei maroho pepoꞌohine. Kohupaꞌna hi Baranaba i Antiokia, motanaꞌ mpololeke laline, alaꞌ noꞌokiꞌ mombaha mpololeke pebarakatine Pueꞌ Ala pe iohi to mepoꞌohi pe hi Yesu. Mewaliꞌ, hi Baranaba mampokaroho lalira, hei nopokonontokihi hingkeꞌna metuntuhi nturusi hei tungkuꞌ pe Pueꞌ Yesu ka lali-lalira. Iomo hinaꞌ woriꞌ woꞌo toAntiokia mepoꞌohi pe Pueꞌ Yesu.

²⁵Uko tiꞌo, noloumo hi Baranaba pe kota Tarsu mampaliꞌ hi Saulu. Ikopohidupaꞌralu, noloumohi pe Antiokia.

²⁶Hei meꞌohaꞌhi itoꞌo hantoꞌa komoruene. Morampuhi itoꞌo moꞌawa-awa hante toaꞌ to mepoꞌohi pe hi Yesu, hei mampoturuꞌ toaꞌ to woriꞌ. I Antiokia tiꞌomola, toaꞌ to mepoꞌohi pe hi Yesu to uluꞌ-uluꞌna nikokeneꞌi toSarani.

²⁷I tempo tiꞌo woꞌo, uwaꞌhi haꞌumbora nabi ka Yerusale to nolou pe kota Antiokia.

²⁸Haduo ka nabi tiꞌo, konaꞌna hi Agabu. Hi Agabu tiꞌo metotiꞌimo, hei nokomi kuasaꞌna Inohaꞌ Mangkolehi, notiꞌi, “Hingkiꞌ hupaꞌ tempo kobiloraha to makaja i humanele kodatua Roma.” (Kobiloraha tiꞌo mewali mpuꞌu i tempo poparentana Datu Ngkodeꞌ Laudiu i Roma.)

²⁹Korohorina toSarani i Antiokia kareba tiꞌo, iohi mangkodokoꞌi mosulungi halali hampepoꞌohira to i woiꞌ Yudea. Katoꞌo, lekiꞌ-lekiꞌra mampeweihi doiꞌ motuntuni pebiaꞌra haduo-haduo,

³⁰hei doiꞌ tiꞌo nirampu. Uko tiꞌo, hi Baraba hante hi Saulu nipoꞌohimohi mangkomi doiꞌ tiꞌo nolou pe tadulakora toSarani i Yerusale.