Read Rampi Suro 14 Bible Online

Suro 14 - Rampi bible

Suro 14

¹I bolaꞌ ngkodeꞌ Ikonium, hi Paulu hante hi Baraba pahuahi hapo to hibobali hante to rohua i bolaꞌ ngkodeꞌ Antiokia. Hei nolouhi pe tambi penombahara toYahudi hei mampowute Kareba Moromiꞌ pe toaꞌ to morampuhi itoꞌo, horiana woriꞌhi toYahudi hei toYunani mepoꞌohi pe hi Yesu.

²Angkana toYahudi to hawaꞌi mepoꞌohi mohohunuhi lalira toaꞌ to woriꞌ to handoꞌio toYahudi, hingkeꞌna rokabiriꞌi toaꞌ to mepoꞌohi pe Pueꞌ Yesu.

³Hi Paulu hante hi Baranaba meꞌohaꞌhi morue itoꞌo. Hei hawaꞌhi motehuꞌ mampowute kareba noniuꞌ i Pueꞌ. Pueꞌ mampaꞌanihi kuasaꞌ mowali tandaꞌ to mepohele hingkeꞌna moliu i waliaNa to moromiꞌ Io mampetidoꞌki komarimana pe iohi. Kareba Moromiꞌ tiꞌo mampololita Rima Ngkotuwuꞌ to ka Pueꞌ Ala to mampaꞌaniꞌi kotuwuꞌ to wolaꞌ pe toaꞌ.

⁴Angkana tumpu bolaꞌ tiꞌo hawaꞌhi hampekokiri. Uwaꞌhi to tinaꞌ i toYahudi, hei uwaꞌhi woꞌo to tinaꞌ i surona Pueꞌ Yesu.

⁵Koꞌukoana toYahudi, hante tadulako-tadulakora, toaꞌ to handoꞌiohi woꞌo toYahudi mohintuwuꞌmohi hingkeꞌna hi Paulu hante hi Baranaba nipopoꞌioꞌiohi hei niwatuihi.

⁶Angkana robahaꞌ hi Paulu hante hi Baranaba tungkaihare. Io horiana mehilaihi nolou pe kota Listra hante Derbe i woiꞌ Likaonia hei bolaꞌ ngkodeꞌ to dodungku itoꞌo.

⁷Mampowutehi woꞌo Kareba Moromiꞌ itoꞌo.

⁸I kota Listra, uwaꞌ haduo tomaꞌani tokohu ka konipoꞌanaꞌakina. Io mahuralu nturusi, alaꞌ hawaꞌi maroho kapuꞌne hei hawaꞌi mpuꞌu nobiaꞌ matengkaꞌ.

⁹Tokohu tiꞌo mahuramo mampehoromua hi Paulu mololita. Konoꞌokiꞌna hi Paulu tokohu tiꞌo maroho pepoꞌohine moliu i Kareba Moromiꞌ to nopowute nobahaꞌmo kohingkiꞌ moꞌoriꞌne.

¹⁰Notiꞌi hi Paulu hante loaꞌna to kodeꞌ “Metotiꞌimoko!” Katoꞌo metotiꞌi tokohu tiꞌo kaliuꞌ matengkaꞌ.

¹¹Koroꞌokiꞌna toaꞌ to woriꞌ hapo to nowali hi Paulu, mololitamohi i wiharora, to nikokeneꞌi wiharo Likaonia, rotiꞌi, “Mengkohoumo humei lomoa-lomoare pe duniaꞌ. Lentera hibali lentena toaꞌ!”

¹²Uko tiꞌo, hi Baraba nikokeneꞌi hi Seu, konaꞌna datu lomoara. Hei hi Paulu nikokeneꞌi hi Heme, konaꞌna lomoara to mampowute pepaha, alaꞌ hi Paulu to biasa mololita.

¹³I tempo tiꞌo, uwaꞌ haduo tadulakona lomoa Seu i huwali kota. Tadulako lomoa tiꞌo mangkomi haꞌumbora mbaꞌa gapiꞌ laki hante bunga rokomi nolou pe wambaꞌ bente kota moꞌawa-awa hante toaꞌ to woriꞌ. Tungkaihara morereꞌ gapiꞌ tiꞌo hingkeꞌna ropopenombaꞌi pe hi Paulu hante hi Baranaba.

¹⁴Angkana korohorinalu surona Pueꞌ Yesu to roduo tiꞌo hapo tungkaihare toaꞌ to woriꞌ, mohepaꞌ-hepaꞌhi baduꞌra, tandaꞌ kohawaꞌna rolei tungkaihare tiꞌo, hei mehilaihi nolou pe lumbuna toaꞌ to woriꞌ, mololitahi ropokobue, rotiꞌi,

¹⁵“Haporeꞌi to iwalikei hieꞌe? Ingka hieꞌe, toaꞌ biasaluka woꞌo hibali ingkei. Humeika mampowute Kareba Moromiꞌ pe ingkei, hingkeꞌna ipohentekei penombahami pe lomoa to hawaꞌi modumbuꞌ hei menombakei pe Pueꞌ Ala to tuwuꞌ, alaꞌ Iomo to mowali laniꞌ, duniaꞌ, tahiꞌ hante lekiꞌ-lekiꞌna ohina.

¹⁶Hampiha Pueꞌ Ala mampotedehi toaꞌ menomba motuntuni peleira hadoduora.

¹⁷Angkana kehapoꞌi watoꞌo, hawaꞌi Nokomolihaki mampaꞌaniki haꞌumbora tandaꞌ to mampokonontokiki kohihimona Io. Io mampopewaliki hapo to moromiꞌ: Nopaꞌaniki ura ka laniꞌ, Nopopowuaꞌ huꞌa-huꞌante i tempona, Nopaꞌaniki pangka, hante Nopaꞌaniki komotanaꞌ lali.”

¹⁸Kehapoꞌi watoꞌo lolitare suro-suro pe toaꞌ to woriꞌ, masusahi nikamoroki hingkeꞌna hawaꞌhi mangkomi popenombara pe suro-suro.

¹⁹Hawaꞌi morue katoꞌo, haꞌumborahi toYahudi ka kota Antiokia hante ka kota Ikonium wute i kota Listra. ToYahudi tiꞌo mampokolaho lalira toaꞌ to woriꞌ i Listra hingkeꞌna nolouhi mowatui hi Paulu. Koꞌukona rowatui, roruiꞌ wotane nolou pe huwali kota hei ropolihi itoꞌo, alaꞌ rotiꞌireaꞌ mahimo.

²⁰Angkana kolentuꞌara toSarani i Listra metotiꞌi motuleliꞌi, meꞌaromo hi Paulu, hei kaliuꞌ mekahi pe lali kota. Poꞌonina, noloumo hi Paulu hante hi Baranaba pe kota Derbe.

²¹I kota Derbe, hi Paulu hante hi Baranaba mampowutehi Kareba Moromiꞌ, koꞌukoana woriꞌ toaꞌ mepoꞌohi pe hi Yesu. Uko tiꞌo, mahuliꞌ womohi nolou pe kota Listra hante pe Ikonium, honiꞌi liuhi nolou pe kota Antiokia i woiꞌ Pisidia.

²²I lekiꞌ-lekiꞌna bolaꞌ to rotengkaꞌi, hi Paulu hante hi Baranaba mampokaroho lalira hingkeꞌna tontora mepoꞌohi pe hi Yesu hei rotiꞌikihi, “Ingkiꞌ hangangaa pahuaki woriꞌ langkaꞌna komaporiꞌ ikohandoaꞌanta tene mekahi i lali poparentana Pueꞌ Ala.”

²³I patengkaꞌara tiꞌo, hi Paulu hante hi Baranaba moꞌuwiꞌhi hei mohini tadulakona toSarani i jumaꞌa-jumaꞌa. Maboki hei mekokaehi, merapiꞌ hingkeꞌna Pueꞌ morewahihi alaꞌ Iolu to ropoꞌohi.

²⁴Uko tiꞌo, hi Paulu hante hi Baraba mampololiumohi patengkaꞌara moliu woiꞌ Pisidia wute pe woiꞌ Pampilia.

²⁵Katoꞌo mampowutemohi Pohawaꞌna Pueꞌ Ala i kota Pega, hei noloumohi pe kota Atalia i bota ntahiꞌ.

²⁶Ka kota Atalia tiꞌo, mehendeꞌmohi kapalaꞌ tahiꞌ mahuliꞌ nolou pe kota Antiokia i woiꞌ Siria. Kota Antiokia tiꞌo iomo kota uluꞌ patengkaꞌara hampiha mampowute Kareba moromiꞌ. I tempo tiꞌo, toSarani i Antiokia mampekokaekihi hei merapiꞌ hingkeꞌna Pueꞌ Ala morewahihi ka kopopuhiꞌna laliNa kolentuꞌara mampopatengkaꞌ jamara hei hinewowoꞌena jamara tiꞌo hiwalimo.

²⁷Kohupaꞌralu i Antiokia, rorampumo lekiꞌ-lekiꞌne to mepoꞌohi pe Pueꞌ Yesu, hei ropowutemo hapo to Nowali Pueꞌ Ala i lali patengkaꞌara. Mampololitamohi woꞌo hohumbo Pueꞌ Ala mampatidoꞌkihi lala hingkeꞌna toaꞌ to handoꞌiohi toYahudi mepoꞌohihi woꞌo pe hi Yesu.

²⁸Uko tiꞌo, hi Paulu hante hi Baranaba moruehi meꞌohaꞌ i kota tiꞌo moꞌawa-awa hante toaꞌ to mepoꞌohi.