Read Rampi Suro 15 Bible Online

Suro 15 - Rampi bible

Suro 15

¹I hampiha tempo, haꞌumborahi toYahudi ka Yudea to mepoꞌohi pe Pueꞌ Yesu nolouhi pe kota Antiokia. ToYahudi mampoturuꞌhi toSarani i Antiokia, nitiꞌikihi, “Ane hawaꞌkei nibulabaꞌ motuntuni atura to nopaꞌanikiki hi Musa, bateꞌna hawaꞌkei hingkiꞌ niposalamaꞌ!”

²Angkana hi Paulu hante hi Baranaba hawaꞌhi mpuꞌu mamponiuꞌ pepoturuꞌra to mantiꞌi lekiꞌna toaꞌ hangangaa nibulabaꞌ dulu honiꞌi salamaꞌ. Koꞌukoana, robutusi hingkeꞌna hi Paulu, hi Baranaba, hante haꞌumbora toaꞌ ntaniꞌna ka jumaꞌa tiꞌo nolou mampowute posisalaꞌ tiꞌo pe surona Pueꞌ Yesu hante tadulako-tadulako jumaꞌa i Yerusale.

³Katoꞌo hi Paulu hante hi Baranaba ropopewotu toSarani i Antiokia hei nipoꞌawahi wute i huwali kota. Katoꞌo matengkaꞌmohi nolou pe Yerusale. I patengkaꞌara tiꞌo, moliuhi i woiꞌ Penisia hante Samaria, hei mampowutekihi hohumbo toaꞌ to handoꞌiohi toYahudi mepoꞌohihi woꞌo pe hi Yesu. Kareba tiꞌo mampomotanaꞌ lalira lekiꞌ-lekiꞌna halali hampepoꞌohira.

⁴Kohupaꞌralu i Yerusale, notorimohi moromiꞌ toSarani hei surona Pueꞌ Yesu hante tadulako-tadulako jumaꞌa to uwaꞌ itoꞌo. Hi Paulu hante hi Baraba mampowutemohi lekiꞌ-lekiꞌna to nowali Pueꞌ Ala i patengkaꞌara hampiha mampowute Kareba Moromiꞌ i woiꞌra toaꞌ to handoꞌiohi toYahudi.

⁵Angkana uwaꞌhi woꞌo haꞌumbora to mepoꞌohi pe hi Yesu to motuntuni pepoturuꞌra toParisi. Metotiꞌimohi toaꞌ tiꞌo, rotiꞌi, “Toaꞌ to handoꞌiohi toYahudi to mepoꞌohi pe hi Yesu, hangangaa nibulabaꞌhi hei nirumbaꞌ motuntuni Hawaꞌna hi Musa!”

⁶Iomo hinaꞌ morampumohi surone Pueꞌ Yesu hante tadulako-tadulako jumaꞌa mampololita noniuꞌ posisalaꞌ tiꞌo.

⁷Morue mpuꞌu ropemehoniꞌi noniuꞌ adaꞌ pebulabaꞌ. Katoꞌo, metotiꞌimo hi Peturuꞌ, notiꞌi, “Halali-halali, ibahaꞌmokei hapo to mewali pe aku. Haꞌumbora ntoꞌa liu, Noꞌuwiꞌa Pueꞌ Ala ka lumbumi, hei Norumbaꞌa mampowute Kareba Moromiꞌ pe toaꞌ to handoꞌiohi toYahudi, hingkeꞌna kareba tiꞌo rohori hei ropoꞌohi woꞌo.

⁸Hei Pueꞌ Ala to pobahaꞌ lalina toaꞌ, to mantorimo toaꞌ to handoꞌiohi toYahudi, hei Io mampokononto tungkaihaNa tiꞌo i koNopaꞌanira Inohaꞌ Mangkolehi hibali to mewali pe ingkiꞌ hampiha.

⁹Ingkiꞌ toYahudi hante to handoꞌiohi toYahudi, hawaꞌki nopopoꞌori-ori Pueꞌ Ala. Io mampomangkolehi lalira alaꞌ mepoꞌohihi pe hi Yesu.

¹⁰Mewaliꞌ halali-halali, mahamporeꞌi hinaꞌ ikodokoꞌikei mampoꞌuwaꞌ kobukotane Pueꞌ Ala? Mahamporeꞌi hinaꞌ ikodokoꞌikei mampomadori toaꞌ to handoꞌiohi toYahudi hante woriꞌ hawaꞌ tota robiaꞌ ropetuntui? Mepongka i tododulunta hampiha wute pe ingkiꞌ hinewowoꞌena, hawaꞌi tobiaꞌ motuntuni lekiꞌ-lekiꞌna hawaꞌ tiꞌo!

¹¹Anioꞌki mowali hatoꞌo alaꞌ ingkiꞌ to mepoꞌohiki, ingkiꞌ woꞌo pahuaki kosalamaꞌa alaꞌ kopopuhiꞌna lalina Pueꞌ Yesu to notidoꞌkimokiki hibali Io mamposalamaꞌhi.”

¹²Mondiiꞌmohi lekiꞌ-lekiꞌne toaꞌ to mogombo tiꞌo, alaꞌ mampehoromuahi lolitara hi Baranaba hante hi Paulu noniuꞌ i tandaꞌ kuasaꞌ to rowali hante kuasaꞌna Pueꞌ Ala kolentuꞌara i bolaꞌra toaꞌ to handoꞌiohi toYahudi.

¹³Koꞌukora hi Baranaba hante hi Paulu mololita, hi Yakobus mampowutemo lolitana, notiꞌi, “Halali-halali, ipehoromuakei hapo to kutiꞌikikei.

¹⁴Hi Simo Peturuꞌ ukomo mampowutekiki hohumbo Pueꞌ Ala uluꞌ-uluꞌna mampatidoꞌkiki rimaNa pe toaꞌ to handoꞌiohi toYahudi. Uwaꞌhi to Noꞌuwiꞌ hingkeꞌna iohi woꞌo mewali toaꞌNa.

¹⁵Hintotoꞌ mpololeke hapo to noꞌukiꞌ nabi-nabi hampiha, iomo:

¹⁶Notiꞌi Pueꞌ, ‘Katoꞌo hingkiꞌ mahuliꞌA hante hingkiꞌ Kuꞌaro huliꞌ poparentana datu Daudi, hibali haꞌanu tambi to modungkamo. Hingkiꞌ Kuꞌaro huliꞌ kodatuane Daudi,

¹⁷hingkeꞌna lekiꞌ-lekiꞌna toaꞌ ntaniꞌna to handoꞌiohi toYahudi, menombahi woꞌo pe Aku, alaꞌ Kuwowoimohi mewali toaꞌKu.

¹⁸Hatoꞌo pantiꞌine Pueꞌ to mampokononto tungkaihaNa hampiha.’” [25]

¹⁹Nopololiumo hi Yakobus lolitane, notiꞌi, “Mewaliꞌ hieꞌemo pahuangku, halali-halali. Inioꞌki mampomaporiꞌ tuwuꞌra toaꞌ to handoꞌiohi toYahudi to mengkoruꞌhi pe Pueꞌ Ala.

²⁰Moromiꞌ ane toꞌukiꞌi suraꞌ pepoturuꞌ hingkeꞌna inioꞌhi mangka pangka to ropopenomba pe lomoa, inioꞌhi mangka raꞌa hante inioꞌhi mangka bauꞌ to handoaꞌi dulu ropopesuwu raꞌane. Hei totiꞌikihi woꞌo hingkeꞌna inioꞌhi bantomaꞌania hei bantowoweꞌea hante inioꞌhi mebualosi.

²¹Ka lekiꞌ-lekiꞌna hawaꞌna hi Musa, hawaꞌ tiꞌolu to hangangaa topowutekihi. Hawaꞌ tiꞌo hangangaa totiꞌikihi ropetuntui hingkeꞌna hawaꞌi ropokoiꞌ toYahudi. Alaꞌ mepongka hampiha wute hinewowoꞌena, toYahudi to meꞌohaꞌ i bolaꞌ-bolaꞌ mobasa Suraꞌ Hawaꞌna hi Musa i tambi penombaha i ando-ando Satu, ando penombahara. Hei hawaꞌ tiꞌo ropepoturuꞌki i lekiꞌna bolaꞌra.”

²²Uko tiꞌo suro-surona Pueꞌ Yesu hante hawiꞌ-hawiꞌna Pueꞌ i jumaꞌa hei lekiꞌ-lekiꞌna toSarani to mogombo itoꞌo moꞌuwiꞌhi haꞌumbora awara hingkeꞌna nirumbaꞌ nolou pe Antiokia moꞌawa-awa hante hi Paulu hei hi Baranaba. To roꞌuwiꞌ tiꞌo roduo tomaꞌani to niꞌadaꞌihi halali hampepoꞌohira. Konaꞌna haduo hi Silas, hei to koroduona konaꞌna hi Yudas, to rotiꞌi woꞌo Baranaba.

²³Suraꞌ to rokomi teꞌukiꞌ waheꞌe: “Tabea ka ingka, surona Pueꞌ Yesu, hei tadulakora toSarani iseꞌe. Mopakatuka suraꞌ hieꞌe pe ingkei halali hampepoꞌohiki to handoꞌiokei toYahudi i kota Antiokia, hei i woiꞌ Siria hante Kilikia.

²⁴Kihorimo haꞌumbora toaꞌ ka lumbumi iseꞌe to nolou pe ingkei mampowewoꞌ pepoꞌohimi hante poturuꞌra. Mewaliꞌ hingkeꞌna ibahaꞌkei, handoꞌio ingka to morumbaꞌhi.

²⁵Iomo hinaꞌ mogombomoka iseꞌe, hei hampekokirika moꞌuwiꞌ haꞌumbora awangki to kirumbaꞌ nolou pe ingkei moꞌawa-awa hante hi Baranaba hante hi Paulu to kipokarima.

²⁶Hi Baranaba hante hi Paulu tiꞌo mampeweihi kotuwuꞌra pe Pueꞌ Yesu Kerisitu wutehi parumpa woriꞌ komaporiꞌ alaꞌ popatengkaꞌra jama to nopaꞌanikihi Pueꞌ Ala.

²⁷Mewaliꞌ, hinewowoꞌena kirumbaꞌmohi woꞌo hi Yudas hante hi Silas nolou pe ingkei. Iomohi to hingkiꞌ mampowutekikei hapo to hintotoꞌ hante ohina suraꞌki hieꞌe.

²⁸Halali-halali, hieꞌemo pebutusi to kihua alaꞌ perandana Inohaꞌ Mangkolehi, hante ingka tadulakomi, kiponiuꞌ woꞌo. Kitiꞌikikei hingkeꞌna hawaꞌkei nipomadori hante woriꞌ hawaꞌ to hantangaꞌ mahi ipetuntuikei. Bateꞌnalu hieꞌe, to paralu kipowutekikei:

²⁹Inioꞌkei mangka pangka to ropopenomba pe lomoa. Inioꞌkei mangka raꞌa, hei inioꞌkei mangka bauꞌ to hawaꞌi ropopesuwu dulu raꞌane. Inioꞌkei bantowoweꞌea hante bantomaꞌania, hei inioꞌkei mebualosi. Ane nipomoꞌelaꞌi lekiꞌ-lekiꞌne walia hieꞌe ka kotuwuꞌmi ganaꞌmo. Mewaliꞌ, ngkoraꞌ iseꞌemo dulu lolitangki.”

³⁰Koꞌukora mesabiꞌ, toaꞌ to iba tiꞌo ropopewotumo nolou pe kota Antiokia. Kohupaꞌralu i Antiokia, morampumohi lekiꞌ-lekiꞌne to mepoꞌohi pe Pueꞌ Yesu hingkeꞌna nipaꞌanihi suraꞌ to rokomi.

³¹Koꞌukona suraꞌ tiꞌo robasa i hinarona jumaꞌa, motanaꞌhi hei dodolimo lalire hante marohomo pepoꞌohire.

³²Katoꞌo hi Yudas hante hi Silas moruehi mololita, mampoturuꞌ halali hampepoꞌohira hei mampokononto pepoꞌohira, alaꞌ iohi tiꞌo roduo nabi to mampowute Pohawaꞌna Pueꞌ Ala.

³³Bahaꞌumbora andona meꞌohaꞌhi moꞌawa-awa hante toaꞌ i Antiokia, hei uko tiꞌo hi Silas hante hi Yudas ropopewotumo mahuliꞌ nolou pe Yerusale. Rotiꞌi toAntiokia tiꞌo, “Moromiꞌ-romiꞌkei i lala. Ipowutekei tabeangki pe iohi to morumbaꞌkei humei.”

³⁴[Angkana nopokonontomo hi Silas hingkeꞌna tontona io holampi i Antiokia.]

³⁵Hi Paulu hante hi Baranaba meꞌohaꞌhi woꞌo i Antiokia. Mepoturuꞌhi hei mampowutehi Boona Pueꞌ moꞌawa-awa hante woriꞌ toaꞌ.

³⁶Katoꞌo notiꞌi hi Paulu pe hi Baranaba, “Mahuliꞌmoki nolou mokadoroꞌi halali hampepoꞌohinta i lekiꞌ-lekiꞌna bolaꞌ to topoliuhi hampiha i tempota mampowute Pohawaꞌna Pueꞌ, hingkeꞌna tobahaꞌi hohumbo kotuwuꞌre.”

³⁷Hi Baranaba nolei nopoꞌowoni hi Yohanes to nikokeneꞌi woꞌo hi Markus i patengkaꞌara tiꞌo,

³⁸angkana notiꞌi hi Paulu, “Hawaꞌi moromiꞌ topoꞌawa, alaꞌ potiloꞌi hampiha i woiꞌ Pampilia hei hawaꞌi lebaꞌ mampoꞌawaki wute uko jamante”

³⁹Mewaliꞌ moheꞌerohi hi Paulu hante hi Baraba, koꞌukoana mokaꞌahi. Hi Baraba mowowoi hi Markus mampoꞌawaꞌi, hei mehendeꞌmohi kapalaꞌ tahiꞌ nolou pe Siprus.

⁴⁰Hi Paulu moꞌuwiꞌ hi Silas mampoꞌowoniꞌi. Hei halali hampepoꞌohira i kota Antiokia mampopewotuhi hei mampekokaekihi hingkeꞌna Pueꞌ Ala morewahihi i lali rimaNa i patengkaꞌara.

⁴¹Hi Paulu hante hi Silas nolou pe woiꞌ Siria hante Kilikia, ako mampokaroho lalira toSarani to uwaꞌ itoꞌo.