Read Rampi Suro 16 Bible Online

Suro 16 - Rampi bible

Suro 16

¹Hi Paulu mampololiu pantengkaꞌana nolou pe kota Derbe hante Listra. I bolaꞌ tiꞌo, uwaꞌ haduo tomaꞌani to mepoꞌohi pe hi Yesu, to nikokeneꞌi hi Timotius. Inoꞌna hi Timotius toYahudi, to mepoꞌohi woꞌo pe hi Yesu. Umoꞌna toYunani.

²I bolaꞌ ngkodeꞌ Listra hante Ikonium hi Timotius tiꞌo nopohibahaꞌ halali hampepoꞌohina moromiꞌ waliane.

³Peleihana hi Paulu hingkeꞌna hi Timotius metuntu i io i patengkaꞌana mampowute Kareba Moromiꞌ. Iomo hinaꞌ noperapiꞌ hi Paulu hingkeꞌna hi Timotius nibulabaꞌ dulu motuntuni Hawaꞌna hi Musa. Tungkaihana hingkeꞌna rotorimoꞌi toYahudihi, alaꞌ lekiꞌ-lekiꞌna toYahudi i woiꞌ tiꞌo pobahaꞌ kotoYunanina umoꞌne.

⁴Katoꞌo hi Paulu hante awa-awanahi molai womohi pe lekiꞌ-lekiꞌna bolaꞌ to rotengkaꞌi, mampowutehi pe toSarani i bolaꞌ-bolaꞌ tiꞌo noniuꞌ adaꞌ pebulabaꞌ to mewalimo kopudiꞌana pololitara surona Pueꞌ Yesu hante tadulako-tadulako jumaꞌa i Yerusale, hingkeꞌna hawaꞌ to nipokonontomo ropetuntui.

⁵Katoꞌo, komaroho-rohoa pepoꞌohire toSarani hei ando humei ando koworiꞌ-woriꞌa toaꞌ to mepoꞌohi pe Pueꞌ Yesu.

⁶Inohaꞌ Mangkolehi mampokononto hi Paulu hante hi Silas hingkeꞌna hawaꞌhi nolou mampowute Pohawaꞌna Pueꞌ Ala i poropensi Asia. Iomo hinaꞌ tewolihi tungkaihare, hei noloumohi motengkaꞌi woiꞌ Perigia hante Galatia.

⁷Kohupaꞌra i parailiꞌna woiꞌ Misia, hingkiꞌ liuhi nolou pe woiꞌ Bitinia, angkana Inohaꞌ Mangkolehi to ka Pueꞌ Yesu hawaꞌi mampoliuhi nolou.

⁸Iomo hinaꞌ moliuhi i woiꞌ Misia hante monaꞌuhi nolou pe bolaꞌ Troas to i bota ntahiꞌ.

⁹I halumbu wini kolentuꞌara toturu i Troas, hi Paulu pangkiꞌ halangkaꞌ peponoꞌokiꞌi. Noꞌokiꞌ haduo tomaꞌani to ka woiꞌ Makedonia metotiꞌi i hinarona, notiꞌi, “Humeikei pe Makedonia. Isulungika wongkenaꞌ!”

¹⁰Koꞌukona pangkiꞌ peponoꞌokiꞌi tiꞌo, hi Paulu, hante awanahi hi Timotius, hi Silas hi Lukas, rohohiꞌi nolou pe woiꞌ Makedonia, alaꞌ monontomo i ingka konorumbaꞌki Pueꞌ Ala mampowute Kareba Moromiꞌ pe toaꞌ to uwaꞌhi itoꞌo.

¹¹Molaimoka ka Troas mehendeꞌ kapalaꞌ tahiꞌ nolou pe leowuta Samorake, hei poꞌonina nolouka pe bolaꞌ Neapoli.

¹²Uko tiꞌo, mengkohoumoka ka kapalaꞌ tahiꞌ, hei matengkaꞌka nolou pe kota Pilipi. I kota Pilipi tiꞌo, iomo haꞌanu kota to mokonaꞌ i poropensi Makedonia to noparentai toRoma. Haꞌumbora ando meꞌohaꞌka i kota tiꞌo.

¹³I ando penombahara toYahudi, nolouka pe botana uwai i huwali kota, alaꞌ kitiꞌingkenaꞌ uwaꞌ pekokaehare toYahudi itoꞌo. Bahaꞌumbohi towoweꞌe nolou morampu, io hinaꞌ mahuraka hei mololitaka pe iohi.

¹⁴Uwaꞌ haduo towoweꞌe to nikokeneꞌi hi Lidia ka kota Tiatira. Hi Lidia tiꞌo, topobaluꞌ-baluꞌ wida to masuliꞌ hilina, hei io menomba pe Pueꞌ Ala. Pueꞌ Ala mampaꞌani pekiri pe hi Lidia, koꞌukoana notorimo hapo to nopagurukiꞌi hi Paulu.

¹⁵Uko tiꞌo, hi Lidia hantambi niriumohi. Koꞌukoralu niriu, hi Lidia mangkomika nolou meꞌohaꞌ i tambina, notiꞌi, “Ane nirekeꞌa toaꞌ to mepoꞌohi pe Pueꞌ Yesu, noloumoki pe tambingku.” Iomo hinaꞌ noloumoka mpuꞌu pe tambina motuntuni perapiꞌna.

¹⁶I hampiha tempo, konoloungki pe pekokaehara toYahudi, mampohidupaꞌkika haduo towoweꞌe to nipohawiꞌ tuwuꞌna. Towoweꞌe tiꞌo poko nopekahii lomoa, hei nokomi kuasaꞌna lomoa tiꞌo, io mampowute hapo to hingkiꞌ mewali. Iomo hinaꞌ tua to mampohawiꞌ towoweꞌe tiꞌo, woriꞌ doiꞌre.

¹⁷I patengkaꞌangki hante hi Paulu, towoweꞌe tiꞌo metuntu nturusi pe ingka, hei moloaꞌ-loaꞌ nturusi, notiꞌi, “Toaꞌ hieꞌehiꞌe surona Pueꞌ Ala to meliu kuasaꞌNe ka lekiꞌ-lekiꞌna to ropenombai! Kohumeira iseꞌe, mampowutekikei lala hingkeꞌna himpolohoꞌkei ka pehukuna Pueꞌ Ala.”

¹⁸I lali haꞌumbora ando, io nturusi lolitane, horiana nobosaꞌmo hi Paulu mampehoromua. Katoꞌo, mehahiliꞌmo hi Paulu, notiꞌi pe tokodake to mampekahiꞌi towoweꞌe tiꞌo, “I lali konaꞌna Yesu Kerisitu, polai katoꞌo!” Molaimo mpuꞌu tokodake to mampekahii towoweꞌe tiꞌo.

¹⁹Katoꞌo koiꞌhi tua-tuane towoweꞌe tiꞌo, alaꞌ hamboaꞌmohi pahua doiꞌ ka io. Io hinaꞌ noloumohi mohokiꞌ hi Paulu hante hi Silas nikomihi nolou pe tadulako bolaꞌ i pobaluꞌ-baluꞌa.

²⁰Kohupaꞌra i hinarora topoparenta, rotiꞌi, “Toaꞌ hieꞌehiꞌe toYahudi to humei mampomagaru toaꞌ i bolaꞌta.

²¹Mepaguruhi adaꞌ to mosisalaꞌ hante adaꞌta. Ingkiꞌ toRoma hawaꞌi wadi mantorimo ba motuntuni pepoturuꞌra.”

²²Toaꞌ to woriꞌ woꞌo mosalaꞌihi. Katoꞌo, topoparenta-topoparenta i kota tiꞌo morumbaꞌmohi toaꞌ mohepaꞌ-hepaꞌ baduꞌra hi Paulu hante hi Silas ka wotara hante nihahaꞌhi woꞌo.

²³Woriꞌ mpihahi nihahaꞌ, hei uko tiꞌo nitarungkuꞌhi. Tadulako petarungkuꞌ nipohawaꞌki hingkeꞌna mampoꞌodaꞌ mpololeke hi Paulu hante hi Silas

²⁴Iomo hinaꞌ nikahihi i petarungkuꞌa to i lumbu-lumbuna, hei kapuꞌra rombali nihopiꞌ i loti.

²⁵Halumbu wini, hi Paulu hante hi Silas mekokaemohi hante molinga mampokodeꞌ Pueꞌ Ala. To nitarungkuꞌ to ntaniꞌna mampehoromuahi lingara.

²⁶I tempo tiꞌo woꞌo, mewali luanoko to makaja horiana watu pahurahana petarungkuꞌa mododua. Kaliuꞌ moweaꞌmo lekiꞌ-lekiꞌna wambaꞌ, hei moꞌuweꞌ woꞌo rante to nipoporante lekiꞌ-lekiꞌna toaꞌ to nitarungkuꞌ.

²⁷Liu-liu tadulako petarungkuꞌa meꞌaro, hei noꞌoki moweaꞌmo lekiꞌ-lekiꞌna wambaꞌ. Nowutumo pihone hingkiꞌ menoꞌo, alaꞌ nopekiri mehilaimohi lekiꞌ-lekiꞌne toaꞌ to nitarungkuꞌ.

²⁸Angkana hi Paulu mewowoi nopokodeꞌ ka lali petarungkuꞌa, notiꞌi, “Inioꞌko menoꞌo! Hieꞌeluka lekiꞌ-lekiꞌki!”

²⁹Uko tiꞌo, tadulako petarungkuꞌa tiꞌo mamperapiꞌ huluꞌ, hei mehilai nohohiꞌi mekahi pe lali petarungkuꞌa. Mororidiꞌmo wotane melingkotuꞌ i hinarora hi Paulu hante hi Silas,

³⁰honiꞌi nokomihi nolou pe huwali, notiꞌikihi, “Tua-tua hapomo wokae to hingkiꞌ kuwali hingkeꞌna tehompoꞌa ka dosangku?”

³¹Hi Paulu hante hi Silas mehoniꞌ, rotiꞌi, “Mepoꞌohiko pe Pueꞌ Yesu, hingkeꞌna Nohompoꞌko Pueꞌ Ala ka pehukuNa, ingko hante lekiꞌ-lekiꞌna toaꞌ to i lali tambimu.”

³²Katoꞌo, hi Paulu hante hi Silas mampowutemo Pohawaꞌna Pueꞌ pe tadulako petarungkuꞌ, hei lekiꞌ-lekiꞌna toaꞌ to i lali tambina.

³³Katoꞌo, i wini tiꞌo tadulako petarungkuꞌ mowaheꞌ belora hi Paulu hante hi Silas. Hei i wini tiꞌo woꞌo, io hante lekiꞌ-lekiꞌna toaꞌ to i lali tambina niriumohi.

³⁴Uko tiꞌo, tadulako petarungkuꞌ tiꞌo mangkomihi hi Paulu hante hi Silas nolou pe tambina, nopopangkahi. Motanaꞌ mpuꞌu tadulako tiꞌo, alaꞌ mepoꞌohimohi hantambi pe Pueꞌ Ala.

³⁵Poꞌonina mehoꞌolu topoparenta toRoma morumbaꞌ polisi nolou pe petarungkuꞌa mampatiꞌiki tadulako petarungkuꞌ, “Ipolohoꞌmohi toaꞌ to roduo tiꞌo to nihokiꞌ hiwinia.”

³⁶Ikonohorina tadulako petarungkuꞌ hawaꞌ tiꞌo, notiꞌimo pe hi Paulu hante hi Silas, “Uwaꞌ hawaꞌ ka topoparenta to mampatiꞌikiꞌa hingkeꞌna nipolohoꞌkei. Mewaliꞌ, noloumokei, hei moromiꞌ-romiꞌkei i lala.”

³⁷Angkana notiꞌi hi Paulu pe pulisi-pulisi tiꞌo, “Ikohandoaꞌana tene nihuroni waliangki, nikondomoka i hinarora toaꞌ to woriꞌ hei nitarungkuꞌka! Hintaro ingka hieꞌe toRomaluka.[26] Hinewowoꞌena rokodokoꞌi mampolohoꞌka ngkawowuni! Hawaꞌka hiniꞌ! Itiꞌikihi, hangangaa iohi to humei mampolohoꞌka.”

³⁸Mahuliꞌmohi pulisi-pulisi tiꞌo mampowute lolitana hi Paulu pe topoparenta. Korohorina topoparenta hi Paulu hante hi Silas tiꞌo toRoma, motehuꞌhi huliꞌ.

³⁹Noloumohi merapiꞌ ampu pe hi Paulu hante pe hi Silas, nipoꞌawahi nolou pe huwali petarungkuꞌa, rotiꞌi, “Kiperapiꞌ hingkeꞌna molaimokei ka kota hieꞌe.”

⁴⁰Katoꞌo molaimohi mpuꞌu hi Paulu hante hi Silas ka petarungkuꞌa tiꞌo nolou pe tambina hi Lidia hei mampomehuakihi halali hampepoꞌohira, hei ropokaroho lalire. Uko tiꞌo, molaimohi mampolihi kota Pilipi.