Read Rampi Suro 17 Bible Online

Suro 17 - Rampi bible

Suro 17

¹Hi Paulu hante hi Silas mampololiuhi patengkaꞌara moliu i kota Ampipoli hante Apolonia wute i kota Tesalonika. I Tesalonika, uwaꞌ haꞌanu tambi penombahara toYahudi.

²Hibali biasana, noloumo hi Paulu pe tambi penombaha tiꞌo ako mampomehoniꞌi noniuꞌ Pohawaꞌna Pueꞌ Ala hante toaꞌ to morampu itoꞌo. Tolu mingguna matengkaꞌ nturusi, hi Paulu mowali watoꞌo i ando penombaha

³hingkeꞌna nopokonontokihi lala-lalane Boo mangkolehi to mampotongawa, “Datu Topohompoꞌ to nodandi Pueꞌ Ala hampiha, hangangaa morii komaporiꞌ wute mahi, angkana Io tuwuꞌ huliꞌ. Hi Yesu to kulolitakikei hieꞌe iomo Datu Topohompoꞌ.”

⁴Uwaꞌhi toYahudi to mantorimo lolita tiꞌo hante to metuntuhi pe hi Paulu hante hi Silas. Uwaꞌhi woꞌo toaꞌ ntaniꞌne to mepoꞌohi, tekahi woꞌo toYunani to mengkoruꞌ pe Pueꞌ Ala hante woriꞌ towoweꞌe to teꞌadaꞌi.

⁵Angkana toYahudi to hawaꞌi mepoꞌohi, mowahiꞌhi pe hi Paulu hante hi silaꞌ. Iomo horiana mampokolahohi lalina toaꞌ to masilaka to uwaꞌhi i porampuana topobaluꞌ-baluꞌ. Toaꞌ tiꞌo, woriꞌhi hei morampuhi, hei nolouhi mowali posisalaꞌ i lali kota. Kowuteralu i tambi to ropeꞌohaꞌi hi Paulu hante hi Silas, mekahimohi. Tungkaihara hingkiꞌ mohokiꞌ hi Paulu hante hi Silas rokomi nolou pe hinarona toaꞌ to woriꞌ, angkana hawaꞌi rohua. Iomo hinaꞌ mohokiꞌhi tumpu tambi, to nikokeneꞌi hi Yaso. Hi Yaso tiꞌo hante haꞌumbora tosarani rokomi nolou pe hinarona tadulako bolaꞌ. Kowuteralu, moloaꞌ-loaꞌhi toaꞌ to woriꞌ, rotiꞌi, “Hi Paulu hante awana hieꞌe mampowuli toaꞌ i humanele duniaꞌ, hei humeihi woꞌo iseꞌe mampowuli toaꞌ i bolaꞌta.

⁷Hei hi Yaso hieꞌe mantorimo hi Paulu hante hi Silas i lali tambina to mosapuaka hawaꞌna datunta i Roma. Rotiꞌi koꞌuwaꞌna datu ntaniꞌna to nikokeneꞌi hi Yesu.”

⁸Ikorohorinalu tadulakora hante toaꞌ woriꞌ koiꞌhi mpuꞌu.

⁹Hi Yaso hante halali hampepoꞌohina hangangaa mampeweihi doiꞌ mewali tikoa kohawaꞌra hingkiꞌ mowali posisalaꞌ pe topoparentana Roma, katoꞌo nipolohoꞌmohi.

¹⁰Wini tiꞌo, halali hampepoꞌohira to i Tesalonika mampatiꞌiki hi Paulu hante hi Silas, “Ingkei hangangaa molaikei kaseꞌe, nolou pe Berea.” Katoꞌo, noloumohi mpuꞌu. Kowuteralu i Berea, hi Paulu hante hi Silas nolouhi pe tambi penombahara toYahudi.

¹¹ToBerea moromiꞌ lalire, hawaꞌi hibali toTesalonika, alaꞌ mampehoromuahi lolitara hi Paulu hante hi Silas hante lalira to motanaꞌ. Ando-ando moparesaꞌhi Boo mangkolehi hingkeꞌna robahaꞌ ba tuꞌu lolitane hi Paulu ba hawaꞌi.

¹²Woriꞌhi toYahudi hante toYunani to mepoꞌohi pe hi Yesu. ToYunani tiꞌo iomo tomaꞌani hante towoweꞌe to teꞌadaꞌi.

¹³Hawaꞌi morue katoꞌo, toaꞌ-toaꞌ toYahudi i kota Tesalonika pahorimohi konopowutenamo hi Paulu pohawaꞌna Pueꞌ Ala i kota Berea. Iomo horiana nolouhi woꞌo pe Berea mampomolaho lalira toaꞌ to woriꞌ.

¹⁴Katoꞌo, tosarani to uwaꞌ itoꞌo hohiꞌhi nolou mowona hi Paulu pe bota ntahiꞌ. Angkana hi Silas hante hi Timotius meꞌohaꞌhi nturusi i Berea.

¹⁵Hi Paulu rowonamo wute i kota Atena. Uko tiꞌo, toaꞌ to mampoꞌawaꞌi tiꞌo mahuliꞌmohi pe Berea mampowute pepahana hi Paulu pe hi Silas hante hi Timotius hingkeꞌna hohiꞌhi nolou mampohidupaꞌkiꞌi.

¹⁶Kolentuꞌana hi Paulu mampekau hi Silas hante hi Timotius i Atena, masusa laline mampeꞌele woriꞌ lente totoaꞌ lomoa to ropenombai toAtena.

¹⁷Io horiana i tambi penombaha, hi Paulu momehoniꞌ hante toYahudi hei toaꞌ ntaniꞌna to mekahi i agamara toYahudi. Ando-andona hi Paulu mampoturuꞌ woꞌo hihimolu to nohua i pobaluꞌ-baluꞌa.

¹⁸I kota Atena tiꞌo, uwaꞌhi woꞌo toaꞌ to mapande motuntuni pepoturuꞌna Epikuro hei pepoturuꞌna to Stoa. Toaꞌ to mapande tiꞌo momehoniꞌhi hante hi Paulu. Uwaꞌhi to mantiꞌi, “Haporeꞌi to notiꞌi toaꞌ to mampemapande hieꞌe?” Uwaꞌhi woꞌo to mantiꞌi, “Ba hingkiꞌ nopowutekiki noniuꞌ lomoa ka woiꞌ ntaniꞌna.” Hatoꞌo pantiꞌire alaꞌ pepoturuꞌna hi Paulu noniuꞌ hi Yesu hei kotuwuꞌra huliꞌ toaꞌ ka komahia.

¹⁹Iomo hinaꞌ toaꞌ tiꞌo mangkomimohi hi Paulu pe porampua ngkodeꞌ to i Biri Areopagu, ropantiꞌiki, “Kikodokoꞌi kihori poturuꞌma to wolaꞌ tiꞌo.

²⁰Handoaꞌi tene uwaꞌ kihori poturuꞌ ntaniꞌna to watoꞌo, hei kikodokoꞌi kibahaꞌ palaihane.”

²¹(Alaꞌ biasana toAtena hei toaꞌ ntaniꞌna to meꞌohaꞌhi i Atena rolei mampehoromua hante mampololita nturusi hapo to wolaꞌ.)

²²Mewaliꞌ metotiꞌimo hi Paulu i hinarora toaꞌ to morampu i Biri Areopagu, notiꞌi, “Ee, toAtena! Kuꞌokiꞌmo poꞌagamami. Woriꞌ langkaꞌ to ipenombaikei.

²³Kubahaꞌ tiꞌo, alaꞌ kolentuꞌaku matengkaꞌ i lali kotami hieꞌe, kuꞌokiꞌ penombahami hei kuꞌokiꞌ woꞌo haꞌanu watu penombahami to uwaꞌ ukiꞌna waheꞌe: ‘penombaha pe Pueꞌ to hawaꞌi nibahaꞌ Konaꞌne.’ Mewaliꞌ, Pueꞌ to hawaꞌi ibahaꞌkei konaꞌne tiꞌo, Iomo to hingkiꞌ kupowutekikei.

²⁴Pueꞌ Ala to mowali duniaꞌ hei lekiꞌ-lekiꞌna ohina, Iomo tumpu laniꞌ hante woiꞌ. Io hawaꞌi meꞌohaꞌ i tambi penombaha to nowali toaꞌ.

²⁵Hawaꞌi woꞌo paralu nopororui toaꞌ, alaꞌ Io to mampaꞌaniki kotuwuꞌta hante inohaꞌta hei hinangkana to toparaluꞌi.

²⁶Ka haduo toaꞌlu, Pueꞌ Ala mampopemuleꞌ lekiꞌ-lekiꞌna toaꞌ, hei Norumbaꞌhi mampeꞌohaꞌi humanele duniaꞌ wute hinewowoꞌena. Io to mampokononto tempo-tempo hei to mampokononto ka uluꞌ-uluꞌna parailiꞌna woiꞌ to ropeꞌohaꞌi lekiꞌ-lekiꞌna kodatua hei tempora moparenta.

²⁷Pueꞌ Ala mowali lekiꞌ-lekiꞌna tiꞌo hingkeꞌna Iolu to topaliꞌo. Hei ane topaliꞌi Pueꞌ Ala, wadi tohua. Kotuꞌuana, Io hawaꞌi moꞌela ka ingkiꞌ lekiꞌ-lekiꞌta.

²⁸Alaꞌ hieꞌemo to poko rotiꞌi todulumi: ‘Ka Iolu kotuwuꞌte. Iomo hinaꞌ tuwuꞌki hante mengkaꞌduiꞌki i duniaꞌ hieꞌe.’ Hibali woꞌo to noꞌukiꞌ haduo todulumi hampiha, (to mapande moꞌukiꞌ linga,) notiꞌi, ‘Ingkiꞌ lekiꞌ-lekiꞌta anaꞌna Pueꞌ Ala.’

²⁹Mewaliꞌ, halali-halali, hawaꞌi moromiꞌ ane ingkiꞌ to mewali anaꞌna Pueꞌ Ala, mampohibali Pueꞌ Ala hibali lente to rowali ka bulawa ba ka peraꞌ ba ka watu, motuntunilu kopobahaꞌna toaꞌ.

³⁰Hampiha, menombaki i lomoa. Kehapoꞌi watoꞌo, hawaꞌki nohuku Pueꞌ Ala. Io mopiriꞌlu mataNa i kobebenta tiꞌo, alaꞌ hawaꞌi tene tobahaꞌ kohihimona Io. Angkana hinewowoꞌena, Norumbaꞌ lekiꞌ-lekiꞌna toaꞌ i imbolu i humanele duniaꞌ hingkeꞌna nohohoꞌhi ka dosara.

³¹Alaꞌ Nopokonontomo Pueꞌ Ala tempone Io hingkiꞌ mobutusi kara-karara toaꞌ i humanele duniaꞌ hante mononto. Topebutusi tiꞌo iomo haduo Toaꞌ to noꞌuwiꞌ Pueꞌ Ala. Toaꞌ tiꞌo Nopotuwuꞌ huliꞌ ka komahia hingkeꞌna mombaha pe lekina toaꞌ koꞌIona to noꞌuwiꞌ Pueꞌ.”

³²Korohorina lolitane hi Paulu, uwaꞌhi to mokokereꞌi, alaꞌ hawaꞌhi mampoꞌohi koꞌuwaꞌna toaꞌ to wadi tuwuꞌ huliꞌ. Angkana, uwaꞌhi woꞌo to mantiꞌi, “Kilei tene intu mampehoromua lolitamu tiꞌo.”

³³Uko tiꞌo, molaimo hi Paulu ka porampuara.

³⁴Angkana uwaꞌhi to metuntu pe hi Paulu hante mepoꞌohi pe hi Yesu. Haduo to mepoꞌohi pe hi Yesu, iomo hi Dionisiu, haduo tadulako to uwaꞌ i pogomboa ngkodeꞌ i biri Areopagu. Uwaꞌ woꞌo haduo towoweꞌe to nikokeneꞌi hi Damari, hei uwaꞌhi woꞌo to ntaniꞌna.