Read Rampi Suro 18 Bible Online

Suro 18 - Rampi bible

Suro 18

¹Uko tiꞌo, molaimo hi Paulu mampolihi kota Atena nolou pe kota Korintus.

²I Korintus, hi Paulu mampohidupaꞌki haduo tomaꞌani toYahudi to nikokeneꞌi hi Akila. Hi Akila tiꞌo nipoꞌanaꞌki i woiꞌ Pontu. Hantambina nikokeneꞌi hi Pirikila. Iohi hamoko melimbahi ka woiꞌ Italia alaꞌ uwaꞌ hawaꞌna Datu ngkodeꞌ Laudiu i Roma to mobue lekiꞌ-lekiꞌna toYahudi ka kota Roma. Kohupaꞌnalu i kota Korintus, noloumo hi Paulu moweoꞌihi,

³hei meꞌohaꞌ moꞌawa-awa hante iohi. Majamahi moꞌawa-awa, alaꞌ pajamana hi Paulu hibali hante pajamara: mowalihi bambaruꞌ ka koliꞌ pinatuwuꞌ.

⁴I ando-ando penombaha, hi Paulu nolou pe tambi penombahara toYahudi mampoturuꞌ toaꞌ to morampu itoꞌo, moromiꞌ toYahudi moromiꞌ toYunani. Tungkaihana hi Paulu hingkeꞌna mepoꞌohihi pe Pueꞌ Yesu.

⁵Katoꞌo, kohupaꞌralu hi Silas hante hi Timotius ka woiꞌ makedonia, hi Paulu hamboaꞌmo majama mowali bambaruꞌ ka koliꞌ, alaꞌ io mampowutemo kareba moromiꞌ pe toYahudihi, nopololitakihi noniuꞌ hi Yesu, Datu Topohompoꞌ.

⁶Angkana toYahudi to i kota Korintus mosapuakaꞌi hei mampokokeniꞌa poturuꞌna. Iomo horiana notiꞌikihi hi Paulu, “Ane nohukukei Pueꞌ Ala, handoꞌio aku to masalaꞌ! Bateꞌna ingkei! Mewaliꞌ mepongka hinewowoꞌena, kupolihimokei. Hingkiꞌ nolouꞌa mampowute Kareba Moromiꞌ pe toaꞌ to handoꞌiohi toYahudi!” Kolentuꞌana mololita hatoꞌo, hi Paulu mokuntamo awu ka baduꞌna, tandaꞌ konopolihiramo,

⁷hei molaimo mpuꞌu nolou pe tambina hi Titiu Yustu to uwaꞌ i hirina tambi penombaha. Tumpu tambi tiꞌo handoꞌio toYahudi, angkana io menomba pe Pueꞌ Ala.

⁸Uwaꞌ haduo toaꞌ to nikokeneꞌi hi Kirisipu. Io haduo tadulako tambi penombaha to dodungku i tambina hi Titiu. Io hante lekiꞌ-lekiꞌna tinona, mepoꞌohihi pe Pueꞌ Yesu. Hei woriꞌ tokorintus mampehoromua kareba to nopowute hi Paulu, koꞌukoana mepoꞌohihi hei niriumohi woꞌo.

⁹I hamini, hi Paulu pangkiꞌ womo halangkaꞌ peponoꞌokiꞌi. I lali pampeponoꞌokiꞌi tiꞌo, notiꞌi Pueꞌ, “Anioꞌko morokaꞌ, hei inioꞌ ipeꞌohaꞌkiꞌi mampowute Kareba Moromiꞌ noniuꞌ hi Yesu i kota Korintus hieꞌe.

¹⁰Akumo to mampoꞌowoniko, hawaꞌi uwaꞌ haduo to hingkiꞌ mokondoko ba mampopoꞌioꞌioko alaꞌ i kota hieꞌe koworiꞌana iomo toaꞌKu.”

¹¹Katoꞌo, hi Paulu meꞌohaꞌ i Korintus hantoꞌa oni mbula komoruene, hei mampoturuꞌ nturusi toaꞌ Kareba Moromiꞌ noniuꞌ Yesu Kerisitu.

¹²I tempona Hi Galio mewali gubenuru i woiꞌ Akaia, hintuwuꞌhi toYahudi moꞌewa hi Paulu, honiꞌi rokomi pe hinarona gubenuru,

¹³hei rosalaꞌi, rotiꞌi, “Toaꞌ hieꞌe mokeloi woriꞌ toaꞌ. Io mampoturuꞌhi noniuꞌ lala mpenomba pe Pueꞌ Ala, angkana hapo to nopaturuꞌkihi tiꞌo hawaꞌi hintotoꞌ hante hapo to teꞌukiꞌ i hawaꞌna hi Musa!”

¹⁴Hongkoꞌ hingkiꞌ mehoniꞌ hi Paulu, notiꞌimo hi Galio, “ToYahudi! Ane toaꞌ to nisalaꞌi tiꞌo mowali silaka ba walia to kodake mpololeke, hingkiꞌ sabaraꞌa mampehoromua pampowutemi.

¹⁵Angkana pampowutemi noniuꞌlu lolita-lolita hei konaꞌ-konaꞌ hei atura agamami. Mewaliꞌ, ingkeilu to morewahi tiꞌo. Aku hawaꞌa hiniꞌ!”

¹⁶Uko tiꞌo, nopopesuwumohi ka tambi pobutusia.

¹⁷I howali tambi pobutusia tiꞌo, toaꞌ to woriꞌ mohokiꞌ hi Sostene, haduo tadulako tambi penombaha, hei rokohiaꞌ. Angkana hawaꞌi nopekahii hi Galio waliare tiꞌo.

¹⁸Haꞌumbora ando hi Paulu meꞌohaꞌ i Korintus, katoꞌo mesabiꞌmo pe halali hampepoꞌohina. Uko tiꞌo, io mehendeꞌ i kapalaꞌ tahiꞌ nolou pe woiꞌ Siria, moꞌawa-awa hante hi Pirikila hante hi Akila. Angkana kolentuꞌana handoaꞌi tene molai, hi Paulu mampopegundi duluna wiloluna i bolaꞌ Kengkerea, alaꞌ uwaꞌ dandine pe Pueꞌ Ala. [Motuntuni adaꞌra toYahudi, ane tutumo tempo podandi, hangkoꞌhi megundi.]

¹⁹I patengkaꞌara tiꞌo, holampihi i kota Epesu, hei hi Paulu nolou pe tambi penombaha hei mololita hante toYahudi to morampu itoꞌo. Toaꞌ tiꞌo merapiꞌ pe hi Paulu hingkeꞌna nomorue moꞌawa-awa hante iohi, angkana hawaꞌi nolei. Kehapoꞌi hatoꞌo, ikohingkiꞌ kopolaina, notiꞌikihi, “Ane noponiuꞌi Pueꞌ Ala, hingkiꞌ mahuliꞌluꞌa humei iseꞌe.” Hi Pirikila hante hi Akila meꞌohaꞌhi nturusi i Epesu, angkana hi Paulu mampololiumo patengkaꞌna mehendeꞌ i kapalaꞌ tahiꞌ nolou pe woiꞌ Siria.

²²Kohupaꞌna i kota Kaisarea, hi Paulu nolou duluna pe Yerusale mampomehuaki tosarani to uwaꞌ itoꞌo, hongkoꞌ noloureꞌi pe kota Antiokia i woiꞌ Siria.

²³Bahaꞌumbo andoꞌi komoruene moꞌawa-awa hante halali hampepoꞌohina i Antiokia, honiꞌi molai womo nolou pe woiꞌ Galatia hante pe woiꞌ Perigia, mampokaroho pepoꞌohira toaꞌ to mepoꞌohi pe Pueꞌ Yesu.

²⁴I tempo tiꞌo, uwaꞌ haduo toYahudi to hupaꞌ i kota Epesu, to nikokeneꞌi hi Apolo. Hi Apolo tiꞌo nipoꞌanaꞌki i kota Alesandaria. Io mapande mololita, hei pobahaꞌ ohina Boo Mangkolehi.

²⁵Hi Apolo nipoturuꞌmo woꞌo noniuꞌ Pueꞌ Yesu. Mewaliꞌ, kohupaꞌna i Epesu, io mololita ka lalina, mampoturuꞌhi toaꞌ noniuꞌ hi Yesu, kehapoꞌi periunalu hi Yohanes to nobahaꞌno.

²⁶I tempo tiꞌo, nopelukamo mololita i tambi penombahara toYahudi hei hawaꞌi uwaꞌ komorokaꞌne. Korohorina hi Pirikila hante hi Akila lolitane hi Apolo, rokomi nolou pe tambira honiꞌi ropokonontoki pe io noniuꞌ lala kotehompoꞌ moliu Yesu Kerisitu, alaꞌ pebahaꞌna hi Apolo handoaꞌi maganaꞌ.

²⁷Uko tiꞌo, nokodokoꞌi hi Apolo nolou pe woiꞌ Akaia. Hei halali hampepoꞌohina i Epesu mosulungiꞌi, mampokatuhi suraꞌ nolou pe hangko tosaranira i Akaia hingkeꞌna hi Apolo nitorimo moromiꞌ. Mewaliꞌ, kohupaꞌna hi Apolo i Akaia, pepoturuꞌna mangkomi woriꞌ pebarakati i lekiꞌ-lekiꞌna toaꞌ to mepoꞌohihi pe Pueꞌ Yesu. Mepoꞌohihi alaꞌ nokomi kopopuhiꞌna lalina Pueꞌ Ala.

²⁸Ala komapandena mololita, hi Apolo monani toYahudi i lali pomehoniꞌara i hinarona toaꞌ to woriꞌ. Ka Boo Mangkolehi,[27] io mampotongawa kohiYesuna Datu Topohompoꞌ to nodandi Pueꞌ Ala.