Read Rampi Suro 2 Bible Online

Suro 2 - Rampi bible

Suro 2

¹Hupaꞌmo tempo ando posusaꞌara toYahudi to rokokeneꞌi ando Pentakosta, lekiꞌ-lekiꞌna toaꞌ to mepoꞌohi pe hi Yesu morampuhi i haꞌanu peꞌohaꞌa.

²Hangkaꞌ-hangkaꞌ romo rohori moni ka laniꞌ, hibali parowo to makaja. Moni tiꞌo rohorimo lekiꞌna toaꞌ to i tambi porampuara.

³Hei pangkiꞌhi makiꞌna api to hibali lilaꞌ, menele hei mengkotoꞌu i iohi hori-hori.

⁴Uko tiꞌo, lekiꞌ-lekiꞌna to itoꞌohi nokuasaꞌihi Inohaꞌ Mangkolehi, hei mampemolukahi mololita i lali wiharo to molangkaꞌ-langkaꞌ to hawaꞌi tene robahaꞌ, motuntuni hapo to nopokonontokihi Inohaꞌ Mangkolehi hingkeꞌna ropowiharo.

⁵I tempo tiꞌo, woriꞌhi woꞌo toYahudi to meꞌohaꞌ i Yerusale ka humanele duniaꞌ. Lekiꞌ-lekiꞌna toaꞌ tiꞌo mengkoruꞌhi pe Pueꞌ Ala.

⁶Korohorina toaꞌ to woriꞌ loaꞌ to mewowoo hibali parowo hingkonia, nolouhi morampu hei helehi, alaꞌ pahorihi surona Pueꞌ Yesu mololita i wiharora toaꞌ to hupaꞌhi itoꞌo.

⁷Hokohi mpuꞌu hei ropohele, rotiꞌi, “Hapo to mewali hieꞌe? Hawaꞌireꞌi topowiharo tiꞌo lekiꞌ-lekiꞌra toGalilea?

⁸Mahamporeꞌi hinaꞌ tohorihi mololita i wiharonta hori-hori?

⁹Alaꞌ uwaꞌki to ka woiꞌ Patia, Media, Elam, ka Mesopotamia, Yudea hante ka Kapadokia. Uwaꞌ woꞌo to ka Pontu hante ka Asia,

¹⁰ka Perigia hante ka Pampilia, ka Masiri hei ka woiꞌ Libia to dodungku i kota Kirene. Uwaꞌhi woꞌo to hupaꞌ ka kota Roma.

¹¹Hantenaꞌ toYahudi, hei uwaꞌhi woꞌo toaꞌ ntaniꞌna to mekahi i agama Yahudi. Uwaꞌhi to hupaꞌ ka woiꞌ Kereta hante ka woiꞌ Arab. Tohori lekiꞌ-lekiꞌta lolitare hante wiharonta hori-hori to mampololita tandaꞌ kuasaꞌ to nowali Pueꞌ Ala.”

¹²Hokohi hei wulihi lekiꞌ-lekiꞌra, hei mometenei-teneihi haduo hei haduo, rotiꞌi, “Haporeꞌi palaihane hieꞌe?”

¹³Angkana uwaꞌhi woꞌo to mokokereꞌi, rotiꞌi, “Nolanuhi anggoroꞌ to wolaꞌ!”

¹⁴Katoꞌo hi Peturuꞌ metotiꞌimo moꞌawa hante awana to hampuluꞌ isaꞌ, mololita nopokodeꞌ, notiꞌi, “Halali-halali toYahudi, hei ingkei to meꞌohaꞌ i Yerusale! Ipehoromuakei moromiꞌ, alaꞌ hapo to mewali hieꞌe, hingkiꞌ kupokonontokikei.

¹⁵Hinewowoꞌena, hawaꞌka nolanu hibali to itiꞌikei. Hinewowoꞌena handoaꞌi tene tempo maꞌinu alaꞌ hongkoꞌ tenteꞌ hio mehoꞌolu.

¹⁶Angkana hapo to mewali hieꞌe mampobuhoꞌi pohawaꞌna Pueꞌ Ala to nopowute nabi Yoel hampiha[3] to noꞌukiꞌ waheꞌe:

¹⁷Notiꞌi Pueꞌ Ala: ‘Ikohingkiꞌ tutuna duniaꞌ, hingkiꞌ mepaꞌaniꞌA InohaꞌKu pe lekiꞌ-lekiꞌna toaꞌ. Anaꞌmi tomaꞌani hante anaꞌmi towoweꞌe hingkiꞌ mampowutehi lolitangKu. Anaꞌntomaꞌani hingkiꞌ pangkiꞌ hapo to Kutidoꞌkihi. Tomotodimi hingkiꞌ mepototuruhi noniuꞌ pototuru to Kupaꞌanikihi.

¹⁸Wute-wute i surongKu, tomaꞌani ba towoweꞌe, hingkiꞌ Kupaꞌanikihi InohaꞌKu i ando tiꞌo, hei iohi hingkiꞌ mampowute lolitangKu to hingkiꞌ mewali.

¹⁹Hingkiꞌ kutidoꞌkikei tandaꞌ to mepohele i laniꞌ hei tandaꞌ kuasaꞌ i duniaꞌ, hibali raꞌa hante api hei oroꞌ to makamba.

²⁰Ando hingkiꞌ mewali mokorindi, hei wula hingkiꞌ mewali momeaꞌ hibali raꞌa, ikohandoaꞌana tene hupaꞌ ando pebutusine Pueꞌ to kodeꞌ hante to mewanta.

²¹I tempo tiꞌo, hihimolu to medodoeꞌ pe Pueꞌ hingkiꞌ niposalamaꞌ.’ ” [4]

²²Nopololiumo hi Peturuꞌ lolitane notiꞌi, “Halalingku toSareili! Ipehoromuakei hapo to kutiꞌikikei hieꞌe. To kutungkai iomo hi Yesu toNasareꞌ. Iomo to Noꞌuwiꞌ hei nopokonontomo umbiꞌ Pueꞌ Ala mewali topajamaNa to mangkolehi, hei tiꞌo mombaha i ingkei. Nokomi kuasaꞌna Pueꞌ Ala, Pueꞌ Yesu mowali woriꞌ tandaꞌ kuasaꞌ hei tandaꞌ to mepohele i lumbumi, hei ibahaꞌkei lekiꞌna tiꞌo.

²³Hi Yesu tiꞌo nipeserakaki pe ingkei, hei ingkei mampeserakaki pe toaꞌ to kodake waliana hingkeꞌna nipakuꞌI i loti momehulepe. Angkana to mewali tiꞌo, bateꞌna motuntuni hapo to nopokonontomo umbiꞌ Pueꞌ Ala, alaꞌ nobahaꞌ Pueꞌ Ala hapo to hangangaa hingkiꞌ mewali. Ingkei to morokoꞌ hi Yesu,

²⁴angkana Pueꞌ Ala to mampotuwuꞌ huliꞌ, hei mampohinte wotaNa ka kuasaꞌ komahia, alaꞌ hawaꞌi mpuꞌu wadi nokuasaꞌi nturusi komahia.

²⁵Uwaꞌmo lolitane datu Daudi hampiha noniuꞌ hi Yesu to mantiꞌi: ‘Kuꞌokiꞌ, bateꞌna Pueꞌ to mampoꞌowoniꞌA. Hawaꞌi uwaꞌ to Kukotehuꞌ, alaꞌ Pueꞌ to mosulungiꞌA.

²⁶Iomo hinaꞌ motanaꞌ lalingKa, hei KupokodeꞌKo, Pueꞌ. Mohinaruꞌa pe Ingko.

²⁷Alaꞌ hawaꞌi hingkiꞌ Nopotodehi inohaꞌKu meꞌohaꞌ i peꞌohaꞌa to mahi, wotangKu hawaꞌi hingkiꞌ Nopotodehi i lali petowua wute morere, alaꞌ Akumo ToaꞌMa to Mangkolehi.

²⁸Itidoꞌkimoꞌa lala ngkotuwuꞌ. Hingkiꞌ makaja mpuꞌu komotanaꞌKa i tempoKu uwaꞌ moꞌawa hante Ingko.’” [5]

²⁹Katoꞌo nopoliumo hi Peturuꞌ lolitane notiꞌi, “Halali-halali, kutiꞌikikei kotuꞌuana, handoꞌio wotana hadoduona to notungkai hi Daudi i lolitana tiꞌo, alaꞌ umoꞌta, hi Daudi mahimo hei nitawu. Petowuana tobahaꞌ tene wute hinewowoꞌena.

³⁰Hi Daudi tiꞌo, haduo nabi to pobahaꞌ umbiꞌ hapo to hingkiꞌ nowali Pueꞌ Ala. Nobahaꞌ koꞌuwaꞌne dandine Pueꞌ Ala i io to mantiꞌi: haduo ka pemuleꞌamu hingkiꞌ Kuhini, Kupopahura mewali datu. Mewaliꞌ, iomo hinaꞌ hi Daudi mampopebahaꞌ umbiꞌ kotuwuꞌna huliꞌ Datu Topohompoꞌ, notiꞌi Io hawaꞌi nipotedehi i peꞌohaꞌa to mahi, hei wotaNa hawaꞌi nipotedehi i lali petowua wute morere.

³¹

³²Hi Yesumo to notungkai hi Daudi i lolitana tiꞌo, alaꞌ Iomo to Nopotuwuꞌ huliꞌ Pueꞌ Ala. Ingka hieꞌe mewali sabiꞌNa, alaꞌ kiꞌokiꞌ mata kotuwuꞌNe huliꞌ.

³³Pueꞌ Ala mohinimo hi Yesu Nopopahura i pahura to teꞌadaꞌi tinaꞌ i kuanaNa. Katoꞌo Pueꞌ Ala Umoꞌta mampaꞌaniꞌi hi Yesu Inohaꞌ Mangkolehi hibali to Nodandi. Mewaliꞌ to iꞌokiꞌkei hei to ihorimokei hingkonia, mewali alaꞌ kuasaꞌna Inohaꞌ Mangkolehi to nopaꞌanikika hi Yesu.

³⁴Mewaliꞌ halali-halali, handoꞌio mpuꞌu wotana hadoduona to notungkai hi Daudi i lolitana. Alaꞌ handoꞌio hi Daudi to tuwuꞌ huliꞌ hei mengkaꞌoreꞌ nolou pe suruga. Angkana notiꞌi hi Daudi, Pueꞌ Ala mampatiꞌikiꞌi Pueꞌku, ‘mahuramoKo tinaꞌ i kuanangKu,

³⁵wute Kupopengkoruꞌhi lekiꞌ-lekiꞌna poniꞌMu pe Ingko.’ ” [6]

³⁶Katoꞌo, nopotutumo hi Peturuꞌ lolitane notiꞌi, “Iomo hinaꞌ ingkei toSareili hangangaa ipokonontokei i lalimi hapo to kutiꞌi hieꞌe: hi Yesu to ipakukei i loti momehulepe, Iomo to noꞌuwiꞌ Pueꞌ Ala mewali Pueꞌta hante Datu Topohompoꞌ.”

³⁷Korohorina toaꞌ to woriꞌ lolitane hi Peturuꞌ tiꞌo, nohohoꞌmo nindira, hei meꞌitanohi pe hi Peturuꞌ hei pe surona Pueꞌ Yesu to ntaniꞌna, rotiꞌi, “Ane watoꞌoꞌi, hapomo to hangangaa kiwali?”

³⁸Mehoniꞌ hi Peturuꞌ, “Hangangaa mengkatobaꞌkei ka dosami, hei hangangaa niriukei i lali konaꞌna Yesu Kerisitu. Ane ipetuntuikei lekiꞌne tiꞌo, Pueꞌ Ala hingkiꞌ moꞌampuni dosami, hei hingkiꞌ pahuakei Inohaꞌ Mangkolehi.

³⁹Alaꞌ dandina Pueꞌ Ala hieꞌe nipaꞌanikiki, hante pe pemuleꞌanta wute-wute i toaꞌ ntaniꞌna to moꞌela woiꞌra. DandiNa hieꞌe, bateꞌna mewali dolaꞌra lekiꞌ-lekiꞌna toaꞌ to nowowoi Pueꞌ Ala Pueꞌta, mewali toaꞌNa.”

⁴⁰Handoꞌio tiꞌolu to notiꞌi hi Peturuꞌ, angkana woriꞌ tene to nololita. Io mampoturuꞌ toaꞌ to woriꞌ hei nopokaꞌingaꞌikihi, notiꞌi, “Mengkatobaꞌmokei! Inioꞌkei motuntuni toaꞌ to kodake to tuwuꞌhi i tempo hinewowoꞌena, hingkeꞌna hawaꞌkei pahua pehukuna Pueꞌ Ala to hingkiꞌ morumpahi!”

⁴¹Woriꞌ toaꞌ to mepoꞌohimo i lolitana hi Peturuꞌ, horiana mampoperiumohi woꞌo. I ando tiꞌo, koworiꞌna toaꞌ to mepoꞌohi pe hi Yesu tetambaimo kira-kira 3.000 duo.

⁴²Uko tiꞌo, woriꞌ toaꞌ to hongkoꞌ mepoꞌohi pe hi Yesu poko mampehoromuahi nturusi pepoturuꞌna surona Pueꞌ Yesu, hei moꞌawa-awahi nturusi. Poko mangkahi moꞌawa-awa, hei modolaꞌ-dolaꞌhi roti alaꞌ pekolowoira pe Pueꞌ Yesu, hante mekokaehi.

⁴³Surona Pueꞌ Yesu mowalihi woriꞌ tandaꞌ kuasaꞌ to mepohele. Iomo hinaꞌ toaꞌ to woriꞌ hokohi mpuꞌu.

⁴⁴Mohintuwuꞌmohi lekiꞌ-lekiꞌra to mepoꞌohi pe hi Yesu. Parewara ropakeꞌ moꞌawa-awa.

⁴⁵Uwaꞌhi i lumbura to mampobaluꞌ lumara, hei hilina rodolaꞌ-dolaꞌ pe hangko awara to hawaꞌi nokoꞌuwaꞌi hingkeꞌna ropopehiliꞌi woꞌo koparaluara hori-hori.

⁴⁶Ando-ando morampuhi i Tambina Pueꞌ Ala. Modolaꞌ-dolaꞌhi roti nokomi pekolowoira pe Pueꞌ Yesu, hei mangkahi moꞌawa-awa i tambira i lali komotanaꞌ-tanaꞌ motuntuni kopopuhiꞌna lalira.

⁴⁷Mampokodeꞌhi nturusi Pueꞌ Ala, hei nopomotanaꞌhi lekiꞌ-lekiꞌna toaꞌ. Ando-ando kotetambai-mbaihahi, alaꞌ pedeꞌ notambai Pueꞌ Ala toaꞌ to Noposalamaꞌ.