Read Rampi Suro 20 Bible Online

Suro 20 - Rampi bible

Suro 20

¹Koꞌukora mosisalaꞌ i Epesu, hi Paulu morampumo toaꞌ to mepoꞌohi pe hi Yesu hei mampokaroho lalira. Uko tiꞌo, mesabiꞌmo hei nopololiumo patengkaꞌne nolou pe woiꞌ Makedonia.

²I patengkaꞌana tiꞌo, io moweoꞌi tosarani, hei nopowutemo lolita hingkeꞌna maroho lalire. Uko katoꞌo, nolou womo pe woiꞌ Akaia, woiꞌna toYunani,

³hei meꞌohaꞌ itoꞌo tolu mbula komoruene. Liumo tolu mbula tiꞌo, nokodokoꞌi mehendeꞌ i kapalaꞌ tahiꞌ molai nolou pe woiꞌ Siria. Angkana uwaꞌ kareba to nohori kohingkiꞌ norokoꞌna toYahudi. Iomo horiana notiꞌi laline hi Paulu, “Aginamo mahuliꞌa moliu i woiꞌ Makedonia.” Katoꞌo, noloumo mpuꞌu pe Makedonia.

⁴I patengkaꞌana tiꞌo, uwaꞌ woꞌo haꞌumbora duo awana to nolouhi hiꞌoꞌalu hante io. Konaꞌra: hi Sopate anaꞌna hi Peru to ka Berea, hi Aritaku hei hi Sekundu to ka Tesalonika, hei hi Gaiu to ka Derbe. Uwaꞌ woꞌo hi Timotius, hi Tikiku hante hi Toropimu, lekiꞌ-lekiꞌra to Asia.

⁵Ka woiꞌ Makedonia, medulumohi ka ingka hei ropekauka i kota Troas.

⁶Liumo ando ngkodeꞌre toYahudi to nitiꞌi Posusaꞌ Roti to hawaꞌi niragi, mehendeꞌ womoka i kapalaꞌ tahiꞌ mampolihi kota Pilipi. Tutumo limo ando, mohidupaꞌka huliꞌ hante awangki i Troas, hei itoꞌo meꞌohaꞌka haminggu komoruene.

⁷Winina i ando Minggu, morampumoka moꞌawa-awa hante halali hampepoꞌohingki i Troas, mangkaka roti i pangkolowoingki komahina Pueꞌ Yesu. Hi Paulu mepoturuꞌ wute morue wini, alaꞌ poꞌonina hingkiꞌ molaimo.

⁸Tambi porampuangki tiꞌo dingkaoꞌ, hei morampuka i kamaraꞌ to i womboꞌ mpololeke. Woriꞌ huluꞌ rotutu.

⁹I porampuangki tiꞌo, uwaꞌ haduo anaꞌntomaꞌani to nikokeneꞌi hi Eutiku. Io mahura i salewaꞌ. Salewaꞌ tiꞌo kotolu huntuna ka woiꞌ. Kolentuꞌana hi Paulu mololita, ngkololeꞌomo anaꞌntomaꞌani tiꞌo wute leꞌo, iomo horiana hibantuliꞌ, monawuꞌ pe woiꞌ. Katoꞌo mengkohouhi awane ako mohiniꞌi, hantaro mahimo.

¹⁰Katoꞌo hi Paulu mengkohoumo woꞌo ka tambi ako motumpopoꞌi anaꞌntomaꞌani tiꞌo, hei nokopui notiꞌi, “inioꞌkei morokaꞌ. Io tuwuꞌlu tene.”

¹¹Uko tiꞌo, mehendeꞌmo huliꞌ hi Paulu nolou pe womboꞌ mokebiꞌ-kebiꞌ roti, hante mangkahi moꞌawa-awa. Mololita womo hi Paulu wute ando, honiꞌiwae molai.

¹²Anaꞌntomaꞌani to monawuꞌ hingkenia tuwuꞌmo, hei rokomimo nolou pe tambina. Motanaꞌhi awane hei moromiꞌmo lalire.

¹³Medulumoka mehendeꞌ i kapalaꞌ tahiꞌ nolou pe kota Aso, hingkeꞌna kipohidupaꞌkiꞌi hi Paulu itoꞌo. Io to nopokononto umbiꞌ hi Paulu, alaꞌ nokodokoꞌi matengkaꞌ nolou pe Aso.

¹⁴Mohidupaꞌmoka mpuꞌu i Aso, hei mehendeꞌmo hi Paulu moꞌawa hante ingka nolou pe kota Mitilene.

¹⁵Uko katoꞌo, kipololiu womo patengkaꞌki, hei poꞌonina hupaꞌmoka i woiꞌ to momehanupe hante leowuta Kio. Ikonokoꞌondoina nolou womoka pe leowuta Samos, hei haꞌando katoꞌo hupaꞌmoka i kota Miletu.

¹⁶Hi Paulu mampokononto hampoliꞌmoka duluna holampi i kota Epesu hingkeꞌna hawaꞌka rahi morue i poropensi Asia. Nokodokoꞌi hingkeꞌna kihantouꞌ hupaꞌ i Yerusale kolentuꞌana handoaꞌi tene hupaꞌ ando ngkodeꞌ to nikokeneꞌi Pentakosta.

¹⁷Ka Miletu, hi Paulu morumbaꞌ haduo toaꞌ nolou pe Epesu, hingkeꞌna mampowuteꞌi kareba pe hawiꞌna Pueꞌ i jumaꞌa to uwaꞌ itoꞌo humeihi mampohidupaꞌki hi Paulu.

¹⁸Hupaꞌmohi i bolaꞌ Miletu, notiꞌikihi hi Paulu, “Halali-halali, ibahaꞌkei mpololeke hohumbo kotuwuꞌku i lumbumi. Mepongka ka uluꞌ-uluꞌna kohupaꞌku i poropensi Asia wute hinewowoꞌena,

¹⁹Mengkaꞌiwowoiꞌa i lali pajamangku i lumbumi. Hei woriꞌ mpihaꞌa meꞌola i tempoku mampopatengkaꞌ jamana Pueꞌ iseꞌe. Hei woriꞌ woꞌo komaporiꞌ to kuhua to rotungkai toYahudi to mangkodokoꞌi morokoꞌa.

²⁰Ibahaꞌkei, halali-halali, hawaꞌa morokaꞌ mampowutekikei hinangkana to modumbuꞌ i lali kotuwuꞌmi. Kupoturuꞌkei, halali-halali, moromiꞌ kolentuꞌami hirampu waheꞌe, moromiꞌ i tambimi.

²¹Kupaꞌingaꞌikei nturusi, moromiꞌ toYahudi, moromiꞌ toYunani, hingkeꞌna nohohoꞌkei ka dosami hei mepoꞌohikei pe Pueꞌta Pueꞌ Yesu.

²²Hinewowoꞌena hingkiꞌ nolouꞌa pe Yerusale motuntuni hawaꞌna Inohaꞌ Mangkolehi. Hawaꞌi tene kubahaꞌ hapo to hingkiꞌ mewali i wotangku itoꞌo.

²³Angkana kubahaꞌmo i lekiꞌ-lekiꞌna bolaꞌ ngkodeꞌ to kutengkaꞌimo, nopokononto Inohaꞌ Mangkolehi bateꞌku hingkiꞌ rohokiꞌ hei pahuaꞌa komaporiꞌ.

²⁴Kehapomo hatoꞌo, hawaꞌi mpuꞌu kupodangkeleꞌi tuwuꞌka, hingkeꞌna kupoꞌukoꞌi jama to nopoꞌohikiꞌa Pueꞌ Yesu. Pajamangku hieꞌe, mampowute kareba moromiꞌ to mampotongawa kopopuhiꞌna lalina Pueꞌ Ala i ingkiꞌ.

²⁵Io horiana, halali-halali, kuweohikei hampiha hei kupopebahaꞌmo pe ingkei noniuꞌ i poparentana Pueꞌ Ala. Angkana monontomo i lalingku, kotangkumo hingkiꞌ iꞌokiꞌkei.

²⁶Iomo horiana kupokonontomokikei umbiꞌ ando hieꞌe: ane uwaꞌkei to handoaꞌi pahua kotuwuꞌ to wolaꞌ, handoꞌiomo salaꞌku.

²⁷Alaꞌ hawaꞌa luleꞌ mampowutekikei lekiꞌ-lekiꞌna tungkaihana Pueꞌ Ala pe ingkei.

²⁸Moromiꞌ-romiꞌkei hingkeꞌna hawaꞌkei madosa, hei irewahikei moromiꞌ jumaꞌa to nopepoꞌohiki Inohaꞌ Mangkolehi, hibali haduo topolambaꞌ molambaꞌ gimbana. Hangangaa irewahikei jumaꞌa tiꞌo alaꞌ mewalimohi toaꞌna Pueꞌ Ala moliu i komahina AnaꞌNa.

²⁹Kubahaꞌ, halali-halali, ane molaiꞌa ka seꞌe, bateꞌna hingkiꞌ medongkaꞌhi toaꞌ to kodake to mampoperima-rimahi toaꞌ to ilambaꞌkei tiꞌo, hibali serigala mohokiꞌ gimba.

³⁰Majaga-jagakei, alaꞌ uwaꞌhi woꞌo toaꞌ i lumbunta to hingkiꞌ mampowuli toaꞌ to mepoꞌohi pe hi Yesu hingkeꞌna uwaꞌ aware mampetuntui lala to mepomonawuꞌ. Ikolowoikei, halali-halali, i lali tolu ntoꞌa, hawaꞌa meꞌohaꞌ-ohaꞌ mampoturuꞌkei haduo-haduo, moromiꞌ ando, moromiꞌ wini, hei woriꞌ mpihaꞌa mampeꞌolonikei.

³²Hinewowoꞌena, halali-halali, mekokaeꞌa pe Pueꞌ Ala hingkeꞌna Iolu to morewahikei. Kupaꞌanikei lolita hingkeꞌna mampetuntuikei nturusi pohawaꞌna Pueꞌ to mampokonontokiki kopopuhiꞌna laline Pueꞌ Ala i ingkiꞌ. Alaꞌ Pueꞌ Alalu to makuasaꞌ mampokaroho lalinta hei mampaꞌaniki pebarakati to Nopatimomomo umbiꞌ pe toaꞌ to Nopohohidamo mewali anaꞌNa to mangkolehi.

³³Hawaꞌi kukodokoꞌi lumane toaꞌ, hibali peraꞌ, bulawa ba baduꞌ.

³⁴Ibahaꞌmokei, halali-halali, aku majamaꞌa hante korawengku hadoduongku, hingkeꞌna kubiaꞌi mehili hinangkana koparaluangki moꞌawa-awa hante to metuntu aku.

³⁵I langkaꞌ-langkaꞌna tiꞌo, mewaliꞌa pandiri' i ingkei, hingkeꞌna ibahaꞌkei lala majama mosulungi awami to masusa. Ikolowoikei nturusi lolitane Pueꞌ Yesu to mantiꞌi, ‘Motanaꞌ tene toaꞌ to mepaꞌani hintina toaꞌ to mantorimo.’ ”

³⁶Koꞌukona hi Paulu mololita, melingkotuꞌmo moꞌawa-awa hante lekiꞌ-lekiꞌna awana to ka Epesu, honiꞌhi mekokae.

³⁷Meꞌolahi lekiꞌ-lekiꞌra mokopui hi Paulu, rohuliꞌ-huliꞌ moꞌumaꞌi.

³⁸To mampomasusa mpololeke lalira, lolitana hi Paulu to mantiꞌi hamboaꞌmo hingkiꞌ roꞌokiꞌ. Katoꞌo, hi Paulu rowona wute mehendeꞌ i kapalaꞌ tahiꞌ.