Read Rampi Suro 21 Bible Online

Suro 21 - Rampi bible

Suro 21

¹Koꞌukongkilu mesabiꞌ i tadulakora tosarani to ka kota Epesu, kipolihimohi itoꞌo hei mampololiumoka patengkaꞌki nolou pe woiꞌ Siria. Mehendeꞌmoka i kapalaꞌ tahiꞌ nolou pe leowuta Kos, hei poꞌonina hupaꞌka i leowuta Rodo. Katoꞌo loliumoka nolou pe bolaꞌ Patara.

²I Patara, pahuaka haꞌanu kapalaꞌ tahiꞌ to nolou pe Penisia i woiꞌ Siria. Katoꞌo mehendeꞌmoka i kapalaꞌ tahiꞌ tiꞌo mampololiu patengkaꞌki.

³I lumbu patengkaꞌki, kiꞌokiꞌ leowuta Siprus tinaꞌ i koiringki, angkana hawaꞌi morue katoꞌo, hupaꞌmoka i woiꞌ Siria. Mengkohoumoka ka kapalaꞌ tahiꞌ i kota Tiru, alaꞌ komiana kapalaꞌ hangangaa nipopengkohou.

⁴Itoꞌo moweohika tosarani hei meꞌohaꞌka moꞌawa-awa hante iohi haminggu. Nokomi perandana Inohaꞌ Mangkolehi, awangki i Tiru mepaha pe hi Paulu hingkeꞌna anioꞌ loliu nolou pe Yerusale.

⁵Angkana, hupaꞌmo tempone molai kapalaꞌ tahiꞌ, kipololiumo patengkaꞌki nolou pe Yerusale. Katoꞌo lekiꞌ-lekiꞌna awangki hei hantambira hante anaꞌra mampoꞌowonika nolou pe howali kota. I bota ntahiꞌ, melingkotuꞌka moꞌawa-awa honiꞌi mekokaeka.

⁶Koꞌukongkilu mekokae, mesabiꞌmoka, hei mehendeꞌmoka pe lali kapalaꞌ tahiꞌ, hei to nolouhi mewona mahuliꞌmohi pe tambira.

⁷Ka Tiru, loliumoka wute i kota Petolemai. Itoꞌo moweohika halali hampepoꞌohingki hei kipometabeꞌkihi. Haminimoka moꞌawa-awa hante iohi.

⁸Nokoꞌondoina, molai womoka nolou pe kota Kaisarea. Itoꞌo meꞌohaꞌka i tambina hi Pilipu. Hi Pilipu tiꞌo haduo to mampowute Kareba Moromiꞌ, hei io woꞌo haduo ka toaꞌ to pitu to niꞌuwiꞌ i Yerusale hampiha to nipoꞌohi, modolaꞌ-dolaꞌ kopongkona pe to merima-rima.

⁹Uwaꞌ iba duo anaꞌne towoweꞌe to handoaꞌi tene momaꞌani. Lekiꞌ-lekiꞌra mewalihi nabina tosarani.

¹⁰Haꞌumbora andomoka i tambina hi Pilipu, hupaꞌmo haduo nabina tosarani ka Yudea. Konaꞌna hi Agabu.

¹¹Io humei moroa salupiꞌna hi Paulu. Salupiꞌ tiꞌo nopopohiluꞌ kapuꞌna hei korawena hadoduona. Uko tiꞌo, notiꞌimo hi Agabu tiꞌo, “Hieꞌemo lolitane Inohaꞌ Mangkolehi: tumpuna salupiꞌ hieꞌe hingkiꞌ rohokiꞌ toYahudi i Yerusale. Io hingkiꞌ nipewei pe toaꞌ to handoꞌiohi toYahudi.”

¹²Kokihorina hatoꞌo, ingka hante awangki i Kaisarea, kiperapiꞌ woꞌo pe hi Paulu hingkeꞌna inioꞌ nololiu nolou pe Yerusale.

¹³Angkana nohoniꞌluka notiꞌi, “Mahamporeꞌi horiana meꞌolakei? Inioꞌkei mampomoledeꞌ lalingku! Kehapoꞌa nihiluꞌ ba nirokoꞌ nokomi petuntuku pe Pueꞌ Yesu, bateꞌna nolouꞌa pe Yerusale.”

¹⁴Nokomi kohawaꞌna mampehoromua peꞌopingki, iomo horiana hamboaꞌmo kiꞌopi. Kitiꞌi romo, “Peleihanalu Pueꞌ to mewali.”

¹⁵Uko tiꞌo, mampatimomomoka komiangki honiꞌi molaika nolou pe Yerusale.

¹⁶Haꞌumbora duohi halali hampepoꞌohingki ka Kaisarea nolouhi mampoꞌowonika wute-wute i tambi peꞌohaꞌangki i Yerusale. Tambi peꞌohaꞌangki tiꞌo iomo tambina haduo toSiprus to moruemo mepoꞌohi pe hi Yesu. Konaꞌna toaꞌ tiꞌo hi Manaso.

¹⁷Kohupaꞌki i Yerusale, halali hampepoꞌohingki motorimoka moromiꞌ hei motanaꞌ lalire.

¹⁸Kopoꞌonina noloumoka hiꞌoꞌalu hante hi Paulu moweoꞌi hi Yakobus, tadulakora tosarani i Yerusale. Lekiꞌ-lekiꞌna tadulako ntaniꞌna hirampuhi woꞌo moꞌawa-awa hante hi Yakobus.

¹⁹Koꞌukongkilu mometabeꞌ, hi Paulu mampowute lekiꞌ-lekiꞌna to nowali Pueꞌ Ala i kolentuꞌana mampowute Kareba Moromiꞌ pe toaꞌ to handoꞌiohi toYahudi.

²⁰Korohorinalu tadulakona tosarani lolitane hi Paulu, mampokodeꞌmohi Pueꞌ Ala. Uko katoꞌo, mampowutemohi lolita hieꞌe pe hi Paulu, rotiꞌi, “Naꞌ bee halali, hingkeꞌna ibahaꞌi, i sabunamo halalinte toYahudi to mepoꞌohi pe hi Yesu. Hantaro iohi tiꞌo, lekiꞌ-lekiꞌra mampetuntuimohi mpuꞌu hawaꞌna hi Musa hante tuꞌu-tuꞌu.

²¹Pahorimohi woꞌo kareba to mosalaꞌiko. Rotiꞌi, ipaturuꞌhi toYahudi to meꞌohaꞌ i bolaꞌna toaꞌ to handoꞌiohi toYahudi hingkeꞌna hamboaꞌmohi mampetuntui hawaꞌna hi Musa. Rotiꞌi, ipoturuꞌhi hingkeꞌna inioꞌhi mobulabaꞌ anaꞌra hei inioꞌhi mampetuntui adaꞌra tododulunta hampiha.

²²Hade hohumbomo? Alaꞌ bateꞌna hingkiꞌ rohori kohupaꞌma iseꞌe.

²³Aginamo ipetuntui hapo to kitiꞌi hieꞌe: uwaꞌhi iseꞌe iba duo awangki to ukomo modandi pe Pueꞌ Ala.

²⁴Io horiana hangangaa nolouko moꞌawa-awa hante iohi pe Tambina Pueꞌ Ala mampomangkolehi wotamu motuntuni adaꞌ agamanta. Hei hangangaa ibaiari doiꞌ popenombare hingkeꞌna hohumbohi mogundi wilolura motuntuni dandira. Ane hatoꞌoꞌi, hingkiꞌ monontomo pe lekiꞌ-lekiꞌna toaꞌ kohawaꞌna tuꞌu kareba to rohori mosalaꞌiko. Alaꞌ ipetuntui woꞌo hawaꞌne hi Musa.

²⁵Tiꞌomo to kipetiꞌiki pe ingko, halali. Angkana toaꞌ to handoꞌiohi toYahudi to mepoꞌohi pe hi Yesu, ukomohi kipampakatuki suraꞌ mampowutekihi pobutusingki, ka lekiꞌ-lekiꞌna hawaꞌna hi Musa, hawaꞌ hieꞌelu to hangangaa topowutekihi: Inioꞌhi mangka pangka to ukomo nipopenomba pe lomoa, hei inioꞌhi woꞌo mangka raꞌa ba bauꞌ to handoaꞌi tene ropopesuwu raꞌane, hei hingkeꞌna inioꞌhi bantomaꞌania hante bantowoweꞌea hei inioꞌhi mebualosi.”

²⁶I poꞌonina hi Paulu noloumo moꞌawa-awa hante awana to iba duohi mampomangkolehihi wotara motuntuni adaꞌ agamara. Uko tiꞌo, mekahimohi pe lali Tambina Pueꞌ Ala mampowute pe tadulako mpenomba kohiwaꞌimbona hingkiꞌ tutu ando pampomangkolehi tiꞌo. Alaꞌ ane tutumoꞌi tempo pampomangkolehi tiꞌo, hi Paulu hante awana to iba duo tiꞌo hangangaa mekahi pe lali Tambina Pueꞌ Ala hei mangkomihi popenombara haduo-haduo.

²⁷Hingkiꞌ tutumo pitu ando to ropokononto, uwaꞌ haꞌumbora duohi toYahudi ka poropensi Asia to pangkiꞌ hi Paulu i Tambina Pueꞌ Ala. Mampomolahohi lalira toaꞌ to woriꞌ hingkeꞌna mohokiꞌhi hi Paulu.

²⁸Rotiꞌi, “Halali-halali toSaraeli! Humeimokei mampororuika! Hieꞌemo toaꞌ to i umbo-umbolu koꞌakoana mampowute pe lekiꞌ-lekiꞌna toaꞌ poturuꞌna moꞌewaki toYahudi, hei mosapuaka hawaꞌna hi Musa. Io mokokomaꞌi Tambina Pueꞌ Ala, alaꞌ mangkomiꞌi humei toaꞌ to handoꞌiohi toYahudi pe lali Tambina Pueꞌ Ala.”

²⁹Mololitahi hatoꞌo, alaꞌ hingkenia pangkiꞌhi hi Toropimu mobole hante hi Paulu i kota. Motuntuni pekirira, hi Toropimu to nokomi hi Paulu mekahi pe lali Tambina Pueꞌ Ala, hantaroreꞌi handoꞌio.[28] Hi Toropimu tiꞌo toEpesu, handoꞌio toYahudi.

³⁰Uko katoꞌo, metulimohi toaꞌ i humanele Yerusale, hei moloaꞌ-loaꞌmohi toaꞌ to woriꞌ nolou pe Tambina Pueꞌ Ala. Hi Paulu rohokiꞌmo hei roruiꞌ ka lali Tambina Pueꞌ Ala. Uko tiꞌo, wambaꞌ Tambina Pueꞌ Ala kaliuꞌ niwiti.

³¹Kolentuꞌara toaꞌ to woriꞌ hingkiꞌ morokoꞌ hi Paulu, uwaꞌ to nolou mampowute hapo to mewali pe tutuꞌ tadulako surodaduna toRoma. Rotiꞌi koꞌuwaꞌne posisalaꞌ ngkodeꞌ to mewali i humanele kota.

³²Katoꞌo tutuꞌ tadulako surodadu tiꞌo noloumo mangkomi haꞌumbora duo tadulako hei surodadura, kaliuꞌhi mehilai monontohi toaꞌ to woriꞌ tiꞌo. Koroꞌokinalu toaꞌ to woriꞌ kohupaꞌre surodadu, kaliuꞌhi meꞌohaꞌ mokondo hi Paulu.

³³Mepongka katoꞌo, tutuꞌ tadulako surodadu tiꞌo mohokiꞌ hi Paulu hei morumbaꞌ surodaduna morante koraweꞌna rombali. Uko tiꞌo, nopeꞌitanoki, “Himo toaꞌ hieꞌe? Hapo to nowali?”

³⁴Uwaꞌ to mehoniꞌ waheꞌe, uwaꞌhi woꞌo to mehoniꞌ watoꞌo. Alaꞌ kopetulira, hawaꞌi nobahaꞌ hapo to mewali itoꞌo. Iomo hinaꞌ tadulako surodadu morumbaꞌ surodaduna mangkomi hi Paulu nolou pe lali tambi surodadu, hingkeꞌna roparesaꞌi itoꞌo.

³⁵Kowuteralu i tukaꞌ tambira, koiꞌhi mpololeke toaꞌ to woriꞌ alaꞌ mangkodokoꞌihi morokoꞌ hi Paulu. Iomo horiana surodadu tiꞌo mokowaꞌhi hi Paulu.

³⁶Toaꞌ to woriꞌ metuntuhi nturusi, hei moloaꞌ-loaꞌhi, rotiꞌi, “Nirokoꞌmolu!”

³⁷Hingkiꞌ mekahimohi pe lali tambina surodadu, notiꞌi hi Paulu pe tutuꞌ tadulakona surodadu, “Ba wadiꞌa wokaia mampowute pe ingko hamokuꞌ romokuꞌ lolita?” Notiꞌi tutuꞌ tadulakona surodadu tiꞌo, “Ee! Ibahaꞌ worayae wiharo Yunani?

³⁸Ane hatoꞌoꞌi, ingko handoꞌioko toMasiri to mampomolaho lalira toaꞌ to woriꞌ hei mangkomi iba sabu topeꞌewa nolou pe popada lori.”

³⁹Mehoniꞌ hi Paulu, “Aku hieꞌe to Yahudiꞌa ka Tasu, kota ngkodeꞌ to mokonaꞌ i woiꞌ Kilikia. Kuperapiꞌ hingkeꞌna ipaꞌaniꞌakei tempo mampowute lolitangku pe toaꞌ to woriꞌ hieꞌe.”

⁴⁰Katoꞌo, ropaꞌanimo tempo mololita. Iomo hinaꞌ metotiꞌimo hi Paulu i tukaꞌ mohini koraweꞌna pe toaꞌ to woriꞌ. Komonondiiꞌralu, honiꞌi nopemolukamo hi Paulu mololita i lali wiharo Yahudi.