Read Rampi Suro 22 Bible Online

Suro 22 - Rampi bible

Suro 22

¹Notiꞌi hi Paulu, “Umoꞌ-umoꞌ, halali-halali kuperapiꞌ, Ipehoromuaꞌakei! Hingkiꞌ mololitaꞌa hante to totuꞌuna.”

²Korohorinalu toaꞌ to woriꞌ hi Paulu mololita i lali wiharora, monondiiꞌhi. Katoꞌo nopololiumo hi Paulu lolitane notiꞌi,

³“Aku hieꞌe to Yahudiꞌa. Bolaꞌ konipoꞌanaꞌangkiku, i Tasu i woiꞌ Kilikia, angkana ka kokokiuꞌangku tene, meꞌohaꞌmoꞌa i hieꞌe i Yerusale. Mosikolaꞌa iseꞌe, nopaguruꞌa moromiꞌ haduo guru to niꞌadaꞌi mpololeke. Konaꞌna hi Gamalie. Io mampoturuꞌa lekiꞌ-lekiꞌna hawaꞌ to nopaꞌaniki hi Musa i tododulunta hampiha. Modotoꞌa mpololeke mampetuntui lekiꞌ-lekiꞌna aturana Pueꞌ Ala, hibali woꞌo ingkei.

⁴Hampiha kupoperima-rimahi toaꞌ to mampetuntui poturuꞌne hi Yesu. Uwaꞌ to kurokoꞌo. Uwaꞌhi woꞌo to kuhokiꞌ hei to kutarungkuꞌ, moromiꞌ tomaꞌani moromiꞌ towoweꞌe.

⁵Tadulako Mpenomba ngkodeꞌ hei lekiꞌ-lekiꞌna tadulako agama, robahaꞌ komaniuꞌne lolitangku hieꞌe. Hawaꞌa mowuti, alaꞌ hampiha iomohi to mampaꞌaniꞌa suraꞌ kuasaꞌ to mampoliuꞌa nolou pe halalinta toYahudi i kota Damasi. Alaꞌ tungkaihana suraꞌ tiꞌo horiana nolouꞌa pe Damasi, ako mohokiꞌ tosarani to uwaꞌ itoꞌo, hei kukomihi pe Yerusale hingkeꞌna nihukuhi.”

⁶I ando patengkaꞌangku, pasi pohoꞌando dodungku i kota Damasi, hangkaꞌ-hangkaꞌ romo uwaꞌ to mewanta ka laniꞌ to motuleliꞌiꞌa.

⁷Modungkaꞌa, hei pahoriꞌa loaꞌ to mantiꞌi, “Saulu, Saulu, mahamporeꞌi hinaꞌ ipoperima-rimaꞌA?”

⁸Katoꞌo meꞌitanoꞌa, “Himoko, Pueꞌ?” Nohoniꞌa, “Akumola hi Yesu toNasareꞌ to ipoperima-rima.”

⁹Awangku pangkiꞌhi woꞌo to mewanta tiꞌo, angkana hawaꞌi uwaꞌ loaꞌ to rohori.

¹⁰Uko tiꞌo, Kutiꞌi, “Pueꞌ, hapo to hangangaa kuwali?” Nohoniꞌa Pueꞌ, “Meꞌaromoko hei nolouko pe kota Damasi. Itoꞌo hingkiꞌ nipowutekiko lekiꞌ-lekiꞌna hapo to Nokodokoꞌi Pueꞌ Ala hingkiꞌ iwali.”

¹¹Alaꞌ wanta to hingkenia, mampomokorindi peꞌoꞌelengku. Iomo horiana rorandaꞌa awangku wute i kota Damasi.

¹²I Damasi, uwaꞌ haduo tomaꞌani to nikokeneꞌi hi Anania. Io toaꞌ to mononto, hei maroho petuntune i hawaꞌna hi Musa. Io roꞌadaꞌi lekiꞌ-lekiꞌna toYahudi to meꞌohaꞌ i Damasi.

¹³Humeimo hi Anania metotiꞌi i hiringku, notiꞌi, “Halalingku Saulu, pangkiꞌmoko huliꞌ!” I tempo tiꞌo woꞌo, pangkiꞌmoꞌa mpuꞌu, hei hi Anania kuꞌokiꞌmo.

¹⁴Uko tiꞌo notiꞌi womo hi Anania, “Pueꞌ Ala to ropenombai tododulunta hampiha moꞌuwiꞌko hingkeꞌna ibahaꞌi hapo peleihaNe. Noꞌuwiꞌko hingkeꞌna iꞌokiꞌi hi Yesu, surona Pueꞌ Ala to moromiꞌ, hei hingkeꞌna ihoriꞌi loaꞌna hi Yesu

¹⁵Ingkomo to hingkiꞌ mewali sabiꞌNe hingkeꞌna ipowutekihi pe lekiꞌ-lekiꞌna toaꞌ hapo to iꞌokiꞌi hei to ihorimo noniuꞌ Aku.

¹⁶Mewaliꞌ, hapo tene to ipekauno? Metotiꞌimoko hei noloumoko niriu. Mekokaemoko pe Pueꞌ Yesu hingkeꞌna dosamu Noꞌampunikiko.”

¹⁷“Katoꞌo, mahuliꞌmoꞌa humei pe Yerusale, hei kolentuꞌangku mekokae i tambina Pueꞌ Ala, kuꞌokiꞌmo halangkaꞌ peponoꞌokiꞌi.

¹⁸Kuꞌokiꞌ Pueꞌ Yesu, Nopantiꞌikiꞌa, ‘Hohiꞌmoko molai ka Yerusale, alaꞌ tumpu bolaꞌ Yerusale hawaꞌhi mantorimo hapo to ipowutekihi noniuꞌ Aku.’

¹⁹Mehoniꞌa: ‘Pueꞌ, robahaꞌlu waliangka hampiha. Robahaꞌlu hohumbo pekahingka pe tambi penombaha mohokiꞌ hei mokondo-kondohi toaꞌ to mepoꞌohi pe Ingko.

²⁰Hatoꞌo woꞌo, i tempona sabiꞌMu hi Stepanu rorokoꞌ, uwaꞌa woꞌo itoꞌo hei kupotanaꞌ kororokoꞌne. Akumo to mampoꞌodaꞌ baduꞌre to merorokoꞌ.’

²¹Uko tiꞌo, Pueꞌ mampatiꞌikiꞌa womo, ‘Hangangaa molaiko, alaꞌ Kurumbaꞌko nolou pe woiꞌ to moꞌela, pe toaꞌ to handoꞌiohi toYahudi.’ ”

²²Mondiiꞌhi toaꞌ to woriꞌ mampehoromua hi Paulu mololita. Angkana konotiꞌina hingkiꞌ nolou pe toaꞌ to handoꞌiohi toYahudi, moloaꞌ-loaꞌmohi ropokobue rotiꞌi, “Nirokoꞌmolu! Hawaꞌi uwaꞌ dumbuꞌne tuwuꞌ!”

²³Moloaꞌ-loaꞌmohi hei mampelubaꞌhi kumbara. Mampehoworihi awu pe raoha nokomi kobukotara.

²⁴Iomo horiana tutuꞌ tadulakona surodadu tiꞌo morumbaꞌmo surodaduna mangkomi hi Paulu mekahi pe lali tambina surodadu Roma, hingkeꞌna kolentuꞌana roparesaꞌ rokondo woꞌo hingkeꞌna robahaꞌi pongkane hapo to ropokoiꞌkihi toYahudi.

²⁵Dongkaꞌmohi itoꞌo, rohiluꞌmo hi Paulu hingkeꞌna rokohiaꞌi uko tiꞌo, mololitamo hi Paulu pe haduo tadulako surodadu to uwaꞌ i hirina, notiꞌi, “Wadireꞌi haduo toRoma nikohiaꞌ ane handoaꞌi tene niparesaꞌ hei nibutusi kara-karane?”[29]

²⁶Konohorina surodadu lolitane tiꞌo, noloumo pe tutuꞌ tadulakona surodadu mantiꞌi, “Tua, mahamporeꞌi hinaꞌ irumbaꞌka mokohiaꞌ toaꞌ tiꞌo? Toaꞌ tiꞌo iomo toRoma!”

²⁷Katoꞌo, tutuꞌ tadulakona surodadu tiꞌo nolou pe hi Paulu, nopeꞌitanoki, “Itiꞌikiꞌa, ba tuꞌu mpuꞌu to Romako?” Mehoniꞌ hi Paulu, “Tuꞌu mpololeke.”

²⁸Notiꞌi tutuꞌ tadulakone surodadu tiꞌo, “Masuliꞌ kokubaiarine i topoparenta, hingkeꞌna mewaliꞌa toRoma.” Mehoniꞌ Hi Paulu, “Angkana aku hieꞌe, mewaliꞌa toRoma mepongka ka konipoꞌanaꞌangkiku.”

²⁹Uko tiꞌo, surodadu to hingkiꞌ moparesaꞌ hi Paulu maꞌoruꞌmohi, hei morokaꞌmo woꞌo tutuꞌ tadulakone surodadu tiꞌo, alaꞌ io to morumbaꞌhi mohiluꞌ hi Paulu, hantarowae hi Paulu tiꞌo toRoma.

³⁰Tutuꞌ tadulako surodadu tiꞌo dokoꞌ pobahaꞌ ba hapo mpuꞌu salaꞌne hi Paulu horiana rosalaꞌi toYahudi. Iomo horiana poꞌonina, nowowoihi lekiꞌ-lekiꞌna tutuꞌ-tutuꞌ tadulako mpenomba hante Ampiꞌ-ampiꞌna Topotiko Atura Agama Yahudi ntaniꞌna hingkeꞌna morampuhi. Uko tiꞌo, hi Paulu nipasuwumo ka petarungkuꞌa hei rokomi nolou pe hinarora.