Read Rampi Suro 23 Bible Online

Suro 23 - Rampi bible

Suro 23

¹Kohupaꞌnalu hi Paulu i porampuara, io meꞌele pe Ampiꞌ-ampiꞌna Topotiko Atura Pepoꞌohi toYahudi nopantiꞌikihi, “Halalingku, wute hinewowoꞌena, mengkoruꞌa pe Pueꞌ Ala motuntuni kopopuhiꞌna lalingku.”

²Kolentuꞌana hi Paulu mololita hatoꞌo, Tadulako Mpenomba Ngkodeꞌ Anania morumbaꞌ toaꞌ to metotiꞌi i hirina hi Paulu hingkeꞌna motupaꞌ omeꞌna hi Paulu.

³Mehoniꞌ hi Paulu notiꞌi, “Pueꞌ Ala hingkiꞌ motampedaꞌko woꞌo, ingko moromiꞌ lolioluko! Ibutusi kara-karangka motuntuni hawaꞌna hi Musa, angkana ingko hadoduomu to molungkaꞌi mpololeke hawaꞌna hi Musa, alaꞌ irumbaꞌhi toaꞌ motampedaꞌa!”

⁴Uko katoꞌo, toaꞌ to i hirina hi Paulu mantiꞌi, “Wuraniko mpuꞌu mololita hatoꞌo pe Tadulako Mpenomba Ngkodeꞌ to majama i tambina Pueꞌ Ala!”

⁵Mehoniꞌ hi Paulu, “Halali-halali, hawaꞌi kubahaꞌ koꞌione Tadulako Mpenomba Ngkodeꞌ. Umbiꞌ uwaꞌmo mpuꞌu to teꞌukiꞌ i lali Suraꞌ Mangkolehi to mantiꞌi waheꞌe: ‘Anioꞌko mampokokeniꞌa tadulakomu.’ ”

⁶Nobahaꞌ hi Paulu, i lumbura tadulako tiꞌo, uwaꞌhi to mampetuntui poturuꞌra toSaduki, uwaꞌhi woꞌo to mampetuntui poturuꞌra toParisi. Io horiana mololitamo io pe lekiꞌ-lekiꞌna toaꞌ nopokobue i hinarona ampiꞌ-ampiꞌna topotiko atura Pepoꞌohi toYahudi notiꞌi, “Halali-halali! Aku hieꞌe toParisiꞌa, hei pemuleꞌnaꞌa woꞌo toParisi. Io horiana nihuroniꞌa i hieꞌe, alaꞌ kupoꞌohi, toaꞌ to mahi bateꞌna hingkiꞌ tuwuꞌ huliꞌ.”

⁷Korohorina toParisi hante toSaduki lolitane tiꞌo, momehoniꞌ-honiꞌmohi hei hamboaꞌmohi mohintuwuꞌ.

⁸To ropemehoniꞌi tiꞌo, alaꞌ toSaduki mosapuaka kotuwuꞌra huliꞌ toaꞌ to mahi, hei hawaꞌi ropoꞌohi koꞌuwaꞌna malaꞌeka, hei hawaꞌhi woꞌo ropoꞌohi koꞌuwaꞌna tanuanaꞌ. Angkana toParisi bateꞌra mampoꞌohi lekiꞌ-lekiꞌna tiꞌo.

⁹Koꞌukoana, makajamo posisalaꞌre. Uwaꞌ haꞌumbora duo guru agama to moꞌawa-awa hante toParisi metotiꞌihi hei mehoniꞌhi, rotiꞌi, “Motuntuni pahuangki, hawaꞌi uwaꞌ salaꞌne toaꞌ tiꞌo. Uwaꞌreꞌi malaꞌeka ba to mahi to mampololitakiꞌi?”

¹⁰Uko tiꞌo, makajamo pomehoniꞌ-honiꞌre, wute tadulakona surodadu tiꞌo motehuꞌ nioꞌ-nioꞌna intu hi Paulu rokondo ropemebiniꞌ-biniꞌi. Horiana norumbaꞌmo surodadune nolou moroa hi Paulu ka lumbura hei rokomimo huliꞌ pe peꞌohaꞌara surodadu.

¹¹I Korominina hi Paulu i peꞌohaꞌara tiꞌo, hangkaꞌ-hangkaꞌ romo Pueꞌ Yesu metotiꞌi i hirina hi Paulu, Notiꞌi, “Ipokaroho lalima. Hampiha ingko mampololita noniuꞌ Aku i Yerusale, hei hingkiꞌ mampololitako woꞌo noniuꞌ Aku i kota Roma.”

¹²Poꞌonina, haꞌumbora duo toYahudi morampuhi. Porampura tiꞌo, singkokoloꞌhi modandi, rotiꞌi handoaꞌhi tene hingkiꞌ mangka ba maꞌinu ane hi Paulu handoaꞌi rorokoꞌ.

¹³Koworiꞌra to singkokoloꞌ tiꞌo, iba mpuluꞌhi lobi.

¹⁴Katoꞌo, noloumohi pe tutuꞌ tadulako-tadulako mpenomba hei tomotodi-tomotodira toYahudi, rotiꞌi, “Modandimoka, hawaꞌka hingkiꞌ mangka ba maꞌinu ane handoaꞌi tene kirokoꞌ hi Paulu.

¹⁵Mewaliꞌ, kiperapiꞌ pe ingkei hei Ampiꞌ-ampiꞌ Topotiko Atura Pepoꞌohi toYahudi hingkeꞌna nipakatuꞌi suraꞌ nolou pe tadulako surodadu toRoma merapiꞌ hingkeꞌna hi Paulu rokomimo huliꞌ pe hinaromi, hantoniꞌ hingkiꞌ niparesaꞌ womo kara-karane. Hingkeꞌna i lumbu lala handoaꞌi hupaꞌ iseꞌe kirokoꞌmo.”

¹⁶Angkana pinoꞌanaꞌna hi Paulu pahori tungkaihara tiꞌo. Iomo horiana nohohiꞌimo nolou pe tambina surodadu mampowute poliwora pe hi Paulu.

¹⁷Uko tiꞌo, hi Paulu mowowoimo haduo tadulako surodadu, notiꞌiki, “Ipoꞌawa anaꞌ hieꞌe nolou pe tutuꞌ tadulakomi. Uwaꞌ to hingkiꞌ nopowute.”

¹⁸Surodadu tiꞌo mampoꞌawamo mpuꞌu anaꞌ tiꞌo nolou pe tutuꞌ tadulakona, notiꞌi, “Tua, hi Paulu to nitarungkuꞌ iseꞌe, merapiꞌ hingkeꞌna kukomiꞌi anaꞌ hieꞌe pe ingkiꞌ. Uwaꞌ to hingkiꞌ nopowutekiki.”

¹⁹Katoꞌo tutuꞌ tadulako surodadu tiꞌo motiko koraweꞌna anaꞌ tiꞌo, hei nokomi nolou pe polohu honiꞌi nopeꞌitanoki, “Hapo to hingkiꞌ itiꞌikiꞌa, anaꞌku?”

²⁰Mehoniꞌ anaꞌ tiꞌo, “Tua, uwaꞌhi toYahudi to morampu. Tungkaihara, hingkiꞌ mamperapiꞌ pe ingko hingkeꞌna poꞌoni pinoꞌumoꞌku rokomi pe hinarora tadulakona toYahudi, hantoniꞌ hingkiꞌ ropekoke womo kara-karane.

²¹Inioꞌ ipetuntui perapiꞌre, alaꞌ uwaꞌhi toaꞌ to iba mpuluꞌ lobi to mangongawu i lala. Modandihi hawaꞌhi mangka ba maꞌinu ane handoaꞌhi morokoꞌ pinoꞌumoꞌku. Timomohi, mampekau romohi balasiana wiharo ka ingko, Tua.”

²²Notiꞌi tutuꞌ tadulako surodadu tiꞌo, “Inioꞌ itiꞌi-tiꞌi ba pe hihimo koꞌipetiꞌikinemo tungkaihare tiꞌo pe aku.” Katoꞌo norumbaꞌmo oꞌanaꞌ tiꞌo molai.

²³Uko tiꞌo, tutuꞌ tadulako surodadu tiꞌo mowowoi roduo tadulako surodadu, hei notiꞌikihi, “Ipatimomomokei 200 surodadu biasa, hei 70 surodadu to menara, hei 200 surodadu to melaiꞌ. Hantudoꞌ wini tenteꞌ hio, noloumokei lekiꞌ-lekiꞌmi pe Kaisarea.

²⁴Ipatimomokei woꞌo nara to nopehendeꞌi hi Paulu, hei ikomikei wute salamaꞌ nolou pe gubenuruꞌ Peliꞌ.”

²⁵Uko tiꞌo, noꞌukiꞌmo tutuꞌ tadulako surodadu haꞌanu suraꞌ nolou pe gubenuruꞌ, to mantiꞌi waheꞌe:

²⁶“Gubenuruꞌ Peliꞌ to kuꞌadaꞌi. Tabea ka aku, hi Laudiu Lisia.

²⁷Toaꞌ to kupokatu hieꞌe to rohokiꞌ toYahudi hei hingkiꞌ rorokoꞌ. Angkana kuhori toaꞌ tiꞌo toRoma. Iomo horiana noloumoꞌa moꞌawa-awa hante surodadungku, ako moroaꞌi ka lumbura.

²⁸Nokomi kokukodokoꞌina pobahaꞌ hapo to roraiꞌkiꞌi, iomo horiana kukomi nolou pe hinarona Ampiꞌ-ampiꞌ Topotiko Atura Pepoꞌohi toYahudi.

²⁹Niparesaꞌmo, angkana hawaꞌi uwaꞌ salaꞌne to rohua hingkeꞌna rorokoꞌi ba rotarungkuꞌ. Rosalaꞌi noniuꞌ adaꞌ agamara.

³⁰Uko tiꞌo, kuhori koꞌuwaꞌne tungkaihara toYahudi to kodake pe io. Iomo horiana kupopekomi humei pe ingko Tua gubenuruꞌ. Hei kutiꞌikihi to moraiꞌi iseꞌe, hangangaa nolouhi mampowute i hinaromi.”

³¹Koꞌukona suraꞌ tiꞌo noꞌukiꞌ, surodadu-surodadu tiꞌo noloumohi mpuꞌu motuntuni hawaꞌna tutuꞌ tadulakora. Wini tiꞌo, hi Paulu rokomimo nolou pe kota Antipatris.

³²Poꞌonina, surodadu to matengkaꞌ mahuliꞌmohi nolou pe tambi porampuara surodadu. Angkana surodadu to menara mangkomihi hi Paulu loliu nolou pe kota Kaisarea.

³³Kowuteralu i Kaisarea, suraꞌ tiꞌo ropaꞌanikimo gubenuruꞌ, hei hi Paulu woꞌo ropeweimo pe gubenuruꞌ.

³⁴Koꞌukona gubenuruꞌ mobasa suraꞌ tiꞌo, nopeꞌitanokimo pe hi Paulu ba to ka hapoꞌi. Konobahaꞌnalu gubenuruꞌ hi Paulu to ka woiꞌ Kilikia,

³⁵notiꞌi, “Ane hatoꞌoꞌi, hingkiꞌ kuparesaꞌ mpuꞌu kara-karama ane mehupaꞌhi to morapoꞌko.” Uko tiꞌo, norumbaꞌmo surodadune mampoꞌodaꞌ hi Paulu i lali petarungkuꞌa i tambi ngkodeꞌ to noꞌaro Datu Herode hampiha.