Read Rampi Suro 24 Bible Online

Suro 24 - Rampi bible

Suro 24

¹Limo ando katoꞌo, Tadulako Mpenomba ngkodeꞌ Anania hante haꞌumbora duo tomotodi-tomotodi toYahudi nolou pe kota Kaisarea moꞌawa-awa hante haduo toaꞌ to mapande mololita, to nikokeneꞌi hi Terulusi. Kowuteralu itoꞌo, noloumohi pe hinarona gubenuruꞌ Peliꞌ mampowute peraiꞌra.

²Gubenuruꞌ Peliꞌ morumbaꞌ toaꞌ mangkomi hi Paulu pe hinarona, hei hi Terulusi nipaꞌani tempo mololita. Hi Terulusi mampemoluka mampowute peraiꞌra, notiꞌi, “Umoꞌki gubenuruꞌ Peliꞌ to kiꞌadaꞌi! Ingka, toaꞌmu to woriꞌ, tuwuꞌka alaꞌ komarohona poparentamu, gubenuruꞌ. Nokomi komapandemu moparenta, moromiꞌ kotuwuꞌki hinewowoꞌena i humanele woiꞌki.

³Lekiꞌ-lekiꞌna kitorimo hei moꞌawerasiꞌka mpololeke pe Tua gubenuruꞌ.

⁴Angkana, hingkeꞌna hawaꞌi woriꞌ tempoma marugiꞌ, kiperapiꞌ rima ka Tua hingkeꞌna ipehoromuaꞌi lolitangka to dodihu hieꞌe.

⁵Hi Paulu hieꞌe to poko mosalempori kotuwuꞌna toaꞌ i bolaꞌ-bolaꞌ. I umbo-umbolu koꞌakoana, io mampomolaho lalina toYahudi moꞌewa topoparenta. Hei Iomo haduo tadulakona toaꞌ to mampetuntui poturuꞌna hi Yesu toNasareꞌ.

⁶Pelumbuꞌna, io mangkodokoꞌi mokokomaꞌi Tambina Pueꞌ Ala. Iomo horiana kihokiꞌ. [Hampiha uwaꞌ tungkaihangki mohuroni kara-karana motuntuni lalana agamangki.

⁷Angkana tadulako surodadu Lisia hohiꞌ nolou moroaꞌi ka korawengki.

⁸Hei io morumbaꞌ hingkeꞌna himo to mosalaꞌiꞌi hangangaa humei pe tua gubenuruꞌ][30] io horiana, ane iparesaꞌi hantudoꞌ, hingkiꞌ ihori ka io kotuꞌuna lolitangki hieꞌe.”

⁹Lekiꞌ-lekiꞌna toYahudi to uwaꞌ itoꞌo, metuntuhi woꞌo mosalaꞌi hi Paulu hei mamponiuꞌhi lolitana hi Terulusi.

¹⁰Uko tiꞌo, gubenuruꞌ mampaꞌanimo koholangkoa pe hi Paulu mololita. Mololitamo hi Paulu, notiꞌi, “Motanaꞌa mpuꞌu, alaꞌ nipaꞌaniꞌa tempo mampowute komaniuꞌangku i hinarona Tua gubenuruꞌ. Alaꞌ kubahaꞌ, i toꞌanamo komoruene gubenuruꞌ mewali topebutusi i woiꞌki.

¹¹Wadilu ipomepaliꞌ. Hampuluꞌ roꞌando to liu, nolouꞌa pe Yerusale menomba i Tambina Pueꞌ Ala.

¹²Hawaꞌa hampiha rohua momehoniꞌ ba mampomolaho lalira toaꞌ to woriꞌ i Tambina Pueꞌ Ala ba i tambi penombaha, ba i imbolu i kota.

¹³Hawaꞌi woꞌo howeꞌ haduo toaꞌ to mampotongawa kotuꞌuna peraiꞌra to ropowute hingkenia to mosalaꞌiꞌa.

¹⁴Angkana hieꞌemo to kupangakuꞌ pe Tua, mampetuntuiꞌa poturuꞌna Pueꞌ Yesu to rosapuaka poniꞌku. Motuntuni poturuꞌ tiꞌo, menombaꞌa pe Pueꞌ Ala to ropenombai tododulungku hampiha, hei bateꞌna kupoꞌohi lekiꞌ-lekiꞌna to teꞌukiꞌ i lali hawaꞌna hi Musa hei suraꞌna Nabi-Nabi.

¹⁵Pepohinaruangku pe Pueꞌ Ala bateꞌna hibali hante pepohinaruara poniꞌku hieꞌe: kupoꞌohi kohingkiꞌ uwaꞌne tempo to nopokononto Pueꞌ Ala mampotuwuꞌ huliꞌ lekiꞌ-lekiꞌna to mahi, iomo to moromiꞌ waliara ba to kodake waliara.

¹⁶Iomo horiana magegaꞌa mowalia nturusi hapo to moromiꞌ hante lali to mononto i hinarona Pueꞌ Ala hei i hinarona toaꞌ.

¹⁷Hei haꞌumbora ntoꞌamoꞌa hawaꞌa nolou pe Yerusale. Uko tiꞌo nolouꞌa huliꞌ hingkeꞌna mangkomiꞌa doiꞌ pesulungi pe halalingku toYahudi hei mangkomiꞌa popenombangku pe Pueꞌ Ala.

¹⁸Kolentuꞌangku mangkomi popenombangku tiꞌo, hei ukomoꞌa mampomangkolehi motuntuni adaꞌ agamangki, haꞌumbora duo toYahudi pahuaꞌa i Tambina Pueꞌ Ala. I tempo tiꞌo, hawaꞌi woriꞌ toaꞌ to moꞌawa-awa hante aku, hei hawaꞌi woꞌo uwaꞌ pomehihoa.

¹⁹Angkana uwaꞌhi itoꞌo haꞌumbora duo toYahudi ka poropensi Asia. Kotuꞌuana, iohi wae to hangangaa humei mosalaꞌiꞌa i tua gubenuruꞌ, ane uwaꞌ mpuꞌu salaꞌka pe iohi.

²⁰[Angkana iohi hawaꞌhi uwaꞌ iseꞌe.] Mewaliꞌ, agina eponiꞌku to uwaꞌhi iseꞌe hinewowoꞌena mantiꞌi hapo salaꞌka to rohua i koroparesaꞌku hampiha i hinarona Ampiꞌ-ampiꞌ Topotiko Atura Pepoꞌohi toYahudi i Yerusale.

²¹Bateꞌna lolitangku hampiha to rosalaꞌikiꞌa, kutiꞌiki kupokobue, ‘Aku hieꞌe niparesaꞌa, alaꞌ kupoꞌohi toaꞌ to mahi bateꞌna hingkiꞌ tuwuꞌ huliꞌ.’ ”

²²Gubenuruꞌ Peliꞌ pobahaꞌ mpololeke hapo to ropoꞌohi tosarani noniuꞌ i poturuꞌna hi Yesu. Iomo hinaꞌ notiꞌi, “Ngkoraꞌmo i hieꞌe duluna pahura-hurante. Kubutusi romoꞌi kara-kara hieꞌe, ane mehupaꞌmoꞌi tutuꞌ tadulako surodadu hi Lisia.”

²³Uko tiꞌo, nopohawaꞌkimo tadulako surodadu mampoꞌodaꞌ hi Paulu. Angkana kehapoꞌi ropoꞌodaꞌ, hawaꞌi hibali toaꞌ to nitarungkuꞌ, hei awana ropoliu mampaꞌaniꞌi hapo to noparalu.

²⁴Haꞌumbora ando katoꞌo, hupaꞌmo gubenuruꞌ Peliꞌ hante hantambina, to nikokeneꞌi hi Dusila. Hi Dusila tiꞌo toYahudi. Norumbaꞌmo hi Peliꞌ surodadune mangkomi hi Paulu pe hinarora, hingkeꞌna mampehoromuahi hi Paulu mampowute noniuꞌ i pepoꞌohina pe Yesu Kerisitu.

²⁵Hi Paulu mololita pe hi Peliꞌ waheꞌe, ingkiꞌ hangangaa mononto waliante, hei hangangaa tobiaꞌ morii peleihane lalinta, alaꞌ hingkiꞌ hupaꞌ ando pehukune Pueꞌ Ala. Konohorinalu hi Peliꞌ lolita tiꞌo, motehuꞌmo horiana mantiꞌi, “Hatoꞌomo duluna! Noloumoko! Kuwowoiromoko hantudoꞌ, ane uwaꞌ koholangkoaku.”

²⁶Kotuꞌuana, nopohinaru hi Peliꞌ kohingkiꞌ nopaꞌanine hi Paulu doiꞌ hingkeꞌna ropolohoꞌi. Iomo horiana hi Paulu poko rowowoi mololita hante io.

²⁷Liumo rontoꞌa, hi Peliꞌ nopahawamo hi Pekiu Petusi mewali gubenuru. Nokomi konokodokoꞌina hi Peliꞌ moroa laline toYahudi, iomo horiana hi Paulu nipotedehi nturusi nitarungkuꞌ.