Read Rampi Suro 26 Bible Online

Suro 26 - Rampi bible

Suro 26

¹Uko tiꞌo, notiꞌi hi Agripa pe hi Paulu, “Hinewowoꞌena nipaꞌanimoko tempo mampowute komaniuꞌamu.” Hi Paulu mohinimo koraweꞌna, hei mampowutemo lolitana, notiꞌi,

²“Datu Agripa to kuadaꞌi! medulu kutiꞌi, morasiꞌa mpuꞌu alaꞌ nipaꞌaniꞌa koholangkoa mampowute lolitangku i hinarona Datu, mohoniꞌ lekiꞌ-lekiꞌna peraiꞌra toYahudi pe aku,

³hapo tene alaꞌ ibahaꞌluꞌi Datu, adaꞌra toYahudi hante poturuꞌ to ropemehoniꞌ-honiꞌi.[31] Iomo horiana kuperapiꞌ hingkeꞌna sabaraꞌki mampehoromua lolitangku.

⁴Lekiꞌ-lekiꞌna toYahudi pobahaꞌ kotuwuꞌku mepongka ka uluꞌ-uluꞌna, i kokokiuꞌangku tene i bolaꞌku, hei i tempoku meꞌohaꞌ i halalingkuhi i Yerusale.

⁵Moruemo toYahudi pobahaꞌ waliangku. Ane hiniꞌhi, rotunturakamo noniuꞌ kotuwuꞌka, aku hieꞌe tuwuꞌa motuntuni poturuꞌra toParisi to makaja potuntunire lekiꞌ-lekiꞌna adaꞌ agama toYahudi.

⁶Iomo horiana roparesaꞌa iseꞌe, nokomi pepohinarungku i dandina Pueꞌ Ala pe tododulunta hampiha.

⁷Dandina tiꞌo ropoꞌohi woꞌo lekiꞌ-lekiꞌna halalinta toYahudi to hampuluꞌ rontino to menombahi nturusi pe Pueꞌ Ala. Datu to kuadaꞌi, alaꞌ pepohinaruangku i dandi tiꞌo, iomo horiana rosalaꞌiꞌa toYahudihi.

⁸Hei ingkei lekiꞌ-lekiꞌmi, mahamporeꞌi hinaꞌ hawaꞌi ipoꞌohikei komakuasaꞌne Pueꞌ Ala mampotuwuꞌ huliꞌ to mahi?

⁹Hampiha moꞌewaꞌa nturusi lekiꞌ-lekiꞌna toaꞌ to metuntu pe hi Yesu toNasare.

¹⁰Hei tiꞌo kuwali mpololeke i Yerusale. I tempo tiꞌo, kutorimomo suraꞌ kuasaꞌ ka tutuꞌ-tutuꞌ tadulako mpenomba, horiana woriꞌ toaꞌne Pueꞌ Ala kupopetarungkuꞌ. Kulei woꞌo ane nihukuhi mahi.

¹¹Woriꞌ mpihahi kupoperima-rima i lali tambi penombaha, hei kuparukuhi mosapuaka pepoꞌohira pe hi Yesu. Koiꞌa mpololeke pangkiꞌhi. Io horiana nolouꞌa pe kota to moꞌela mampoperima-rimahi.”

¹²Katoꞌo nopololiu womo hi Paulu lolitane notiꞌi, “Io hinaꞌ nolouꞌa pe kota Damasi alaꞌ rorumbaꞌa hei nipaꞌaniꞌa kuasaꞌ ka tutuꞌ tadulako-tadulako mpenomba.

¹³Hei i lumbu lala kolentuꞌana pohoꞌando hangkaꞌ-hangkaꞌ romo kuꞌokiꞌ wanta ka laniꞌ to mewanta ka wantana ando. Wanta tiꞌo motuleliꞌika.

¹⁴Modungkaka lekiꞌ-lekiꞌki hei kuhori loaꞌ to mantiꞌi pe aku i lali wiharo Ibarani waheꞌe: ‘Saulu, Saulu, mahamporeꞌi hinaꞌ ipoperima-rimaꞌA? Hingkiꞌ maporiꞌko ane iꞌewaꞌi nturusi peleihangKa.’

¹⁵Kupeꞌitanoki, ‘HimoKoreꞌi Pueꞌ?’ Nohoniꞌa, ‘Akumola hi Yesu to ipoperima-rima!

¹⁶Peꞌaro hei metotiꞌimoko! Mampopemombahaꞌa wotangKu, alaꞌ uwaꞌ tungkaihangKa pe ingko, kuꞌuwiꞌmoko mewali topajamangKu hei sabiꞌKu. Hangangaa mampowuteko pe toaꞌ ntaniꞌna hapo to iꞌokiꞌmo i ando hieꞌe noniuꞌ i Aku, hei hapo to kuponoꞌokiꞌkiko i ando to hingkiꞌ medongkaꞌ.

¹⁷Hingkiꞌ Kuperoruiko ka toYahudihi hei ka toaꞌ to handoꞌiohi toYahudi. Kurumbaꞌko nolou mampowute pohawaꞌKu pe iohi.

¹⁸Kurumbaꞌko nolou hingkeꞌna tewuraꞌ matare toaꞌ to handoaꞌhi tene pobahaꞌA hingkeꞌna mepoꞌohihi, hei mampolihihi komokorindi mekahi pe komobaro hingkeꞌna himpolohoꞌhi ka kuasaꞌna Belisiꞌ hei nokuasaꞌihi Pueꞌ Ala. Kurumbaꞌko nolou hingkeꞌna dosara hingkiꞌ noꞌampuni Pueꞌ Ala hei hingkiꞌ mewalihi woꞌo toaꞌNa, to Noꞌuwiꞌmo.’”

¹⁹“Datu Agripa to kuꞌadaꞌi. Iomo hinaꞌ magegaꞌa hei tungkuꞌa pe hapo to notiꞌikiꞌa Pueꞌ i lali pampemombahaNa pe aku.

²⁰Iomo hinaꞌ kupowute pe lekiꞌ-lekiꞌna toaꞌ, hangangaa nohohoꞌhi ka dosara hei mengkoruꞌhi pe Pueꞌ Ala, hei hangangaa mowalihi hapo to moromiꞌ hingkeꞌna mombaha konohohoꞌre. Uluꞌ-uluꞌna kareba tiꞌo kupowute i kota Damasi, uko tiꞌo i Yerusale hei i humanele woiꞌ Yudea, hante pe toaꞌ ntaniꞌna to handoꞌiohi toYahudi.

²¹Iomo horiana rohokiꞌa toYahudi i Tambina Pueꞌ Ala hei rokodokoꞌi morokoꞌa.

²²Angkana kehapoꞌi hatoꞌo, wute hinewowoꞌena, Pueꞌ Ala mampodaꞌa, hei wadiꞌa tene metotiꞌi iseꞌe mololita noniuꞌ i Pueꞌ Yesu pe lekiꞌ-lekiꞌna toaꞌ, moromiꞌ pe toaꞌ to dingkaoꞌ tikoana, moromiꞌ pe toaꞌ biasa. Hapo to Kutiꞌi hieꞌe, bateꞌna hibali hante hapo to ropowutemo umbiꞌ hi Musa hante nabi-nabi hampiha,

²³to mantiꞌi, Datu Topohompoꞌ to nodandi Pueꞌ Ala hangangaa nipoperima-rima hei nirokoꞌ, hei Iomo to uluꞌ-uluꞌne hingkiꞌ tuwuꞌ huliꞌ ka komahia. Hei Iomo to hingkiꞌ mampowute komobaro iomo kareba kosalamaꞌa pe lekiꞌ-lekiꞌna toaꞌ, moromiꞌ toYahudi moromiꞌ to handoꞌiohi toYahudi.”

²⁴Kolentuꞌana tene hi Paulu mololita, notiꞌi hi Petusi nopokobue, “Magilako Paulu! Komapandemu tiꞌo to mangkomiko magila.”

²⁵Mehoniꞌ hi Paulu, “Gubenuruꞌ to kuadaꞌi hawaꞌa magila, Tuꞌu mpololeke lolitangka hieꞌe, hei kupasuwu hante pekiri to mononto.

²⁶Nobahaꞌ woꞌo Datu Agripa hapo to kutiꞌi hingkenia. Iomo horiana hawaꞌa motehuꞌ mololita hatoꞌo i hinarona. Kupekiri lekiꞌna tiꞌo nohorimo Datu Agripa, alaꞌ lekiꞌ-lekiꞌna hapo to mewali hawaꞌi uwaꞌ to tewuni.

²⁷Datu Agripa to kuadaꞌi! Ba ipoꞌohiꞌi hapo to rotiꞌi nabi-nabi hampiha? Kubahaꞌ ipoꞌohi!”

²⁸Mehoniꞌ Datu Agripa, “Ba pekirimu ane kupehoromuaꞌi hapo to ilolita tiꞌo, kaliuꞌa hingkiꞌ mewali toSarani?”

²⁹Mehoniꞌ hi Paulu, “Hohiꞌ ba morue, mekokaeꞌa pe Pueꞌ Ala hingkeꞌna Datu hei lekiꞌ-lekiꞌna toaꞌ to mampehoromua lolitangku ando hieꞌe hingkiꞌ mewali hibali aku, asala inioꞌkei hibali aku nihiluꞌ hante rante hibali to kuhua i petarungkuꞌa hieꞌe.”

³⁰Koꞌukoana, metotiꞌimohi Datu Agripa, gubenuruꞌ Petusi, hei hi Beanike, hante awara, mesuwuhi ka lali tambi porampuara.

³¹I howali, mololitahi haduo hei haduo, rotiꞌi, “Toaꞌ tiꞌo, hawaꞌi uwaꞌ salaꞌne to hintotoꞌ nitarungkuꞌkiꞌi ba nirokoꞌkiꞌi.”

³²Uko tiꞌo, notiꞌi Datu Agripa pe hi Petusi, “Kotuꞌuana, wadimo nipolohoꞌ, ane kehawaꞌi mampehoriki kara-karana pe Datu ngkodeꞌ.”