Read Rampi Suro 27 Bible Online

Suro 27 - Rampi bible

Suro 27

¹Uko tiꞌo, ropokonontomo hangangaa molaika mekapalaꞌ tahiꞌ nolou pe woiꞌ Italia. Hi Paulu hante haꞌumbora duo toaꞌ ntaniꞌna to nitarungkuꞌ nipeserakaki pe hi Yuliu, tadulako surodadu toRoma, ka Surodaduna Datu Ngkodeꞌ.

²Kapalaꞌ tahiꞌ to kipehendeꞌi, iomo haꞌanu kapalaꞌ tahiꞌ to kodeꞌ ka bolaꞌ Adaramitiu to ropatimomo ako monontohi bolaꞌ-bolaꞌ to i bota ntahiꞌ i poropensi Asia. Haduo awangki to metuntu i patengkaꞌangki iomo hi Aritaku, to ka kota Tesalonika i woiꞌ Makedonia.

³Kopoꞌonina holampimoka i kota Sido. Moromiꞌ mpuꞌu laline hi Yuliu pe hi Paulu, iomo horiana hi Paulu nopaꞌani tempo moweoꞌi awana i lali kota, hingkeꞌna hapo to noparaluꞌi nipaꞌaniki.

⁴Uko katoꞌo, kipololiumo patengkaꞌki. Alaꞌ komakajana parowo, iomo horiana kapalaꞌki mampebota dodungku i leowuta Siprus tinaꞌ i motoꞌando hingkeꞌna hawaꞌka noniuꞌ parowo to makaja.

⁵Uko tiꞌo, mengkalimbamoka i tahiꞌ to nohinoroi woiꞌ Kilikia hante Pampilia, wute mehupaꞌka i kota Mira i woiꞌ Likia.

⁶I Mira, tadulako surodadu pahua haꞌanu kapalaꞌ tahiꞌ ka kota Alesandaria to hingkiꞌ nolou pe woiꞌ Italia. Iomo horiana nopopengkaboliꞌka pe kapalaꞌ tahiꞌ tiꞌo.

⁷I lali haꞌumbora ando, maꞌeleꞌ patengkaꞌne kapalaꞌ tahiꞌ tiꞌo, hei hangkiuꞌ kehawaꞌka wute i kota Kinidu. Nokomi komakajana parowo ka hinarongki, hawaꞌi kipololiu patengkaꞌki pe tungkaihangki uluꞌna. Iomo horiana kapalaꞌki mampebotalu i leowuta Kreta moliu i wuntu Salamone, hingkeꞌna hawaꞌka noniuꞌ parowo.

⁸Masusa mpololeke patengkaꞌki mampebota i leowuta Kreta tiꞌo. Koꞌukoana, hupaꞌmoka i paweoha to nitiꞌi Paweoha Moromiꞌ, to dodungku i bolaꞌ Lasea.

⁹Alaꞌ komaꞌeleꞌna patengkaꞌki, hampakaꞌmo liu ando ngkodeꞌ posusaꞌara toYahudi, hei hingkiꞌ hupaꞌmo tempo mepoholeꞌ. [Biasana i tempo tiꞌo, lekiꞌ-lekiꞌna kapalaꞌ tahiꞌ meꞌohaꞌ alaꞌ hamboaꞌmo moromiꞌ ropatengkaꞌi i tahiꞌ.] Iomo horiana hi Paulu mampokolowoikihi, notiꞌi,

¹⁰“Halali-halali, motuntuni pahuangku, hingkiꞌ masusaki ane topololiuꞌi patengkaꞌte. Hingkiꞌ woriꞌ komarugiꞌnte. Hawaꞌi podo kapalaꞌlu hei komianta to marugiꞌo, angkana inohaꞌta woꞌo hingkiꞌ moholi.”

¹¹Angkana tadulako surodadu tiꞌo hawaꞌi mampoꞌohi lolitana hi Paulu, alaꞌ nopoꞌohi tene lolitare topangkomi hante tumpu kapalaꞌ tahiꞌ.

¹²Alaꞌ i paweoha tiꞌo hawaꞌi moromiꞌ nipeꞌohaꞌi mampekau koliuna tempo mepoholeꞌ, iomo hinaꞌ woriꞌ toaꞌ merapiꞌ hingkeꞌna hawaꞌhi rahi morue i paweoha tiꞌo alaꞌ hawaꞌi uwaꞌ to mohidaꞌi ka parawo. Katoꞌo kipehohongkeꞌ nolou pe bolaꞌ Peniꞌ. Tungkaihara hingkeꞌna mampekauka koliuna tempo mepoholeꞌ itoꞌo. I Peniꞌ tiꞌo iomo paweoha kapalaꞌ tahiꞌ to i woiꞌ Kreta to moromiꞌ nipaweohi i tempo mepoholeꞌ, alaꞌ tehidaꞌi hangkiuꞌ ka parowo.

¹³I tempo tiꞌo, moromiꞌ peparowone ka selata. Io horiana, motuntuni pahuara topajama i kapalaꞌ tahiꞌ, wadiluka mampololiu patengkaꞌki. Iomo hinaꞌ besi popotahana kapalaꞌ tahiꞌ[32] tiꞌo niꞌoreꞌmo, hei kapalaꞌki matengkaꞌ mampebota nturusi i leowuta Kreta.

¹⁴Angkana, handoaꞌi tene morue katoꞌo, meparowomo to makaja ka tinaꞌ motoꞌando. Iomo horiana nikokeneꞌi parowo Mata ando.

¹⁵Nokomi kohawaꞌna nobiaꞌ kapalaꞌ tahiꞌ mohinoroi parowo ngkodeꞌ, iomo horiana kipotedehi romo nopotio parowo.

¹⁶Poliungki i leowuta to kokiuꞌ to nikokeneꞌi Kauda, tehidaka hangkiuꞌ ka parowo. I tempo tiꞌo, kipasimuku mobiniꞌ haꞌanu duanga to kokiuꞌ to biasana roruiꞌ kapalaꞌ tahiꞌ, to nitiꞌi sekoci.

¹⁷Duanga to kokiuꞌ tiꞌo, kihinimo pe womboꞌna kapalaꞌ tahiꞌ hei kihiluꞌ maroho. Uko tiꞌo, kapalaꞌki rohiluꞌ hante koloroꞌ hingkeꞌna nomaroho. Morokaꞌhi topajama alaꞌ kapalaꞌ hingkiꞌ hiruntui i woꞌoni Sirti i koꞌohiana uwai to dodungku i woiꞌ Libia. Iomo horiana bambaruꞌna kapalaꞌki nipopengkohou hei ropotedehi noparowohi.

¹⁸Nokomi parowo ngkodeꞌ hei ura, iomo horiana poꞌonina mampelukamohi motube komiana kapalaꞌ pe lali tahiꞌ, hingkeꞌna nomonangkoꞌ.

¹⁹Kotolu andona womo, parewana kapalaꞌ ropelubaꞌ pe lali tahiꞌ.

²⁰Bahaꞌumbo andoꞌi, hawaꞌka pangkiꞌ wantana ando hante betueꞌ, hei hawaꞌi uwaꞌ kopodaꞌne ura. Horiana masusamo lalingki, hei kipekiri hingkiꞌ pahuaka komarugiꞌ.

²¹Alaꞌ koworiꞌna jamara i lali kapalaꞌ tahiꞌ, hawaꞌhi hampaka' mangka. Mepongka katoꞌo, metotiꞌimo hi Paulu i lumbura, pampatiꞌikihi, “Halali-halali, ane keꞌipoꞌohikei lolitangka hampiha hingkeꞌna inioꞌki molai ka Kreta, kehawaꞌki waheꞌe.

²²Angkana hinewowoꞌena kutiꞌikikei, ipokarohokei lalimi! Alaꞌ ka lumbunta hawaꞌi howeꞌ haduo to hingkiꞌ mahi. Bateꞌnalu kapalaꞌ tahiꞌ hieꞌe to hingkiꞌ marugiꞌo.

²³Alaꞌ hiwowini, Pueꞌ Ala to kupenombai hei to morewahiꞌa, morumbaꞌmo malaꞌekana pe aku.

²⁴Notiꞌi malaꞌeka tiꞌo waheꞌe, ‘Paulu, inioꞌko morokaꞌ. Alaꞌ hangangaa bateꞌmu nolou pe Datu ngkodeꞌ. Hei nokomi komarimana Pueꞌ Ala pe ingko, lekiꞌ-lekiꞌna toaꞌ i lali kapalaꞌ tahiꞌ hieꞌe hingkiꞌ salamaꞌhi woꞌo.’

²⁵Iomo hinaꞌ hangangaa ipokarohokei lalimi. Alaꞌ kupoꞌohi hapo to Notiꞌikiꞌa Pueꞌ Ala, bateꞌna hingkiꞌ mewali.

²⁶Angkana kapalaꞌ tahiꞌ hieꞌe monontomo kohingkiꞌ tetuhune i haꞌanu leowuta.”

²⁷Hampuluꞌ iba minimo, kapalaꞌki noparowohi nturusi parowo to makaja i tahiꞌ Adaria. Halumbu wini, topajamana kapalaꞌki pahorihi balumba mopalupaꞌ i botana. Robahaꞌmo kohawaꞌramo moꞌela ka lerina.

²⁸Iomo horiana haꞌanu watu popehukaꞌ roꞌulumo pe tahiꞌ hingkeꞌna robahaꞌi kokuladune. Kokuladuna tiꞌo, kira-kira iba mpuluꞌ meteꞌ. Uko tiꞌo, roꞌulu womo wute toꞌu, tolu mpuluꞌ meteꞌ romo kokuladune.

²⁹Motehuꞌmohi topajamane kapalaꞌki alaꞌ ropekiri hingkiꞌ moripoꞌka watu hante rangka. Iomo hinaꞌ iba onu besi popotaha roꞌulu pe lali uwai i tundu, hingkeꞌna notetaha kapalaꞌki, hei kikodokoꞌimo hingkeꞌna nohohiꞌ ando.

³⁰Mepongka katoꞌo, topajamahi i kapalaꞌki dokoꞌhi mehilai ngkawowuni ka kapalaꞌ. Hantoniꞌ nolouhi moꞌulu besi popotaha i tutuꞌ kapalaꞌ, hantaro mampopengkohouhi wora duanga to kokiuꞌ pe tahiꞌ.

³¹Angkana noꞌokiꞌ hi Paulu hapo to rowali tiꞌo, iomo horiana notiꞌikihi tadulako hante surodaduna, “Ane topajama tiꞌo mampolihi kapalaꞌ tahiꞌ hieꞌe, hawaꞌkei hingkiꞌ tuwuꞌ!”

³²Katoꞌo surodadu tiꞌo mopudiꞌmo pohiluꞌna duangara to kokiuꞌ, koꞌukoana duanga tiꞌo monawuꞌ pe tahiꞌ.

³³Hingkiꞌ meluamo ando, hi Paulu mantiꞌi, “Hangangaa mangkakei lekiꞌ-lekiꞌmi! Hampuluꞌmo iba ando ipekaukei hapo to hingkiꞌ mewali. Handoaꞌkei mangka hapo-hapo.

³⁴Iomo hinaꞌ kutiꞌikikei, hangangaa mangkakei duluna, hingkeꞌna marohokei. Alaꞌ hawaꞌkei hingkiꞌ mahampo-hampo, hingkiꞌ salamaꞌkei lekiꞌ-lekiꞌmi.”

³⁵Koꞌukona hi Paulu mololita hatoꞌo, moroamo depa hei mekokae moꞌawerasiꞌ pe Pueꞌ Ala i hinarona lekiꞌ-lekiꞌna toaꞌ. Depa tiꞌo nohepoꞌ katoꞌo noꞌoka.

³⁶Korohorina toaꞌ tiꞌo lolitane, marohomo huliꞌ lalire, honiꞌi mangkamohi woꞌo.

³⁷Lekiꞌ-lekiꞌna toaꞌ to uwaꞌ i lali kapalaꞌ tahiꞌ tiꞌo, koworiꞌra 276 duo.

³⁸Koꞌukora mangka wute wohu, mampelubaꞌ womohi gandum pe tahiꞌ. Tungkaihara, hingkeꞌna mononangkoꞌi kapalaꞌ tiꞌo.

³⁹I koborongkokahanalu, topajamana kapalaꞌ tahiꞌ pangkiꞌmohi lorina, angkana hawaꞌi robahaꞌ konaꞌne woiꞌ tiꞌo hei pangkiꞌmohi woꞌo tahiꞌ to notuleliꞌi woiꞌ, hei botana hawaꞌi mowatu-watu. Iomo horiana uwaꞌ tungkaihare hingkeꞌna ane hohumboꞌi, ropetuhuki kapalaꞌre i koꞌohiana.

⁴⁰Lekiꞌ-lekiꞌna koloroꞌ, besi popotaha ropudiꞌmo, hei besi popotahana tiꞌo ropotedehi i lali tahiꞌ. I tempo tiꞌo woꞌo, koloroꞌ to mohiluꞌ poweona kapalaꞌ tahiꞌ roꞌuweꞌmo, hingkeꞌna kapalaꞌ tahiꞌ hohumbo roweo. Bambaruꞌna kapalaꞌki rohoimo i hinarona hingkeꞌna monontomo patengkaꞌki nolou pe lorina.

⁴¹Angkana kapalaꞌki tetahamo i koꞌohiana, koꞌukoana lebaꞌmo. Tinaꞌ i lelona kapalaꞌki morutumo, nopolupaꞌ balumba tahiꞌ to kodeꞌ.

⁴²Tempo tiꞌo, uwaꞌ tungkaihare surodadu hingkiꞌ morokoꞌ lekiꞌ-lekiꞌna toaꞌ to nitarungkuꞌ to rokomi, hingkeꞌna hawaꞌhi uwaꞌ to meloluꞌu nolou pe lorina hei mehilai.

⁴³Angkana notahahi tadulakora, hingkeꞌna hi Paulu hawaꞌi ropoharokoꞌa. Iomo hinaꞌ norumbaꞌ toaꞌ to robahaꞌ meloluꞌu melihaꞌ medulu pe tahiꞌ hei meloluꞌu nolou pe lorina.

⁴⁴Uko tiꞌo, norumbaꞌmohi toaꞌ to hawaꞌi pobahaꞌ meloluꞌu moroa lobo ba kopiheꞌana kapalaꞌ tahiꞌ hingkeꞌna ropakeꞌi meloluꞌu nolou pe lorina. Iomo horiana lekiꞌ-lekiꞌra wutehi i lorina.