Read Rampi Suro 28 Bible Online

Suro 28 - Rampi bible

Suro 28

¹Kowutengki i lorina, honiꞌi kibahaꞌ konaꞌna leowuta tiꞌo iomo Malta.

²Moromiꞌ mpololeke lalire tumpu bolaꞌ to itoꞌo pe ingka. Rotorimoka moromiꞌ, ropopatuwuꞌkika api kipanirui, alaꞌ uraꞌi hei mepoholeꞌ.

³I tempo tiꞌo, hi Paulu nolou morampu loti hei nohompada i womboꞌ api. Kolentuꞌana modompuhi, mesuwu hambaꞌa ule ka lali loti, alaꞌ molahoꞌi nopedeꞌi api, liu mobingku koraweꞌna.

⁴Ikoroꞌokiꞌna tumpu bolaꞌ ule to medadingkiꞌ i koraweꞌna hi Paulu, ropantiꞌiki, “Toaꞌ tiꞌo to merorokoꞌ! Ele, kehapoꞌi hawaꞌi pahua kohorewuꞌ i tahiꞌ, angkana hawaꞌi nopotedehi Lomoa Topobutusi hingkiꞌ tuwuꞌ!”

⁵Angkana hawaꞌi molalo nohori hi Paulu. Nopetampirakilu ule tiꞌo pe lali api.

⁶Ropekiri tumpu bolaꞌ tiꞌo, hingkiꞌ bangkaꞌ intu korawene, ba modungkaꞌi mahi. Morue ropekau, hantaro hawaꞌi mahampo-hampo. Katoꞌo tewolihimo woꞌo pekirire, rotiꞌi, “Hi Paulu tiꞌo hibali lomoanta!”

⁷Hawaꞌi moꞌela katoꞌo, uwaꞌ halimboꞌ kineteꞌ. Kineteꞌ tiꞌo, kineteꞌna hi Publiu, gubenuruꞌ i woiꞌ tiꞌo. Alaꞌ komoromiꞌna laline, nowowoimoka nolou pe tambina, hei mewalika tolorina i lali tolu ando.

⁸I tempo tiꞌo, umoꞌna hi Publiu mohakiꞌ, hoholeꞌ hei molalo hinaꞌine. Iomo hinaꞌ toloumo hi Paulu hei mekahi pe koturuana, morama wotane, nopekokaeki, hei kaliuꞌ moꞌoriꞌ.

⁹Uko tiꞌo, lekiꞌ-lekiꞌna toaꞌ to mohakiꞌ i woi tiꞌo mehupaꞌhi merapiꞌ sulungi pe hi Paulu, hei lekiꞌ-lekiꞌra nopokoꞌoriꞌhi ka hakiꞌra.

¹⁰Nokomi peꞌadaꞌira, ropaꞌanika mampopengaa pepaꞌani. Hei i kopolaingki, ropatimomokika bakungki hei rokomi roporia i lali kapalaꞌ tahiꞌ.

¹¹Tolu mbulamoka i leowuta Malta, molai womoka mehendeꞌ i kapalaꞌ tahiꞌ to ka Alesandaria. Kapalaꞌ tahiꞌ tiꞌo moruemo meꞌohaꞌ i leowuta mampekau koliuna tempo mepoholeꞌ. Konaꞌna kapalaꞌ tahiꞌ tiꞌo, “Lomoa Moropaꞌ”.

¹²Holampimoka i kota Sirakusa, hei meꞌohaꞌka tolu ando itoꞌo.

¹³Uko katoꞌo, kipololiumo patengkaꞌki mampebota tahiꞌ wute i kota Regiu. Poꞌonina, parowo to moromiꞌ meparowo ka mbuhaꞌu, hei roꞌando katoꞌo mengkohoumoka ka kapalaꞌ tahiꞌ i kota Putioli i woiꞌ Italia.

¹⁴Itoꞌo kipohidupaꞌkihi haꞌumbora duo halali hampepoꞌohingki. Rowonaka nolou pe tambira hei mewalika tolorira i lali haminggu. Uko katoꞌo, matengkaꞌ womoka nolou pe Roma.

¹⁵Rohorimo hampepoꞌohingki kohingkiꞌ hupaꞌkio. Horiana akoka rodupaꞌ i Pahaꞌ Apiu hei i tambi to nikokeneꞌi Peꞌohaꞌa Tolu. I pohidupaꞌki tiꞌo, hi Paulu mampokodeꞌ Pueꞌ Ala, hei motanaꞌ laline.

¹⁶Kohupaꞌki i Roma, hi Paulu nipoliumo meꞌohaꞌ i tambina hadoduona, angkana nopoꞌodaꞌ nturusi haduo surodadu.

¹⁷Liumo tolu ando, hi Paulu mowowoimo tomotodi-tomotodira toYahudi hingkeꞌna nipohidupaꞌkiꞌi. Ikohupaꞌra, mololitamo hi Paulu, notiꞌi, “Halali-halali, hawaꞌikae uwaꞌ salaꞌka i halalinta toYahudi. Hawaꞌa woꞌo molungkaꞌi adaꞌna tododulunta. Angkana kehapoꞌi hatoꞌo, bateꞌku rohokiꞌa i Yerusale hei ropeweiꞌa pe kuasaꞌna topoparenta toRoma.

¹⁸Kara-karangku roparesaꞌ topoparenta Roma, hei keropohinteluꞌa, alaꞌ monontomo kohawaꞌne uwaꞌ salaꞌku to hintotoꞌ nirokoꞌkiꞌa.

¹⁹Angkana uwaꞌhi toYahudi ka Yudea to moꞌewaꞌa nturusi. Iomo horiana kuperapiꞌ hingkeꞌna nipaꞌaniꞌa tempo mampehoriki kara-karangku pe Datu ngkodeꞌ. Angkana kehapoꞌi hatoꞌo, hawaꞌi uwaꞌ to kusalaꞌikihi halalinta toYahudi.

²⁰Kuwowoikei humei mampohidupaꞌkiꞌa hei kukodokoꞌi kulolitakikei mahamporeꞌi hinaꞌ rohiluꞌa hante rante iseꞌe nokomi pepoꞌohingku pe Datu Topohompoꞌ to ropekau toSaraeli.”

²¹Mehoniꞌhi toYahudi rotiꞌi, “Hawaꞌi uwaꞌ suraꞌ to kitorimo ka Yudea to mampololita noniuꞌ ingko. Hei hawaꞌi woꞌo uwaꞌ haduo toaꞌ kanoꞌo to humei mampowute kareba ba mampololita waliamu.

²²Kilei mpololeke mampehoromua hohumbo pepoꞌohimu, alaꞌ kihori lolitare toaꞌ i umbo-umbolu to moꞌewa poturuꞌ to ipetuntui.”

²³Uko tiꞌo, ropokonontomo toYahudi tempo pohidupaꞌre hante hi Paulu. Wute i tempona to ropokononto, woriꞌ toaꞌ hirampu i peꞌohaꞌana hi Paulu. Mepongka mpihiꞌolu wute kononewa, hi Paulu mampowutekihi noniuꞌ i poparentana Pueꞌ Ala, hante mobasa ohi hawaꞌna hi Musa hante suraꞌna nabi-nabi, nopokonontokihi kohihimona hi Yesu hingkeꞌna mepoꞌohihi pe Io.

²⁴Uwaꞌhi to mampoꞌohi lolitana, uwaꞌhi woꞌo to hawaꞌi mampoꞌohi.

²⁵Nokomi posisalaꞌna pahuara, horiana molaimohi ka porampuara tiꞌo. Angkana handoaꞌhi tene mokaꞌa-kaꞌa, notiꞌikihi hi Paulu, “Tuꞌu mpuꞌu lolitane Inohaꞌ Mangkolehi to nopowute nabi Yesaia pe tododulunta hampiha to mantiꞌi waheꞌe:

²⁶Notiꞌi Pueꞌ Ala: Akohi itiꞌiki toYahudi waheꞌe: ‘Ihorilukei, angkana hawaꞌkei ibahaꞌ palaihane. Iꞌokiꞌlukei, angkana hawaꞌkei ibahaꞌ hapo to mewali.’

²⁷Alaꞌ morintodi lalire, tolinara rohihi hei matara ropidiꞌ, hingkeꞌna hawaꞌhi pangkiꞌ hante matara, hawaꞌhi hiniꞌ mampehoromua hante tolinara, hawaꞌhi hiniꞌ mangkoromiꞌi lalira. Koꞌukoana, hawaꞌhi hingkiꞌ mahuliꞌ pe Aku, hei hawaꞌhi hingkiꞌ Kupaꞌani kotuwuꞌ to wolaꞌ.” [33]

²⁸Uko tiꞌo, notiꞌi womo hi Paulu pe iohi, “Halali-halali, hingkeꞌna ibahaꞌkei, Hieꞌemo kareba moromiꞌ to nipowutemo pe toaꞌ to handoꞌiohi toYahudi. Iohi to hingkiꞌ mantorimo kareba tiꞌo!”

²⁹[Koꞌukona Hi Paulu mololita hatoꞌo, molaimohi toYahudi hei momehoniꞌ-honiꞌhi][34]

³⁰Uko tiꞌo, hi Paulu meꞌohaꞌ i Roma merontoꞌa komoruene i haꞌanu tambi to nobaiari. Motanaꞌ laline mohidupaꞌ hante toaꞌ to mehupaꞌ mokadodoroꞌiꞌi.

³¹Hawaꞌi uwaꞌ komotehuꞌne mampowute noniuꞌ i poparentana Pueꞌ Ala hei noniuꞌ i Pueꞌ Yesu Kerisitu, hei hawaꞌi uwaꞌ to mosalemporiꞌi.