Read Rampi Suro 3 Bible Online

Suro 3 - Rampi bible

Suro 3

¹I hampiha tempo, tenteꞌ tolu kononewa, hi Peturuꞌ hante hi Yohanes nolouhi pe Tambina Pueꞌ Ala, i tempora toYahudi mekokae.

²I wambaꞌ to rokokeneꞌi, “Wambaꞌ Manobaꞌ,” uwaꞌ haduo tomaꞌani to kohumo ka konipoꞌanaꞌkina. Ando-ando toaꞌ tiꞌo rokomi nolou mahura i wambaꞌ tiꞌo, hingkeꞌna merapiꞌ-rapiꞌi pe toaꞌ to mekahi pe Tambina Pueꞌ Ala.

³Ikopangkiꞌnalu hi Peturuꞌ hante hi Yohanes hingkiꞌ mekahi, liu-liu merapiꞌ-rapiꞌ pe iohi.

⁴Hi Peturuꞌ hante hi Yohanes mampenotoꞌ tokohu tiꞌo, honiꞌi notiꞌi hi Peturuꞌ pe io, “Eleꞌi humei!”

⁵Nopomoꞌoꞌelemo mpuꞌu nturusi, alaꞌ notiꞌiae hingkiꞌ nipaꞌaniꞌi doiꞌ.

⁶Angkana notiꞌi hi Peturuꞌ, “Hawaꞌi uwaꞌ bulawangki hante peraꞌki, angkana hieꞌelu to kipaꞌanikiko: i lali konaꞌna Yesu Kerisitu toNasareꞌ, matengkaꞌmoko!”

⁷Honiꞌi notiko korawe kuanane tokohu tiꞌo hei nopopetotiꞌi. Kaliuꞌ maroho kapuꞌne.

⁸Io melihaꞌ, metotiꞌi, honiꞌi matengkaꞌ nolou humei. Katoꞌo metuntumo pe hi Peturuꞌ hante hi Yohanes, mekahi i lali Tambina Pueꞌ Ala moꞌawa hante iohi, matengkaꞌ hei motaroꞌ-taroꞌ mampokodeꞌ Pueꞌ Ala.

⁹Woriꞌ toaꞌ pangkiꞌ io matengkaꞌmo hei mampokodeꞌ Pueꞌ Ala.

¹⁰Hokohi mpuꞌu toaꞌ to pangkiꞌ hapo to mewali tiꞌo, alaꞌ robahaꞌi toaꞌ tiꞌo iomo tokohu to merapiꞌ-rapiꞌlu rima ando-ando mahura i Wambaꞌ Manobaꞌ i Tambina Pueꞌ Ala.

¹¹Tokohu tiꞌo metuntumo nturusi pe hi Peturuꞌ hante pe hi Yohanes. Kohupaꞌra i tangkoꞌna Tambina Pueꞌ Ala to rokokeneꞌi Tangkoꞌ Salomo, woriꞌ toaꞌ to mehupaꞌ mampeꞌeleꞌi, alaꞌ ropoheleꞌi.

¹²Konoꞌokiꞌna hi Peturuꞌ toaꞌ to woriꞌ tiꞌo, nopantiꞌikihi, “Halalingku toSareili! Mahamporeꞌi hinaꞌ ipohokokei hapo to iꞌokiꞌkei hieꞌe? Mahamporeꞌi hinaꞌ ipomoꞌoꞌeleka hei ipenotoꞌka nturusi? Ba itiꞌikeireꞌi, toaꞌ hieꞌe matengkaꞌ alaꞌ uwaꞌ kuasaꞌki, ba komoromiꞌna lalingki? Hawaꞌi!

¹³Pueꞌ Ala to ropenombai uweꞌta hampiha, to ropenombai hi Burahima, hi Isaki hante hi Akoꞌ, Pueꞌ Ala tiꞌo to mampokodeꞌmo HawiꞌNa, iomo hi Yesu. Hi Yesu tiꞌo to nipewei pe to mepohawiꞌ, hei to nisapuakamo i hinarona hi Pilatu kehapoꞌi pahuana hi Pilatu Io hangangaa nipolohoꞌ.

¹⁴Io mangkolehi hei moromiꞌ laliNe, angkana iparukulukei hingkeꞌna hi Pilatu mampolohoꞌ pe ingkei haduo to merorokoꞌ.

¹⁵Hi Yesu tiꞌo to mepaꞌani kotuwuꞌ to wolaꞌ pe lekiꞌna toaꞌ. Kehapoꞌi watoꞌo bateꞌna irokoꞌlukei, angkana Pueꞌ Ala mampotuwuꞌI huliꞌ ka komahia. Ingka hieꞌe sabiꞌNa to pangkiꞌ kotuwuꞌna huliꞌ hi Yesu.

¹⁶Kuasaꞌna hi Yesu, iomo to mampokaroho kapuꞌna tokohu hieꞌe. Mewaliꞌ, hapo to mewali, iꞌokiꞌkei hante isobiꞌikei, tiꞌo mewali alaꞌ pepoꞌohingki pe kuasaꞌna hi Yesu. Iomo hinaꞌ toaꞌ tokohu hieꞌe moꞌoriꞌ.

¹⁷Halali-halali, kibahaꞌ hapo to iwalimokei hante tadulakomi pe hi Yesu. Iwalikei tiꞌo ala hawaꞌkei ibahaꞌ hapo palaihane.

¹⁸Angkana kehapoꞌi watoꞌo, ka walia to iwalikei tiꞌo, mampobuhoꞌimo hapo to notiꞌi Pueꞌ Ala hampiha to ropowute lekiꞌ-lekiꞌna nabiNa to mantiꞌi: Datu Topohompoꞌ hangangaa mampolala komaporiꞌ.

¹⁹Halali-halali, mengkatobaꞌmokei hei mahuliꞌmokei pe Pueꞌ Ala, hingkeꞌna dosami Noꞌampuni.

²⁰Hingkeꞌna Pueꞌ Ala mampaꞌanikei komaroho lali hei Io morumbaꞌ hi Yesu pe ingkei, alaꞌ Io to Nopokononto mewali Datu Topohompoꞌ.

²¹Pueꞌ Yesu uwaꞌ i suruga wute tempona Pueꞌ Ala mowali lekiꞌna mewali wolaꞌ hibali to notiꞌimo Pueꞌ Ala moliu i nabi-nabiNa to Norumbaꞌ i tempo hampiha.

²²Hampiha notiꞌi nabi Musa noniuꞌ Pueꞌ Yesu to mantiꞌi waheꞌe: ‘Pueꞌ Ala hingkiꞌ mohini haduo ka halalimi mewali nabi hibobali hante aku. Hangangaa ipetuntuikei hapo to notiꞌikikei nabi tiꞌo.

²³Himolu to hawaꞌi motuntuni hapo to notiꞌi nabi tiꞌo, io hingkiꞌ nipohohida ka lumbuna toaꞌna Pueꞌ Ala, hei nirokoꞌ.’ [7]

²⁴Nabi-nabi to hampiha to mampowutemo lolitana Pueꞌ Ala, mepongka ka nabi Semuel wute i nabi-nabi ntaniꞌna to mehuntuna, lekiꞌ-lekiꞌra mampowute hapo to mewali i tempo hinewowoꞌena.

²⁵Hampiha Pueꞌ Ala mantiꞌi pe hi Burahima waheꞌe: ‘Ka muleꞌmu, lekiꞌ-lekiꞌna hingkiꞌ pahua pebarakati.’ [8] Halali-halali, ingkei woꞌo pahuakei pebarakati tiꞌo to nodandimo Pueꞌ Ala pe tododulunta hampiha.

²⁶Iomo horiana Pueꞌ Ala moꞌuwiꞌ hi Yesu hawiꞌNa hei morumbaꞌ mehupaꞌ medulu pe ingkei hingkeꞌna Nobarakatikei hori-hori hingkeꞌna mengkatobaꞌkei ka kotuwuꞌmi to kodake.”